Edisana Usem Oro Ẹnode Kpukpru Idụt
“Ke ini oro nyekabade edisana n̄kpọkinua [“edisana usem,” NW] nnọ mme idụt: man kpukpru mmọ ẹkot enyịn̄ Jehovah, man ẹnam n̄kpọ ẹnọ enye ke esịt kiet.”—ZEPHANIAH 3:9.
1, 2. (a) Ke edisu Zephaniah 3:9, nso ke Jehovah anam ke eyo nnyịn? (b) Man ifiọk nte prọfesi Zephaniah otụkde nnyịn, nso mme mbụme ke oyom ẹbọro?
JEHOVAH ABASI ke ada utom ọkọyọhọ ke eyo nnyịn oro ke akpanikọ edide n̄kpọ ndyọ. Enye ke atan̄ mme owo ẹtode kpukpru idụt adian ọtọkiet. Nte enye ekebemde iso etịn̄ ke anyanini ke Edisana Ikọ esie, enye ke anam emi ke ndikpep mmọ obufa usem.—Zephaniah 3:9.
2 Usem oro edi nso? Ntak emi enye edide se ẹyomde-e? Edikpep enye oyom nso oto nnyịn owo kiet kiet?
Enọ Utịn̄ikọ
3. (a) Nso utịbe utịbe enọ ke ẹkenọ Adam? (b) Nso ikedi usem oro Adam ekesemde?
3 Ukeme edida ikọ nneme nneme edi enọ Abasi oro anamde ubonowo okpụhọde ye kpukpru edibotn̄kpọ ẹdide unam. Ẹkebot akpa owo oro, Adam, ye ibuot oro ekemede ndikere n̄kpọ ọniọn̄ ọniọn̄. Ẹma ẹnọ enye ọkpọrọ, edeme, ye n̄kpọkinua oro enye ekemede ndida n̄tịn̄ ikọ, ọkọrọ ye nsio nsio ikọ ke usem ye ukeme edision̄o mbufa ikọ ndi. Ama an̄wan̄a Adam ke ini Jehovah eketịn̄de ikọ ọnọ enye, ndien Adam, n̄ko, ama ekeme nditetịn̄ mme ekikere esie. (Genesis 1:28-30; 2:16, 17, 19-23) Usem oro ẹkenọde Adam nte an̄wan̄ade edi enyeoro ke ukperedem ẹkediọn̄ọde nte Hebrew. Ke nsụhọde n̄kaha akpa isua 1,757 eke edidu owo, ofụri ubonowo nte an̄wan̄ade ẹma ẹkaiso ndisem usem kiet oro.—Genesis 11:1.
4. Didie ke mme n̄kpọntịbe eke eyo Nimrod okotụk usem owo?
4 Ekem, ke eyo Nimrod, man ẹbiat ukeme mme idiọkowo, Jehovah ama otịmede usem kpukpru mbon oro ẹkeyakde ẹnyịk mmọ ẹsịn ke akwa udịm oro man ẹbuana ke ndibọp tọwa Babel. (Genesis 11:3-9) Etie nte Jehovah ekebemiso ọsọhi akpa usem kiet oro efep ke ibuot mmọ ndien ekem ada obufa usem edisịn ke ibuot mmọ. Emi ikabuanake sụk nsio nsio mbufa ikọ ke usem edi ama abuana mbufa ido ke nte ẹbonde ikọ ye mbufa edu ukere n̄kpọ n̄ko. Toto ke usem oro Jehovah ọkọtọn̄ọde ke Babel, mmọ eken ẹma ẹkọri nsịt nsịt tutu osịm mfịn, nte mme ẹkpep usem ẹdọhọde, esem n̄kpọ nte usem tọsịn ita ke ofụri isọn̄.
5. Didie ke nnyịn ikeme ndibiere se ‘edikabade edisana usem nnọ’ abuanade?
5 Ye mbon oro ẹsemde kpukpru usem ẹmi, ndi ‘edikabade edisana usem nnọ’ eyeyom mmọ ẹtop usem emana mmọ ẹduọk ẹnyụn̄ ẹkpep akpa usem oro Abasi ọkọnọde Adam? Se ikanamde etịn̄ prọfesi emi an̄wam ndibọrọ mbụme oro.
