Owo Emi Enyenede Ifụre Ifụre Ido Enyene Ọniọn̄
Usen kiet, Toñi ama efịk n̄kanika enyịnusụn̄ akanian̄wan mma kiet emi enye esisede enyịn. Eyen mma oro ama ọwọrọ edi, edisụn̄i onyụn̄ ọsọn̄ọ enye enyịn ke ntak emi enye mîkabakke-bak idise iban̄a eka imọ. Toñi ikedịghe ke idiọk ini. Kpa ye oro, enye ama ekpe enye ubọk ete okûyat esịt.
EYEN mma oro ama afiak anam ukem n̄kpọ emi ye Toñi ke ini enye akafiakde aka do edem usen. Nso ke Toñi akanam isan̄ emi? Toñi ọdọhọ ete: “Ikememke utom ndimụm idem n̄kama. Inyeneke se n̄kanamde emi akpanamde enye ọtọk mi ntre.” Edi Toñi ama afiak ekpe enye ubọk onyụn̄ ọdọhọ ke imọfiọk ke imemke inọ enye.
Ekpedi afo ekedi Toñi, nso ke akpakanam? Ndi ekpekekeme ndinam n̄kpọ ifụre ifụre ye enye? Ndi ekpekenen̄ede ọsọn̄ fi ndimụm idem n̄kama? Ke nditịn̄ akpanikọ, isimemke utom ndimụm idem n̄kama ke ini utọ n̄kpọ emi etịbede. Esinen̄ede ọsọn̄ ndinam n̄kpọ ifụre ifụre ke ini owo anamde se iyatde nnyịn.
Edi Bible ọdọhọ yak ikọt Abasi ẹnyene ifụre ifụre ido. Ikọ Abasi ọdọhọ ke owo emi enyenede utọ edu emi enyene ọniọn̄. James ọkọdọhọ ete: “Anie enyene ọniọn̄ ye ifiọk ke otu mbufo? Yak enye ada nti edu esie owụt utom esie ke ifụre ifụre ido oro asan̄ade ye ọniọn̄.” (Jas. 3:13) Didie ke owo emi enyenede ifụre ifụre ido enyene ọniọn̄ emi otode Abasi? Nso ikeme ndin̄wam nnyịn inyene ifụre ifụre ido?
NTAK EMI ỌFỌNDE INYENE IFỤRE IFỤRE IDO
Ifụre ifụre ido ekeme ndisịn emem. “Sụn̄sụn̄ ibọrọ osụk ifụtesịt, edi uyat uyat ikọ edemede iyatesịt.”—N̄ke 15:1.
Edieke owo etịn̄de se iyatde nnyịn, ifọnke itịn̄ se iyatde enye n̄ko, sia oro edikam ababiat n̄kpọ. Ekpetie nte ndin̄wan̄a petrol ndọn̄ ke ikan̄. (N̄ke 26:21) Edi ifụre ifụre ido ayan̄wam nnyịn inam n̄kpọ emem emem, ndien utọk emi okpodude ididụhe aba. Ndinam n̄kpọ ntem ekeme ndinam owo emi esisọn̄de ido okpụhọde.
Se ikonyụn̄ itịbede inọ Toñi edi emi ke ini enye akanamde n̄kpọ ifụre ifụre ye eyen mma oro. Eyen mma oro ama ọtọn̄ọ nditua, ekem ọdọhọ enye ke mfịna ubon ye mme mfịna en̄wen ekịm imọ enyịn. Toñi ama ọkwọrọ ikọ ọnọ enye, enye ama onyụn̄ enyịme ndikpep Bible. Ifụre ifụre ido akanam Toñi ekeme ndinam emi.
Owo emi enyenede ifụre ifụre ido okop inemesịt. “Mmọ oro ẹnyenede ifụre ifụre ido ẹkop inemesịt, koro mmọ ẹyeda isọn̄ ẹnyene.”—Matt. 5:5.
Nso isinam mbon oro ẹnyenede ifụre ifụre ido ẹkop inemesịt? Ata ediwak mbon emi ẹkesidude uwem afai afai ẹkop inemesịt idahaemi ke ntak emi mmọ ẹnyenede ifụre ifụre ido. Mmọ ẹdidu eti uwem idahaemi, ẹnyụn̄ ẹdori enyịn ndidu uwem ke nsinsi. (Col. 3:12) Adolfo, emi edide esenyịn circuit ke Spain, etịn̄ nte uwem esie ekesitiede ke ini enye mîkodụkke esop Abasi.
Enye ọdọhọ ete: “Uwem mi ikọwọrọke usụn̄. Mma nsisọp iyatesịt tutu mme ufan mi ẹkefefehe mi. Edi n̄kpọ ama etịbe usen kiet emi akanamde mi n̄kpụhọde. Ke ini n̄kan̄wanade en̄wan, ẹma ẹkịm mi ke itie itiokiet, iyịp ama ọwọrọ mi tutu n̄kpere ndikpa.”
Edi idahaemi, Adolfo edikam ekpekpep mbon en̄wen ndinyene ifụre ifụre ido. Ata ediwak owo ẹma enye idahaemi ke ntak nte enye odude uwem. Enye esikọm Jehovah ke ndikan̄wam imọ ikpụhọde, ndien emi esinam esịt enem enye etieti.
Owo emi enyenede ifụre ifụre ido esinam esịt enem Jehovah. “Eyen mi, nyene ọniọn̄, nyụn̄ dat mi esịt, man n̄kụt se ndibọrọde owo eke osụn̄ide mi.”—N̄ke 27:11.
Devil, akakan asua Jehovah, esisụn̄i Jehovah. Utọ usọn̄enyịn emi edi se ikpayatde Jehovah, edi Bible ọdọhọ ke Jehovah “isọpke iyatesịt.” (Ex. 34:6) Iyanam esịt enem Jehovah edieke nnyịn mîsọpke iyatesịt, inyụn̄ inyenede ifụre ifụre ido nte enye.—Eph. 5:1.
Mbon ererimbot emi ẹtie afai afai. Nnyịn imesikụt nte mme owo ‘ẹkohorede idem, ẹseride iseri, ẹsụn̄ide isụn̄i, ẹdọkde edidọk, ẹnanade mfara ke idem, ẹnyụn̄ ẹtiede obom obom.’ (2 Tim. 3:2, 3) Edi ikpanaha ikpebe mmọ. Ikọ Abasi ọdọhọ ke ‘ọniọn̄ eke otode enyọn̄ etie emem emem onyụn̄ enyene eti ibuot.’ (Jas. 3:17) Edieke itiede emem emem inyụn̄ inyenede eti ibuot, oro oyowụt ke imenyene ọniọn̄ emi otode Abasi. Ọniọn̄ emi ayan̄wam nnyịn inam n̄kpọ emem emem ke ini esịt ayatde nnyịn, iyonyụn̄ inen̄ede ikpere Jehovah Abasi emi enyenede ọniọn̄ akan.