Mmọ ‘Ẹma Ẹdep Akpanikọ’!

“DEP akpanikọ, kûnyụn̄ unyam.” (Mme N̄ke 23:23) Ntre ke enyene-ọniọn̄ owo oro Solomon eketeme. Ke adan̄aemi ẹkemede nditịn̄ emi mban̄a akpanikọ ke ofụri ofụri, emi enen̄ede edi ntre ke edide edisịm akpanikọ emi ẹkụtde ke Ikọ Abasi, kpa Bible. Utọ akpanikọ oro ekeme ndida nsịm nsinsi uwem! (John 17:3, 17) Tịm fiọk, nte ededi, nte ke ndinyene utọ akpanikọ oro idịghe ye unana ekọmurua. Owo enyene ndinyịme ‘ndidep’ enye, oro edi, awa m̀mê ayak n̄kpọ atak man enyene enye. (Men Matthew 13:45, 46 domo.) Ke ofụri ofụri, mme owo inyịmeke ndinam ntre. Edi ke ediwak idụt, ibat mbon uko oro ọkọride-kọri ke ẹdep akpanikọ Bible—ekese ini ke akwa ọkpọkpọ ekọmurua.

Da, ke uwụtn̄kpọ, Mme Ntiense Jehovah ke idụt Ghana Edem Usoputịn Africa. Ke June 1989, se ibede owo 34,000 ẹma ẹdu ke idụt oro ẹmi ẹkebọde akpanikọ Bible ẹnyụn̄ ẹbuanade enye ifịk ifịk ye mbon en̄wen. Ekem ẹma ẹdori mme ukpan eke ibet ke an̄wan̄wa utom ukwọrọikọ. Edi, mbon esịt akpanikọ ẹma ẹka iso ‘ndidep akpanikọ’—kpa ye mme ukpan ibet. Ubiọn̄ọ emi ama etre ke October 31, 1991, ndien ke ufọt ufọt 1995, isua ita ye ubak kpọt ke ẹma ẹkedorode mme ukpan oro, ibat ifịk ifịk Mme Ntiense Jehovah ke Ghana ama ọkọri ekesịm 46,104! Ndien isua emi ibat oro ọmọkọri ekesịm se ibede 52,800.

Nso idụri mme owo itiene akpanikọ Ikọ Abasi? N̄waidem ewe ke ndusụk owo ẹkenyene ndinam man ‘ẹdep akpanikọ’? Ke ibọrọ, yak nnyịn ise mme ifiọkutom mme Christian ita ke Ghana.

Mme Ukpepn̄kpọ Bible Ẹma Ẹdụri Ẹda

Yak nnyịn ibem iso ikere iban̄a n̄wan emi odude ke ntọn̄ọ ntọn̄ọ iduọk isua 20 esie. Ete esie ekedi pastọ, edi enye ama emek ndikpọn̄ ido ukpono ete esie. Ntak-a? Ima emi enye ekenyenede ọnọ akpanikọ.

Enye ini kiet ama anam an̄wan̄a ete: “Mme Ntiense ẹma ẹsidi ufọk nnyịn nte mmọ ẹkenamde ediwaha eke ufọk ke ufọk mmọ. Ke mma n̄kenyene nneme ifan̄ ye mmọ, mma mfiọk nte ke se mmọ ẹkekpepde ama enyene nsọn̄ọ ke Bible. Mma ndemede mme mbụme ke mme utọ ibuot nneme nte Abasi-Ita-ke-Kiet, hell ikan̄, ukpọn̄ ikpaha ke nsinsi, ye akpan akpan ukọkudọn̄ọ mbuọtidem. Mma nnen̄ede nnịm ke mme ukpepn̄kpọ ẹmi ẹketo Bible. Edi Mme Ntiense oro ẹma ẹn̄wam mi ndikụt nte ke oro ikedịghe ntre.”—Ke ndiwụt ekikere Bible ke mme utọ ibuot nneme ẹmi, mbọk se Mark 13:32; Rome 6:23; Utom 10:40; ye 1 Corinth 13:8-10.

