Ukpepn̄kpọ Ubon Oro Adade Idatesịt Edi

“Ẹda ifiọk ẹyọhọ kpukpru uto inyene ye uyai ke mme ubet,” ntre ke Bible ọdọhọ. (Mme N̄ke 24:4) Mme ọsọn̄urua n̄kpọuto ẹmi idịghe sụk mme n̄kpọuto obụkidem ẹdi ẹsịne ata ima, uten̄e Abasi, ye ọkpọsọn̄ mbuọtidem. Mme utọ edu oro ẹnen̄ede ẹnam ẹnyene eti uwem ubon. (Mme N̄ke 15:16, 17; 1 Peter 1:7) Man inyene mmọ, nte ededi, oyom nnyịn ida ifiọk Abasi idisịn ke ufọk nnyịn.

IBUOT ufọk enyene mbiomo edisịn ifiọk emi ke esịt mbon ubon. (Deuteronomy 6:6, 7; Ephesus 5:25, 26; 6:4) Kiet ke otu mfọnn̄kan usụn̄ ndinam emi edi ke ukpepn̄kpọ ubon ofụri ini. Emi ekeme ndidi n̄kpọ inemesịt didie ntem nnọ mme andibuana ke ini ẹnịmde ukpepn̄kpọ ke usụn̄ oro esịnede item onyụn̄ enyenede inem! Ẹyak nnyịn, ndien, ikere iban̄a ndusụk akpan n̄kpọ ke ndinịm ukpepn̄kpọ ubon oro enyenede uforo.a

Ukpepn̄kpọ ubon enen̄ede enyene ufọn ke ini ẹnịmde enye kpukpru ini. Edieke ẹnịmde ke ini ẹnyenede ifet m̀mê ke ini ẹdịghede ẹti, etie nte ididịghe kpukpru ini. Ntre ana afo “ededep ifet” ọnọ ukpepn̄kpọ emi. (Ephesus 5:15-17) Ndimek ini ukpepn̄kpọ ofụri ini oro ọfọnde ye kpukpru owo ekeme ndidi n̄kpọ-ata. “Ama esisọn̄ nnyịn idem ndinịm ukpepn̄kpọ ubon nnyịn kpukpru ini,” ntre ke ibuot ubon kiet etịn̄. “Nnyịn ima isidomo nsio nsio ini ise tutu ke akpatre ikụt ikpehe ini oro ọkọfọnde esisịt ye nnyịn ke mbubịteyo. Idahaemi ukpepn̄kpọ ubon nnyịn edi ofụri ini.”

Ndondo oro afo enyenede ini oro ọfọnde, tịn̄ enyịn kpeme mbak mme n̄kpọ oro ẹwọn̄ọrede ntịn̄enyịn idibiat ukpepn̄kpọ oro. Maria,b edide isua 33 idahaemi, eti ete: “Edieke isenowo ẹkedide ke adan̄aemi inịmde ukpepn̄kpọ, Papa ama esidọhọ mmọ ẹbet tutu ikụre ukpepn̄kpọ. Ndien amaedi ikot urụk ukopikọ, enye n̄kukụre ama esidọhọ owo oro ete ama ekem imọ iyọnọ ikot.”

Nte ededi, emi iwọrọke ite ke owo ikemeke ndinam ukpụhọde. Mbabuat n̄kpọntịbe m̀mê n̄kpọ oro owo mîkeben̄eke idem inọ ẹkeme nditịbe, ndien emi ndusụk ini ekeme ndiyom ẹbiat m̀mê ẹsio ukpepn̄kpọ ẹnịm ini efen. (Ecclesiastes 9:11) Edi kpeme mbak uduyak baba kiet ke otu ẹmi etịmede edinam ofụri ini fo.—Philippi 3:16.

Ukpepn̄kpọ ekpenyene ndibịghi adan̄a didie? Robert, emi ama okokụt unen ke ndibọk eyenan̄wan kiet ye eyeneren kiet, ọdọhọ ete: “Ukpepn̄kpọ nnyịn ekesibịghi ke hour kiet. Ke ini nditọ ẹkedide n̄kpri owo, nnyịn ima isidomo ndimụm udọn̄ mmọ ke hour kiet ebe ke ndineme nsio nsio n̄kpọ, utọ nte ibat ibat ikpehe ekikere ke ibuotikọ ukpepn̄kpọ ke Enyọn̄-Ukpeme, ikpehe oro ẹmekde ẹto Bible, ye mme ikpehe ke mme n̄wed eken.” Maria eti ete: “Ke ini ami ye n̄kpri nditọeka mi iban iba ikedide ata n̄kpri owo, ukpepn̄kpọ nnyịn ekesidi n̄kpọ nte minit 20 ikaba m̀mê ikata ke urua. Nte nnyịn ikọkọride ikponi, ukpepn̄kpọ ubon nnyịn eke urua ke urua ama esibịghi ke hour kiet m̀mê n̄kpọ ntre.”

