Ẹka Iso Ẹsọn̄ọ Ẹda nte N̄kpọ eke Ẹkụtde Enye Emi Enyịn Owo Mîkwe!
“[Moses ọsọn̄ọ] ada nte n̄kpọ eke okụtde Enye emi enyịn owo mîkwe.”—Mme Hebrew 11:27.
1. Nso n̄wọrọnda ikọ ke Jesus eketịn̄ aban̄a Abasi ke Ukwọrọikọ esie oro ke Obot?
JEHOVAH edi Abasi emi enyịn owo mîkwe. Ke ini Moses ekeben̄ede ndikụt ubọn̄ Esie, Jehovah ọkọdọhọ ete: “Afo ukemeke ndikụt mi iso: koro owo ndomo kiet mîkwe mi iso idu uwem.” (Exodus 33:20) Ndien apostle John ekewet ete: “Akanam baba owo kiet ikwe Abasi.” (John 1:18) Ke ini Jesus Christ ekedide owo ke isọn̄, enye ikakam ikemeke ndikụt Abasi. Nte ededi, ke Ukwọrọikọ esie oro ke Obot, Jesus ama ọdọhọ ete: “Ọfọfọn ọnọ mmọ eke esịt mmọ asan̄ade: koro mmọ ẹyekụt Abasi.” (Matthew 5:8) Nso ke ikọ Jesus ọkọwọrọ?
2. Ntak emi nnyịn mîkemeke ndida ata ata enyịn nnyịn n̄kụt Abasi?
2 N̄wed Abasi etịn̄ aban̄a Jehovah nte Spirit oro enyịn owo mîkwe. (John 4:24; Colossae 1:15; 1 Timothy 1:17) Ntem, Jesus ikọdọhọke ite ke nnyịn mme owo imekeme ndida ata ata enyịn nnyịn n̄kụt Jehovah. Edi akpanikọ, mme Christian oro ẹyetde aran ẹyekụt Jehovah Abasi ke heaven ke ẹma ẹkenam mmọ ẹset nte mme edibotn̄kpọ eke spirit. Edi mme owo oro “esịt mmọ asanade” oro ẹnyụn̄ ẹnyenede idotenyịn edidu uwem ke nsinsi ke isọn̄ ẹkeme n̄ko ‘ndikụt’ Abasi. Didie ke emi ekeme nditịbe?
3. Didie ke mme owo ẹkeme ndikụt ndusụk edu Abasi?
3 Nnyịn ikpep n̄kpọ iban̄a Jehovah ebe ke nditịn̄ enyịn nse mme n̄kpọ oro enye okobotde. Ke ntem, odudu esie ekeme nditụk nnyịn onyụn̄ onụk nnyịn ndinyịme enye nte Abasi emi edide Andibot. (Mme Hebrew 11:3; Ediyarade 4:10b) Ke afan̄ emi, apostle Paul ekewet ete: “Tọn̄ọ ẹkebot ererimbot owo ẹtịm ẹkụt [mme edu Abasi oro enyịn owo mîkwe, NW], kpa nsinsi odudu Esie ye idaha Esie nte Abasi; ẹda mme n̄kpọ emi Enye akanamde ẹtịm ẹfiọk.” (Rome 1:20) Ntem mme ikọ Jesus ẹban̄ade ndikụt Abasi ẹsịne ukeme edikụt ndusụk edu Jehovah. Utọ edikụt oro ọkọn̄ọ ke nnennen ifiọk ẹnyụn̄ ẹda “enyịn esịt” ẹkụt ke usụn̄ eke spirit. (Ephesus 1:18) Mme ikọ ye edinam Jesus n̄ko ẹyarade ekese ẹban̄a Abasi. Ntem, Jesus ama ọdọhọ ete: “Owo eke okokụtde Mi okokụt Ete.” (John 14:9) Jesus ama owụt mbiet edu Jehovah ke mfọnmma usụn̄. Ntem, ndifiọk uwem ye mme ukpepn̄kpọ Jesus ẹkeme ndin̄wam nnyịn ndikụt ndusụk edu Abasi.
