Ndisọn̄ọ Mbuọtidem Nnyịn Ke Edinen Ido Abasi

“Mmasian fi, . . . man afo ọbuọt idemfo ye Jehovah.”—MME N̄KE 22:19.

1, 2. (a) Ntak emi Mme Ntiense Jehovah ẹnyenede mbuọtidem ke Jehovah? (Mme N̄ke 22:19) (b) Nso iwụt ite ke oyom ndusụk owo ẹsọn̄ọ mbuọtidem mmọ ke Jehovah?

ẸDA nnennen ifiọk aban̄ade Jehovah ye mme uduak esie ẹdiọn̄ mme ata Christian. “Asan̄autom emi anamde akpanikọ, onyụn̄ enyenede ọniọn̄” ke ima ọmọnọ mmọ “udia [eke spirit] ke edikem ini.” (Matthew 24:45) Ifiọk oro mmọ ẹnyenede ọnọ mmọ ọkpọsọn̄ itiat idakisọn̄ ndida n̄kọn̄ mbuọtidem mmọ ke Abasi. Ntem, nte otu, Mme Ntiense Jehovah ẹwụt n̄wọrọnda mbuọtidem ke Jehovah ye ke edinen ido esie.

² Nte ededi, etie nte ke nte owo kiet kiet oyoyom ndusụk Mme Ntiense ẹnam utọ mbuọtidem oro ọsọn̄ idem. Ke ini ke ini N̄ka esibọ mme leta oro ẹwụtde eyịghe oro ẹnyenede ke mme edinam an̄wan̄a oro ẹsinọde ke mme n̄wed esie. Mme eyịghe ẹmi ẹkeme ndidi nte ẹnamde n̄kpọ ẹban̄a mme ukpụhọde ke nte mme n̄kpọ ẹn̄wan̄ade, mîdịghe mmọ ẹkeme ndinyene n̄kpọ ndinam ye mme n̄kpọ oro ẹtụkde andibụp mbụme oro, akpan akpan ke ntụk.—Men John 6:60, 61 domo.

3. Nso ikeme nditịbe nnọ idem mme anam-akpanikọ asan̄autom Jehovah, ndien ntak-a?

³ Idem mme ata asan̄autom Jehovah ẹsikụt nte Ecclesiastes 9:11 edide akpanikọ: “Ntie ke idak utịn n̄kabade, nnyụn̄ n̄kụt nte ke idịghe mbon nsọp-itọk ẹkan ke mbuba, inyụn̄ idịghe mbon-uko ẹkan ke ekọn̄, nte ke idịghe mbon eti ibuot ẹnyene udia, inyụn̄ idịghe mbon ikike ẹkụt inyene, inyụn̄ idịghe mme ọfiọkn̄kpọ owo ẹnyene itoro: koro ini ye unọmọ ẹtịbede ẹnọ mmọ kpukpru.” Didie ke emi ekeme ndidi akpanikọ ke ntatara usụn̄, m̀mê ke usụn̄ifiọk eke spirit? Ekeme ndidi nnyịn ima ifiọk mme Christian oro ẹkesisọpde ndinam item Bible, ẹnyenede uko ke ndin̄wana nnọ akpanikọ, ẹnyene eti ibuot ke ndida mme edumbet Bible nsịn ke edinam, ẹnyụn̄ ẹsịn ifịk ke ndiyom nnennen ifiọk. Edi, ke ntak “ini ye unọmọ,” ndusụk owo ẹkeme ndikụt idemmọ nte ẹnanade ukeme idahaemi ke ntak mbabuat n̄kpọntịbe m̀mê usọn̄. Mmọ ẹkeme ndiyịk m̀mê mmimọ iyodụk obufa ererimbot Abasi ye uwem.

4, 5. Ntak emi mme Christian mînyeneke ntak ndomokiet ndiduọk mbuọtidem mmọ ke edinen ido Jehovah?

⁴ Ke ini Christian atabade nsan̄andọ esie ke n̄kpa, ubiak ye ntakurua esikpon etieti. Ekeme ndidi mmọ ẹma ẹnam n̄kpọ Jehovah nte mme nsan̄andọ ke ata ediwak isua. Nsan̄andọ oro osụhọde ọdiọn̄ọ ete ke n̄kpa esịbe mbọbọ ndọ.a (1 Corinth 7:39) Idahaemi, man ọbiọn̄ọ mbuọtidem esie ndiwụre, ana enye akara ntụk esie.—Men Mark 16:8 domo.

