“Inụn̄ Ama Akabade Adaba”
ẸN̄WANA mme ekọn̄ ke ntak esie. Ẹda enye ẹkpụhọ ye mme n̄kpọ. Ke China eset, enye ekedi udiana n̄kpọ ọnọ gold ke ekọmurua. Ih, ubonowo ke anyan ini ada inụn̄ nte ata ọsọn̄urua n̄kpọ. Tutu esịm mfịn emi, ẹdọhọ ke usọbọ ye mme ibọk uwot n̄kpri unam ẹto enye, ndien ẹda enye ẹnam n̄kpọ ke ofụri ererimbot nte se inamde n̄kpọ enyene inem m̀mê se ikpande n̄kpọ ndibiara.
Ke ikerede iban̄a ediwak nti ufọn ye se ẹdade inụn̄ ẹnam, idịghe n̄kpọ n̄kpaidem nte ke ẹda enye ẹtịn̄ ikọ ke Bible ke ndamban̄a usụn̄. Ke uwụtn̄kpọ, Ibet Moses ama oyom ẹsịn inụn̄ ke n̄kpọ ekededi oro ẹkewade ke itieuwa ẹnọ Jehovah. (Leviticus 2:13) Owo ikanamke emi man ẹnam n̄kpọ oro ẹkewade enyene inem, edi eyedi koro inụn̄ adade aban̄a se ibọhọde mbiara m̀mê edibu.
Ke ọwọrọetop Ukwọrọikọ esie oro ke Obot, Jesus Christ ọkọdọhọ mme anditiene enye ete: “Mbufo ẹdi inụn̄ isọn̄.” (Matthew 5:13) Ke nditịn̄ ntem, Jesus okowụt ete ke mmọ ndikwọrọ mban̄a Obio Ubọn̄ Abasi nnọ mbon efen eyenyene odudu oro akpande mbiara, m̀mê eke unyan̄a uwem ọnọ mme andikop. Ke akpanikọ, ẹyekpeme mbon oro ẹdade mme ikọ Jesus ẹsịn ke edinam ẹbiọn̄ọ mbiara eke ido uwem ye eke spirit ke mme obio oro mmọ ẹdụn̄de ẹnyụn̄ ẹnamde utom.—1 Peter 4:1-3.
Nte ededi, Jesus ama aka iso odụri owo utọn̄ ete: “Edi inụn̄ ama akabade adaba, . . . ifọnke aba ke baba n̄kpọ kiet, ibọhọke nditop nduọk, owo ndidịghi ke ukot.” Ke etịn̄de n̄kpọ aban̄a emi, eyen ukpepn̄kpọ Bible oro Albert Barnes ọkọdọhọ ete ke inụn̄ oro Jesus ye mme apostle esie ẹkediọn̄ọde “ikasanake, akabuaha ye mme ikọn̄ ye mme n̄kpatan̄a n̄kpọ isọn̄.” Ntre edieke inụn̄ mînyeneke aba inem, “ndusụk n̄kpatan̄a n̄kpọ isọn̄” ẹma ẹkeme ndisụhọ. “Emi,” nte Barnes etịn̄de, “ikọfọnke ke n̄kpọ ndomokiet ibọhọke . . . ndiduọk ke afan̄usụn̄, m̀mê ke usụn̄, nte nnyịn isinamde ye n̄kwa itiat.”
Ke ndinam item emi, mme Christian ẹkpenyene nditịn̄ enyịn mbak ẹkûtre an̄wan̄wa ikọ ntiense mmọ m̀mê ndiduọ ndụk usụn̄ edinam unana uten̄e Abasi. Mîdịghe ntre mmọ ẹyetahade ke n̄kan̄ eke spirit ndien ẹkeme ndikabade nnana ufọn, ukem nte ‘inụn̄ oro akabarede adaba.’