Ke mme ima ima ikọ ete, enyene-ọniọn̄ Edidem Solomon eke Israel eset ọdọhọ ete: “Eyen mi, afo ama ọbọ ikọ mi, onyụn̄ enịm mbet mi ke idem fo; onyụn̄ akpan̄ utọn̄ fo ke eti ibuot, onyụn̄ esịn esịt fo ke mbufiọk; ama ofiori okot asian, emenede uyo fo ọnọ mbufiọk; ama oyom enye nte silver, onyụn̄ odụn̄ọde enye nte n̄kpọ-uto eke edịbede; ndien afo eyetịm ọfiọk uten̄e Jehovah, onyụn̄ esịm ifiọk Abasi.”—Mme N̄ke 2:1-5.

Eti ibuot edi ukeme ndida ifiọk emi Abasi ọnọde nsịn ke edinam nte enende. Ndien Bible ọnọ eti ibuot ke utịbe utịbe usụn̄ didie ntem! Ih, enye ọdọn̄ọ mme ikọ eti ibuot, utọ nte mbon oro ẹwetde ke n̄wed Mme N̄ke ye Ecclesiastes, ndien oyom nnyịn ikpan̄ utọn̄ ke mme ikọ ẹmi. Nnyịn imokụt n̄ko ediwak uwụtn̄kpọ ke Bible ẹmi ẹwụtde mme ufọn edida mme edumbet Abasi nsịn ke edinam ye mme n̄kpọ iduọ eke edifụmi mmọ. (Rome 15:4; 1 Corinth 10:11) Ke uwụtn̄kpọ, kere ban̄a mbụk aban̄ade Gehazi ọdiọk-itọn̄, ekedide asan̄autom prọfet Elisha. (2 Ndidem 5:20-27) Ndi enye ikpepke nnyịn ọniọn̄ edifep idiọkitọn̄? Ndien nso kaban̄a idiọk utịp otode Dinah eyen Jacob ndika n̄kese “nditọ-iban idụt” Canaan emi eketiede nte inọhọ unan? (Genesis 34:1-31) Ndi nnyịn isọpke-sọp ikụt unana ifiọk emi odude ke idiọk nsan̄a?—Mme N̄ke 13:20; 1 Corinth 15:33.

Ndikpan̄ utọn̄ ke eti ibuot abuana ndinyene mbufiọk ye asian. Nte Webster’s Revised Unabridged Dictionary ọdọhọde, mbufiọk edi “odudu m̀mê ukeme ekikere emi enye adade abahade n̄kpọ kiet ọkpọn̄ en̄wen.” Mbufiọk otode Abasi edi ukeme ndifiọk se idide eti ye idiọk ndinyụn̄ mmek eti usụn̄ ndisan̄a. Ibọhọke nnyịn ‘isịn esịt nnyịn’ ke mbufiọk m̀mê inyene ọkpọsọn̄ udọn̄ ndinyene enye, didie ke nnyịn ikeme ndika iso ndu ke “inua-otop emi adade owo esịm uwem”? (Matthew 7:14; men Deuteronomy 30:19, 20 domo.) Edikpep ye edida Ikọ Abasi nsịn ke edinam ọnọ mbufiọk.