N̄kaiferi oro ama adian do ete: “Edi, ọkpọsọn̄ ubiọn̄ọ otode ubon mi ama odu, akpan akpan ete mi. Enye ekekere ke ẹma ẹtụn mi usụn̄. Nte ededi, mma mfiọk ke se n̄kekpepde nto Mme Ntiense Jehovah ekedi akpanikọ. Mma ndomo ndinam ete mi emehe ye mme n̄kpọ ẹmi ke Bible, edi enye ikakpan̄ke utọn̄. Ke akpanikọ, ubiọn̄ọ oro ama ọsọn̄ ubọk.

“Nte ededi, idem ikememke mi. Mma mfiọk nte ke nnennen ifiọk ikpọn̄ ada esịm nsinsi uwem ke Paradise, ndien mma mbiere ndisọn̄ọ nyịre ke enye. Ke ini Mme Ntiense n̄kann̄kụk ẹkekopde ẹban̄a mme mfịna oro n̄kosobode, mmọ ẹma ẹnọ mi ima ima un̄wam, ẹsịnde udọn̄ ẹnọ mi ẹnyụn̄ ẹnọde mi ndusụk akpan n̄kpọ oro n̄kananade. Emi ama anam mi nti mme ikọ Jesus ẹmi ẹkụtde ke John 13:35: ‘Mbufo ẹma ẹma kiet eken, kpukpru owo ẹyeda oro ẹfiọk ẹte mbufo ẹdi mbet mi.’ Edinịm ke akpanikọ mi nte ke Mme Ntiense Jehovah ẹkenam ido ukpono akpanikọ ama otụn̄ọ. Ekem, ke ini ete ye eka mi ẹkekụtde nte ke mma n̄kpụhọde uwem mi nnam akabade ọfọn akan, mmọ ẹma ẹma se mmọ ẹkekụtde, ẹdu mmọ ye ami ama onyụn̄ okpụhọde—tutu ete mi ama ọdọhọ Mme Ntiense ẹkpep Bible ye akamba eyeneka mi eren!”

Ndisọn̄ọ Akpanikọ nnọ Idem

‘Ndidep akpanikọ’ edi n̄ko n̄kpọ-ata ọnọ ndusụk n̄kpri owo ẹmi ete ye eka ẹdide Ntiense ẹbọkde. Ndusụk uyen ẹnyene ntụhọ edida akpanikọ Bible didie didie. Edieke mmọ ẹkpude ndinam mme utọ akpanikọ oro ẹdi eke mmọ, mbuọtidem mmọ akabade emem, itụn̄ọke. (Men Matthew 13:20, 21 domo.) Nathaniel, eren Ghana kiet ke mme iduọk isua 30 esie, etịn̄ aban̄a nte imọ ‘ikedepde akpanikọ’ ke adan̄aemi imọ ikosụk idide uyen.

Enye eti ete: “Ete ye eka mi ẹma ẹkpep mi Bible tọn̄ọ ke ini n̄kedide eyenọwọn̄. Nte n̄kọkọride, mma nsisan̄a ye mmọ ke utom ukwọrọikọ, edi n̄kenen̄ekede mbiere ndikabade ndi Ntiense. Nte ini akade, mma ndifiọk nte ke n̄kenyene ndidụn̄ọde mme n̄kpọ nnọ idem mi.

“Akpa, n̄kenyene ndinịm ke akpanikọ nte ke Bible, idịghe edisana n̄wed ido ukpono efen, edi Ikọ Abasi. Ebede ke ọkpọkpọ ukpepn̄kpọ, mma n̄kpep nte ke enye edi n̄kukụre edisana n̄wed oro ọdọn̄ọde ekese in̄wan̄în̄wan̄ ntịn̄nnịm ikọ ẹmi ẹkesude nnennen nnennen. Mma n̄kpep n̄ko nte ke Bible ọdọn̄ọ ekese akpanikọ ifiọk ntaifiọk—ke uwụtn̄kpọ, nte ke ererimbot ‘ọkọn̄ọ ke ikpîkpu.’ (Job 26:7) Ẹkewet mme ikọ ẹmi ke ediwak tọsịn isua mbemiso ntaifiọk ẹdiọn̄ọde ẹban̄a ndutịm ekondo nnyịn. Abasi ikpọn̄ ekekeme ndinọ mme owo spirit ndiwet utọ n̄kpọ oro!a