Idaha eke Spirit Edi Akpan N̄kpọ
4. Didie ke ediwak owo ẹwụt unana idaha eke spirit mfịn?
4 Mfịn, mbuọtidem ye ata idaha eke spirit ẹnen̄ede ẹnana. Paul ọkọdọhọ ete: “Idịghe kpukpru owo ẹnyene mbuọtidem.” (2 Thessalonica 3:2) Ediwak owo ẹsịn idem ofụri ofụri ke mbubehe idemmọ inyụn̄ inyeneke mbuọtidem ke Abasi. Edu unam idiọkn̄kpọ mmọ ye unana idaha eke spirit ọbiọn̄ọ mmọ ndida enyịn ikike n̄kụt enye, koro apostle John ekewet ete: “Owo eke anamde se idiọkde ikekwe Abasi.” (3 John 11) Sia mme utọ owo oro mîdaha enyịn ikpọkidem ikụt Abasi, mmọ ẹnam n̄kpọ nte n̄kpọ eke enye mîkwe se mmọ ẹnamde. (Ezekiel 9:9) Mmọ ẹse mme n̄kpọ eke spirit ke ndek, ntre mmọ ikemeke ndinyene “ifiọk Abasi.” (Mme N̄ke 2:5) Do, nte odotde, Paul ama ewet ete: “Owo eke mînyeneke spirit ibọhọ mme n̄kpọ Spirit Abasi; koro mmọ ẹdide ndisịme n̄kpọ ke enyịn esie; enye inyụn̄ ikemeke ndifiọk mmọ, koro edi spirit ekpep owo ẹdomo mmọ ẹfiọk.”—1 Corinth 2:14.
5. Mme owo oro ẹkerede n̄kpọ eke spirit ẹfiọk akpanikọ ewe?
5 Nte ededi, edieke nnyịn ikerede n̄kpọ eke spirit, nnyịn iyọfiọk kpukpru ini ite ke okposụkedi Jehovah mîdịghe Abasi emi esiyomde ndudue, enye ọfiọk ini oro nnyịn inamde n̄kpọ itiene ndiọi ekikere ye ndiọi udọn̄. Ke akpanikọ, “mme usụn̄ owo [ẹna] in̄wan̄ ke iso Jehovah, enye onyụn̄ odomo kpukpru ido owo.” (Mme N̄ke 5:21) Edieke idiọkn̄kpọ akande nnyịn ubọk, oyonụk nnyịn ndikabade esịt nnyụn̄ nyom edifen nnọ otode Jehovah koro nnyịn imade enye mînyụn̄ iyomke ndisuene enye.—Psalm 78:41; 130:3.
Nso Inam Nnyịn Isọn̄ọ Ida?
6. Nso ke ndisọn̄ọ nda ọwọrọ?
6 Okposụkedi nnyịn mîkemeke ndikụt Jehovah, ẹyak nnyịn iti kpukpru ini ite ke enye ke okụt nnyịn. Ndifiọk ke enye mmọdo nnyụn̄ nnịm ke akpanikọ nte ke enye odu ekpere kpukpru mmọ oro ẹsemede ẹnọ enye ayan̄wam nnyịn ndisọn̄ọ nda—ndisọn̄ọ nda ye unana edisehede ke edinam akpanikọ nnyịn nnọ enye. (Psalm 145:18) Nnyịn imekeme nditie nte Moses, oro Paul ekewetde aban̄a ete: “Oto mbuọtidem enye ọwọrọ ọkpọn̄ Egypt, ifeheke iyatesịt edidem; koro enye ọsọn̄ọde ada nte n̄kpọ eke enye okụtde Enye emi enyịn owo mîkwe.”—Mme Hebrew 11:27.
7, 8. Nso ikọnọ Moses uko ndida ke iso Pharaoh?
