“Ẹsan̄a Ẹkpere Abasi, Ndien Enye Ayasan̄a Ekpere Mbufo”
Mbemiso ye ke Ama Ekekpep Bible—Mme Edumbet Bible Ẹma Ẹn̄wam Enye Ndikpụhọde
ADRIAN ekedi owo ifụtesịt ye utọk ke ini enye ekedide akparawa. Enye ndisisọp nyat esịt ama esinam enye anam n̄kpọ ibụmede ibụmede. Enye ama esin̄wọn̄ mmịn ye sika, onyụn̄ odu oburobụt uwem. Ẹkediọn̄ọ Adrian nte owo oro amade ikwọ rọk, ndien enye ama ekịm utịme ikan̄ ke idem ndiwụt ke imọ idi owo ntịme. Ke etịn̄de aban̄a mme isua oro, enye ọkọdọhọ ete: “N̄kesifat idet nte mbon rọk, nsịn ibọk nnam enye ada nnennen nnennen, ndusụk ini nda ndatndat ibọk m̀mê uduot efen n̄kpụhọde enye.” Adrian n̄ko ama etịbi ibuo esie.
Adrian ama ọwọrọ okodụn̄ ke ntaha ufọk kiet ye ndusụk uyen en̄wen oro ẹkedide mbon nsọn̄ibuot. Do ke mmọ ẹkesin̄wọn̄ mmịn ẹnyụn̄ ẹda n̄kpọsọn̄ ibọk. Adrian eti ete: “Mma nsida n̄kpọsọn̄ ibọk emi ẹnamde idem aduai mi nnyụn̄ n̄kịm ibọk oro ẹkotde Valium ye ibọk efen oro n̄kekemede ndinyene. Ke ini n̄kpọsọn̄ ibọk m̀mê un̄wọn̄ mîkodụhe, mma nsision̄o aran uwat ke moto mme owo n̄n̄wụne tutu enye anam mi.” Sia okodude uwem nte esịn ntịme efak, Adrian ama esisịn mme owo ndịk ke idem onyụn̄ etie ata afai afai. Owo ndomokiet ikenyịmeke ndisan̄a n̄kpere enye. Ke ukem ini oro, eduuwem esie ama anam ndiọi owo ẹsan̄a ẹkpere enye.
Sụn̄sụn̄, Adrian ama edifiọk ke inua-okot mme ufan imọ ẹkedụk nsan̄a ye imọ n̄kukụre ke ntak se mmọ ẹkenyenede ẹto imọ. Ke akande oro, enye ama ọdọhọ ete: “Kpukpru ifụtesịt ye afai oro n̄kanamde ikenyeneke ufọn ndomokiet.” Ke okụtde edikpu onyụn̄ ananade uduak ke uwem, enye ama ọkpọn̄ mme nsan̄a esie oro. Ke ini enye okokụtde Enyọn̄-Ukpeme ke itie ubọpufọk kiet, etop Bible oro okodude do ama edemede enye udọn̄, ndien emi ama osụn̄ọ ke enye ndikpep Bible ye Mme Ntiense Jehovah. Adrian ama ọsọsọp eyere ikot emi: “Ẹsan̄a ẹkpere Abasi, ndien enye ayasan̄a ekpere mbufo.” (James 4:8) Nte utịp, Adrian ama okụt ke oyom itọn̄ọ ndida mme edumbet oro ẹdude ke Edisana N̄wed Abasi isịn ke edinam.
Nte ifiọk esie ke Bible ọkọkọride, emi ama otụk ubieresịt Adrian onyụn̄ enen̄ede usụn̄ uwem esie. Ẹma ẹn̄wam enye ndikara iyatesịt esie nnyụn̄ nnyene mfara ke idem. Odudu Ikọ Abasi ama anam edu Adrian enen̄ede okpụhọde.—Mme Hebrew 4:12.
Edi didie ke Bible ekeme ndinyene utọ okopodudu utịp oro? Ifiọk N̄wed Abasi an̄wam nnyịn ‘ndimen obufa owo nsịne.’ (Ephesus 4:24) Ih, ndida nnennen ifiọk Bible nsịn ke edinam esikpụhọde edu nnyịn. Edi didie ke utọ ifiọk oro esikpụhọde mme owo?
