Ẹtịm Idem Ẹnọ Utom Isụn̄utom ke Mme Iduọk Isua 1990
AKPAN ini ọmọtọn̄ọ ọnọ utom isụn̄utom. Ye ediberede mme usụn̄ ifetutom ke ediwak mbufa isoutom, kpukpru mme anam-akpanikọ Ntiense Jehovah ẹnyene udọn̄ ndisịn ifịk mbịne idem utom oro okponde akan.
Ntre ke ekedi ye ọkpọsọn̄ idotenyịn nte nditọ ufọkn̄wed 24 ke ọyọhọ otu 89 ke Watchtower Bible School of Gilead ẹkedụkde edinam ukụre ufọkn̄wed mmọ ke September 9, 1990. Otuowo ẹwakde ẹbe 5,000 ẹmi ẹkedide isenowo ẹkenọde ikot ye mbonufọk Bethel ẹma ẹsop idem kaban̄a edinam ukụre ufọkn̄wed eke mbufa isụn̄utom emi, oro uma ẹkebọbọ itieutom ke idụt duop. Enịmde ke Ufọkmbono Mme Ntiense Jehovah ke Obio Jersey, New Jersey, mbon oro ẹkesopde idem ke Bethel Brooklyn, In̄wan̄ Enyọn̄ Ukpeme, ye Itie Unọ Ukpep Enyọn̄ Ukpeme ke Patterson, New York, ẹma ẹkop ofụri ndutịm oro n̄ko.
Ke nnennen n̄kanika 10 usenubọk, Theodore Jaracz, owo Otu Ukara Mme Ntiense Jehovah ye etieibuot okpokoro usen oro, ama asiak ikwọ edida mberede. Etienede emi, Arthur Worsley eke mbonufọk Bethel Brooklyn ama ọbọn̄ akam. Etieibuot okpokoro ndien ama etịn̄ otụk Utom Mme Apostle 10:33, ke ebiet akwa owoekọn̄ Rome oro, Cornelius, ọkọdọhọde Peter ete: “Kpukpru nnyịn idu mi ke iso Abasi, man ikop kpukpru se Jehovah ọdọhọde fi etịn̄.” Ẹma ẹwụt nte ke onịm-mbụk n̄kpọntịbe oro akadade itie ke eyo Peter ekedi ndiberede usụn̄ nnọ edikwọrọ eti mbụk nnọ mme owo ẹtode kpukpru idụt.
Philip D. Wilcox, otode In̄wan̄ Enyọn̄ Ukpeme, ama ọnọ akpa ke otu nduaidem nduaidem utịn̄ikọ itiaba oro ẹkọnọde. Osiode oto N̄wed Mbon Philippi 4:7, enye ama ada “Ẹyak Emem Abasi An̄wam Mbufo ke Utom Mbufo” nte ibuotikọ esie. Enye ọkọdọhọ ete: “Jehovah Abasi edi Ntọn̄ọ ata emem. Enye enyene emem ke ofụri ofụri, m̀mê ọyọhọ ọyọhọ ifiọk, inyụn̄ ikopke mfụhọ mfụhọ editịmede esịt, ndịk, m̀mê mfịna ekikere ndomokiet. Mmọdo, ndobo ye emem ẹkanade nyayama iso Jehovah ke ebekpo esie ẹkụk, nte nsem nsem awawa awawa akpara oro John okokụtde ke n̄kukụt owụtde. (Ediyarade 4:2, 3) Emem esie oto ke enye atara osịm kpukpru mbon oro ẹdiyakde enye an̄wam mmọ. Nte afo eyeyak enye an̄wam fi?” Brọda Wilcox ama owụt akpan un̄wam iba, akam ye unyịme ndibet Jehovah. (Micah 7:7; Philippi 4:6) Enye ama ọdọhọ ete ke idụhe n̄kpọ oro Abasi ayakde otịbe oro ekemede ndinọ nnyịn nsinsi unan.
