Ndi akanam emekere ke Bible idin̄wan̄ake fi, ke idinemke fi ndikot, mîdịghe ke enye okpon akaha? Ediwak owo ẹda ndikot Bible nte akamba utom. Edi nso ke afo edinam edieke ọfiọkde ke Bible ayanam okop inemesịt onyụn̄ anam uwem enen̄ede enem fi? Nso ke edinyụn̄ anam edieke ọfiọkde nte okpokotde Bible man enen̄ede enem fi? Ndi ayama ndikot Bible nse man ọfiọk nte enye ekemede ndin̄wam fi?

Kop se ndusụk mbon oro ẹkedide ẹdifiọk ufọn edikot Bible ẹtịn̄de mi.

Ezekiel emi edide n̄kpọ nte isua 22 ọdọhọ ete: “N̄kesidu uwem nte owo emi awatde moto edi inyeneke akpan itie emi enye akade. Edi ndikot Bible anam mfiọk nte n̄kpodude uwem. Nti item emi odude ke Bible an̄wam mi kpukpru usen.”

Frieda emi mîyọhọke isua 30 kan̄a ọdọhọ ete: “Mma nsifiop ibuot etieti. Edi ndikot Bible anam n̄keme ndimụm idem n̄kama ke ini owo anamde se iyatde mi. Emi anam mme owo ẹma ndidian idem ye ami, onyụn̄ anam nnyene ediwak ufan.”

Mma kiet emi ekerede Eunice onyụn̄ ebede isua 50 ọdọhọ ete: “Bible ke okpụhọde mi, enye ke anam ntre ndusụk edu oro mîfọnke.”

Mbon oro itịn̄de iban̄a mi ye ata ediwak owo eken ẹkụt ke ndikot Bible ekeme ndinam uwem enen̄ede enem owo. (Isaiah 48:17, 18) Ndusụk n̄kpọ oro Bible ekemede ndin̄wam owo anam edi (1) ndifiọk nte ẹkpebierede n̄kpọ, (2) ndifiọk nte ẹkpemekde nti ufan, (3) ndifiọk nte ẹkpeyọde mfịna, ye (4) ndifiọk se Bible etịn̄de aban̄a Abasi, ndien idụhe se ifọnde ntem. Abasi akanam ẹwet Bible, ntre owo emi anamde se Bible etịn̄de idisopke usụn̄. Abasi ikemeke ndinọ nnyịn idiọk item.

Akpan n̄kpọ edi ndikam ntọtọn̄ọ ndikot Bible. Edi nso ikeme ndinam emem fi utom nditọn̄ọ? Nso idinyụn̄ inam esinem fi ndikot Bible?

Didie ke ekpesikot Bible man enenem fi, man onyụn̄ enen̄ede adia ufọn? Se n̄kpọ ition emi an̄wamde ediwak owo mi.

Tie ke ebiet emi ọfọnde. Ke ini okotde Bible, yom ebiet emi uyom mîdụhe, kûnyụn̄ utie ke ebiet emi n̄kpọ editịmerede fi. Tie ke ebiet emi un̄wana odude ye ke ebiet emi ofụm editụkde fi.

Kere ban̄a nti n̄kpọ oro edikpepde. Sia edide Ete nnyịn eke heaven ọnọ nnyịn Bible, iyenen̄ede idia ufọn edieke inyịmede enye ada Bible ekpep nnyịn n̄kpọ nte emi ekpri eyen okpoyomde ete esie ekpep imọ n̄kpọ. Ntre, edieke enyenede idiọk ekikere aban̄a Bible, duọk utọ ekikere oro mbak uduyak nti n̄kpọ emi Abasi ekpekpepde fi atak fi.—Psalm 25:4.

Bọn̄ akam mbemiso ọtọn̄ọde. Bible edi ikọ Abasi, ntre Abasi edi nnennen owo emi edinamde Bible an̄wan̄a nnyịn. Abasi ọdọhọ ke imọ iyọnọ “mbon oro ẹben̄ede [imọ] edisana spirit.” (Luke 11:13) Edisana spirit Abasi ekeme ndinam Ikọ Abasi an̄wan̄a fi. Nte ini akade, enye ekeme ndinam ọfiọk mme n̄kpọ emi ọsọn̄de ndusụk owo ndifiọk ke Bible.—1 Corinth 2:10.

Kot ke usụn̄ emi edin̄wan̄ade fi. Kûyom ndida usen ifan̄ n̄kot Bible n̄kụre. Nen̄ede tie kere se okotde. Bụp idemfo utọ mbụme nte: ‘Nso utọ edu ke owo emi n̄kotde mban̄a mi ekenyene? Didie ke n̄keme ndinam se n̄kotde emi?’

