Ndima Jehovah ye Se Enye Anamde Ọnọ Fi Ẹdinam Fi Ana Baptism

1-2. Utom 8:27-31, 35-38 owụt ke nso ikanam eunuch owo Ethiopia oro ana baptism?

NDI omoyom ndina baptism man edi mbet Christ? Ediwak owo ẹna baptism ẹdi mbet Christ ke ntak emi mmọ ẹmade Jehovah ye se enye anamde ọnọ mmọ. Yak ineme iban̄a owo ukara emi akanamde utom ọnọ ọbọn̄ an̄wan Ethiopia.

² Ndondo emi owo Ethiopia oro okokụtde ke N̄wed Abasi ọdọhọ yak owo ana baptism, enye ama anam ntre. (Kot Utom 8:27-31, 35-38.) Nso ikan̄wam enye? Enye ndikokot n̄wed Isaiah ini ẹsụk ẹwatde enye ke chariot owụt ke enye ikadaha Ikọ Abasi ibre mbre. Ndien ini Philip ekenemede Ikọ Abasi ye enye, enye ama enen̄ede owụt esịtekọm ke se Jesus akanamde ọnọ enye. Edi nso ikada enye ika Jerusalem? Ima emi enye akamade Jehovah akanam enye aka. Isan̄a didie idiọn̄ọ? Jehovah ke enye ọkọnyọn̄ ndikpono oro ke Jerusalem. Ọwọrọ enye ama ọkpọn̄ ido ukpono emi enye akamanade edidụk onyụn̄ etiene n̄kukụre idụt emi ẹkeyakde idem ẹnọ ata Abasi okpono Abasi. Kpa ima emi enye akamade Jehovah akanam enye anam ata akpan n̄kpọ efen, emi ekedide ndina baptism n̄kabade mbet Christ.—Matt. 28:19.

3. Nso ikeme ndikpan owo ndina baptism? (Se ekebe oro “Esịt Fo Ebiet Nso Utọ Isọn̄?”)

³ Ima emi afo amade Jehovah ekeme ndinam fi ana baptism. Edi ima onyụn̄ ekeme ndikpan fi ndina. Didie? Yak inọ fi uwụtn̄kpọ ifan̄. Emekeme ndinen̄ede mma mbon ubon mbufo ye mme ufan fo emi mîdịghe Mme Ntiense Jehovah tutu ndịk anam fi ke mmọ ẹyesua fi ama ana baptism. (Matt. 10:37) Emekeme ndinyụn̄ mma mme ido emi ọdiọn̄ọde ke Abasi asasua, ekeme ndinyụn̄ nsọn̄ fi nditre mmọ. (Ps. 97:10) Mîdịghe ekeme ndidi tọn̄ọ ke ekpri afo ama esitiene anam mme usọrọ emi ẹsan̄ade n̄kpọ ye nsunsu ido ukpono. Nte mme usọrọ oro ẹsinamde esịt enem fi ekeme ndinam ọsọn̄ fi nditre mmọ kpa ye emi mmọ mînemke Jehovah esịt. (1 Cor. 10:20, 21) Ntre ana obụp idemfo mbụme emi, “Anie ke mma n̄kan? Nso ke mma n̄kan?”

ENYE EMI IKPAMADE IKAN

4. Nso idi ata akpan ntak emi edinamde fi ana baptism?

⁴ Enyene ediwak nti n̄kpọ emi afo amade onyụn̄ ọkọmde Abasi aban̄a. Ke uwụtn̄kpọ, idem mbemiso afo ọkọtọn̄ọde ndikpep Bible ye Mme Ntiense Jehovah, ekeme ndidi afo ama enen̄ede ama Bible. Ekeme ndidi ama ọtọn̄ọ ndima Jesus. Idahaemi ama ekedidiọn̄ọ Mme Ntiense Jehovah mi, ekeme ndinem fi ndisidụk mbono esop mmọ. Edi idịghe ndima nti n̄kpọ ifan̄ emi kpọt edinam fi oyom ndiyak idemfo nnọ Jehovah nnyụn̄ nna baptism. Ima emi afo amade Jehovah Abasi edi ata akpan ntak emi edinamde fi ana baptism. Ama ama Jehovah akan n̄kpọ ekededi m̀mê owo ekededi, udûyakke n̄kpọ ndomokiet m̀mê owo ndomokiet akpan fi ndinam n̄kpọ esie. Ima emi amade Jehovah ayanam fi ana baptism onyụn̄ an̄wam fi aka iso anam n̄kpọ esie.