⁵ Owụt eti ibuot didie ntem ndise n̄kpa nsan̄andọ, ete m̀mê eka, eyen, m̀mê Christian edide n̄kpet n̄kpet ufan nte ifet ndiwụt mbuọtidem ke edinen ido Jehovah! Idem ke isobode ọkpọkpọ ntakurua, nnyịn imekeme ndinyene mbuọtidem nte ke Jehovah ikwan̄ake. Nnyịn imekeme ndinyene mbuọtidem nte ke owo ekededi oro enyenede uwem nsinsi—edide ebe ke edibọhọ ye uwem m̀mê ebe ke ediset ke n̄kpa—oyokop inemesịt. Kaban̄a Abasi, andiwet psalm ọdọhọ ete: “Afo atat ubọk fo, onyụn̄ ọnọ kpukpru mme andidu uwem se mmọ ẹmade, ẹyụhọ. Jehovah emenen ke kpukpru usụn̄ esie, onyụn̄ ọfọn ido ke kpukpru se enye anamde. Jehovah emekpere kpukpru mmọ eke ẹsemede ẹnọ enye, kpukpru mmọ eke ẹsemede ẹnọ enye ke akpanikọ. Enye ayanam se mme andibak enye ẹmade: onyụn̄ okop eseme mmọ, onyụn̄ anyan̄a mmọ.”—Psalm 145:16-19.

Ekikere nte ke Ima Ibọ Ufen nte Mîdotke

6, 7. (a) Ntak emi ndusụk Mme Ntiense oro ẹkebọde ufen ke ini edem ẹkemede ndinyene isio isio ifiọk idahaemi? (b) Ntak emi nnyịn mîkpekereke ke Jehovah ama akwan̄a ke ndikayak ẹbọ utọ ufen oro ke ini edem?

⁶ Ke ini edem, ndusụk Mme Ntiense ẹma ẹbọ ufen ke ndikesịn ndibuana ke edinam oro ubieresịt mmọ ekemede ndiyak mmọ ẹbuana idahaemi. Ke uwụtn̄kpọ, emi ekeme ndikedi se mmọ ẹkemekde ediwak isua ko-o kaban̄a ndusụk orụk utom mbio obio. Eyenete ekeme ndikere idahaemi ke imọ imekeme ndinam oro ye eti ubieresịt ye unana edifụmi edida san̄asan̄a eke Christian esie ke editịm n̄kpọ emi odude ke emi.

⁷ Ndi Jehovah ama akwan̄a ke ndikayak enye ọbọ ufen ke se enye ekemede ndinam idahaemi ye unana edinyene mfịna? Ekese owo ẹmi ẹkenyenede ifiọk n̄kpọntịbe oro idikereke ntre. Utu ke oro, mmọ ẹdat esịt nte ke mmimọ ima inyene ifet ndiwụt an̄wan̄wa ye in̄wan̄în̄wan̄ nte ke mmimọ ima ibiere ndisọn̄ọ nda ke eneni aban̄ade unen itie edikara ofụri ekondo. (Men Job 27:5 domo.) Nso ntak ke owo ekededi ekpenyene nditua n̄kpọfiọk ke ndiketiene ubieresịt esie ke ndimụm nsọn̄ọnda n̄kama ke n̄kan̄ Jehovah? Ke ndisọn̄ọ nda nnọ mme edumbet Christian nte akan̄wan̄ade mmọ m̀mê ndinam n̄kpọ ntiene nte ubieresịt onụkde owo, mmọ ẹma ẹwụt ke imodot ndinyene itie ufan ye Jehovah. Ke akpanikọ, owụt eti ibuot ndifep edinam oro edifịnade ubieresịt owo m̀mê oro ekemede ndinam mbon en̄wen ẹtuak ukot ẹduọn̄ọ. Nnyịn imekeme ndikere n̄kpọ ke usụn̄ emi mban̄a uwụtn̄kpọ oro apostle Paul ekenịmde.—1 Corinth 8:12, 13; 10:31-33.