7 Ke ndinam utom oro Abasi ọkọdọn̄de enye ete ada nditọ Israel usụn̄ ọwọrọ ke ufụn Egypt, Moses ama esiwak ndika iso ọsọn̄ido Pharaoh ke ufọk ubọn̄ oro mme adaiso ido ukpono ye ikpọ owo ukara ẹkeyọhọde. Eyedi ẹma ẹbon ndisọi n̄kpọ ẹkanade ibibene ufọk ubọn̄ oro. Edi Jehovah, okposụkedi enyịn owo mîkwe, ekedi ata ata owo ọnọ Moses, ke mîbietke kpukpru ndisọi n̄kpọ oro ẹkedade ẹnọ mme anana-uwem abasi Egypt. Eyịghe idụhe Moses mîkayakke Pharaoh esịn enye ndịk ke idem!
8 Nso ikọnọ Moses uko ndika iso Pharaoh ndien ndien? N̄wed Abasi asian nnyịn ete ke “Moses oro edi ata sụn̄sụn̄ owo, akan kpukpru owo emi ẹdude ke iso ererimbot.” (Numbers 12:3) Nte an̄wan̄ade, nsọn̄idem esie ke n̄kan̄ eke spirit ye mbuọtidem nte ke Abasi odu ye imọ ama ọnọ Moses odudu oro enye okoyomde man enye ada ọnọ “Enye emi enyịn owo mîkwe” ke iso anana-mbọm edidem. Nso idi ndusụk usụn̄ oro mbon oro ‘ẹkụtde’ Abasi oro enyịn owo mîkwe ẹwụtde mbuọtidem mmọ ke enye mfịn?
9. Nso idi usụn̄ kiet oro nnyịn ikemede ndika iso nsọn̄ọ nda?
9 Usụn̄ kiet ndiwụt mbuọtidem nnyụn̄ n̄ka iso nsọn̄ọ nda nte n̄kpọ eke ikụtde Enye emi enyịn owo mîkwe edi ndikwọrọ ikọ uko uko kpa ye ukọbọ. Jesus ama odụri mme mbet esie utọn̄ ete: “Kpukpru owo ẹyesua mbufo kaban̄a enyịn̄ Mi.” (Luke 21:17) Enye n̄ko ama ọdọhọ mmọ ete: “Asan̄autom ikponke ikan ete-ufọk. Edieke mmọ ẹkesịnde Mi enyịn, ẹyesịn mbufo enyịn n̄ko.” (John 15:20) Nte Jesus ọkọdọhọde, esisịt ini ke enye ama akakpa, mme anditiene enye ẹma ẹsobo ukọbọ ke orụk ndịghe, edimụm, ye umia. (Utom 4:1-3, 18-21; 5:17, 18, 40) Okposụkedi ọkpọsọn̄ ukọbọ okodude, mme apostle Jesus ye mme mbet eken ẹma ẹka iso ndikwọrọ eti mbụk uko uko.—Utom 4:29-31.
10. Didie ke mbuọtidem nnyịn ke ukpeme Jehovah an̄wam nnyịn ke utom ukwọrọikọ?
10 Ukem nte Moses, mme akpa anditiene Jesus ikayakke ediwak mme asua mmọ oro ẹkụtde ke enyịn ẹsịn mmọ ndịk ke idem. Mme mbet Jesus ẹma ẹnyene mbuọtidem ke Abasi, ndien nte utịp, mmọ ẹma ẹkeme ndiyọ ọkpọsọn̄ ukọbọ oro mmọ ẹkesobode. Ih, mmọ ẹma ẹka iso ẹsọn̄ọ ẹda nte n̄kpọ eke ẹkụtde Enye emi enyịn owo mîkwe. Mfịn ndika iso mfiọk nte ke imenyene ukpeme Jehovah ọsọn̄ọ nnyịn idem, ọnọde nnyịn uko ke utom ukwọrọikọ Obio Ubọn̄ nnyịn. Ikọ Abasi ọdọhọ ete ke “uten̄e owo ọkọk afia enịm: edi ẹda owo eke ọbuọtde idem esie ye Jehovah ẹmenede enye ẹnịm ke enyọn̄.” (Mme N̄ke 29:25) Mmọdo, nnyịn ifiakke edem ke ntak ndịk ukọbọ, m̀mê ndikop bụt mban̄a utom ukwọrọikọ nnyịn. Mbuọtidem nnyịn onụk nnyịn ndinọ mme mbọhọidụn̄, mme nsan̄autom, mme nsan̄a ufọkn̄wed, ye mbon en̄wen ikọ ntiense uko uko.—Rome 1:14-16.