“Ekem, mma nyom ndidiọn̄ọ m̀mê esop ido ukpono ewe ekpep onyụn̄ anam mme akpanikọ ẹmi ẹkpepde ke Bible. Ekese ido ukpono ẹkpep hell ikan̄, Abasi-Ita-ke-Kiet, ye ukpọn̄ oro mîkemeke ndikpa emi ọbọhọde n̄kpa. Edi mme ukpepn̄kpọ ẹmi ikesịneke ifiọk inọ mi. Mma n̄kere: Nte ikpedịghe idiọk ete okpomụm ubọk eyen esie esịn ke eso ufiop mmọn̄ nte ufen? Didie, ndien, ke Abasi ima ekpekeme ndisịn nditọ esie ke ufiop ufiop hell onyụn̄ ayak mmọ ẹbọ ufen? Mme Ntiense Jehovah, nte ededi, ẹkpep n̄kpọ ke n̄kemuyo ye mme utọ itien̄wed Bible nte Rome 6:23, emi ọdọhọde: ‘N̄kpọ eyenutom idiọkn̄kpọ edi n̄kpa’—idịghe ndusụk ufiop ufiop hell. Emi ama esịne ifiọk ọnọ mi.

“Ami mma n̄kụt n̄ko nte ke Mme Ntiense Jehovah ẹyom ẹte kpukpru mme andibuana ẹda mme edumbet Bible ẹdu uwem ye nte ke mmọ ẹsisio kpukpru mbon ẹmi ẹnamde idiọkn̄kpọ ye unana edikabade esịt ẹfep. Ye kpukpru emi ke ekikere, mma mbiere nte ke Mme Ntiense Jehovah ẹnyene akpanikọ, ndien mma nnam ọkpọkpọ ubiere ndikabade ndi kiet ke otu mmọ. Mma nnam utom ọkpọsọn̄ ndidot ndina baptism nte Ntiense.”—1 Corinth 5:11-13.

Ifiọkutom Nathaniel etịm owụt nte ke ana idem mme uyen ẹmi mme ete ye eka ẹdide Christian ẹbọkde ‘ẹdedep akpanikọ.’ Inaha mmọ n̄kukụre ẹdụk mme mbonoesop ndebe ndebe. Ukem nte mbon Beroea eset, ana mmọ “ẹdụn̄ọde n̄wed Abasi ke usen ke usen, ẹte ifiọk m̀mê mme ikọ oro ẹkem ntre.” (Utom 17:11) Emi ada ini ye ukeme, edi enye ekeme ndisụn̄ọ ke ọkpọsọn̄ mbuọtidem ye edinịm ke akpanikọ.—Men Ephesus 3:17-19 domo.

Ama Okụt Edikpu ke Nsunsu Ido Ukpono

Eren Ghana kiet ekerede Godwin ama ekpere ndisịm isua 70 ke ini enye ọkọkpọn̄de Ufọkabasi Presbyterian ye Ufọk Freemason. “Mme n̄kpọ ẹma ẹdu oro ẹkekade iso ke ufọkabasi oro n̄kokụtde nte mîfọnke,” ntre ke Godwin ọdọhọ. “Ke uwụtn̄kpọ, ekese ndotndot utọk ẹma ẹdu, ndien emi ke osụk akaka iso. Ndusụk ini mme bodisi ẹkenyene ndidi ndisịn emem ye ifụre! N̄kekereke ke emi ama odot ọnọ mme anditiene Christ. Ekem mfịna ama edemede ke ufọt owo Presbyterian ye ami. Esopikpe ofụri owo ama okop ikọ oro onyụn̄ ebiere ikpe ọnọ owo oro nte andidue. Nte ededi, ọkwọrọikọ ufọkabasi ama ada ke n̄kan̄ owo emi nte mîdotke onyụn̄ odomo ndibiom mi ikpe ke iso ofụri ufọkabasi! Mma ntịn̄ ekikere mi nnọ enye nnyụn̄ nsan̄a n̄wọrọ ke ufọkabasi oro—mfiakke n̄ka tutu amama.