Akpa, Bible owụt ndiọi edu oro anade ẹtre. (Mme N̄ke 6:16-19) Ọyọhọ iba, N̄wed Abasi esịn udọn̄ ọnọ nnyịn ndision̄o mbun̄wụm edisana spirit Abasi. Mme edu emi ẹsịne “ima, ye idatesịt, ye emem, ye ime, ye mfọn-ido, ye eti ido, ye edinam akpanikọ, ye ifụre ifụre ido, ye mfara ke idem.”—Galatia 5:22, 23.
Ntotụn̄ọ ifiọk aban̄ade se Abasi oyomde ama an̄wam Adrian ndidụn̄ọde idemesie nnyụn̄ n̄kụt mme edu oro enye ekenyenede ndikọri ye mbon oro enye ekenyenede ndibiat mfep. (James 1:22-25) Edi oro ekedi sụk ntọn̄ọ. Ke adianade ye ifiọk, enye ama oyom nsịnudọn̄—n̄kpọ oro edinụkde Adrian ndinam ukpụhọde.
Adrian ama edikpep nte ke ẹnam nti edu emi ẹyomde mi ke “mbiet Andibot enye.” (Colossae 3:10) Enye ama edifiọk ke edu Christian enyene ndibiet edu Abasi. (Ephesus 5:1) Ebede ke ndikpep Bible, Adrian ama ekpep aban̄a nte Jehovah esinamde n̄kpọ ye ubonowo onyụn̄ etịm okụt nti edu Abasi utọ nte ima, mfọnido, eti ido, mbọm ye edinen ido esie. Utọ ifiọk oro ama onụk Adrian ndima Abasi nnyụn̄ ndomo ndinyene unyịme Jehovah.—Matthew 22:37.
Nte ini akakade, ndien ye un̄wam edisana spirit Abasi, Adrian ama ekeme ndikara afai afai edu esie. Idahaemi enye ye n̄wan esie ke ẹsịn idem ẹda ifiọk Bible ẹn̄wam mbon efen ndikpụhọde usụn̄ uwem mmọ. Adrian ọdọhọ ete: “Ediwak n̄kani ufan mi ẹma ẹkpan̄a, edi ami ke nsụk ndodu uwem nnyụn̄ nnyene inem inem uwem ubon.” Enye edi in̄wan̄-in̄wan̄ uyarade emi owụtde odudu oro Bible enyenede ndikpụhọde uwem owo.
[Se ẹwetde ke ikpọ abisi ke page 25]
“Kpukpru ifụtesịt ye afai oro n̄kanamde ikenyeneke ufọn ndomokiet”
[Ekebe ke page 25]
Mme Edumbet Bible ke Ẹnam Utom
Ndusụk edumbet Bible emi ẹn̄wamde ediwak mbon ifụtesịt ye afai ndikabade ntie emem emem ẹdi emi:
‘Ẹdu ke emem ye kpukpru owo. Ẹkûsio usiene ẹnọ idem mbufo, ndima mme ufan mi, edi ẹbọk idem ke usụn̄ ẹnọ iyatesịt Abasi.’ (Rome 12:18, 19) Yak Abasi ebiere ini, ye owo oro enye edisiode usiene. Enye ekeme ndinam ntre sia enye enyenede ọyọhọ ifiọk aban̄a se iketịbede ndien usiene ekededi oro enye edisiode oyowụt mfọnmma unenikpe esie.
“Ẹyat esịt, ndien ẹkûdue; ẹkûyak utịn osụhọde edisịm iyatesịt mbufo: ẹkûnyụn̄ ẹnọ Satan ufan̄.” (Ephesus 4:26, 27) Ndusụk ini owo ekeme ndinyene eti ntak ndiyat esịt. Edieke emi etịbede, enye inyeneke ndika iso ‘nyat esịt.’ Ntak-a? Koro emi ekeme ndinụk enye ndinam se idiọkde, ke ntre ‘ọnọde Satan ufan̄,’ adade ekesịm editaba unyịme Jehovah Abasi.
“Tre ifụtesịt, nyụn̄ kpọn̄ ifiopesịt: kûyat esịt kûnyụn̄ unam idiọk baba.” (Psalm 37:8) Iyatesịt oro owo mîkarake esida okosụn̄ọ ke ebeubọk edinam. Edieke owo edide owo iyatesịt, enye ekeme nditịn̄ m̀mê ndinam n̄kpọ oro edibiakde owo.