Idụt Oro Omụmde Nsọn̄ọnda Akama

“Ẹberede mme itịm, man edinen idụt emi onịmde akpanikọ odụk.”—ISAIAH 26:2.

1. Ntak emi ikọ Isaiah aban̄ade “edinen idụt” ekemede ndidi n̄kpọ n̄kpaidem?

MFỊN, nsio nsio orụk idụt ẹdu. Ndusụk ẹnyene ukara mbio obio, ndusụk ẹnyene ukara ufịk. Ndusụk ẹnyene uforo, ndusụk ẹbuene. Mmọ ẹnyene ọsọ n̄kpọ kiet: Kpukpru mmọ ẹdi ubak ererimbot emi Satan edide abasi. (2 Corinth 4:4) Ye emi ke ekikere, mme ikọ Isaiah ẹkeme ndidi n̄kpọ n̄kpaidem ẹnọ ndusụk owo ke ini enye ọdọhọde ete: “Mbufo ẹberede mme itịm, man edinen idụt emi onịmde akpanikọ odụk.” (Isaiah 26:2) Edinen idụt? Ih, edinen idụt odu, sia prọfesi oro anyande ubọk owụt edidu esie ke eyo nnyịn. Didie ke ẹkeme ndidiọn̄ọ esen esen idụt emi?

2. Nso idi “edinen idụt”? Nnyịn isan̄a didie ifiọk?

² Ke edikabade eke Isaiah 26:2 ke New World Translation, ẹdọhọ ke idụt oro “odu uwem akpanikọ.” King James Version (ikọ mben) akabade ufan̄ikọ oro nte, “edinen idụt emi onịmde akpanikọ.” Mbiba ẹmi ẹdi in̄wan̄în̄wan̄ usụn̄ nditịn̄ mban̄a. Ke akpanikọ, edi mmemmem n̄kpọ ndidiọn̄ọ edinen idụt oro koro enye edi n̄kukụre idụt ke isọn̄ emi odude ke idak Christ kpa Edidem, ntem idịghe ubak ererimbot Satan. (John 17:16) Ntem, ẹdiọn̄ọ mme andibuana ke enye ke ntak ‘mmọ ndidu eti uwem ke otu mme idụt.’ Mmọ ẹtiene usụn̄uwem oro ọnọde Abasi ubọn̄. (1 Peter 2:12) Akande oro, ebiet ekededi oro mmọ ẹdude ke ererimbot, mmọ ẹdi ubak “[esop, NW] oduuwem Abasi, adaha ye isọn̄ eke akpanikọ Abasi odorode ke esịt.” (1 Timothy 3:15) Ke ẹdade ẹnọ akpanikọ, mmọ ẹsịn mme ukpepn̄kpọ ifiọkowo eke mme okpono ndem oro Christendom ekpepde, ndien mmọ ẹda ẹnọ “ata mmọn̄eba spirit”—Ikọ Abasi, kpa Bible. (1 Peter 2:2) N̄ko-n̄ko, mmọ ẹkwọrọ eti mbụk Obio Ubọn̄ ifịk ifịk ẹnọ “kpukpru owo ke idak ikpaenyọn̄.” (Colossae 1:23) Nte ẹkeme ndinyene eyịghe ekededi nte ke nsụhọ “Israel Abasi,” kpa esop mme Christian oro ẹyetde aran, anam idụt emi? Ke akpanikọ owo ikemeke!—Galatia 6:16.