8. Ntak emi mme Christian ẹdide mme Jew, oro ke mbemiso ẹkenịmde Ibet, mîkenyeneke ntak ndomokiet ndinyene eyịghe mban̄a edinen ido Jehovah?

⁸ Man ẹnem Jehovah esịt, ama oyom mme Jew ẹnịm Ibet Duop n̄ko ye ntatara nsio nsio ibet 600. Ekem, ke idak ndutịm Christian, ndinịm mme ibet ẹmi ikenen̄ekede idi se ẹkeyomde man ẹnam n̄kpọ Jehovah, ikedịghe inọ idem mme Jew eke obụk. Mme ibet oro mîkọbọpke mmọ aba ẹma ẹsịne mbon oro ẹkenyenede n̄kpọ ndinam ye edina mbobi, edinịm Sabbath, ediwa mme unam, ye edibet ndusụk orụk udia. (1 Corinth 7:19; 10:25; Colossae 2:16, 17; Mme Hebrew 10:1, 11-14) Ẹma ẹbiomode mme Jew—esịnede mme apostle—ẹmi ẹkekabarede ẹdi mme Christian mbiomo edinịm mme ibet oro ẹkeyomde mmọ ẹnịm ke ini mmọ ẹkedude ke idak Ibet ediomi. Ndi mmọ ẹma ẹkụni nte ke ndutịm Abasi ama akwan̄a ke ndikoyom mmọ ke mbemiso ẹnam n̄kpọ oro owo mîkoyomke aba ito mmọ? Baba, mmọ ẹma ẹkop idatesịt ke mme uduak Jehovah oro ẹkenamde an̄wan̄a ntatara ntatara.—Utom 16:4, 5.

9. Nso idi akpanikọ kaban̄a ndusụk Mme Ntiense, edi ntak emi mmọ mînyeneke ntak ndomokiet nditua n̄kpọfiọk?

⁹ Ke eyomfịn, odu ndusụk Mme Ntiense oro ẹkesọn̄ọde ẹyịre ye ekikere mmọ kaban̄a se mmọ ẹdinamde ye se mîdinamke. Ke ntak oro mmọ ẹma ẹbọ ufen ẹkan mbon eken. Ekem, ifiọk oro ọkọkọride ama an̄wam mmọ ndinyene ntatara ekikere kaban̄a mme n̄kpọ. Edi mmọ inyeneke ntak ndomokiet nditua n̄kpọfiọk ke ndikanam n̄kpọ ntiene ubieresịt mmọ ke mbemiso, idem ke ini emi akadade ufen efen efen ọsọk mmọ. Edi n̄kpọ oro enen̄erede odot itoro nte ke mmọ ẹma ẹwụt unyịme mmọ ndibọ ufen ke edinam akpanikọ nnọ Jehovah, “[ndinam] kpukpru n̄kpọ kaban̄a gospel.” Jehovah ọdiọn̄ orụk uten̄e Abasi oro. (1 Corinth 9:23; Mme Hebrew 6:10) Apostle Peter ama ewet ye mbufiọk ete: “Edieke mbufo ẹmede ime ke ini ẹkụtde ndutụhọ ke edinam nti n̄kpọ, oro edi se inemde Abasi esịt.”—1 Peter 2:20.

Ndikpep N̄kpọ Nto Jonah

10, 11. Didie ke Jonah okowụt unana mbuọtidem ke Jehovah (a) ke ini ẹkedọn̄de enye utom ke Nineveh? (b) ke ini Abasi mîkosoboke mbon Nineveh?

¹⁰ Ke ini ẹkedọhọde ete aka Nineveh, Jonah ama owụt unana esịtekọm aban̄a mbuọtidem oro Jehovah ekenyenede ke idemesie. Ke enyene-ndịk ifiọk n̄kpọntịbe oro okotode enye ndimen̄e ndisụk ibuot ama ekebe, enyịn ama an̄wan̄a Jonah, enye ama okụt ndudue esie, enyịme utom esenidụt esie, onyụn̄ ọkọtọt mbon Nineveh aban̄a nsobo oro akasan̄ade ekpere. Ekem n̄kpọ oro owo mîkodorike enyịn ama etịbe: Ke ntak edu edikabade esịt eke mbon Nineveh, Jehovah ama ebiere nditre ndisobo mmọ.—Jonah 1:1–3:10.