Lloyd Barry, owo Otu Ukara, ama etiene ye ibuotikọ oro “Ẹkaiso Ndituak Inua Imam.” Enye ama ọtọn̄ọ ye ikọ oro, “Imam edi eti ibọkusọbọ.” Enye eketi ubak udịmikọ oro koro ko ke edem ke 1955 enye ekedi ibuotikọ ikpaedem akpa nsiondi magazine Awake! oro okodude ke usem Japanese. Edi nso utọ imam? Idịghe uyom uyom, ndisịme “imam owo ndisịme.” (Ecclesiastes 7:6) Utu ke oro, enye edi inem inem, emem emem imam eke mme isụn̄utom ye eke mbon en̄wen oro ẹyerede ikot oro David ọkọnọde ‘ndidara ke Jehovah’ kpukpru ini. (Psalm 32:11) Brọda Barry ama etịn̄ ete ke kpa ye n̄kpọsọn̄ idomo, Job ama ekeme ndikaiso ntuak inua imam, koro enye ọkọfiọkde ete ke imọ ima imụm nsọn̄ọnda ikama ye Abasi. Mme isụn̄utom oro ẹmụmde nsọn̄ọnda ẹkama kpa ye n̄kpọsọn̄ n̄kpọntịbe nte Job ẹyebọ akwa edidiọn̄ ke akpatre. (Job 29:24; 42:12) Etịn̄ikọ oro ama eberi ete: “Ẹyọhọ ke utom, ẹkaiso ndituak inua imam, ndien mbufo n̄ko ẹyedọk nsinsi ima unyịme Jehovah.”
Etịn̄ikọ efen ekedi Richard E. Abrahamson, oro ekemekde ibuotikọ oro “Ẹyak Kpukpru Owo Ẹkụt Ẹte Ẹmetịm Ẹkara Esịt Mbufo,” ọkọn̄ọde ke N̄wed Mbon Philippi 4:5. Nte ekemde ye ikọ Greek oro enye otode, ikọ oro ‘edikara esịt’ ekeme ndikama ekikere “edinyịme nnọ.” Ndusụk isụn̄utom ẹma ẹnyene mme mfịna n̄kukụre ke ntak ọkpọ ọkpọ n̄kpọ ẹmi owo amade. Kiet ama odu ke n̄kpaidem ke usụn̄ nte ekemmọ isụn̄utom okosịbede ubak cheese ke okpokoro udia. Ke isua utom isụn̄utom 22 ama ekebe, enyeoro okodude ke n̄kpaidem do ama ọdọhọ ete ke ata ediwak mfịna ẹsitọn̄ọ oto n̄kpọ ẹmi mîkponke ndomo esisịt ikan nte owo osịbede cheese. Etịn̄ikọ oro ama ọnọ item ete: “Ẹkpep ndikpụhọde, ukem nte eto ke oyobio. Ediwak edidiọn̄ ẹdu ke ndinyịme nnọ, utọ nte edikeme ndiyọ mme idomo nte ọfọnde nnyụn̄ nsọn̄ọ nyịre ke utom oro owo anamde ye emem eke ekikere.”
Milton G. Henschel, eke Otu Ukara, ama eneme ibuotikọ oro, “Emeberede Akamba Usụn̄ Adade Osịm Utom.” Brọda Henschel ama owụt ete ke Jesus ama ama mme owo, atua mmọ mbọm, onyụn̄ ekpep mmọ ediwak n̄kpọ. Ke Ephesus apostle Paul ama ewet mbon Corinth ete: “Ẹma ẹberede usụn̄ akamba ẹnọ mi ndinam akwa utom do, mmọ eke ẹn̄wanade ye ami ẹnyụn̄ ẹwak.” (1 Corinth 16:8, 9) Kpa ye ubiọn̄ọ emi, Paul ama ekpep n̄kpọ ke ufọkn̄wed Tyrannus ke isua iba, tutu ẹkop etop Obio Ubọn ke ofụri n̄kann̄kụk Asia. (Utom 19:9, 10) Usụn̄ oro ẹkeberede ama ada osịm edikụt unen ke ukwọrọikọ esie. Esop Ephesus okosụk ododu ke edinam ke utịt akpa isua ikie.—Ediyarade 2:1-7.