Idụt Oro Amana

3. Nam an̄wan̄a nte “edinen idụt” akasan̄ade edimana.

³ Ini ewe ke “edinen idụt” emi akamana? Ẹma ẹtịn̄ prọfesi ẹban̄a ntọn̄ọ esie ke n̄wed Isaiah. Ke Isaiah 66:7, 8, nnyịn ikot ite: “Ke uman mîka-itụkke enye [Zion], enye aman; ke ubiak mîka-isịmke enye, enye aman eyeneren. . . . Uman omotụk Zion, enye omonyụn̄ aman nditọ esie.” Ke edide ata esen esen n̄kpọ, Zion, esop Abasi eke heaven, ekenyene ndiman “eyeneren” ke ubiak uman mîka-isịmke enye. Ke 1914 Obio Ubọn̄ Messiah ama amana ke heaven. (Ediyarade 12:5) Ke oro ebede, ata ediwak idụt ẹma ẹbuana ke akpa ekọn̄ ererimbot, ndien mme Christian oro ẹyetde aran ẹma ẹsobo ọkpọsọn̄ ukụt ye ukọbọ. Ke akpatre, ke isua 1919, idụt eke spirit, kpa “eyeneren,” ama amana ke isọn̄. Ntem Zion ‘ama aman nditọ esie’—mbon oro ẹyetde aran oro ẹbuanade ke obufa “edinen idụt”—ndien ẹma ẹtịm mmọ idem ẹnọ utom unọ ikọ ntiense oro akade-kaiso ndikọri.—Matthew 24:3, 7, 8, 14; 1 Peter 2:9.

4. Ntak emi edinen idụt Abasi ekenyenede ndin̄wana man omụm nsọn̄ọnda akama?

⁴ Toto ke ntọn̄ọ esie, idụt emi omosobo n̄kpọsọn̄ udomo nsọn̄ọnda. Ntak-a? Ke ini Obio Ubọn̄ heaven akamanade, ẹma ẹsion̄o Satan ye mme demon esie ẹduọn̄ọ ke isọn̄. Ọkpọsọn̄ uyo ama atan̄a ete: “Kemi edinyan̄a ye edikara ẹmedi, ye Ubọn̄ Abasi nnyịn ye odudu Christ Esie; koro ẹma ẹsio enyeemi odoride nditọete nnyịn ikọ ẹduọk ke isọn̄. Emi odoride mmọ ikọ ke iso Abasi ke uwemeyo ye okoneyo. Mmọ ẹma ẹkan enye oto ke iyịp Eyenerọn̄, onyụn̄ oto ke se mmọ ẹtịn̄de nte ntiense. Mmọ imaha uwem mmọ tutu osịm n̄kpa.” Satan ama anam n̄kpọ aban̄a ukpụhọde idaha emi ye akwa ifụtesịt “onyụn̄ adaba ndin̄wana ekọn̄ ye nditọ [n̄wan] ẹmi ẹsụhọde ẹnyụn̄ ẹnịmde mme item Abasi, ẹnyụn̄ ẹyịrede ẹmụm ikọ ntiense Jesus ẹkama.” Ke ẹsobode afai afai en̄wan Satan, mme Christian oro ẹyetde aran ẹsọn̄ọ ẹda. Tutu osịm mfịn emi, ifịk ifịk mme andibuana ke edinen idụt Abasi ẹnyene mbuọtidem ke iyịp Jesus oro ọnọde ufak ẹnyụn̄ ẹkaiso ndinọ Jehovah n̄kpọ ndibọrọ akwa osụn̄i isụn̄i oro ebe ke ndimụm nsọn̄ọnda n̄kama “tutu osịm n̄kpa.”—Ediyarade 12:1, 5, 9-12, 17; Mme N̄ke 27:11.

5. Ewe eti edu oro Mme Ntiense eyomfịn ẹnyenede an̄wam mmọ ndimụm nsọn̄ọnda n̄kama?

⁵ Ke 1919, ke ini edinọ ikọ ntiense mban̄a Obio Ubọn̄ Abasi ke eyomfịn ọkọtọn̄ọde, Nditọ Ukpepn̄kpọ Bible, nte ẹkesikotde Mme Ntiense Jehovah adan̄aoro, ẹkedi esisịt ke ibat edi ẹkop idem ke mbuọtidem. Mmọ ẹma ẹkabade ẹdi itiat idakisọn̄ ‘ọkpọsọn̄ obio, ye edinyan̄a ke ibibene ye ọkọ ekọn̄.’ Ibetedem mmọ ekedi ke “Jah Jehovah [emi] edide nsinsi itiat.” (Isaiah 26:1, 3, 4) Ukem nte Moses eke eset, mmọ ẹma ẹtan̄a ẹte: “Nyetan̄a enyịn̄ Jehovah; mbufo ẹnọ Abasi nnyịn ubom. Akwa itiat, utom esie ọfọn ama: koro kpukpru usụn̄ esie ẹnende: Abasi akpanikọ emi mînamke ukwan̄n̄kpọ, enye edi eti ye edinen.”—Deuteronomy 32:3, 4.