Ntak Ẹyomde Edisana Usem
6-8. (a) Nso idaha ido ukpono ikọkọri ke Judah mbemiso ẹnọde prọfesi eke Zephaniah 3:9? (b) Ke mme idụt oro ẹkekanarede Judah ẹkụk, nso ido ikọyọhọ?
6 Ke ndondo oro ke Manasseh ekebemiso akara obio ubọn̄ Judah ndien ekem Amon, ẹmi ẹkọbọpde mme itieuwa ẹnọ Baal, ẹbre idiọn̄, ẹnyụn̄ ẹmenede mme edinam ubụpekpo ke enyọn̄. (2 Ndidem 21:1-6; 2 Chronicles 33:21-23) Nte utịp, ke ini ukara Josiah, eyen Amon ye andida itie esie, Jehovah ama ọdọn̄ prọfet esie Zephaniah nditọt nte ke ubiereikpe Abasi ọmọn̄ odoro idụt oro ke idem.—Zephaniah 1:1, 2.
7 Idem okposụkedi mbon Judah ẹkediọn̄ọde ẹto mbụk mmọ ye N̄wed Abasi eke odudu spirit nte ke Jehovah edi ata Abasi, mmọ ẹkesụk ẹsesịn idem ke mme oburobụt ido edinam utuakibuot Baal. Mmọ ẹma ẹnụk ibuot ẹnọ utịn ye ọfiọn̄ ye ofụri udịm enyọn̄, emi ekedide nnennen edibiat ibet Abasi. (Deuteronomy 4:19; 2 Ndidem 23:5) Ke akande kpukpru ẹmi, mmọ ẹma ẹbuana ke edinam mbuaha mbuọtidem, ẹnamde nte n̄kpọ eke ẹdọhọde ke kpukpru ido ukpono edi ukem, ke ndida un̄wọn̄ọ ke enyịn̄ Jehovah ye ke enyịn̄ nsunsu abasi Malcam. Edu mmọ ekedi nte ke “Jehovah idinamke eti n̄kpọ, idinyụn̄ inamke idiọk.” (Zephaniah 1:4-6, 12) Amaedi mme idụt oro ẹkekande Judah ẹkụk, kpukpru mmọ ẹma ẹnịm mbụk edibiọn̄ọ Jehovah ye ikọt esie, ntre mmọ n̄ko ẹkedu ke udịm oro anade ẹbiere unenikpe Abasi ẹnọ mmọ.—Zephaniah 2:4-15.
8 Edi ye utọ n̄kpọntịbe emi ke Jehovah ekebemiso etịn̄ ete ke imọ ‘iyekabade edisana usem inọ mme idụt, man kpukpru mmọ ẹkot enyịn̄ Jehovah, man ẹnam n̄kpọ ẹnọ imọ ke esịt kiet.’ (Zephaniah 3:9) Nso, ndien, idi edisana usem oro?
9. (a) Ntak emi edisana usem mîdịghe usem Hebrew m̀mê sụk Ikọ Abasi oro ẹwetde-wet-e? (b) Nso idi edisana usem oro, ndien didie ke enye otụk uwem mbon oro ẹsemde enye?
9 Nte enye edi usem Hebrew? Baba; mbon Judah ẹma ẹnyenyene oro, edi n̄kpọ ẹmi mmọ ẹketịn̄de ẹnyụn̄ ẹnamde nte an̄wan̄ade ikasanake, ikonyụn̄ inenke ke enyịn Jehovah. Ndien edisana usem idịghe sụk Ikọ Abasi oro ẹwetde-wet. Mmọ n̄ko ẹma ẹnyene oro. Edi se mmọ ẹkeyomde ekedi edinen̄ede mfiọk akpanikọ aban̄ade Abasi ye mme uduak esie, ndien Jehovah ikpọn̄îkpọn̄ ekeme ndinọ oro ebe ke spirit esie. Ke ini mmọ ẹkpepde ndisem edisana usem oro, ekikere mmọ, utịn̄ikọ mmọ, ye edu uwem mmọ, edikọn̄ọ ke edidiọn̄ọ akpanikọ oro nte ke Jehovah edi n̄kukụre Abasi akpanikọ. (Zephaniah 2:3) Mmọ ẹkpekọn̄ mbuọtidem mmọ ke enye ẹnyụn̄ ẹnọ ukara esie ọyọhọ ibetedem. Emi edi akpan n̄kpọ ndemede udọn̄ ọnọ nnyịn mfịn. Ntak-a?