¹¹ Didie ke Jonah akanam n̄kpọ? Ke okopde idiọkesịt, enye ama eseme ọnọ Abasi ke akam. Akpan ntak iyatesịt esie ekedi: ‘Mma n̄kere ke n̄kpọ ẹditie ntem. Ntak edi oro n̄kesịnde ndidi Nineveh ke akpa ifet. Idahaemi, ke mma n̄kọbọ kpukpru ufen emi mma, esịnede ndịghe ye esuene edidi se akamba iyak emende emen, ndien ke mma n̄kokụre ọkpọsọn̄ utom editọt mbon Nineveh mban̄a nsobo oro akasan̄ade ekpere, emi etịbe! Ofụri utom ye ufen mi ekedi ke ikpîkpu! Akpakam ọfọn mi ndikpa!’—Jonah 4:1-3.

12. Nso ke nnyịn ikeme ndikpep nto ifiọk n̄kpọntịbe Jonah?

¹² Ndi Jonah ama enyene eti ntak ndiseme? Ndi Jehovah ama akwan̄a ndiwụt mme anamidiọk oro ẹkekabarede esịt mbọm? Ke akpanikọ, akpakana Jonah adat esịt; ẹma ẹtre ndisobo ediwak tọsịn owo ke mme itie duop! (Jonah 4:11) Edi edu eseme ye unana ukpono esie ama owụt ete ke enye ikenyeneke ọyọhọ mbuọtidem ke edinen ido Jehovah. Enye ama ekere aban̄a idemesie akaha onyụn̄ ekere esisịt aban̄a mbon efen. Ẹyak nnyịn ikpep n̄kpọ ito Jonah ke ndiyak ntụk mbon efen ebem ọkpọkpọ ntụk nnyịn iso. Ẹyak nnyịn inyene mbuọtidem nte ke ndikop uyo nnọ Jehovah, nditiene ndausụn̄ oro ẹnọde ebe ke esop esie nnyụn̄ nnyịme mme ubiere esie, ẹdi nnennen n̄kpọ ndinam. Nnyịn imenịm ke akpanikọ ite ke “edifọn ye mmọ eke ẹbakde Abasi.”—Ecclesiastes 8:12.

Ini Edi Emi Ndisọn̄ọ Mbuọtidem Nnyịn!

13. Didie ke kpukpru nnyịn ikeme ndisọn̄ọ mbuọtidem nnyịn ke Jehovah?

¹³ Ndisọn̄o mbuọtidem nnyịn ke Jehovah edi edinam owụtde ọniọn̄. (Mme N̄ke 3:5-8) Edi akpanikọ, ana nnyịn inam n̄kpọ ikan sụk edibọn̄ akam mben̄e Jehovah an̄wam nnyịn idọdiọn̄ inyene mbuọtidem. Mbuọtidem ọkọri etiene nnennen ifiọk, ntre ana nnyịn inam ọkpọkpọ edikpep Bible, edikot Bible ye mme n̄wed oro ẹnamde Bible an̄wan̄a, ẹdi ubak edinam nnyịn ke usen ke usen. Edidụk mme mbono esop Christian kpukpru ini edi akpan n̄kpọ, ukem nte eti ntịmidem ye editiene mbuana nte ikekeme. Ndinam edi edu nnyịn ndibuana akpanikọ Bible ye mbon en̄wen, idade mbufiọk ikan mme mfan̄a, anam n̄ko mbuọtidem nnyịn ke Jehovah ye Ikọ esie ọsọn̄. Nnyịn ke ntem imakabade inyene ebuana ye enye ke usen ke usen.