6. Ke ewe usụn̄ ke Jehovah ọdiọn̄ ikọt esie ke mme ukperedem usen ẹmi?

⁶ Toto ke ini oro, mme itịm ndutịm Obio Ubọn̄ Abasi ke ẹsụk ẹberede ẹna in̄wan̄ nte ẹkebemde iso ẹtan̄ nsụhọ ke otu 144,000 eke mme Christian oro ẹyetde aran ẹbok ndien idahaemi akwa otuowo eke “mme erọn̄ en̄wen” ẹdiana ke nditan̄a mme uduak Obio Ubọn̄ Jehovah. (John 10:16) Ntem, ẹkeme nditọt idara idara ẹte: “Afo anam idụt ọtọt, O Jehovah, anam idụt ọtọt; ada ukpono; anam kpukpru adan̄a isọn̄ ẹtara.” (Isaiah 26:15) Nte nnyịn idụn̄ọrede in̄wan̄ ererimbot mfịn, nnyịn imokụt nte mme ikọ ẹmi ẹdide akpanikọ! Ebede ke odudu edisana spirit, ẹmenọ ikọ ntiense aban̄ade Obio Ubọn̄ Christ oro edide “tutu osịm utịt ererimbot.” (Utom 1:8) Ẹkeme ndidomo nte n̄kọri emi okponde ke Ibatutom Isua Utom 1994 eke Mme Ntiense Jehovah ke Ofụri Ererimbot, emi odude ke page 12 osịm 15.

Obufa N̄wakn̄kan Ibat Mme Asuanetop

7, 8. (a) Nso uyarade idu nte ke ikọt Abasi ‘ẹnam urụk mmọ ọniọn̄’? (b) Ke esede Ibatutom Isua Utom 1994, mme ikpehe ewe ke afo okụt oro ‘ẹtatde adan̄a mmọ’ ke n̄wọrọnda usụn̄?

⁷ Kere ban̄a ndusụk n̄wọrọnda n̄kpọ ke ibatutom emi. N̄wakn̄kan ibat mme asuanetop Obio Ubọn̄ ke an̄wautom ama osịm 4,914,094! Didie ke edi n̄kpọ nduaidem ntem ndikụt ẹkade iso nditan̄ “akwa otuowo [mbok] . . . eke ẹtode ke kpukpru obio ye esien ye idụt ye usem ẹda ke iso ebekpo ye ke iso Eyenerọn̄, ẹsịne mfia ọfọn̄idem”! Ih, mmọemi n̄ko ẹmewụt nte idide mbon nsọn̄ọnda. ‘Mmọ ẹma ẹnyụn̄ ẹyet ọfọn̄idem mmọ ẹnam afia ke iyịp Eyenerọn̄,’ ẹnyụn̄ ẹdi se ẹbatde nte ndinen owo ke ntak ẹwụtde mbuọtidem ke uwa ufak Jesus.—Ediyarade 7:9, 14.

⁸ Akpan akpan toto ke 1919, ikot ama ọwọrọ osịm esop Jehovah ete: “N̄wan̄ade ebiet tent fo, yak mmọ ẹnyụn̄ ẹnen̄ede ikpehe idụn̄ fo ẹkọn̄: kûfat ubọk, nam urụk fo ọniọn̄, nyụn̄ nam ọkpọhọ fo ẹsọn̄ọ.” (Isaiah 54:2) Ke ndinam n̄kpọ mban̄a oro, utom ukwọrọikọ amakaiso ye unana edidop, idem ke Yukon oro ice esifụkde, emi enyenede adan̄a ye Alaska, emi okopidem otu mme asiakusụn̄ ẹyọde mbịtmbịt eyo emi ekemede ndibịt n̄kan ice ke Fahrenheit 50 m̀mê 60 ke ediwak urua ke ndusụk ini. Ke mme isua ndondo emi otuowo ke ẹbụn̄ọ ke ediwak ibat akan nte akanam edide ẹka idụt Jehovah oro omụmde nsọn̄ọnda akama. Mme itịm ẹmeberede ẹna in̄wan̄ man mmọemi ẹtode mme idụt Asia ẹmi ẹwọrọde ẹkpọn̄ Christendom ẹdụk, ẹtode n̄kani idụt ukara Communist, ẹtode ediwak idụt ke Africa, ye mme idụt Catholic, utọ nte Italy, Spain, Portugal, ye South America. Mbon oro ẹbịnde ẹfep ke isọn̄ emana mmọ ẹmeberede mme efakutom en̄wen. Ke England, ke uwụtn̄kpọ, Mme Ntiense ke ẹse ẹban̄a udọn̄ ekpụk 13 oro ẹsemde usem esenidụt.