Mbon Oro Ẹnọde Edisana Usem
10. Ke ewe ikpehe ini ke prọfesi eke Zephaniah 3:9 ekenyene ndisu?
10 Ke anyande ubọk owụt edisu prọfesi ke akpan ini kiet, Zephaniah 3:9, NW, ọdọhọ ete: “Koro ke ini oro nyekabade edisana usem nnọ mme idụt.” Ini ewe idi oro? Zep 3 Ufan̄ikọ 8 ọbọrọ ete ke enye edi ke ini Jehovah ‘osopde mme idụt,’ mbemiso enye ‘an̄wan̄a mmọ ifụtesịt esie ke idem,’ ke enye ọnọ mbon nsụhọdeidem ẹmi ẹdude ke isọn̄ edisana usem.
11. (a) Ewe edisu iba ke Zephaniah 3:9 ekenyene mbemiso eyomfịn? (b) Didie ke edisu esie mfịn enyene ukpụhọde?
11 Ke eyo Edidem Josiah, mbemiso Jehovah akayakde udịmekọn̄ mbon Babylon ọnọ ubiereikpe, ediwak owo ẹma ẹkpọn̄ nsunsu utuakibuot ẹnyụn̄, utu ke oro, ẹnam n̄kpọ Jehovah. (2 Chronicles 34:3-33) N̄ko, ke akpa isua ikie C.E., mbemiso mbon Rome ẹkesobode Jerusalem, ediwak tọsịn owo ẹma ẹkpep akpanikọ aban̄ade Abasi ye uduak esie ẹnyụn̄ ẹdiana kiet ke utom esie. Ke ini oro usem akpanikọ emi ama enyene uforo akamba akamba oto mme n̄kpọ oro Jesus Christ akanamde ke ndisu uduak Jehovah. Edi, edi ke eyo nnyịn ke prọfesi Zephaniah osu ke udomo eke ofụri ekondo. Ke ẹtan̄ kpukpru idụt idahaemi ẹbon ọtọkiet ẹnọ ekọn̄ akwa usen Abasi, Andikara kpukpru n̄kpọ ke Armageddon. (Ediyarade 16:14, 16) Editan̄ mbon oro ama ọtọtọn̄ọ toto ke emana Obio Ubọn̄ oro ke 1914. Ndien edi ke ukem ini emi ke Jehovah emen edisana usem ọnọ mme owo ke ofụri ererimbot ke ndisu prọfesi emi. Ndikpep usem oro edi ata akpan n̄kpọ koro mme andibọhọ akwa ukụt oro edide ke iso ẹnyene ndidi mbon oro ẹnen̄erede ẹnam edisana usem oro edi usem mmọ.—Joel 2:32.
12. (a) Nso ebuana ke n̄kukụt oro ẹwetde ke Isaiah 6 enyene ye prọfesi aban̄ade edisana usem? (b) Ntak emi nsụhọ oro ẹyetde aran ẹkeyomde un̄wam edieke anade mmọ ẹdot ndikaiso ke utom Jehovah?