14. Ntak emi ediyomde ikọt Abasi ẹwụt mbuọtidem mmọ ke Jehovah ke n̄kpet n̄kpet ini iso ẹkan nte akanam ẹyomde?

¹⁴ Ke n̄kpet n̄kpet ini iso, n̄kponn̄kan ini ukụt oro akanam esịmde ubonowo eyetịbe ke mbuari. (Matthew 24:21) Ke ini enye etịbede, oyoyom mme asan̄autom Abasi ẹnyene mbuọtidem ke edinen ido Jehovah ye ke ndausụn̄ oro esop esie ọnọde akan nte akanam oyomde. Ke ndamban̄a usụn̄, adan̄aoro mmọ ke mbuọtidem ẹyenam item Abasi oro: “Ikọt mi, mbufo ẹka ẹkedụk ke mme ubet mbufo, ẹnyụn̄ ẹberi itịm mbufo ẹbaha idem mbufo: ẹdịbe ini esisịt ntem, tutu ikpahaesịt ebe.” (Isaiah 26:20) Kan̄a ke emi mmọ ẹdodu ke idaha oro ọnọde ukpeme ke se iwakde ikan esop 85,000 ke mme idụt 232. Se ededi efen oro edidianade ke item oro “ẹka ẹkedụk ke mme ubet mbufo,” nnyịn imekeme ndinyene mbuọtidem nte ke Jehovah ayan̄wam nnyịn ndinam.

15. Didie ke ẹdori nsọn̄uyo ke n̄kpọ aban̄ade mbuọtidem ke 1998, ndien ntak enende ndinam ntre?

¹⁵ Oyom nnyịn isọn̄ọ mbuọtidem nnyịn idahaemi. Ye unana mbuọtidem ke nditọete Christian nnyịn, ke esop Jehovah ye, ke akande kpukpru, ke Jehovah ke idemesie, edinyan̄a ididụhe. Ntre odot didie ntem nte ke 1998, ẹti Mme Ntiense Jehovah ke ofụri ererimbot ndien ndien, ebe ke mme ikọ ibuotikọ isua mmọ, nte ke “owo ekededi eke edisemede okot enyịn̄ Jehovah ọyọbọhọ”! (Rome 10:13) Ana nnyịn ika iso ndinyene mbuọtidem ke oro. Edieke nnyịn ikụtde idem ata ekpri eyịghe ke mbuọtidem emi, nnyịn ikpenyene ndinen̄ede enye idahaemi, ih, mfịn emi.

Ubiereikpe Jehovah Edidi Edinen

16. Nso ikeme nditịbe nnọ mbuọtidem edieke owo mînamke enye ọkọri, ndien didie ke nnyịn ikeme ndibiọn̄ọ emi nditịbe?

¹⁶ Ke Mme Hebrew 3:14, ẹdụri mme Christian oro ẹyetde aran utọn̄ ẹte: “Nnyịn imakabade idi mme abuana n̄kpọ ye Christ, edieke nnyịn isọn̄ọde imụm mbuọtidem eke ikenyenede ke editọn̄ọ tutu esịm akpatre.” Ke edumbet, mme ikọ ẹmi ẹnyene n̄kpọ ndinam n̄ko ye mme Christian oro ẹnyenede idotenyịn eke isọn̄. Mbuọtidem oro ẹkenyenede ke editọn̄ọ ekeme ndisụhọde edieke owo mînamke enye ọkọri. Edi akpan n̄kpọ didie ntem nte nnyịn ika iso ibịne nnennen ifiọk, ke ntem isọn̄ọde itiat idakisọn̄ emi mbuọtidem nnyịn ọkọn̄ọde!

17. Ntak emi nnyịn ikemede ndinyene mbuọtidem nte ama edi edinọ ubọhọ, Jesus eyebiere ikpe nte enende?

¹⁷ Ke mîbịghike Christ oyodụn̄ọde kpukpru idụt man enye ekeme “[ndibahade] mmọ kiet ye eken, nte emi ekpemerọn̄ abaharede erọn̄ ye ebot.” (Matthew 25:31-33) Nnyịn imekeme ndinyene mbuọtidem nte ke Christ ayanam se inende ke ndibiere m̀mê mmanie ẹdot ndibọhọ. Jehovah ọnọ enye ọniọn̄, ikike, ye mme edu eken oro ẹyomde man ‘ekpe ikpe ọnọ ererimbot ke edinen ido.’ (Utom 17:30, 31) Ẹyak mbuọtidem nnyịn etie nte eke Abraham, emi ọkọdọhọde ete: “Nsa fo O [Jehovah]! ndinam ntem, ndiwot mmọ eke ẹnende ye mmọ eke mînenke: mmọ eke ẹnende ndinyụn̄ ntie nte mmọ eke mînenke, nsa fo O! Nte Ebiereikpe ofụri ererimbot idinamke se inende?”—Genesis 18:25.