5. Mme mbụme ewe ke idineme?

⁵ Jesus ama ọdọhọ ke ana ima Jehovah ke ofụri esịt, ofụri ukpọn̄, ofụri ekikere, ye ofụri ukeme nnyịn. (Mark 12:30) Didie ke afo edikpep ndinen̄ede mma nnyụn̄ n̄kpono Jehovah ntre? Nnyịn nditie n̄kere nte Jehovah amade nnyịn ayanam ima enye n̄ko. (1 John 4:19) Ama ama Jehovah ntre, nso ye nso efen ke afo edima onyụn̄ anam?b

6. Rome 1:20 owụt ke nso idi usụn̄ kiet emi ikemede ndikpep mban̄a Jehovah?

⁶ Da se Jehovah okobotde kpep n̄kpọ ban̄a enye. (Kot Rome 1:20; Edi. 4:11) Tie kere nte mme eto, mbiet, ye mme unam emi Jehovah okobotde ẹwụtde ke enye enen̄ede enyene ọniọn̄.c Domo ndikpep n̄kpọ mban̄a utịbe utịbe usụn̄ emi Jehovah okobotde fi. (Ps. 139:14) Nyụn̄ kere n̄ko ban̄a adan̄a odudu emi Jehovah ọnọde utịn; kûfre ke utịn akam edi kiet kpọt ke otu ediwak biliọn ntantaọfiọn̄ emi enye okobotde. (Isa. 40:26) Afo ndikere mban̄a se Jehovah okobotde ayanam fi enen̄ede okpono enye. Edi idịghe afo ndidiọn̄ọ ke Jehovah enyene ọniọn̄ ye odudu kpọt edinam fi ekpere enye. Ọfọn ọdiọn̄ọ ediwak n̄kpọ efen aban̄a enye man ekeme ndinen̄ede n̄kpere enye.

7. Nso ke ana enịm man ekeme ndinen̄ede mma Jehovah?

⁷ Ana enịm ke Jehovah ekere aban̄a fi. Ndi esisọn̄ fi ndinịm ke Andikobot enyọn̄ ye isọn̄ ọdiọn̄ọ fi onyụn̄ ekere aban̄a fi? Ekpedi ntre, ti ke Jehovah ‘iyomke usụn̄ ikpọn̄ nnyịn owo kiet kiet.’ (Utom 17:26-28) Enye ‘odụn̄ọde kpukpru esịt.’ Ndien kpa nte David ọkọdọhọde Solomon, Jehovah ọn̄wọn̄ọ ndiyak fi okụt imọ edieke oyomde imọ. (1 Chron. 28:9) Afo ndikam n̄kpep Bible idahaemi owụt ke Jehovah ‘odụri fi’ adian idem nte enye ama eketetịn̄ ke Bible. (Jer. 31:3) Adan̄a nte ọdiọn̄ọde kpukpru se Jehovah anamde ọnọ fi, ntre ke afo editetịm ima enye.

8. Didie ke ekeme ndiwụt ke enem fi nte Jehovah amade fi?

⁸ Usụn̄ kiet emi ekemede ndiwụt ke enem fi nte Jehovah amade fi edi afo ndibọn̄ akam nnọ enye. Adan̄a nte ọdọhọde Abasi se ifịnade fi onyụn̄ ọkọmde enye ke kpukpru se enye anamde ọnọ fi, ntre ke afo edinen̄ede ima enye. Ama okụt n̄ko nte enye ọbọrọde akam fo, afo ye Jehovah ẹyetịm ẹkpere. (Ps. 116:1) Afo eyenịm ke an̄wan̄a enye nte etiede fi ke idem. Edi se idin̄wamde fi aka iso enen̄ede ekpere Jehovah edi afo ndidiọn̄ọ ntak emi enye amade m̀mê asuade n̄kpọ, ye ntak emi enye esinamde ndusụk n̄kpọ. Onyụn̄ oyom ọdiọn̄ọ se enye oyomde fi anam. N̄kukụre se idin̄wamde fi ọdiọn̄ọ oro edi afo ndikpep Bible emi edide Ikọ esie.

9. Didie ke afo ekeme ndiwụt ke imọ idaha Bible ibre mbre?

⁹ Kpep ndida Bible emi edide Ikọ Abasi ke akpan n̄kpọ. Bible kpọt ke ẹtịn̄ akpanikọ ẹban̄a Jehovah ye se enye oyomde fi anam. Afo ndikot Bible kpukpru usen, mben̄e idem nnọ ukpepn̄kpọ Bible fo, nnyụn̄ nnam se afo ekpepde owụt ke udaha Bible ubre mbre. (Ps. 119:97, 99; John 17:17) Ndi emenyene ndutịm ndikot Bible ke idemfo? Ndi emesikot Bible kpukpru usen?