Nyene akpan n̄kpọ emi oyomde ndikpep. Edieke oyomde ndinen̄ede ndia ufọn ke ini okotde Bible, biere mme akpan n̄kpọ emi oyomde ndikpep man anam fi odu eti uwem. Ke uwụtn̄kpọ, emekeme ndibiere ke iyom ndinen̄ede n̄kpep n̄kpọ mban̄a Abasi. Omonyụn̄ ekeme ndidọhọ ke iyom ndikpụhọde m̀mê ndidi eti ebe m̀mê n̄wan. Ekem, yom mme itie Bible emi ẹdin̄wamde fi anam mme n̄kpọ emi.a

N̄kpọ ition oro inemede mi ẹyen̄wam fi ọtọn̄ọ ndisikot Bible. Edi nso ke akpanam man se okotde enen̄ede enem fi? Ibuotikọ oro etienede eyetịn̄ se akpanamde.

Ndi esinenem fi ndikot Bible? Mîdịghe ndi esifefek fi? Ekeme ndidi etiene nte esikotde. Yak ineme se ekemede ndinam man esinen̄ede enem fi ndikot Bible.

Mek Bible emi ẹkabarede ọfọn. Edieke okotde n̄wed emi ọdọn̄ọde mme ikọ emi mîn̄wan̄ake fi, idinemke fi ndikot. Ntre, yom Bible emi ẹkabarede ke mmemmem usụn̄ man se okotde ọsọp an̄wan̄a fi. Edi kụt ete ke Bible emi okotde enen.a

Da kọmputa m̀mê fon kot. Mfịn, Bible odu ke nsio nsio usụn̄, idịghe ke n̄wed kpọt. Ẹkeme ndikot ndusụk Bible ke Intanet, ẹnyụn̄ ẹkeme ndision̄o ndusụk ndọn̄ ke kọmputa, fon, m̀mê tablet. Ndusụk Bible ẹnyene mme n̄kpọ emi ẹsinamde emem utom ndikụt mme itie Bible en̄wen oro ẹtịn̄de n̄kpọ ẹban̄a se ẹkotde oro m̀mê nte ẹkabarede ufan̄ikọ oro ke mme Bible en̄wen. Omonyụn̄ ekeme ndikpan̄ utọn̄ n̄kop Bible emi ẹkotde-kot ẹdọn̄ ke n̄kpọ. Ediwak owo ẹsima ndikpan̄ utọn̄ n̄kop nte ẹkotde Bible ke ini mmọ ẹsịnede ke moto, ẹyetde ọfọn̄, m̀mê ẹnamde n̄kpọ eken oro mînamke uyom. Mek enye emi ọfọnde ye afo.

Nyene mme n̄kpọ emi ẹdinamde se okotde an̄wan̄a fi. Enyene mme n̄kpọ emi ẹkemede ndinam se okotde ke Bible enen̄ede an̄wan̄a fi. Ke uwụtn̄kpọ, n̄wed emi mme map obio Bible ẹdude ẹkeme ndin̄wam fi ọfiọk mme itie emi mme obio oro okotde aban̄a ẹkedude. Ndusụk ibuotikọ, utọ nte mbon oro ẹdude ke magazine emi m̀mê mbon oro ẹdude ke “Se Bible Ekpepde” ke jw.org/efi ẹkeme ndin̄wam fi enen̄ede ọfiọk se Bible ekpepde.

Kot ke nsio nsio usụn̄. Edieke etiede nte edikakak fi nditọn̄ọ ke Genesis n̄kot nsịm Ediyarade, emekeme nditọn̄ọ ye n̄wed Bible emi amade akan. Edieke oyomde ndifiọk n̄kpọ mban̄a ndusụk mbon oro ẹtịn̄de ẹban̄a ke Bible, emekeme ndimek mme n̄wed Bible oro ẹtịn̄de n̄kpọ ẹban̄a mmọ. Ekebe oro “Kpep N̄kpọ Ban̄a Mbon Emi Ẹsiakde ke Bible” owụt usụn̄ iba oro ekemede ndimek ndikot Bible. Emekeme ndinyụn̄ mmek akpan n̄kpọ kiet oro oyomde ndikot mban̄a, mîdịghe okot nte n̄kpọ eketịbede ke adiana ke adiana. Usụn̄ ekededi ke otu emi osụk ọfọfọn ndida ntọn̄ọ ndikot Bible.