“Ẹnam Emi”

9. (a) Nso ke ibat mme andikodụk Editi ke 1994 owụt? (b) Ewe ẹdi ndusụk idụt ẹmi ẹnyenede n̄wọrọnda uwak ibat mme andidụk Editi?

⁹ N̄wọrọnda n̄kpọ efen ke ibatutom isua edi ibat ẹkedụkde Editi. Esisịt ini mbemiso enye akakpade, Jesus ama ọtọn̄ọ usọrọ Editi n̄kpa esie onyụn̄ asian mme anditiene enye ete: “Ẹnam emi nditi Mi.” (1 Corinth 11:24) Ekedi n̄kpọ nduaidem ke 1994 ndikụt 12,288,917—awakde utịm ikaba akan ibat ifịk ifịk mme asuanetop—ẹsopde idem ọtọkiet ndinam ewụhọ oro, edide nte mme andidia m̀mê mme andida nse. Ke ndusụk idụt ibat mme andidụk Editi ke ẹbaharede ẹnọ mme asuanetop ama akam ọdọk. Mme asuanetop 4,049 ke Estonia, Latvia, ye Lithuania ẹma ẹkop idatesịt ndinyene owo 12,876 ẹkedụkde Editi, awakde utịm ikata akan ibat mme asuanetop. Ndien ke Benin, owo 16,786 ẹmi ẹkedụkde Editi ẹma ẹkpere ndiwak utịm ikotion n̄kan ibat mme asuanetop. Esop kiet enyenede n̄kpọ nte asuanetop 45 ama enyene owo 831 ẹkedụkde!

10. (a) Nso mbiomo ke ediwak ibat mme andikodụk Editi odori nnyịn ke idem? (b) Nam an̄wan̄a se ikemede nditịbe ke ini owo emi okodụkde Editi ọbọde n̄kaiso un̄wam.

¹⁰ Mme Ntiense Jehovah ẹkop inemesịt nte ke ata ediwak mbon oro ẹnyenede udọn̄ ẹma ẹdiana ye mmimọ ke akwa edinam oro. Idahaemi mmọ ẹyom ndin̄wam mmọemi ndikaiso nnam n̄kọri ke ifiọk ye ima oro mmọ ẹnyenede ke akpanikọ. Ndusụk owo ẹkeme ndinam n̄kpọ ke usụn̄ nte Alla ke Russia akanamde. Alla ekekpep n̄kpọ ye eyenete an̄wan kiet edide akpan asiakusụn̄ edi anam esisịt n̄kọri, ntre ẹma ẹtre ukpepn̄kpọ oro. Edi, Alla ama onyịme ikot ndidụk Editi. Mbonoesop oro, emi enyenede ekese se ọwọrọde, ama enen̄ede otụk enye ke idem. Ke afiakde ọnyọn̄ ufọk, n̄wan emi ama otomo kpukpru ndisọi mbiet esie ọduọn̄ọ onyụn̄ ọbọn̄ akam ọnọ Jehovah oyom un̄wam. Usen iba ẹma ẹkebe eyenete an̄wan edide asiakusụn̄ mi ama aka ebịne Alla ndikese nte enye akadarade Editi oro. Nneme oro enyenede ufọn ama ada itie. Ukpepn̄kpọ Alla ama afiak ọtọn̄ọ. Ikebịghike enye ama etiene abuana ke utom unọ ikọ ntiense. Ifiọkutom emi owụt ufọn edifiak n̄ka mbịne mbon oro ẹkedụkde Editi. Eyedi ediwak owo ẹyenam n̄kpọ nte Alla akanamde.

‘Ẹkûsịn Ndisop Idem Ọtọkiet’

11-13. (a) Nso idi ubak eduuwem akpanikọ eke edinen idụt oro? (b) Ntak oyomde mme ata Christian ẹdụk mme mbonoesop?