Nso ke Nnyịn Ikpekpep?

Ndikere mban̄a mbụme emi ke ini kpukpru owo ẹma ẹkesop idem ẹnọ ukpepn̄kpọ oyosụn̄ọ ke edikpu ye edibiat ekese ini ukpepn̄kpọ. Edieke ẹnamde ntre, nditọ idinyeneke akpan n̄kpọ oro ẹdoride enyịn ndikop ndien ke mîbịghike ẹyenana udọn̄. Ntre bem iso mek kiet ke otu mme n̄wed N̄ka oro ẹdikpepde.

“Asan̄autom emi anamde akpanikọ, onyụn̄ enyenede ọniọn̄” ọmọnọ akpakịp n̄wed ndimek nto. (Matthew 24:45-47) Ndusụk afo emekeme ndida n̄wed oro ubon mîkpepke kan̄a. Ndien nso n̄kpọ idatesịt ke edi ntem ndineme mme ikpehe oro ẹsatde-sat ke Insight on the Scriptures edieke mme eboho ẹmi ẹdude ke usem mbufo! Ke uwụtn̄kpọ, afo emekeme ndidụn̄ọde ibuotikọ aban̄ade Udia Mbubịteyo Ọbọn̄ ke mme urua oro ẹbemde Editi iso. Ediwak ubon ẹsikop inem nditịm idem nnọ Ukpepn̄kpọ Enyọn̄-Ukpeme eke urua. Edi mme udiana ibuotikọ Enyọn̄-Ukpeme ẹdi n̄ko se ifọnde kaban̄a ukpepn̄kpọ. Ibuot ubon, emi ọfiọkde se ubon oyomde ke n̄kan̄ eke spirit, odu ke eti idaha ndibiere m̀mê mme n̄wed ewe ke ẹkpekpep.

Maria eti ete: “Kpukpru ini nnyịn ima isibem iso ikpep n̄wed oro ẹkemekde. Edi ke ini mbụme edemerede m̀mê idaha odude ke ufọkn̄wed, do nnyịn ima isiwọn̄ọde ika ntọt oro ekemde.” Mme akpan n̄kpọ udọn̄, utọ nte mme mfịna oro mme uyen ẹsobode ke ufọkn̄wed, uwọrọ an̄wa, mme udiana edinam, ye ntre ntre eken, ẹsidemede. Ke ini emi etịbede, mek mme ibuotikọ m̀mê mme n̄wed oro ẹnemede ẹban̄a mme mfịna oro ẹdemerede. Edieke afo okụtde ntọt ke Enyọn̄-Ukpeme m̀mê Awake! eke ndondo emi oro afo akpamade ndikpep ye ubon idahaoro, kûmen̄e ndinam ndutịm nnọ oro. Nte ededi, ọyọfọn afo abak asian mbon ubon aban̄a ukpụhọde emi. Edi kụt ete ẹmefiak ẹka n̄wed oro ẹkediomide ndondo oro ẹsede ẹban̄a udọn̄ oro.

Nam Idaha Etie Ifụre Ifụre

Ukpepn̄kpọ esitịm ọfọn ke idaha oro etiede emem emem. (James 3:18) Ntre nam idaha oro ifụre odude, edi etiede ukpono ukpono. Ibuot ubon kiet ke United States ọdọhọ ete: “Edide nnyịn itie ke ufọtufọk m̀mê ke etehe ikpep n̄kpọ, nnyịn imesidomo nditie nnen̄ede n̄kpere kiet eken utu ke ndisuana ntie ke akamba ubet. Ye nnyịn, emi esinam ikop ufiop.” Ndien Maria eti ye akwa inemesịt ete: “Ẹma ẹsiyak ami ye nditọeka mi iban imek ebiet oro idimade ẹnịm ukpepn̄kpọ ke ufọk urua oro. Emi ama esinam nnyịn inyene ifụre.” Nyene ke ekikere ete ke ikan̄ oro ayamade ọfọn, n̄kpọitie oro odotde, ye n̄kann̄kụk oro etiede inem inem mînyụn̄ ideheke kpukpru ẹtịp ẹsịn ke ndinam esịt ana sụn̄. Ndinọ ubon n̄kpọ ubịtitọn̄ ke ukpepn̄kpọ ama okokụre ayan̄wam n̄ko ndinyene inem inem mbubịteyo.

Ndusụk ubon ẹsikam ẹmek ndibuan mme ubon efen ke ukpepn̄kpọ mmọ ndusụk ini, anamde etịm enyene inem ọkọrọ ye edinyene nsio nsio uduot ibọrọ. Ke ini ẹnọde mbon oro ẹdide obufa ke akpanikọ ikot ndibuana ke ndutịm emi, mmọ ẹkeme ndibọ ufọn nto edikụt nte ibuot ubon oro enyenede mbufiọk enịmde ukpepn̄kpọ ubon.

