Inyene Oro Afo Ekemede Ndiberi Edem

“EDIEKE afo ọbọde leta oro ọdọhọde ke odu inyene oro ẹnịmde ẹnọ fi, kpeme idem. Ekeme ndidi akari n̄kari owo abian̄a oyom ndibian̄a fi.”

Oro edi ntọt emi Itieutom Udụn̄ọde Leta ke United States ekewetde ke Ikpehe Intanet esie. Ntak-a? Koro ediwak tọsịn owo ẹsibọ leta oro ọdọhọde ete: ‘Iman fo amakpa ọkpọn̄ inyene enịm ọnọ fi.’ Nte utịp, ediwak owo ẹsinọ $30 m̀mê awakde akan oro ẹsọk andiwet leta oro man mmọ ẹbọ ‘n̄wed’ oro ẹdọhọde nte edinamde ẹdiọn̄ọ ebiet emi inyene oro odude ye mme n̄kpọ oro ibet oyomde ẹnam man ẹbọ inyene oro. Edi ẹma ẹnen̄ede ẹkpu mme owo emi. Kpukpru mme owo oro ẹkebian̄ade ẹkebọ ukem leta—ndien idotenyịn ndomokiet idụhe nte ke owo mmọ ekededi ọyọbọ inyene ndomokiet.

Ẹsida mme utọ usụn̄ emi ẹbian̄a mme owo sia mme owo ẹnyenede ndammana udọn̄ ndibọ inyene. Edi, Bible etịn̄ nte ọfọnde aban̄a mbon oro ẹkpọn̄de inyene ẹnịm ẹnọ mbonufọk mmọ, ete: “Eti owo ada akpa ọnọ nditọ-nditọ.” (Mme N̄ke 13:22) Ke akpanikọ, Jesus Christ ke idemesie ama etịn̄ mme ikọ oro ẹtịmde ẹmehe ẹnyụn̄ ẹmade mi ke Ukwọrọikọ esie Oro ke Obot, ete: “Ọfọfọn ọnọ mmọ eke ẹnyenede ifụre-ifụre ido [m̀mê, mbon nsụkidem]: koro mmọ ẹyeda isọn̄ ẹnyene.”—Matthew 5:5.

Mme ikọ Jesus oro ẹti nnyịn se Edidem David eke Israel eset akadade odudu spirit ewet ediwak isua ikie ke mbemiso ete: “Mbon nsụkidem ẹyeda isọn̄ ẹnyene; ediwak emem ẹyenyụn̄ ẹnem mmọ esịt.”—Psalm 37:11.

‘Ndida isọn̄ nnyene’—nso aduai-owo-idem idotenyịn ke emi edi ntem! Edi, nte nnyịn imekeme ndinịm ke emi ikam idịghe ukem ikọ abian̄a oro iketịn̄de iban̄a ke enyọn̄ emi? Ih, nnyịn imekeme ndinịm. Sia isọn̄ edide ubak utịbe utịbe edibotn̄kpọ Jehovah, enye enyene ofụri unen nte Andibot ye Andinyene isọn̄ ndida enye nnọ owo ekededi oro enye amade. Jehovah ama ada Edidem David anam un̄wọn̄ọ emi ọnọ edima Eyen Esie, Jesus Christ, ete: “Ben̄e mi, ndien nyọnọ fi mme idụt ke udeme fo, nyọnọ mme utịt ererimbot, nte afo ada enyene.” (Psalm 2:8) Ke ntak emi, apostle Paul ama ọdọhọ ke Jesus edi enye “emi [Abasi] ekemekde enịm, ete edidi andinyene kpukpru n̄kpọ.” (Mme Hebrew 1:2) Ke ntre, nnyịn imekeme ndinyene ọyọhọ mbuọtidem nte ke Jesus eketịn̄ ofụri akpanikọ ke ini enye ọkọdọhọde ke mbon nsụkidem “ẹyeda isọn̄ ẹnyene,” ndien enye enyene ofụri odudu ndisu un̄wọn̄ọ esie.—Matthew 28:18.

Mmọdo, akpan mbụme edi, Didie ke un̄wọn̄ọ oro edisu? Ke kpukpru ebiet oro nnyịn isede mfịn, etie nte mbon ibak ye mbon n̄kohodeidem ẹnen̄ede ẹkụt unen ẹnyụn̄ ẹnyene se mmọ ẹyomde. Nso idisụhọ inọ mbon nsụkidem ndida nnyene? Ke adianade do, akwa afanikọn̄ esịm isọn̄ ẹnyụn̄ ẹsabade enye, ndien mbon idiọkitọn̄ ye mbon oro ẹdọhọde yak idia inyụn̄ in̄wọn̄ koro iyakpa n̄kpọn̄ ẹda inyene isọn̄ ẹnam n̄kpọ ke en̄weme. Ndi isọn̄ oro akam ọfọnde akan oyodu ndida nnyene? Nnyịn imesịn udọn̄ inọ fi ndikot ibuotikọ oro etienede man okụt mme ibọrọ mbụme emi ye mme ibọrọ akpan mbụme eken.

