Nso Ini Iso Odu Ọnọ Isọn̄ Nnyịn?

“Idụhe isua ikie efen ke mbụk oro ebietde ọyọhọ isua ikie 20 ke afai mbio obio, ke ibat ekọn̄ ẹmi ẹn̄wanade, akwa otu mbon itọkekọn̄ oro ẹnamde ẹdu, ediwak miliọn owo oro ẹwotde ke mme ekọn̄, ye akpakịp ubiatokụk ke ‘ekọn̄,’” ntre ke World Military and Social Expenditures 1996 ọdọhọ. Nte idahaoro odude mi oyokpụhọde tutu amama?

Apostle Peter ama eti mme Christian aban̄a un̄wọn̄ọ oro Abasi ọkọn̄wọn̄ọde ke ediwak isua ikie oro ẹkebede: “Nnyịn itie ibet obufa enyọn̄ ye obufa isọn̄, nte un̄wọn̄ọ [Abasi] edide; ndien edi do ke edinen ido edidụn̄.” (2 Peter 3:13) Mme utọ ikọ oro ke ata akpa ẹkedi ubak prọfesi Isaiah. (Isaiah 65:17; 66:22) Israel eset ama okụt akpa edisu ke ini ẹkenamde idụt oro afiak ada isọn̄ un̄wọn̄ọ esie enyene ke ama okodu ke ntan̄mfep ke Babylon ke isua 70. Ebede ke ndifiak ntịn̄ un̄wọn̄ọ “obufa enyọn̄ ye obufa isọn̄” oro, Peter okowụt ete ke prọfesi oro oyosu ke udomo oro akam okponde akan oro—ke ofụri ererimbot!

Ediwụk ndinen idaha ke ofụri isọn̄ edi uduak Abasi, ndien Obio Ubọn̄ esie eke heaven ye Christ nte Edidem edinam emi osu. “Idụt idimenke ofụt itiene idụt, mmọ idinyụn̄ ikpepke aba ekọn̄.” (Isaiah 2:4) Utọ ọyọhọ emem ye ifụre oro ke Jesus ekekpep mme anditiene enye ndidori enyịn nnyụn̄ mbọn̄ akam mban̄a ke se ẹsiwakde ndikot Ete Nnyịn, m̀mê Akam Ọbọn̄, ọdọhọde ete: “Yak Ubọn̄ Fo edi; yak inam uduak Fo; nte ẹnamde ke heaven, yak inam ke isọn̄ kpasụk ntre.”—Matthew 6:9, 10.

Nte afo ayadara ndidụn̄ ke ererimbot oro edide edinen nte heaven edide? Oro edi idotenyịn oro Bible ọnọde kpukpru mbon oro ẹyomde ndifiọk Abasi nnyụn̄ ndu uwem nte ekemde ye ndinen usụn̄ esie ke ofụri esịt.