Nam Bible Enyene Uwem

Nam mme ini ukpepn̄kpọ ẹnyene inem ẹnọ nditọwọn̄, ndien mmọ ẹyesak iso ẹse mmọ ye ọkpọsọn̄ udọn̄. Afo emekeme ndinam emi ebe ke ndisịn udọn̄ nnọ n̄kpri nditọwọn̄ ndiwet mme ndise ẹban̄ade mme n̄kpọntịbe Bible. Ke ini oro odotde, nam nditọwọn̄ ẹnanam mme n̄kpọntịbe ye mme drama Bible ẹwụt. Ye ata n̄kpri nditọwọn̄ iyomke ẹsọn̄ọ ẹyịre ke usụn̄ ukpepn̄kpọ mbụme ye ibọrọ oro ẹtịmde-tịm. Ndikokot m̀mê nditetịn̄ mme mbụk mban̄a mme owo eke Bible edi inem inem usụn̄ ndisịn mme edumbet Abasi ke esịt. Robert, oro ikebemde iso itịn̄ iban̄a, eti ete: “Ndusụk ini nnyịn imesikot mme ikpehe ke Bible, ke adiana ke adiana, imekde mme owo ndikot nsio nsio orụk ‘uyoikọ’ mme owo.” Ẹkeme ndidọhọ nditọ ẹmek owo oro mmọ ẹyomde ndinam n̄kpọ nte enye ke edikot n̄wed.

Ndida mme n̄wed ndise obio ye mme chart ẹyen̄wam nditọwọn̄ oro ẹkponide ndikụt mme itie ye mme ikpehe isọn̄ oro mme n̄kpọntịbe oro ẹnemede ẹban̄a ẹkedade itie ke enyịn ikike. Nte an̄wan̄ade, ye esisịt n̄kọkibuot, ẹkeme ndinam ukpepn̄kpọ ubon enyene inem onyụn̄ enyene ukpụhọde. Ndien nditọwọn̄ ẹyeyom Ikọ Abasi.—1 Peter 2:2, 3.

N̄wam Kpukpru Owo Nditiene Mbuana

Man nditọ ẹkop inem ukpepn̄kpọ, oyom mmọ n̄ko ẹtiene ẹbuana. Ndinam nditọ ẹmi ẹdude ke nsio nsio isua emana ẹnyene ebuana, nte ededi, ekeme ndidi n̄kpọ-ata. Edi edumbet Bible kiet ọdọhọ ete: “Owo eke akarade, yak enye esịn ifịk ke edikara esie.” (Rome 12:8) Ndinyene nduaidem esin̄wam, koro nduaidem edi n̄kpọ oro ebede-be owo.

Ronald esinam eyenan̄wan esie, Dina, edide isua ition enyene ebuana ebe ke ndinam enye okot n̄kpri ibuotikọ ke n̄wed ukpepn̄kpọ onyụn̄ ọdọhọ enye etịn̄ n̄kpọ aban̄a mme ndise. Nte Editi n̄kpa Christ akasan̄ade ekpere isua oko, enye ama owụk ntịn̄enyịn ke mme ndise oro ẹdotde ke n̄wed Akakan Owo Oro Akanam Odude Uwem.c Enye ọdọhọ ete: “Emi ama an̄wam enye ndifiọk se n̄kpọntịbe oro ọwọrọde.”

Ye eyenan̄wan esie, Misha, edide isua duop, Ronald ama anam usio-ukot efen efen. Ronald etịn̄ ete: “Misha anam n̄kọri ekesịm idaha oro mîdịghe mme ndise kpọt ẹn̄wan̄a enye edi se mmọ ẹdade ẹban̄a. Ntre ke ini ikekpepde n̄wed Ediyarade—Ubọn̄ Ubọn̄ Ata-Utịt Esie Emekpere!,d nnyịn ima iwụk ntịn̄enyịn ke se mme ndise ẹwọrọde, ndien emi ama an̄wam enye.”

Nte nditọ ẹkọride ẹdụk mme isua uyen mmọ, dọhọ mmọ ẹtịn̄ nte ẹkemede ndida se ẹnemede nsịn ke edinam. Ke ini mme mbụme ẹdemerede ke ini ukpepn̄kpọ, nọ utom edinam ndụn̄ọde. Robert akanam ntre ke ini eyeneren esie, Paul, emi edide isua 12 okobụpde mbụme aban̄a obufa n̄ka oro ẹketọn̄ọde ke ufọkn̄wed abuanade mbre oro mme Dungeon ye mme Dragon. Paul ye mbon eken ke ubon ẹma ẹda The Watchtower Publications Index ẹdụn̄ọde ntọt aban̄ade n̄kpọ emi, ndien mmọ ẹma ẹfiak ẹneme enye ke ukpepn̄kpọ ubon mmọ. “Nte utịp,” nte Robert etịn̄de, “ama ọsọsọp an̄wan̄a Paul nte ke ifọnke mme Christian ndibre mbre emi.”