¹¹ Editi edi ata akpan mbonoesop ke n̄wed usenọfiọn̄ Mme Ntiense Jehovah, edi enye ke usụn̄ ndomokiet idịghe n̄kukụre mbonoesop. Kpukpru urua Mme Ntiense Jehovah ẹsisop idem ọtọkiet ke ndinam mme ikọ apostle Paul: “Ẹyak nnyịn inyụn̄ ikere nte ikpedemerede kiet eken inọ ima ye nti utom; ikûnyụn̄ isịn ndisop idem ọtọkiet, nte edu ndusụk owo edide, edi inọ kiet eken item; ndien mbufo ẹkpedọdiọn̄ ẹnam ntem, adan̄a nte ẹkụtde ẹte usen oro ke asan̄a ekpere.” (Mme Hebrew 10:24, 25) Mmọ ẹbuana ye edinen idụt Jehovah oro ẹdiọn̄ọde ebe ke eduuwem akpanikọ esie. Eduuwem akpanikọ esịne edinam akpanikọ ke ndidụk mme mbonoesop.

¹² Nte an̄wan̄ade ẹtịm ẹdiọn̄ọ emi ke Philippines, emi mbahade mme andidụk mme mbonoesop ke Sunday ke ofụri idụt oro edide mbahade 125 eke ikie ke otu ibat mme asuanetop. N̄ko, Otu Mme Ntiense ye mbon oro ẹnyenede udọn̄ ke Argentina ẹtịm ẹdiọn̄ọ emi. Mmọ ẹdụn̄ oyom usụn̄ ke n̄kpọ nte kilomita 20 ẹkpọn̄ Ufọkmbono Obio Ubọn̄. Edi, esenyịn circuit ọtọt ete ke ibọhọke ke mme ini udọn̄ọ, owo mmọ ndomokiet isidehede itaba mme mbonoesop. Mmọ ẹsinam isan̄ ke hour inan̄ ke ukpatn̄kpọ m̀mê ke enan̄-mbakara, ndien ke ini etuep mmọ ẹsinam isan̄ unyọn̄ ke ekịm okoneyo.

¹³ Nte utịt ndutịm emi asan̄ade ekpere akan, uwem ototịm ọsọn̄, mme mfịna ẹkponi, ndien edidụk mme mbonoesop kpukpru ini ekeme nditotịm ndi n̄kpọ-ata. Edi ke idak mme utọ idaha oro, nnyịn imoyom udia eke spirit ye ufiop ufiop itie ebuana oro ẹkemede ndinyene sụk ke mme utọ usopidem oro ikan nte akanam edide.

“Sịn Ifịk Nam Emi”

14. Ntak emi Mme Ntiense Jehovah ẹnyenede nte ini edide usọp usọp ke ekikere ẹban̄a utom ukwọrọikọ mmọ, ndien mme utịp ewe ẹwụt emi?

¹⁴ Isua oko, Ufọkabasi Catholic ke Italy ama etịn̄ aban̄a utom Mme Ntiense Jehovah nte “afai afai edikwọrọ ikọ n̄kabade mme owo esịt.” Ke akpanikọ, nte ededi, idụhe n̄kpọ ndomokiet oro edide afai afai kaban̄a se Mme Ntiense ẹnamde. Utu ke oro, utom ukwọrọikọ mmọ edi uyarade ntotụn̄ọ ima ẹnyenede ẹnọ mbọhọidụn̄ mmọ. Enye n̄ko edi uyarade n̄kopitem nnọ mme ikọ Paul ẹmi: “Kwọrọ ikọ Abasi; sịn ifịk nam emi, ke edide ekemini ye ke mînyụn̄ idịghe ekemini.” (2 Timothy 4:2) Edinyene nte ini edide usọp usọp ke ekikere onụk Mme Ntiense Jehovah ndisịn ifịk ke utom ukwọrọikọ mmọ, nte ẹkụtde ke mmọ ndisịn ofụri ibat hour 1,096,065,354 ke 1994 ndikwọrọ ikọ nnọ mme mbọhọidụn̄ mmọ, ndinam mme mfiakn̄ka, nnyụn̄ nnịm ukpepn̄kpọ Bible 4,701,357. Ediwak mmọ ẹma ẹkeme ndidụk udịm mme asiakusụn̄, emi owụtde nte ke edu usiakusụn̄ enyene uwem onyụn̄ okop odudu. Mme asiakusụn̄ 636,202 ke ẹbaharede ukem ukem ke ofụri ererimbot ẹwụt nte emi edide akpanikọ.