Enye Emi Enyịn Owo Mîkwe Ada Ikọt Esie Usụn̄
11. Nte Peter ye Jude ẹtịn̄de, didie ke ndusụk mbon oro ẹkebuanade ke esop Christian ẹkewụt unana idaha eke spirit?
11 Mbuọtidem an̄wam nnyịn ndikụt Jehovah nte enye emi adade esop esie eke isọn̄ usụn̄. Ke ntem, nnyịn imesifep ndikụt ndudue nnọ mbon oro ẹkamade ifet ke esop. Apostle Peter ye Jude eyeneka Jesus ẹma ẹdụri owo utọn̄ ẹban̄a ndusụk owo oro ẹkenanade idaha eke spirit tutu mmọ ẹsụn̄i iren oro ẹkedade usụn̄ ke otu mme Christian. (2 Peter 2:9-12; Jude 8) Ndi mme utọ okụt-ndudue oro ẹkpeketịn̄ ikọ ke usụn̄ oro ke iso Jehovah edieke mmọ ẹkpekekemede ndida ata ata enyịn n̄kụt enye? Ikpetịn̄ke! Edi sia owo mîkemeke ndikụt Abasi, iren oro ikekereke ke mmimọ iyanam ibat inọ enye.
12. Nso edu ke nnyịn ikpowụt kaban̄a mme andida usụn̄ ke esop?
12 Edi akpanikọ, mme anana-mfọnmma owo ẹnam esop Christian. Mbon oro ẹnamde utom nte mbiowo ẹsinam ndudue oro ndusụk ini ekemede nditụk nnyịn ọkpọkpọ. Kpa ye oro, Jehovah ke ada utọ iren oro anam n̄kpọ nte mme ekpemerọn̄ esie. (1 Peter 5:1, 2) Iren ye iban oro ẹkerede n̄kpọ spirit ẹfiọk ẹte ke emi edi usụn̄ kiet oro Jehovah adade ikọt esie usụn̄. Ke ntre, nte mme Christian, nnyịn imesifep edu edikụt ndudue nnọ, inyụn̄ iwụt ukpono inọ mme ndutịm ukara Abasi. Ebede ke ndikop uyo mme andida nnyịn usụn̄, nnyịn iwụt ke imokụt Enye emi enyịn owo mîkwe.—Mme Hebrew 13:17.
Ndise Abasi nte Akwa Anditeme Nnyịn
13, 14. Ndise Jehovah nte Akwa Anditeme ọwọrọ nso ọnọ fi?
13 Ikpehe efen odu oro oyomde ukeme edikụt n̄kpọ eke spirit. Isaiah ama etịn̄ ntịn̄nnịm ikọ ete: “Enyịn fo ẹyenyụn̄ ẹkụt [Akwa Anditeme, NW] fi.” (Isaiah 30:20) Oyom mbuọtidem man ifiọk nte ke Jehovah edi Enye emi ọnọde nnyịn ukpep ebe ke esop esie eke isọn̄. (Matthew 24:45-47) Ndise Abasi nte Akwa Anditeme nnyịn esịne se ikande edimụm nti edu edikpep Bible n̄kama ye edidụk mme mbono esop Christian kpukpru ini. Enye ọwọrọ ndibọ ufọn ọyọhọ ọyọhọ nto mme ndutịm eke spirit oro Abasi anamde. Ke uwụtn̄kpọ, oyom itịm ikpan̄ utọn̄ ke ndausụn̄ oro Jehovah ọnọde ebe ke Jesus man nnyịn ikûfiọrọ ikpọn̄ usụn̄ ke n̄kan̄ eke spirit.—Mme Hebrew 2:1.