“Ndusụk ini ẹma ẹbe, ndien Mme Ntiense Jehovah ẹma ẹdi ufọk mi. Ke akpa, n̄kakpan̄ utọn̄ n̄kukụre koro mmen̄koyomke ndisịn mbon ẹmi ẹtịn̄de n̄kpọ ẹban̄a Abasi. Edi mma ntọn̄ọ ndikụt nte ke okposụkedi n̄kedide owo Presbyterian ke ediwak isua ke mme itie duop, ekese n̄kpọ ẹma ẹdu ẹmi mmen̄kọdiọn̄ọke mban̄a Bible. Ke uwụtn̄kpọ, akananam n̄kọdiọn̄ọke nte ke Bible akama idotenyịn edidu uwem ke nsinsi ke Paradise ke isọn̄.b Ndien ke ini n̄kọtọn̄ọde ndidụk mme mbonoesop Mme Ntiense Jehovah, edu uwem, ndien akpan akpan usịnen̄kpọ ye ukamaidem mme uyen ke otu mmọ, ama enen̄ede otụk mi. Mmọ ẹmi ẹkedi mbon oro ẹnen̄erede ẹda mme edumbet Bible ẹdu uwem!”

Edi, ‘ndidep akpanikọ’ ama oyom enye anam mme ukpụhọde oro okoyomde ukeme ke uwem esie. Godwin eti ete: “N̄kedi andibuana ke Ufọk Freemason. Ndien okposụkedi ẹdiọn̄ọde enye nte ufan ufan n̄ka emi ọnọde mme andibuana ke enye un̄wam, mma nsinịm mme edinam ẹmi ẹkesibuanade edida mme n̄kpọkpọrọ ye ọkpọ ye edikot mme spirit. Ẹkekere ẹte ke mme spirit ẹmi ẹsin̄wam mbon ẹmi ẹdiande idem ye mmọ ndikọri ke n̄kan̄ eke spirit.

“Mme ukpepn̄kpọ mi ẹma ẹn̄wam mi ndikụt nte ke Jehovah Abasi asua ebuana ekededi ye ubụpekpo koro enye ekemede ndida owo n̄kesịn ke idak odudu Satan ye udịm ndiọi spirit esie.c Nte ami nyaka iso nte andibuana ke Ufọk Freemason ye ofụri ndedịbe odudu esie, mîdịghe nte ami nyọkpọn̄ nnyụn̄ nnem Jehovah esịt? Mma mmek akpatre emi. Mma mbiat kpukpru n̄kpọ Freemason ẹmi n̄kenyenede, idem ye ọfọn̄ emi n̄kesisịnede n̄ka mboho Ufọk oro. Mma n̄kụt akpanikọ un̄wọn̄ọ Jesus ke ini enye ọkọdọhọde, ‘Akpanikọ oyonyụn̄ anam mbufo ẹwọrọ ufụn’! (John 8:32) Idahaemi ami ke idatesịt ke mbuana mme n̄kpọ oro n̄kekpepde ye mbon en̄wen. Ntuaha n̄kpọfiọk ndomokiet.”

Ediwak tọsịn mbon esịt akpanikọ ukem ntre ẹnam ikpọ n̄waidem man ‘ẹdep akpanikọ.’ Ukem nte mme Christian ita ẹmi ẹnemede mi, mmọ ituaha n̄kpọfiọk ke mme ukpụhọde oro mmọ ẹkenamde. Akpanikọ Bible ọnọ mmọ ‘eti isọn̄ ke ini iso, man mmọ ẹkpemụm uwem eke edide ata uwem ẹkama.’ (1 Timothy 6:19) “Ata uwem” oro ye kpukpru edidiọn̄ ẹmi ẹsan̄ade ye enye ẹkeme ndidi okwo ke nsinsi edieke afo ‘edidepde akpanikọ.’

[Mme Ikọ idakisọn̄]

[Ndise ke page 9]

Nathaniel

[Ndise ke page 9]

Godwin