15, 16. (a) Didie ke n̄kparawa owo ye ikpọ owo ẹwụt edu usiakusụn̄? (b) Ke esede idụt kiet kiet ke Ibatutom Isua Utom 1994, m̀mọ̀n̄ ke okụt n̄wọrọnda ibat mme asiakusụn̄?

¹⁵ Ke otu mme asiakusụn̄ oro ẹdi ediwak n̄kparawa owo. Ndusụk ke United States ke ẹnam utom idahaemi nte mme asiakusụn̄ ofụri ini ke ini ẹdude ke ufọkn̄wed sekọndri, ye nditọ ubet ukpepn̄kpọ ẹdide akpan efakutom mmọ. Mme uyen ẹmi ẹmekụt nte ke usiakusụn̄ edi ata mfọnn̄kan usụn̄ ndikpeme idemmọ nsio ke n̄kpọsọn̄ ibọk, oburobụt ido, ye afai oro ẹyọhọde ediwak ufọkn̄wed ke idụt oro. Ediwak n̄kparawa owo eken ẹnyene usiakusụn̄ nte utịtmbuba mmọ ke ini mmọ ẹdikpọn̄de ufọkn̄wed. Ke Ukraine, Irina ama anam usiakusụn̄ unọ un̄wam ke ofụri ini oro enye okodude ke ufọkn̄wed sekọndri man otịm enye idem ọnọ usiakusụn̄ ke enye ama okokụre n̄wed. Ke enye ama okokụre n̄wed, ubon esie ama onyịme ndinọ un̄wam ke n̄kan̄ utom idịbi udia man enye ekeme ndinam utom usiakusụn̄ ofụri ini ke ibuot mmọ. Ke n̄kan̄ ndutịm uforo, n̄kpọ imemke ke Ukraine. Edi Irina ọdọhọ ete: “Mmọfiọk nte ke ami nnam utom oro mîwọrọke uwem inọ mi ikpọn̄ edi n̄ko ọwọrọde uwem ọnọ mbon oro n̄kwọrọde ikọ nnọ.” Edi ata n̄kpọ inemesịt ndikụt ediwak n̄kparawa owo mfịn ẹkerede n̄kpọ nte Irina. Ewe usụn̄ oro ọfọnde akan odu ọnọ mmọ ‘nditi Akwa Andibot mmọ ke ini emi mmọ ẹdide n̄kparawa owo ye n̄kaiferi’?—Ecclesiastes 12:1.

¹⁶ Ediwak ibat mme asiakusụn̄ ke ẹsọn̄ ke isua emana. Owo kiet ọtọt ete ke ini ọyọhọ ekọn̄ ererimbot iba, ẹma ẹwot ete ye eyeneka imọ eren nte mmọ ẹken̄wanade ekọn̄ oro, ẹma ẹnyụn̄ ẹwot eka ye eyeneka imọ an̄wan ke itieidụn̄. Ekem enye ama ataba eyeneren esie. Idahaemi, ke mme isua usọn̄ ye eke unana nsọn̄idem esie, Jehovah ọmọnọ enye, ke esop Christian, ubon oro enen̄erede okpon akan enyeoro enye akatabade. Ndien enye emenyene idatesịt ke ndin̄wam mbon en̄wen nte asiakusụn̄ ofụri ini.

17, 18. Didie ke nnyịn owo kiet kiet, edide idi asiakusụn̄ m̀mê idịghe, ikeme ndiwụt edu usiakusụn̄?

¹⁷ Nte ededi, idịghe kpukpru owo ẹkeme ndidi asiakusụn̄. Jehovah okop inemesịt ndibọ ofụri mbak duop nnyịn, kpa mfọnn̄kan se nnyịn ikemede ndinọ, inamke n̄kpọ se emi ekemede ndidi ke san̄asan̄a idaha nnyịn. (Malachi 3:10, ikọ idakisọn̄, NW) Ke akpanikọ, kpukpru nnyịn imekeme ndikọri ifịk ifịk edu mme asiakusụn̄ ẹmi inyụn̄ inam se ededi oro mme idaha nnyịn ẹyakde man inam edikwọrọ eti mbụk aka iso.