10. Nso idi n̄kpọ kiet emi anamde Bible edi ata akpan n̄wed?

¹⁰ N̄kpọ kiet emi anamde Bible edi ata akpan n̄wed edi se mbon emi ẹkekụtde Jesus ẹwetde ẹban̄a Jesus. Bible kpọt edi n̄kukụre n̄wed akpanikọ emi etịn̄de se Jesus akanamde ọnọ fi. Nte osụk ekpepde aban̄a se Jesus eketịn̄de onyụn̄ anamde, imekere ke oro ayanam fi oyom ndidi ufan esie.

11. Nso idin̄wam fi ekpep ndima Jehovah?

¹¹ Kpep ndima Jesus man ekeme ndinen̄ede mma Jehovah. Ntak idọhọde ntre edi ke Jesus ama enen̄ede ekpebe nti edu Ete esie. (John 14:9) Ntre adan̄a nte enen̄erede ekpep n̄kpọ aban̄a Jesus, ntre ke editetịm idiọn̄ọ Jehovah onyụn̄ ama enye. Kere ban̄a nte Jesus akanamde n̄kpọ ke mbọm ye mbon emi mbon en̄wen mîkadaha ke n̄kpọ ke ntak emi mmọ ẹkedide ubuene, ẹdọn̄ọde, mînyụn̄ inyeneke owo. Kere n̄ko ban̄a nti item emi Jesus ọnọde fi ye nte uwem fo ọfọnde idahaemi akan akpa ke ntak emi anamde item esie.—Matt. 5:1-11; 7:24-27.

12. Nte osụk ekpepde n̄kpọ aban̄a Jesus, nso ikeme ndidọn̄ fi ndinam?

¹² Afo emekeme ndinen̄ede mma Jesus edieke adade ini ekere aban̄a n̄kpa emi enye akakpade man ẹkeme ndifen mme idiọkn̄kpọ nnyịn. (Matt. 20:28) Ke ini an̄wan̄ade fi ke owo ikenyịkke-nyịk Jesus yak akpa ọnọ fi, oro ekeme ndinam fi akabade esịt onyụn̄ ọdọhọ Jehovah efen ọnọ fi. (Utom 3:19, 20; 1 John 1:9) Ndien nte amade Jesus ye Jehovah, ọyọdọn̄ fi ndikpere mbon emi ẹmade mmọ n̄ko.

13. Nso ke Jehovah ọnọ fi?

¹³ Kpep ndima mbon emi ẹmade Jehovah. Ekeme ndidi idin̄wan̄ake mbon ubon mbufo ye n̄kani ufan fo emi mîdịghe Mme Ntiense Jehovah se inamde fi oyom ndiyak idemfo nnọ Jehovah. Mmọ ẹkam ẹkeme ndikọbọ fi. Jehovah ayanam nditọete ke esop ẹtie nte ubon fo man enye ada mmọ an̄wam fi. Edieke ekperede nditọete oro, mmọ ẹyema fi ẹnyụn̄ ẹn̄wam fi. (Mark 10:29, 30; Heb. 10:24, 25) Nte ini akade, mbon ubon mbufo ẹkeme nditiene fi nnam n̄kpọ Jehovah ẹnyụn̄ ẹdu uwem nte enye ọdọhọde.—1 Pet. 2:12.

14. Nso inam fi enịm se 1 John 5:3 etịn̄de aban̄a ibet Jehovah?

¹⁴ Kpep ndima nte Jehovah ọdọhọde idu uwem, nyụn̄ du uwem ntre. Mbemiso afo ọkọdiọn̄ọde Jehovah, anaedi ekesida ekikere idemfo ebiere se ifọnde ye se idiọkde, edi idahaemi emedikụt ke nte Jehovah ọdọhọde ẹdu uwem ọfọn akan. (Ps. 1:1-3; kot 1 John 5:3.) Kere ban̄a item emi Bible ọnọde mme ebe, iban, mme ete ye eka, ye nditọ. (Eph. 5:22–6:4) Tọn̄ọ ọkọtọn̄ọ ndinam item oro, ndi uwem enem ke ufọk fo akan nte ekesinemde? Ndi ido fo ọfọn akan akpa tọn̄ọ akanam item Jehovah emi aban̄ade utọ ufan emi ekpenyenede? Ndi uwem enem fi idahaemi akan akpa? (N̄ke 13:20; 1 Cor. 15:33) Imenịm ke edibọrọ ih ke kpukpru mme mbụme emi.