14 Ndusụk ini esiyom ẹsịn akpan ukeme man ẹbọ ọyọhọ ufọn ẹto udia eke spirit. Ke uwụtn̄kpọ, nnyịn imekeme ndinyene ntụhọ edikot ndusụk mbụk Bible oro ẹsọn̄de nnyịn ndifiọk enyọn̄ enyọn̄. Ke ini ikotde Enyọn̄-Ukpeme ye Awake!, eyedi nnyịn imesikam ibe ikpọn̄ ndusụk ibuotikọ koro nneme oro mînen̄ekede idi n̄kpọ udọn̄ inọ nnyịn. Mîdịghe nnyịn imekeme ndiyak ekikere nnyịn oyo ke mme mbono esop Christian. Nte ededi, nnyịn imekeme ndika iso ndu ke edidemede edieke nnyịn itịmde ikere mme akpan n̄kpọ oro ẹnemede. Ntotụn̄ọ esịtekọm oro iwụtde iban̄a item eke spirit oro nnyịn ibọde owụt nte ke nnyịn imọdiọn̄ọ Jehovah nte Akwa Anditeme nnyịn.
Nnyịn Inyene Ndinam Ibat
15. Didie ke ndusụk owo ẹnam n̄kpọ nte n̄kpọ eke Jehovah mîkwe mmọ?
15 Ndinyene mbuọtidem ke Enye emi enyịn owo mîkwe edi akpan n̄kpọ akpan akpan sia idiọkido enen̄erede atara ke “utịt ini” emi. (Daniel 12:4) Unana edinam akpanikọ ye oburobụt ido ẹdu ntatara ntatara. Nte ededi, owụt eti ibuot nditi nte ke Jehovah okụt se nnyịn inamde idem ke ini mme owo mîkemeke ndikụt nnyịn. Ndusụk owo ifiọkke akpanikọ emi. Ke ini mbon efen mîkwe mmọ, mmọ ẹkeme ndisịn idem ke mme edinam oro mîkemke ye N̄wed Abasi. Ke uwụtn̄kpọ, ndusụk owo isibiọn̄ọke idomo edise edinam unọ idem inemesịt oro ekemede ndinọ unan ye ndise idan̄ ke Intanet, ekebe ndise m̀mê orụk n̄kpọ efen oro ẹsion̄ode ẹdi mfịn. Sia ẹkemede ndisịn idem ke mme utọ n̄kpọ oro ke ndịbe, ndusụk owo ẹnam n̄kpọ nte n̄kpọ eke Jehovah mîkwe se mmọ ẹnamde.
16. Nso ikpan̄wam nnyịn ndinam n̄kpọ ekekem ye mme n̄kokon̄ idaha Jehovah?
16 Ọfọn nditi mme ikọ apostle Paul emi: “Kpukpru nnyịn kiet kiet iyobụk mbụk iban̄a idem esie inọ Abasi.” (Rome 14:12) Oyom nnyịn ifiọk nte ke kpukpru ini oro nnyịn inamde idiọkn̄kpọ, nnyịn idue Jehovah. Ndifiọk emi ekpenyene ndin̄wam nnyịn ndinam n̄kpọ n̄kekem ye mme n̄kokon̄ idaha esie ndinyụn̄ mfep ndedehe edinam. Bible eti nnyịn ete: “Baba n̄kpọ kiet eke edịbede Enye ke enyịn inyụn̄ idụhe; edi kpukpru n̄kpọ ẹna iferi ye ata in̄wan̄-in̄wan̄ ke enyịn Abasi, emi nnyịn [inyenede ndinam ibat nnọ, NW].” (Mme Hebrew 4:13) Edi akpanikọ, nnyịn inyene ndinam ibat nnọ Abasi, edi enen̄ede edi ntotụn̄ọ ima oro inyenede inọ Jehovah edi akpan ntak oro nnyịn inamde uduak esie inyụn̄ idude uwem ekekem ye ndinen idaha esie. Ke ntre, ẹyak nnyịn iwụt mbufiọk ke mme utọ n̄kpọ nte unọ idem inemesịt oro imekde ye ke nte nnyịn inamde n̄kpọ ye owo isio uduot.