12 Ke n̄kemuyo ye emi, ekedi ke ntọn̄ọ ntọn̄ọ emana oro eketienede Ekọn̄ Ererimbot 1 ke Jehovah ọkọtọn̄ọ nditat mme asan̄autom esie oro ẹyetde aran enyịn ndikụt utịbe n̄kukụt oro ẹwetde ke Isaiah ibuot 6. (Isa 6 Ufan̄ikọ 1-4) N̄kukụt emi ọsọn̄ọ owụt nte nnyịn ndinyene edisana n̄kpọkinua edide akpan n̄kpọ man ikpanam n̄kpọ Jehovah ke usụn̄ ẹnyịmede. Enye owụt nte, ke n̄wọrọnda usụn̄, Jehovah edi edisana. Ana ikọt esie n̄ko ẹwụt edu emi. (1 Peter 1:15, 16) Edi nsụhọ oro ẹyetde aran ẹma ẹyom un̄wam ke afan̄ emi. Ke Ekọn̄ Ererimbot 1, mmọ ke ndusụk udomo ẹma ẹyak ẹyet mmọ mbat ke edibuana ke mme mbubehe ererimbot. “Uten̄e Jehovah asana,” edi mmọ ẹma ẹyak ndịk owo ye eke mme n̄ka ubọkowo okịbi mmọ inua, anamde mmọ ẹtre nditan̄a Ikọ Abasi ke akamba udomo. (Psalm 19:9) Otode ke ebuana mmọ ye Christendom, ndusụk ido edinam ye mme usụn̄ unam n̄kpọ esie ẹkesụk ẹsasabade nsụhọ ẹmi.
13, 14. (a) Didie ke nsụhọ ẹkewụt nnennen edu, ndien nso ke Jehovah akanam ke ibuot mmọ? (b) Ke nso usụn̄ ke Jehovah ọkọnọ nsụhọ edisana usem?
13 Ke ẹfiọkde itie mmọ, nsụhọ ẹma ẹdọhọ, kpa nte prọfet Isaiah ọkọdọhọde ẹte: “Mbọm mi! Koro mmakpa: koro ami ndide owo edidehe n̄kpọkinua, nnyụn̄ ndụn̄ ke otu mbon edidehe n̄kpọkinua, koro enyịn mi okụtde edidem, Jehovah mme udịm.” (Isaiah 6:5) Mmọ ẹma ẹfiọk ẹte ke owo inyịmeke idaha mmimọ. Mmọ ye mmemidem ikọsọn̄ọke iyịre ke idiọk usụn̄uwem m̀mê ke nsọn̄ibuot esịnde ndibọ ntụnọ Jehovah. Mmọ ikadianake ye mme ọkwọrọ ederi ke ini mmọemi ẹkenọde Obio Ubọn̄ Abasi un̄wam inua inua ndien ekem ẹnyịmede Esop Ediomi M’idụt nte n̄kpọ eke enye edide Obio Ubọn̄ oro.
14 Ke ntak edu utua n̄kpọfiọk eke nsụhọ oro ẹsụhọrede idem mi, Jehovah ke ima mfọnido esie ama anam n̄kpọkinua mmọ ẹsana. Isaiah 6:6, 7 asian nnyịn ete: “Ndien owo mme seraphim kiet efe etiene mi, ye mbubek ikan̄ eke enye akadade ufatikan̄ osio ke itieuwa, ke ubọk esie: ndien enye ada enye otụk mi ke n̄kpọkinua, onyụn̄ ọdọhọ ete, Sese, emi omotụk fi ke n̄kpọkinua: omonyụn̄ osio isop idiọkido fo.” Enye ekedi etop edinam asana eke otode Ikọ Abasi oro okosobode mme ido edinam ye ukpepn̄kpọ owo nte ikan̄ osobode n̄kpọ. Enye ama ọkọmọde ndịk owo ke esịt mmọ efep onyụn̄ anam ikan̄ ikan̄ udọn̄ edida n̄kpọkinua mmọ n̄kpono Jehovah ada ke itie esie. Ntre Jehovah ama osu un̄wọn̄ọ oro enye ọkọn̄wọn̄ọde “[ndi]kabade edisana usem [ke ata ata usụn̄, edisana n̄kpọkinua] nnọ mme idụt, man kpukpru mmọ ẹkot enyịn̄ Jehovah.”—Zephaniah 3:9, NW.