¹⁸ Ke uwụtn̄kpọ, ke Australia, ẹma ẹsio April 16 ẹnịm san̄asan̄a nte akpan usen kaban̄a unọ ikọ ntiense efak. Mme asuanetop ọkọrọ ye mme asiakusụn̄ ẹma ẹnọ usen emi ibetedem mfọn mfọn, nte ẹkemede ndikụt ke obufa n̄wakn̄kan ibat mme asuanetop 58,780 ke ọfiọn̄ oro. N̄ko-n̄ko, ẹma ẹsuan mme magazine 90,000 efen efen akan se ẹkesuande ke ukem ọfiọn̄ oro ke isua ekebede. Ke akpan usen emi, eyenete an̄wan ama onịm mme magazine ye eren kiet, ndien ke adan̄aemi ewetde enyịn̄ ye adres esie man akpafiak aka ebịne udọn̄ oro, enye ama okụt ete ke mmimọ imabuana n̄kpọ! Enye ekedi eyen eyeneka eka esie emi mmọ mîkekwe kiet eken ke isua 30. Oro ke akpanikọ ama eberede usụn̄ ọnọ ata inem inem mfiakn̄ka!

Ẹmụm Nsọn̄ọnda Ẹkama Tutu Osịm Utịt

19. Ntak edide usọp usọp n̄kpọ nte edinen idụt Jehovah omụm nsọn̄ọnda akama tutu osịm utịt?

¹⁹ Edi usọp usọp n̄kpọ nte kpukpru owo ke edinen idụt Abasi ẹmụm nsọn̄ọnda ẹkama nte ererimbot Satan osụhọrede ke ubiak n̄kpa esie. Ibịghike, edisana idụt Jehovah eyekop ikot oro: “Ikọt mi, mbufo ẹka ẹkedụk ke mme ubet mbufo, ẹnyụn̄ ẹberi itịm mbufo ẹbaha idem mbufo: ẹdịbe ini esisịt ntem, tutu ikpahaesịt ebe.” Ererimbot emi enyenede ubiomikpe iyịp mi idibọhọke ubiereikpe Abasi. “Koro, sese, Jehovah ọmọn̄ oto ke ebiet esiemmọ ọwọrọ, ete inọ ererimbot ufen iban̄a mme idiọkido mmọ; ndien isọn̄ eyeyarade iyịp esie, idinyụn̄ ifụkke aba nditọ esie ẹmi ẹkpan̄ade afai.” (Isaiah 26:20, 21) Akpakam nnyịn owo kiet kiet isọn̄ọ ida nte Christian oro omụmde nsọn̄ọnda akama emi abuanade ye edinen idụt Jehovah. Adan̄aoro nnyịn iyedara ndinyene nsinsi uwem ke ikpehe n̄kan̄ Obio Ubọn̄ Christ ke isọn̄ m̀mê ke heaven.

Nte Afo Emeti?

◻ Ini ewe ke “edinen idụt” akamana?

◻ Ntak oyomde ikọt Abasi ẹyọ ke mme ukperedem usen ẹmi?

◻ Nso ke ediwak ibat mme asuanetop ye mme hour oro ẹkesịnde ke utom ukwọrọikọ nte ẹkụtde ke Ibatutom Isua Utom 1994 ẹwụt?

◻ Ntak emi edidụk mme mbonoesop edide ata akpan n̄kpọ nte ererimbot emi otịmde-tịm asan̄a ekpere utịt esie?

◻ Ntak anade kpukpru mme andibuana ke edinen idụt Abasi ẹmụm nsọn̄ọnda ẹkama?

[Chart ke page 12-15]

IBATUTOM ISUA UTOM 1994 EKE MME NTIENSE JEHOVAH KE OFỤRI ERERIMBOT

(Se magazine)

[Ndise ke page 18]

Mbon nsọn̄ọnda ke edinen idụt Jehovah ẹyenyene nsinsi uwem ke mfọnmma idaha