17. Jehovah esise nnyịn ye nso utọ udọn̄?
17 Jehovah enyene ọkpọsọn̄ udọn̄ ke idem nnyịn, edi oro iwọrọke ite ke enye ebebet nnyịn inam ndudue man enye akpamia nnyịn ufen. Utu ke oro, enye esise nnyịn ye ima ima udọn̄ ebietde eke ete oro oyomde ndinọ mme okop-item nditọ esie utịp. Ọnọ ndọn̄esịt didie ntem ndifiọk nte ke mbuọtidem oro inyenede enem Ete nnyịn eke heaven esịt ye nte ke enye edi “Andinọ mmọ emi ẹyomde Enye utịp”! (Mme Hebrew 11:6) Nnyịn ikpakam iwụt ọyọhọ mbuọtidem ke Jehovah inyụn̄ ‘inam n̄kpọ esie ke ofụri esịt.’—1 Chronicles 28:9.
18. Sia Jehovah okụtde nnyịn onyụn̄ ọfiọkde edinam akpanikọ nnyịn, nso nsọn̄ọ ke nnyịn inyene ito N̄wed Abasi?
18 Mme N̄ke 15:3 ọdọhọ ete: “Enyịn Jehovah ẹdu ke kpukpru ebiet, ẹse mme idiọk owo ye nti.” Ih, Abasi ese mme idiọkowo onyụn̄ anam n̄kpọ ye mmọ etiene edu mmọ. Nte ededi, edieke nnyịn idude ke otu ‘nti owo,’ nnyịn imekeme nditịm nnịm nte ke Jehovah etịm ọfiọk edinam akpanikọ nnyịn. Ọsọn̄ọ mbuọtidem didie ntem ndifiọk nte ke ‘utom eke nnyịn inamde idiwọrọke idi ikpîkpu ke Ọbọn̄’ ye nte ke Enye emi enyịn owo mîkwe ‘idifreke utom nnyịn ye ima enyịn̄ esie oro nnyịn iwụtde’!—1 Corinth 15:58; Mme Hebrew 6:10.
Ndiben̄e Jehovah Odụn̄ọde Nnyịn
19. Nso idi ndusụk ufọn oro ẹsisụn̄ọde ẹto edinyene ọkpọsọn̄ mbuọtidem ke Jehovah?
19 Nte mme anam-akpanikọ asan̄autom Jehovah, nnyịn imọsọn̄ urua ke enyịn esie. (Matthew 10:29-31) Okposụkedi enye edide Enye emi enyịn owo mîkwe, enye ekeme ndidi ata ata owo nnọ nnyịn, ndien nnyịn imekeme ndima ọsọn̄urua itie ebuana oro nnyịn inyenede ye enye. Ndinyene utọ edu oro mban̄a Ete nnyịn eke heaven ayada ediwak ufọn ọsọk nnyịn. Ọkpọsọn̄ mbuọtidem nnyịn an̄wam nnyịn ndinyene edisana esịt ye eti ubieresịt ke iso Jehovah. Mbuọtidem oro mîsan̄ake ye mbubịk ekpeme nnyịn n̄ko ọbiọn̄ọ edidu uwem esịt iba. (1 Timothy 1:5, 18, 19) Mbuọtidem oro mîyokke emi inyenede ke Abasi enịm eti uwụtn̄kpọ ọnọ, onyụn̄ ekeme ndinyene eti utịp ke idem mbon oro ẹdude ẹkpere nnyịn. (1 Timothy 4:12) Akan oro, utọ mbuọtidem oro esịn udọn̄ ọnọ edu uten̄e Abasi, anamde esịt Jehovah adat.—Mme N̄ke 27:11.
20, 21. (a) Ntak oyomde Jehovah ese nnyịn? (b) Didie ke nnyịn ikeme ndida Psalm 139:23, 24 mbuan ye idem nnyịn?
