‘Nte Mme Usen Eto’

KE SE ikande isua tọsịn ita ẹmi ẹkebede, Moses ekewet ete: “Isua ata ye duop ẹdu ke eyouwem nnyịn, ye isua anan̄, edieke nsọn̄idem odude; ndien iseri mmọ edi ọkpọsọn̄ utom ye ukụt.”—Psalm 90:10.

Kpa ye n̄kọri ke ifiọk ibọkusọbọ, isua uwem owo osụk edi ukem nte ekedide ke eyo Moses. Edi, mme owo idikaha iso idu ke ubiomikpe utọ uwem ibio ini oro. Ke n̄wed Bible eke Isaiah, Abasi ama ọdọhọ ete: “Usen ikọt mi [ebiet] usen eto, ndien ndimek ikọt mi ẹyedia se ubọk mmọ ẹnamde.”—Isaiah 65:22.

Kiet ke otu mbịghi-n̄kan eto ke mme idụt oro ẹkewetde Bible edi eto olive. Eto oro ẹwụtde mi edi kiet ke otu ediwak eto olive emi ọsọn̄de ke tọsịn isua oro osụk odude uwem ke Galilee. Ini ewe ke mme owo ẹdidu uwem ebịghi ntre? Kpa ukem prọfesi oro anam an̄wan̄a nte ke edidi ke ini Abasi edibotde “mbufa enyọn̄ ye obufa isọn̄.”—Isaiah 65:17.

N̄wed Ediyarade n̄ko etịn̄ prọfesi aban̄a ediwụk “obufa enyọn̄ ye obufa isọn̄”—kpa obufa ukara eke heaven ye obufa n̄kaowo ke ini Abasi “[edikwọhọrede] kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba.”—Ediyarade 21:1, 4.

Un̄wọn̄ọ Abasi emi eyesọp ndisu. Adan̄aoro, idem mme usen eto olive ẹditie sụk nte usen kiet emi esịnede hour 24. Ndien nnyịn iyenyene ini oro ekemde ndidara mme utom ubọk nnyịn ọyọhọ ọyọhọ.