15. Didie ke ibọrọ nsụhọ ẹmi okodu ke n̄kemuyo ye ntak oro Jehovah ọkọnọde mmọ edisana usem?
15 Ntre ke ini otu Isaiah eyomfịn ẹketọn̄ọde ndikop uyo Jehovah obụpde, nte ẹwetde ke Isaiah 6:8 ete: “Anie ke ndidọn̄ utom? Anie edinyụn̄ aka n̄kpọ ọnọ nnyịn?” mmọ ẹma ẹbọrọ idara idara ẹte: “Se mi, dọn̄ mi utom.” Ikememke utom inọ kpukpru mmọ nditọn̄ọ an̄wan̄wa utom ukwọrọikọ, edi mmọ ẹma ẹyom Abasi ada mmimọ anam utom nte ikọt enyịn̄ esie. Spirit esie ama ọsọn̄ọ mmọ idem. Ibat mmọ ama ọkọri.
16. (a) Nso mfri oro owo mîkodorike enyịn ke ukwọrọikọ nsụhọ oro okon̄wụm? (b) Didie ke akwa otuowo ẹnọ uyarade nte ke mmimọ n̄ko ke isem edisana usem oro idahaemi?
16 Nte ini akade, ama ana in̄wan̄în̄wan̄ nte ke ukwọrọikọ mmọ ke okon̄wụm mfri oro owo mîkodorike enyịn. Ebede ke mmọ, Jehovah ke akan̄wam otu efen ndikpep edisana usem oro. (Isaiah 55:5) Mmọemi ikenyeneke idotenyịn uwem eke heaven, edi mmọ ẹma ẹda emi nte ifet edidi nsan̄a nsụhọ emi ẹdade udeme Obio Ubọn̄ ẹnyene, ẹnyụn̄ ẹnam n̄kpọ ye mmọ ke esịt kiet nte mme anditan̄a Obio Ubọn̄ Abasi. Nte n̄kọri odude, mmọemi ẹto “kpukpru obio ye esien ye idụt ye usem,” tutu mmọ idahaemi ẹmenam “akwa otuowo” ẹmi ibat mmọ ẹdide ediwak million. Ikọ oro ọwọrọde mmọ ke inua idịghe orụk ikọ oro akpadade mmọ akabuan ye mbon ererimbot ẹmi ẹbaharede mi. Mmọ ikọn̄ke idotenyịn mmọ ke owo baba kiet m̀mê ke n̄ka ubọkowo. Utu ke oro, “mmọ . . . ẹfiori ke ọkpọsọn̄ uyo, ẹte, yak edinyan̄a enyene Abasi nnyịn emi etiede ke ebekpo, onyụn̄ enyene Eyenerọn̄.”—Ediyarade 7:9, 10.
Se Edikpep Usem Oro Oyomde Oto Nnyịn
17. Ntak edide akpan n̄kpọ nte nnyịn ikpep edisana usem mfọn mfọn inyụn̄ ikọri ke ukeme nnyịn ndisem enye-e?
17 Inamke n̄kpọ mme nnyịn idu ibịghi didie ke esop Jehovah, ekese n̄kpọ ẹdu oro nnyịn ikemede ndinam man ikọri ifiọk nnyịn ke edisana usem ye ukeme nnyịn ndisem enye mfọn mfọn. Edi akpan n̄kpọ ndisịn ukeme nnam oro. Ntak-a? Koro emi edi idiọn̄ọ ima oro nnyịn imade akpanikọ.
18, 19. (a) Ke ntọn̄ọ ntọn̄ọ, ntak emi edide akpan n̄kpọ ndikọri ọkpọsọn̄ ima nnọ akpanikọ? (b) Ntak edide akpan n̄kpọ ndikaiso nnam ima oro ọsọn̄ idem?