20 Edieke nnyịn inen̄ede inyene eti ibuot, nnyịn iyadat esịt Jehovah ndise nnyịn. Nnyịn iyomke enye ese nnyịn kpọt edi iyom enye n̄ko enen̄ede odụn̄ọde ekikere ye mme edinam nnyịn. Ke akam, nnyịn iyanam ọfọn ndiben̄e Jehovah odụn̄ọde nnyịn onyụn̄ ese m̀mê nnyịn imenyene mme ukwan̄ ekikere ekededi. Ke akpanikọ enye ekeme ndin̄wam nnyịn ndiyọ mme mfịna nnyịn nnyụn̄ nnam edinen̄ede ekededi oro ẹyomde. Nte odotde, David andiwet Psalm ama ọkwọ ete: “O Abasi, dụn̄ọde mi, nyụn̄ fiọk esịt mi: domo mi, nyụn̄ fiọk ekikere mi: Nyụn̄ se m̀mê usụn̄ ukwan̄ odu mi ke esịt, nyụn̄ da mi usụn̄ nsinsi uwem.”—Psalm 139:23, 24.
21 David ekekpe Jehovah ubọk ete odụn̄ọde imọ ese m̀mê ‘ukwan̄ usụn̄’ ekededi ama odu imọ ke esịt. Ukem nte andiwet psalm, nte nnyịn iyomke Abasi odụn̄ọde esịt nnyịn ese m̀mê nnyịn imenyene ndiọi uduak? Do, ke mbuọtidem ẹyak nnyịn iben̄e Jehovah odụn̄ọde nnyịn. Edi nso edieke esịt etịmerede nnyịn kaban̄a ndusụk idiọkn̄kpọ oro ikanamde m̀mê idiọkn̄kpọ odude nnyịn ke esịt? Do ẹyak nnyịn ika iso ndibọn̄ akam ke ofụri esịt nnọ ima ima Abasi nnyịn, Jehovah, inyụn̄ isụk idem inọ ndausụn̄ edisana spirit esie ye item otode Ikọ esie. Nnyịn imenyene mbuọtidem nte ke enye eyedi edin̄wam nnyịn ke oyonyụn̄ an̄wam nnyịn ndibịne usụn̄ oro edidade isịm nsinsi uwem.—Psalm 40:11-13.
22. Nso ikpedi ubiere nnyịn ke ebuana ye Enye emi enyịn owo mîkwe?
22 Ih, Jehovah ayada nsinsi uwem ọdiọn̄ nnyịn edieke nnyịn isịmde mme n̄kpọ oro enye oyomde. Nte ededi, ana nnyịn inyịme ke enye enyene odudu, idem nte apostle Paul ekenyịmede ke ini enye ekewetde ete: “Yak ẹmen ukpono ye ubọn̄ ẹnọ Edidem emi akarade ke kpukpru eyo, emi mîkemeke ndikpa, enyịn mînyụn̄ ikemeke ndikụt Enye, kpa Abasi kierakiet ke nsinsi-nsinsi. Amen.” (1 Timothy 1:17) Nnyịn ikpakam iwụt utọ ukpono ofụri esịt oro inọ Jehovah kpukpru ini. Ndien inamke n̄kpọ m̀mê nso itịbe, ẹyak nnyịn ikûdede iyok ke ubiere nnyịn ndika iso nsọn̄ọ nda nte n̄kpọ eke ikụtde Enye emi enyịn owo mîkwe.
Didie ke Afo Ọkpọbọrọ?
• Didie ke mme owo ẹkeme ndikụt Abasi?
• Edieke Jehovah edide ata ata owo ọnọ nnyịn, didie ke nnyịn idinam n̄kpọ ke ini ẹkọbọde nnyịn?
• Ndise Jehovah nte Akwa Anditeme ọwọrọ nso?
• Ntak emi nnyịn ikpoyomde Jehovah odụn̄ọde nnyịn?
[Ndise ke page 18]
Moses, oro mîkayakke iyatesịt Pharaoh esịn enye ndịk ke idem, ama anam n̄kpọ nte n̄kpọ eke enye okokụtde Jehovah, Abasi emi enyịn owo mîkwe
[Ndise ke page 21]
Ẹyak nnyịn ikûdede inam n̄kpọ nte n̄kpọ eke Jehovah mîkemeke ndikụt se nnyịn inamde
[Ndise ke page 23]
Nnyịn inen̄ede iyom ifiọk Abasi koro nnyịn ikụtde enye nte Akwa Anditeme nnyịn