“Mbon Nsụkidem Ẹyeda Isọn̄ Ẹnyene”—Didie?

“EKEME ndidi afo ememehe ye inem inem ikọ Jesus emi ọdọhọde ke ‘mbon nsụkidem ẹyeda isọn̄ ẹnyene.’ Edi ke ikerede iban̄a se mme owo ẹnamde ye kiet eken ẹnyụn̄ ẹnamde ye isọn̄, ndi afo emekere ke n̄kpọ ndomokiet oyosụhọ ke isọn̄ ọnọ mbon nsụkidem ndida nnyene?”—Matthew 5:5; Psalm 37:11.

Myriam, kiet ke otu Mme Ntiense Jehovah, ama ada mbụme emi ọtọn̄ọ ukpepn̄kpọ Bible. Eren oro enye okobụpde mbụme emi ama ọbọrọ ete ke edieke edide Jesus akanam en̄wọn̄ọ emi, do anaedi isọn̄ edidi ebiet oro edidotde ẹda ẹnyene, idịghe ebiet oro ẹma ẹkebiat m̀mê ifụm emi mîdotke se ẹdụn̄de.

Ke akpanikọ, oro ekedi ibọrọ oro ọnọde idotenyịn. Edi, ndi nnyịn imenyene ntak ndinyene utọ idotenyịn oro? Ih, imenyene, koro Bible ọnọ nnyịn eti ntak ndinịm ke un̄wọn̄ọ oro oyosu. Ke nditịm ntịn̄, edisu un̄wọn̄ọ oro enen̄ede enyene ebuana ye uduak Abasi kaban̄a ubonowo ye isọn̄. Nnyịn imenịm ke akpanikọ ite ke Abasi ayanam se enye aduakde. (Isaiah 55:11) Mmọdo, nso ikedi akpa uduak Abasi kaban̄a ubonowo, ndien didie ke enye edisu?

Nsinsi Uduak Abasi Kaban̄a Isọn̄

Jehovah Abasi okobot isọn̄ ye akpan uduak. “Emi edi uyo Jehovah andibot enyọn̄; enye edi Abasi emi obotde isọn̄, onyụn̄ anamde enye; enye owụk enye, ibotke enye ke ikpîkpu, obot enye man ẹdụn̄ ke esịt: ami ndi Jehovah, ndien efen idụhe.” (Isaiah 45:18) Ntem, ẹkebot isọn̄ akpan akpan man mme owo ẹdụn̄ ke esịt. N̄ko-n̄ko, uduak Abasi edi isọn̄ ndidi nsinsi ebietidụn̄ ubonowo. “Enye odori isọn̄ ke itie esie, idisehekede ke nsinsi-nsinsi.”—Psalm 104:5; 119:90.

Ẹkụt n̄ko uduak Abasi kaban̄a isọn̄ ke utom oro enye ọkọnọde akpa owo iba oro. Jehovah ọkọdọhọ Adam ye Eve ete: “Mbufo ẹtọt, ẹnyụn̄ ẹwak, ẹnyụn̄ ẹyọhọ ke isọn̄, ẹnyụn̄ ẹkan enye: ẹnyụn̄ ẹkara iyak ke akamba mmọn̄, ye inuen ke enyọn̄, ye kpukpru n̄kpọ uwem eke ẹnyọnide ke isọn̄.” (Genesis 1:28) Isọn̄ emi Abasi ọkọnọde Adam ye Eve, ekenyene ndidi nsinsi ebietidụn̄ mmọ ye eke nditọ mmọ. Andiwet psalm ama etịn̄ ediwak isua ikie ke ukperedem ete: “Enyọn̄ edi heaven Jehovah: edi enye ada isọn̄ ọnọ nditọ owo.”—Psalm 115:16.