18 Ke ntọn̄ọ ntọn̄ọ, utọ ima emi esin̄wam ndin̄wan̄a ekikere ye esịt owo man enye ekpekeme ndifiọk se idude ke n̄wed Abasi oro ẹmende ẹwụt enye; ima emi esinụk enye ndisan̄a n̄kpere Jehovah nnyụn̄ n̄wụt esịtekọm mban̄a esop esie. Ntre, ima ẹnyenede ẹnọ akpanikọ edi ukpọhọde uwọrọ ufụn nsunsu ido ukpono. Ndusụk owo ẹsidọhọ ke imenyene udọn̄ ke Bible edi idehedei ikpọn̄ kpukpru n̄kọk nsunsu ido ukpono ye usụn̄uwem nnam-se-mmade esie. Ntak mîdehedei ikpọn̄-ọ? Nte ẹnamde an̄wan̄a ke 2 Thessalonica 2:10, mmọ inyịmeke “ndibọ ima akpanikọ, man ẹnyan̄a mmọ.” Edi akpan n̄kpọ didie ntem nnyịn ndinyene ima oro!
19 Inikiet oro nnyịn ibọde akpanikọ emi, nnyịn ndinam ima oro ọsọn̄idem edi akpan n̄kpọ ke n̄kọri nnyịn eke spirit. Nyene ke ekikere ete ke Jehovah ọdọhọ ke akpanikọ oro ebiet “usem.” Ke ini owo ekpepde obufa usem, enye enyene ndisịn ukeme ofụri esịt ndikọri nsio nsio ikọ ke usem esie, okot ikọ nnennen, ekpep kpukpru usụn̄ nte ẹbonde ikọ, ye ntre ntre eken. Ima enyenede ọnọ obufa usem oro ye mme owo oro ẹsemde usem emi eyen̄wam enye ndikaiso nnam n̄kọri. Enye ekeme ndisem usem oro ke ndusụk udomo, ke ọfiọn̄ ifan̄, edi eyeda ukeme esịt akpanikọ oro esịnde ke ediwak isua mbemiso enye ekemede ndisem nte amanaisọn̄. Orụk ukeme oro ke eyom man idiọn̄ọ edisana usem.
20. (a) Nso inam edisana usem enen̄ede edi edisana? (b) Ntak emi edidu ke ukpeme edide se ẹyomde ke n̄kan̄ nnyịn owo kiet kiet?
20 Edi akpan n̄kpọ nditịm mfiọk nte ke usem oro Abasi ọnọde ikọt esie edi edisana. Emi edi akpanikọ, idịghe ke ido nte ẹbonde ikọ, edi koro enye ọnọde uyarade eti ido uwem ye edisana idaha eke spirit. Ufan̄ idụhe ke usem emi inọ nsu, abian̄a, m̀mê n̄kari. Mbon oro ẹsemde usem emi ẹnyene nditịn̄ akpanikọ kpukpru ini. (Zephaniah 3:13; Ephesus 4:25) Ukem oro n̄ko, ana ikọinua mmọ owụt n̄kokon̄ idaha Jehovah kaban̄a eti ido idan̄. (Ephesus 5:3, 4) N̄wed Abasi n̄ko amanam nnyịn ifiọk nte ke kpukpru n̄kpọ oro ẹnyenede ebuana ye Akwa Babylon, kpa ukara ererimbot eke nsunsu ido ukpono, isanake. (Ediyarade 18:2-4) Ẹmen mme abasi esie ẹwụt nte “ekpat eto.” (Jeremiah 50:2) Nte odotde, ndien, ana mbon oro ẹkpepde edisana usem ẹduọn̄ọ mme n̄kọk nsunsu utuakibuot oro ẹkụtde ke enyịn, ẹsịn mme ukpepn̄kpọ esie, ẹnyụn̄ ẹkpọn̄ mme usọrọ esie, ẹnyụn̄ ẹsion̄o ikọ ekededi oro owụtde ukwan̄ ekikere esie ẹfep ke utịn̄ikọ mmọ. Ke adianade ye emi, ke Ediyarade 16:13-16, ẹnam nnyịn ifiọk nte ke nsunsu ekikere oro atan̄de mme idụt obok ndin̄wana ye Obio Ubọn̄ Abasi edi ndedehe n̄ko, emi mme demon ẹnọde odudu ndisuan. Ntre oyom nnyịn idu ke edidemede mbak idiyak ekededi ke otu ndedehe n̄kpọ ẹmi ebe odụk utịn̄ikọ nnyịn.