Bible itiehe nte mme n̄wed eken. Enye ke Andibot nnyịn ada eteme nnyịn nte ikpodude uwem. (2 Timothy 3:16) Enye ekeme ndinen̄ede n̄n̄wam nnyịn. Bible ke idemesie ọdọhọ ete: “Ikọ Abasi enyene uwem onyụn̄ enyene odudu.” (Mme Hebrew 4:12) Enye ekeme ndin̄wam nnyịn ke akpan usụn̄ iba emi: eteme nnyịn nte ikpodude uwem ke usen ke usen onyụn̄ anam ifiọk Abasi ye se enye aduakde ndinam nnọ nnyịn.—1 Timothy 4:8; James 4:8.

Anam ọfiọk nte okpodude uwem idahaemi. Bible ekeme ndin̄wam fi ke ata ediwak usụn̄. Ke uwụtn̄kpọ, enye etịn̄:

• Nte ikpanamde n̄kpọ ye kiet eken. —Ephesus 4:31, 32; 5:22, 25, 28, 33.

• Nte ikpetrede mme edu emi mîfọnke ye owo.—Psalm 37:8; Mme N̄ke 17:22.

• Nte ikpodude eti uwem.—1 Corinth 6:9, 10.

• Se ikpanamde man inyene se idiade.—Mme N̄ke 10:4; 28:19; Ephesus 4:28.a

Ebe ye n̄wan kiet ke Asia emi ẹkerede Vicent ye Annalou ẹma ẹdikụt ufọn nti item emi ẹdude ke Bible. Ke ini mmọ ẹkedọde ndọ obufa, ama esisọn̄ mmọ ndifiọk nte ẹkpenamde n̄kpọ ye kiet eken ye nte ẹkpenemede nneme ifụre ifụre. Edi mmọ ẹma ẹtọn̄ọ ndinam se mmọ ẹkekotde ke Bible. Didie ke emi akan̄wam mmọ? Vicent ọdọhọ ete: “Se n̄kokotde ke Bible ama anam ndiọn̄ọ nte n̄kpanamde n̄kpọ ye n̄wan mi idem ke ini mfịna odude. Ndidu uwem nte Bible ọdọhọde anam inen̄ede ikop inemesịt.” Annalou an̄wan esie ọdọhọ ete: “Ndikot nte ebe ye n̄wan ke Bible ẹkenamde n̄kpọ ye kiet eken enen̄ede an̄wam nnyịn. Mmenen̄ede n̄kop inemesịt idahaemi nnyụn̄ n̄kop inem ndọ nnyịn. Se ibierede ndinam enem mi n̄ko.”

Anam ọfiọk Abasi. Vicent etịn̄ n̄kpọ en̄wen emi Bible anamde ọnọ enye. Enye ọdọhọ ete: “Ndikot Bible anam n̄kpere Jehovah n̄kan nte n̄kesikperede.” Se Vicent etịn̄de emi owụt ke Bible ekeme ndinam ọfiọk Abasi. Edieke ọfiọkde Abasi, ayadia ufọn nti item emi enye adade Bible ọnọ fi oyonyụn̄ edi ufan esie. Oyokụt n̄ko ke Abasi anam mme owo ẹfiọk nti n̄kpọ emi enye aduakde ndinam ke ini iso, kpa ini emi ididude “ata uwem” ke nsinsi. (1 Timothy 6:19) Idụhe n̄wed en̄wen emi ekemede ndinam nnyịn ifiọk emi.

Edieke ọtọn̄ọde ndikot Bible onyụn̄ akade iso okot, afo n̄ko ọyọfiọk nte okpodude uwem idahaemi onyụn̄ ọfiọk Abasi. Edi, emekeme ndinyene ediwak mbụme nte osụk okotde Bible. Edieke enyenede mbụme, nam se owo Ethiopia emi okodude uwem n̄kpọ nte isua 2,000 emi ekebede, akanamde. Enye ama enyene ediwak mbụme ke ini okokotde Bible. Ke ini ẹkebụpde enye m̀mê se enye okotde an̄wan̄a enye, enye ọkọdọhọ ete: “N̄keme didie ndifiọk ke owo mîtemeke mi?”b Ndien enye ama enyịme Philip emi ekedide mbet Jesus, okonyụn̄ etịmde ọfiọk ndikpep owo Bible, anam se enye okokotde an̄wan̄a enye. (Utom 8:30, 31, 34) Kpasụk ntre, edieke oyomde owo edinam Bible enen̄ede an̄wan̄a fi, mbọk ka www.jw.org/efi kewet enyịn̄ ye adres fo nọ ẹsọk nnyịn, mîdịghe da kiet ke otu adres emi odude ke magazine emi wet nnyịn. Emekeme n̄ko ndinyene nneme ye Mme Ntiense Jehovah emi ẹdude ke edem mbufo. Mbọk tọn̄ọ ndikot Bible mfịn emi man okụt nte enye ekemede ndin̄wam fi.