Man mmọ ẹkeme ndikụt nte utọ utịbe utịbe idotenyịn oro osude, akana Adam ye Eve, ọkọrọ ye nditọ mmọ, ẹnyịme Jehovah Abasi, kpa Andibot ye Ọnọ-Uwem, nte Andikara mmọ ẹnyụn̄ ẹnyịme ndisụk ibuot nnọ enye. Jehovah ama owụt nte edide akpan n̄kpọ mmọ ndisụk ibuot nnọ imọ ke ini enye okowụkde Adam ete: “Dia kpukpru eto in̄wan̄; edi ama edi eto ifiọk, eti ye idiọk, kûdia ke esịt: koro ke usen eke afo adiade ke esịt afo ayakpa n̄kpa.” (Genesis 2:16, 17) Adam ye Eve ẹkenyene ndinam mmemmem ye in̄wan̄-in̄wan̄ ewụhọ emi edieke mmọ ẹkeyomde ndika iso ndụn̄ ke In̄wan̄ Eden. Mmọ ndikpakanam ntre okpowụt esịtekọm oro mmọ ẹkenyenede ẹban̄a kpukpru n̄kpọ oro Ete mmọ eke heaven akanamde ọnọ mmọ.

Ke ini Adam ye Eve ẹkekoide-koi ẹsọn̄ ibuot ye Abasi ebe ke ndibiat ewụhọ oro enye ọkọnọde mmọ, ke nditịm ntịn̄, mmọ ẹkesịn enye emi ọkọnọde mmọ kpukpru n̄kpọ oro mmọ ẹkenyenede. (Genesis 3:6) Ntre, mmọ ẹma ẹtaba ediye Paradise oro ekpekedide ebietidụn̄ mmọ ye eke nditọ mmọ. (Rome 5:12) Ndi nsọn̄ibuot akpa ebe ye n̄wan oro ama abiat uduak Abasi ke ndikobot isọn̄?

Abasi Emi Mîkpụhọkede

Abasi ama ada prọfet esie Malachi etịn̄ ete: “Ami [ndi] Jehovah, n̄kpụhọkede.” (Malachi 3:6) Ke etịn̄de aban̄a ufan̄ikọ emi, eyen ukpepn̄kpọ Bible oro L. Fillion emi edide eyen France, ọkọdọhọ ke ufan̄ikọ emi enen̄ede enyene ebuana ye Abasi ndisu mme un̄wọn̄ọ esie. Fillion ekewet ete: “Jehovah ekpekekeme ndisobo mme ọsọn̄ibuot ikọt esie mfep, edi sia enye mîkemeke ndikpụhọde mme un̄wọn̄ọ esie, enye oyosu mme un̄wọn̄ọ oro enye ọkọn̄wọn̄ọde, inamke n̄kpọ m̀mê nso itịbe.” Edide Abasi akanam un̄wọn̄ọ ọnọ owo, idụt, m̀mê ofụri ubonowo, enye idifreke mme un̄wọn̄ọ esie edi oyosu mmọ ke edikem ini esie. “Enye eti ediomi esie ke nsinsi, ikọ emi enye owụkde ke tọsịn emana.”—Psalm 105:8.

Nte ededi, didie ke nnyịn ikeme ndinịm ke Jehovah ikpụhọkede akpa uduak esie kaban̄a isọn̄? Nnyịn imekeme ndinịm emi koro imokụt ke ofụri Ikọ Esie eke odudu spirit, kpa Bible, etịn̄ aban̄a uduak Abasi ndida isọn̄ nnọ okopitem ubonowo. (Psalm 25:13; 37:9, 22, 29, 34) Ke adianade do, N̄wed Abasi etịn̄ aban̄a mbon oro Jehovah ọdiọn̄de nte ẹdụn̄de ke ifụre, kpukpru mmọ ẹnyụn̄ ‘ẹtie ke idak vine mmọ ye ke idak fig mmọ; ndien baba owo kiet eke anamde mmọ ndịk idụhe.’ (Micah 4:4; Ezekiel 34:28) Edimek ikọt Jehovah “ẹyebọp ufọk ẹnyụn̄ ẹdụn̄ ke esịt: ẹyenyụn̄ ẹtọ in̄wan̄-vine, ẹnyụn̄ ẹdia mfri mmọ.” Emem ayakam odu ke ufọt mmọ ye mme unamikọt.—Isaiah 11:6-9; 65:21, 25.

Bible owụt ke usụn̄ efen nte Abasi edisude un̄wọn̄ọ esie. Idụt Israel ama enyene emem ye uforo ke ini ukara Edidem Solomon. Ke ini ukara esie, “Judah ye Israel [ẹkedụn̄] ke ifụre, kpukpru owo ke idak vine mmọ ye eto fig mmọ, ọtọn̄ọde ke Dan tutu esịm ke Beer-sheba, ke ofụri eyo Solomon.” (1 Ndidem 4:25) Bible ọdọhọ ke Jesus ‘okpon akan Solomon,’ ndien andiwet psalm ama etịn̄ ntịn̄nnịm ikọ aban̄a ukara esie ete: “Edinen owo ayafiari ke eyo esie; ye ediwak emem n̄ko tutu ọfiọn̄ okụre.” Ke ini oro, “uwak ibokpot ẹyedu ke isọn̄ ke nsom ikpọ obot.”—Luke 11:31; Psalm 72:7, 16.