Jack D. Redford, andikpep Gilead, ama etịn̄ ikọ ke ibuotikọ oro “Ẹkaiso Ndidomo Mfiọk se Mbufo Edide.” (2 Corinth 13:5) Mme isụn̄utom Gilead ẹma ẹberede mbufa an̄wautom ẹnyụn̄ ẹsọn̄ọ mme esop oro ẹma ẹketọtọn̄ọ idem, ẹyọde ekese ẹnyụn̄ ẹbiọn̄ọde mbukpek mbukpek n̄kpọ oro Devil osiode anyan ndiwọn̄ọde mmọ n̄kpọn̄ usụn̄. Mbufa owo ke ẹkaiso ndidiana ye otu oro. Ye in̄wan̄în̄wan̄ ifiọkutom iba, andikpep oro ama owụt nte edide akpan n̄kpọ ndidomo mfiọk mbuọtidem oro owo enyenede. Isụn̄utom kiet ama ataba mme ifetutom esie ke enye ke ntan̄idem ama ekesịn item oro ẹkedụride enye utọn̄ ẹban̄a idiọk usụn̄. Ke edide isio, en̄wen ama ọsọn̄ọ odu ke utom esie ye idatesịt, okposụkedi n̄wan emi ke akpa ọfiọn̄ ita oro enye okodude do, enye ama atak okosụhọ ikpa ye ọkpọ ke ntak udọn̄ọ oro n̄ko okosụn̄ọde ke enye nditaba idet esie ye ukeme ukop n̄kpọ esie. N̄wan emi osụk odu do ke isua 42 ẹma ẹkebe ndien, ebede ke mme ukpepn̄kpọ Bible, ama an̄wam owo 156 ndina baptism. Brọda Redford ama eberi ete: “En̄wana ye Devil, ndien enye eyefehe ọkpọn̄ mbufo. Ẹkûdedei ẹbọ mbukpek mbukpek n̄kpọ esie. Ẹkaiso ndidomo idem mbufo mfiọk. Jehovah eyese mbufo enyịn.”
Ekem, andikpep efen, Ulysses V. Glass, ama etịn̄ ikọ ke ibuotikọ oro, “Eti Ibuot Odu ye Mme Osụk Idem.” (Mme Nke 11:2) Enye ama akama n̄kanika itọn̄ubọk oro odudu utịn anamde asan̄a ndiwụt nte ke un̄wana Ikọ Abasi ekeme ndinam nnyịn “inyene odudu.” “Edi,” enye ama osio owụt ke, “ifiọk ikpọn̄ inọhọ eti ibuot. Abasi oyom nsụkidem n̄ko.” (Micah 6:8) Nsụkidem eyeda nnyịn usụn̄ nditen̄e Abasi, ndien “editọn̄ọ eti ibuot edi uten̄e Jehovah.” (Mme Nke 9:10) Edi akpanikọ, ana nnyịn ikere ke nnyịn imedi n̄kpọ; edibiom idem ikpe ekeme ndikama nsobo. Jehovah ama ọnọ ndusụk owo san̄asan̄a ukeme, kpasụk nte enye akanamde ke ini ẹkebọpde tabernacle, edi ana ẹnam n̄kpọ ẹban̄a edinam akpanikọ ke nsụhọdeidem. Brọda Glass ama asian otu nditọ ufọkn̄wed oro ete, “Ke ini ufọkn̄wed oro, mbufo ẹma ẹnọ uyarade edidi se ẹberide edem ẹnyụn̄ ẹkponode. Ewụt ukem edinam akpanikọ emi ke utom mbufo, ndien Abasi eyediọn̄ mbufo.”