Robert n̄ko ama ọnọ utom edinam ndụn̄ọde ke mme ini efen. N̄wan esie, Nancy, eti ete: “Ke ini nnyịn ikanamde ndụn̄ọde iban̄a mme apostle Jesus, ẹma ẹnọ nnyịn kiet kiet apostle kiet kpukpru urua. Ekedi n̄kpọ inemesịt didie ntem ndikụt nte nditọ ẹnọde mbụk mmọ ye ufiop ke ukpepn̄kpọ ubon!” Ndinam ndụn̄ọde ke idemmọ nnyụn̄ mbuana ntọt oro ye ubon an̄wam nditọ ‘ndikọri ke iso Jehovah.’—1 Samuel 2:20, 21.

Ndibụp mme mbụme—mme mbụme ẹdade ẹfiọk ekikere owo ọkọrọ ye mme mbụme ndausụn̄—edi n̄ko eti usụn̄ ndinam nditọ ẹtiene ẹbuana. Etubom Andikpep, Jesus, ama esibụp mme mbụme ẹdade ẹfiọk ekikere owo, utọ nte, “Ekere didie?” (Matthew 17:25) Maria eti ete: “Ke ini owo nnyịn ekededi enyenede mbụme, ete ye eka nnyịn akananam ibọrọke nnyịn nnennen. Kpukpru ini mmọ ẹma ẹsibụp mme mbụme ndausụn̄, ẹn̄wamde nnyịn ndikọk ibuot ke n̄kpọ oro.”

Neme Nneme—Kûfofiomo!

Ẹnam idatesịt ke ukpepn̄kpọ ubon ọkọri edieke kpukpru mme andidu ẹkemede nditịn̄ ekikere ye mme ntụk mmọ ye unana edikop ndịk nte ke ẹyesak mmimọ. Edi “ẹkeme ndinyene eti nneme ke ini ukpepn̄kpọ ubon n̄kukụre edieke ẹsinịmde usụn̄ nneme in̄wan̄ ke mme ini eken,” ntre ke ete kiet etịn̄. “Afo ukemeke ndinam enye n̄kukụre ke ini ukpepn̄kpọ.” Ke kpukpru usụn̄, fep ikọ unana n̄kọkibuot oro ekemede ndinọ unan, utọ nte, ‘Nte okụre ke oro? N̄kekere nte edi akpan n̄kpọ’; ‘Etịn̄ ndisịme’; ‘Ndien-e, nso ke ekpetịn̄ akan oro? Afo osụk edi kan̄a eyenọwọn̄.’ (Mme N̄ke 12:18) Wụt nditọ fo edikere mban̄a ye mbọm. (Psalm 103:13; Malachi 3:17) Nyene inemesịt ke mmọ, nyụn̄ nọ mmọ ibetedem nte mmọ ẹdomode ndida se mmọ ẹkpepde nsịn ke edinam.

Idaha ukpepn̄kpọ ubon ekpenyene ndidi enyeoro anamde ekikere eyen ana sụn̄ ndibọ item. “Ke ini ọtọn̄ọde ndinen̄ede nditọwọn̄,” nte ete kiet enyenede nditọ inan̄ oro okokụtde unen anamde an̄wan̄a, “afo enyene otuowo oro mîtiehe ufan ufan.” Ke utọ idaha oro, ekeme ndidi ntọt oro idisụhọkede idụk esịt. Ntre fep ndinam mme ini ukpepn̄kpọ edi ini edinọ ntụnọ ye ufen. Edieke edide se ẹyomde, nam ẹmi ke ukperedem nyụn̄ nam ye owo kiet kiet.

Ukeme Esịnde Odot

Ndibọp ubon oro enyenede uforo ke n̄kan̄ eke spirit ada ini ye ukeme. Edi andiwet psalm ọdọhọ ete: “Sese, nditọ ẹdi udeme Jehovah, mfri idịbi onyụn̄ edi n̄kpọ eyenutom.” (Psalm 127:3) Ndien ẹnọ mme ete ye eka utom ‘edikama nditọ ke ntụnọ ye item Ọbọn̄.’ (Ephesus 6:4) Ntre kọri usọ ke ndinịm ukpepn̄kpọ ubon oro enyenede uforo ye inem. Nam ukeme fo ndinọ “ata mmọn̄eba Spirit,” man otodo nditọ fo “ẹkọri ẹsịm edinyan̄a.”—1 Peter 2:2; John 17:3.

[Mme Ikọ idakisọn̄]