Ke ndisu uduak esie, Jehovah Abasi oyokụt ete ke isọn̄ oro imọ in̄wọn̄ọde ndinọ mme owo ẹda ẹnyene ekem mme owo onyụn̄ afiak ekeye nte ekeyede. Ikọ Abasi asian nnyịn ke Ediyarade 21:4 aban̄a obufa ererimbot oro Abasi ọn̄wọn̄ọde ete: “[Abasi] ọyọkwọhọde kpukpru mmọn̄eyet ke enyịn [mme owo] efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba.” Emi edinen̄ede edi ata Paradise.—Luke 23:43.

Nte Afo Ekemede Ndida Isọn̄ Oro Ẹn̄wọn̄ọde Nnyene

Ẹdinam isọn̄ akabade edi Paradise ke ini ukara oro ẹtiede ke heaven ẹkara, kpa ukara Obio Ubọn̄ emi Jesus Christ edide Edidem. (Matthew 6:9, 10) Akpa, Obio Ubọn̄ oro ‘oyosobo mmọ emi ẹsobode isọn̄.’ (Ediyarade 11:18; Daniel 2:44) Ekem, ntịn̄nnịm ikọ oro etienede mi oyosu Jesus Christ, kpa “Ọbọn̄ Emem” ke idem: “Ubọn̄ ye emem ididopke ndikọri ke ebekpo . . . ubọn̄ esie.” (Isaiah 9:6, 7) Ke ini ukara Obio Ubọn̄ oro, ediwak miliọn owo, esịnede mbon oro ẹdinamde ẹset, ẹyenyene ifet ndida isọn̄ nnyene.—John 5:28, 29; Utom 24:15.

Mmanie ẹdidot ndida ediye isọn̄ oro nnyene? Kere ban̄a mme ikọ Jesus emi: “Ọfọfọn ọnọ mmọ eke ẹnyenede ifụre-ifụre ido: koro mmọ ẹyeda isọn̄ ẹnyene.” (Matthew 5:5) Nso ke ọwọrọ owo ndinyene ifụre-ifụre ido, m̀mê ndidi owo nsụkidem? Mme n̄wed ukabadeikọ ẹsiwak ndikabade “nsụkidem,” m̀mê “ifụre-ifụre ido,” nte sụn̄sụn̄ ido, edinyene iso o-bụt, nsụkibuot, edinyene mmemmem ido ye editie sụn̄sụn̄. Nte ededi, ikọ emi enen̄ede enyene se ọwọrọde ke akpasarade usem Greek. New Testament Wordbook eke William Barclay, ọdọhọ ke “sụn̄sụn̄ ido odu ke ifụre ifụre ido, [edi] odudu emi ọsọn̄de nte ukwak odu ke edem sụn̄sụn̄ ido.” Enye owụt idaha ekikere oro anamde owo ekeme ndiyọ ubiak ye unana n̄kụni m̀mê ekikere edisio usiene, ke ntak oro owo enyenede eti itie ebuana ye Abasi, ndien itie ebuana emi anam owo enyene odudu ndiyọ.—Isaiah 12:2; Philippi 4:13.

Owo nsụkidem esisụhọde idem enyịme mme idaha Abasi ke kpukpru ikpehe uwem esie; enye isisọn̄ọke iyịre ke ndinam n̄kpọ ke ekikere idemesie m̀mê nditiene ekikere mbon en̄wen. Enye n̄ko edi owo emi enyịmede ndibọ ukpep, enyịmede Jehovah ọnọ imọ ukpep. David andiwet psalm ekewet ete: “[Jehovah] ayanam mbon nsụkidem ẹsan̄a ke edinen: onyụn̄ eteme mbon nsụkidem usụn̄ esiemmọ.”—Psalm 25:9; Mme N̄ke 3:5, 6.

Ndi afo oyodu ke otu “mbon nsụkidem” oro ẹdidade isọn̄ ẹnyene? Ebede ke ndifiọk Jehovah ye uduak esie oto ndikpep Ikọ esie ifịk ifịk nnyụn̄ nda se ekpepde nsịn ke edinam, afo n̄ko emekeme ndidori enyịn ndida Paradise isọn̄ nnyene nnyụn̄ ndụn̄ ke esịt ke nsinsi.—John 17:3.