21. Nso n̄kpọ ibuana ke edisana usem ke adianade ye mme ikọ ẹmi ẹtịn̄de?
21 Ẹkot se nnyịn ikpepde usem, ndien enye odot ntre, edi oro iwọrọke ite ke mbon oro ẹsemde enye ẹsikpep sụk nte ẹtịn̄de mme ikọ oro edide ọsọ ikọ ke utọn̄ ikọt Jehovah. Uyoikọ, nte ẹkamade iso, ye edida idem ntịn̄ ikọ edi akpan n̄kpọ n̄ko. Mmọemi ẹkeme ndinam owo ọdiọn̄ọ etop oro ikọinua kpọt mînamke. Mmọ kpukpru ini ẹsiwụt se nnyịn inen̄erede idi ke esịt esịt. Mmọ ẹkeme ndiwụt m̀mê nnyịn imosion̄o idem ikpọn̄ ufụp, utọk, ye iyatesịt, ẹmi kpukpru ẹdide utom anamidiọk obụkidem. Ke ini spirit Abasi anamde utom ifụre ifụre ke uwem nnyịn, mbun̄wụm esie akabade edi se ẹkụtde ke usụn̄ nte nnyịn itịn̄de ikọ ye mbon en̄wen.—Galatia 5:19-23; Ephesus 4:31, 32.
22. Ke ini nnyịn ikpepde edisana usem mfọn mfọn, didie ke enye otụk mme edinam ubiere nnyịn?
22 Owo ekededi oro ekpepde obufa usem ofiọk ete ke imọ imosịm ata n̄wọrọnda ikpehe ke n̄kọri ke ini enye enen̄erede ekere n̄kpọ ye obufa usem oro, utu ke ndikabade ikọ nto usem emana esie. Ntre, n̄ko, ke ini nnyịn ikpepde akpanikọ, isịnde ukeme esịt akpanikọ ndida enye nsịn ke edinam ke uwem nnyịn, inyụn̄ ibuanade enye kpukpru ini ye mbon en̄wen, nnyịn nsịt nsịt ikụt idem nnyịn nte ikerede n̄kpọ oro aban̄ade akpanikọ. Nnyịn ke nsinsi imenke akani n̄kpọ idomo ye obufa inyụn̄ in̄wana ndinam ubiere. Idem ke n̄kpri n̄kpọ, mme edumbet Bible ẹdụk nnyịn esịt ndinọ ndausụn̄ oro ẹyomde.—Mme N̄ke 4:1-12.
23. Inamke n̄kpọ m̀mê nso ke usem emana mmọ ekeme ndidi, nso iwụt nte ke Mme Ntiense Jehovah ke ofụri isọn̄ ke ẹsem edisana usem?
23 Edi akpanikọ nte ke ediwak tọsịn usem ẹdu oro ubonowo esemde, edi ẹkeme ndida kpukpru ẹmi nsem edisana usem. Ke edidiana kiet, ke ofụri isọn̄, Mme Ntiense Jehovah ke ẹda edisana usem ẹnam n̄kpọ ke eti usụn̄ nte mmọ ke esịt kiet ẹnọde an̄wan̄wa ikọ ntiense oro adade ukpono ọsọk Jehovah, kpa ima ima Abasi nnyịn.
Mme Mbụme Ndụn̄ọde
◻ Nso ibuana ke enọ utịn̄ikọ?
◻ Nso idi edisana usem?
◻ Kaban̄a mmanie ke Zephaniah 3:9 ekenyene edisu?
◻ Didie ke nnyịn ikeme ndinọ uyarade nte ke nnyịn ke akpanikọ imama edisana usem?
[Ndise ke page 23]
Mbon oro efiọkde ndisem edisana usem ẹsibuana enye ye mmọ en̄wen
[Ndise ke page 25]
Sededi oro usem isọn̄ emana mmọ edide, Mme Ntiense Jehovah ke ofụri ererimbot ẹsem edisana usem