Albert D. Schroeder, eke Otu Ukara, ama ọnọ akpan utịn̄ikọ ke ibuotikọ oro, “Etịm Idem Mfọn Mfọn Enọ Utom Isụn̄utom ke Iduọk Isua 1990.” Enye ọkọtọn̄ọ ete: “Iduọk isua 1990 ama eyenyene uyom uyom ntọn̄ọ. Ẹma ẹnyen̄e ediwak idụt Edem Usiahautịn Europe. Ke ndusụk ọfiọn̄ ẹmi ẹkebede, ẹma ẹberede Ibibene Berlin. The New York Times ama akama ibuotikọ oro: ‘August 1990, Ọfiọn̄ Oro Ekenyen̄ede Ererimbot.’ Ntre, mbufo mme andikụre ufọkn̄wed ẹdu uwem ke ini nnyen̄e. Nte ọfiọn̄ ition oro mbufo ẹkeda ẹbọ ukpep otịm mbufo idem ọnọ emi? Ke akpanikọ ama otịm!” Enye ndien ama asiak ndusụk ikpehe New World Translation of the Holy Scriptures—With References oro ọnọde un̄wam ye nte edikpep enye akanamde Ikọ Abasi enyene uwem. Okopodudu n̄kpọutom efen oro okotịmde nditọ ufọkn̄wed oro idem ekedi “All Scripture Is Inspired of God and Beneficial,” idahaemi odude ke nsiondi eke 1990 oro ẹfiakde ẹdụn̄ọde. N̄wed ẹsiode ndondo emi, Mankind’s Search for God ekpenyene n̄ko ndidi okopodudu n̄kpọ un̄wam nnọ mme isụn̄utom. Brọda Schroeder ama eberi ete: “Ntre ndien, nditọete, ẹkọm Jehovah ẹban̄a utịbe utịbe, anana ekọmurua ukpepn̄kpọ oro mbufo ẹkenyenede—kiet oro ọsọn̄ọde ada ndien owo mîkemeke ndinyen̄e. Ẹwọrọ ẹka ye edidiọn̄ Jehovah ẹnyụn̄ ẹnyene ọyọhọ mbuọtidem ke enye ye ke utịbe utịbe Adausụn̄ nnyịn, Jesus Christ. Ikọ ẹmi nnyịn inyenede ke N̄wed Abasi ke akpanikọ ẹdi eke odudu spirit ẹyenyụn̄ ẹkpeme onyụn̄ ada mbufo usụn̄ ke utom isụn̄utom.”
Ẹma ẹkot mme ikọ ekọm ẹtode idụt 11. Ndi tọ ufọkn̄wed oro ẹma ẹbọ n̄weditoro mmọ, ndien kiet ke otu mmọ ama okot leta uwụt esịtekọm ọnọ Otu Ukara ye mbonufọk Bethel.
Edinam uwemeyo ama esịne ibio ibio ukpepn̄kpọ Enyọn̄-Ukpeme, oro David L. Walker, owo Kọmiti In̄wan̄ Enyọn̄ Ukpeme, okonịmde. Ekem nditọ ufọkn̄wed oro ẹma ẹkama aduai-owo-idem ibuotikọ oro, “Odudu oro Akam Enyenede ke Ukwọrọikọ” ke ndinanam n̄wụt mme ifiọkutom an̄wautom. Esop n̄kann̄kụk kiet ama owụt edemede owo udọn̄ drama oro, Ẹsio ke Ufụn Man Ẹmenede Utuakibuot Akpanikọ, ọkọn̄ọde ke edinyọn̄ oro Ezra akafiakde ọnyọn̄ Jerusalem man ekemenede utuakibuot akpanikọ. Brọda Frederick W. Franz, etieibuot okpokoro Ufọkn̄wed Gilead, ama eberi ye akam oro otụkde owo esịt.
[Ndise ke page 24]
Mme Andikụre Ufọkn̄wed Ọyọhọ Otu 89 eke Watchtower Bible School of Gilead
Ke udịm enyịn̄ etienede mi, ẹtọn̄ọ ke udịm iso ẹnọ nọmba ẹka edem, ẹnyụn̄ ẹtọn̄ọ ke ufien ẹwet enyịn̄ ẹka nnasia ke udịm kiet kiet. (1) Ahr, K.; Johnston, L.; Ng Ying Kin, V.; Sukkau, A.; Rodriguez, A.; Myklebust, N. (2) Ahr, H.; Verbeek, P.; Verbeek, K.; DeBolt, S.; DeBolt, S. (3) Sukkau, W.; Ayala, L.; Ayala, S.; Jenson, R.; Ng Ying Kin, J.; Myklebust, T. (4) Rodriguez, C.; Ferlisi, G.; Ferlisi, L.; Tank, J.; Jenson, K.; Tank, J.; Johnston, P.