15. Nso ke akpanam edieke ọsọn̄de fi ndinam se Bible ekpepde?

¹⁵ Ndusụk ini ekeme ndisọn̄ fi ndidiọn̄ọ nte akpanamde se afo ekpepde ke Bible. Oro anam Jehovah anam esop esie ẹsion̄o mme n̄wed emi ẹnamde se Bible etịn̄de an̄wan̄a man an̄wam fi ọdiọn̄ọ se ifọnde ye se idiọkde. (Heb. 5:13, 14) Ama okot mme n̄wed emi onyụn̄ ada ini ekpep mmọ, oyokụt nte mmọ ẹfọnde onyụn̄ okụt nte afo ekemede ndinam se ekpepde. Imonyụn̄ ikere ke oro ayanam fi oyom ndisịne ke esop Jehovah.

16. Didie ke Jehovah etịm ikọt esie?

¹⁶ Kpep ndima esop Jehovah nnyụn̄ mberi esop emi edem. Jehovah abahade ikọt esie ọdọn̄ ke esop ke esop, ndien Jesus Eyen esie edi ibuot kpukpru mmọ. (Eph. 1:22; 5:23) Jesus emek ekpri otu irenowo emi ẹyetde aran ete ẹda usụn̄ ke utom emi enye oyomde ẹnam mfịn. Jesus okot otu emi “ofụn emi anamde akpanikọ onyụn̄ enyenede ọniọn̄,” mmọ ẹnyụn̄ ẹda utom emi ẹnọde mmọ ẹte ẹkpep fi Ikọ Abasi ẹnyụn̄ ẹn̄wam fi ekpere Abasi ke akpan n̄kpọ. (Matt. 24:45-47) Usụn̄ kiet emi mmọ ẹsede ẹban̄a fi edi mmọ ndikụt ẹte ke ẹmek irenowo emi ẹdotde ẹte ẹdi mbiowo, man ẹda fi usụn̄ ẹnyụn̄ ẹkpeme fi. (Isa. 32:1, 2; Heb. 13:17; 1 Pet. 5:2, 3) Mbiowo ẹben̄e idem ndinam se ededi emi mmọ ẹkemede nnọ fi, ndọn̄ fi esịt, nnyụn̄ n̄n̄wam fi akaka iso ekpere Jehovah. Edi ata akpan n̄kpọ emi mmọ ẹkemede ndinam nnọ fi edi mmọ ndin̄wam fi ekpep mbon en̄wen n̄kpọ aban̄a Jehovah.—Eph. 4:11-13.

17. Rome 10:10, 13, 14 owụt ke nso isinam itịn̄ iban̄a Jehovah inọ mbon en̄wen?

¹⁷ N̄wam mbon en̄wen ẹkpep ndima Jehovah. Jesus ọkọdọhọ mbet esie ẹkpep mbon en̄wen ẹma Jehovah. (Matt. 28:19, 20) Owo ekeme ndinyụn̄ nnam ewụhọ oro sia se ẹkenyụn̄ ẹdọhọde inam edi oro. Edi nte afo etịmde ama Jehovah, editie fi ke idem nte eketiede Peter ye John emi ẹkedide mme apostle Jesus. Mmọ ẹkedọhọ ẹte: “Nnyịn ikemeke nditre nditịn̄ mban̄a mme n̄kpọ emi nnyịn ikokụtde inyụn̄ ikopde.” (Utom 4:20) Iwakke se isinamde esịt enem owo nte ndin̄wam owo efen edima Jehovah. Kere nte esịt akadatde Philip emi ọkọkwọrọde ikọ ọnọ owo Ethiopia oro, ini enye akan̄wamde ete oro ọdiọn̄ọ akpanikọ emi odude ke N̄wed Abasi onyụn̄ ana baptism! Ama ekpebe Philip onyụn̄ anam ewụhọ Jesus emi ọdọhọde yak ikwọrọ ikọ, afo ada oro owụt ke imoyom ndidi Ntiense Jehovah. (Kot Rome 10:10, 13, 14.) Ini oro ndien, afo n̄ko emekeme ndibụp ukem mbụme emi owo Ethiopia oro okobụpde ete: “Nso ibiọn̄ọ mi ndina baptism?”—Utom 8:36.

18. Nso ke idineme ke ibuotikọ emi etienede?

¹⁸ Afo ndibiere ndina baptism edi akakan n̄kpọ emi edibierede ndinam ke uwem fo. Sia baptism edide ata akpan n̄kpọ ntre, ọfọn enen̄ede ekere se enye ọwọrọde. Nso ke akpana ọdiọn̄ọ aban̄a baptism? Nso ke oyom anam mbemiso anade baptism ye ke ama akana? Ẹyebọrọ mme mbụme emi ke ibuotikọ emi etienede.