18. Ntak emi nnyịn mîkpafịnake idem ikaha iban̄a mme n̄kpọ oro nnyịn mîkemeke ndifiọk idahaemi?

¹⁸ Ye ọyọhọ mbuọtidem ke edinen ido Jehovah, iyomke nnyịn ifịna iban̄a edinyene ibọrọ nnọ mme mbụme nte: ‘Didie ke edikpe ikpe nseknditọ ye n̄kpri nditọwọn̄? Nte ekeme ndidi owo ididaha eti mbụk isọk ata ediwak owo ke ini Armageddon edidide edisịm? Nso kaban̄a mbon oro ẹnyenede udọn̄ọ mbeibuot? Nso kaban̄a . . . ?’ Edi akpanikọ, idahaemi nnyịn ikemeke ndifiọk nte Jehovah edibierede mme n̄kpọ ẹmi. Nte ededi, enye ayanam oro, ke edinen usụn̄ oro owụtde mbọm. Nnyịn ikpedehede iyịk oro. Ke akpanikọ, nnyịn imekeme ndikop n̄kpaidem ye idatesịt ndikụt nte enye esede aban̄a mmọ ke usụn̄ oro akananam nnyịn mîkam ikereke iban̄a.—Men Job 42:3; Psalm 78:11-16; 136:4-9; Matthew 15:31; Luke 2:47 domo.

19, 20. (a) Ntak mîkwan̄ake ndibụp mme mbụme oro ẹwụtde eti ibuot? (b) Ini ewe ke Jehovah edinọ mme ibọrọ oro ẹyomde?

¹⁹ Esop Jehovah ikpanke mme mbụme esịt-akpanikọ oro ẹbụpde ke ekem ini, nte ndusụk mme andibiọn̄ọ ẹtịn̄de ke ndudue. (1 Peter 1:10-12) Nte ededi, Bible ọnọ item ete nnyịn ifep mme eyịghe eyịghe mbụme oro mîsịneke ifiọk. (Titus 3:9) Ndibụp mme mbụme oro ẹwụtde eti ibuot nnyụn̄ ndụn̄ọde Ikọ Abasi ye mme n̄wed Christian man inyene mme ibọrọ N̄wed Abasi ekeme ndinam nnennen ifiọk nnyịn ọkọri ndien ke ntre ekeme ndisọn̄ọ mbuọtidem nnyịn ke Jehovah. Esop emi etiene uwụtn̄kpọ Jesus. Enye ama efep ndibọrọ mme mbụme oro nnennen ini ndibọrọ mmọ mîkekemke. Enye akanam an̄wan̄a ete: “Mmenyene ediwak n̄kpọ kan̄a ndineme ye mbufo, edi mbufo ikemeke ndiyọ mmọ ke emi.” (John 16:12) Enye n̄ko ama enyịme ete ke imọ ikọfiọkke kan̄a ndusụk n̄kpọ ini oro.—Matthew 24:36.

²⁰ Jehovah osụk enyenyene ediwak n̄kpọ ndiyarade. Owụt eti ibuot didie ntem ndibet enye, inyenede mbuọtidem nte ke edidi ke edikem ini esie ke enye ediyarade mme uduak esie kaban̄a se ẹyomde ini oro. Nnyịn imekeme ndinyene mbuọtidem nte ke ndondo oro edide ekem ini Jehovah, nnyịn iyokop idatesịt ndinyene ifiọk efen efen mban̄a mme usụn̄ esie. Ih, ẹyenọ nnyịn utịp, nnyịn ima ikam inyene ọyọhọ mbuọtidem ke Jehovah ye ke esop oro enye adade anam n̄kpọ. Mme N̄ke 14:26 ọnọ nnyịn nsọn̄ọ ete: “Ọkpọsọn̄ ibetedem odu ke uten̄e Jehovah: ndien nditọ esie ẹyenyene ubọhọ.”

[Mme Ikọ idakisọn̄]

Nso ke Afo Ekere?

◻ Ntak emi mîwụtke eti ibuot ndiyak mme ntụk ẹkara mbuọtidem nnyịn ke Jehovah?

◻ Nso ke nnyịn ikeme ndikpep nto ifiọk n̄kpọntịbe Jonah?

◻ Ntak emi edikpep Bible ye edidụk mme mbono esop ẹdide akpan n̄kpọ ntre?

[Ndise ke page 16]

Idem kpa ye ọkpọkpọ ntakurua, imekeme ndibuọt idem nte ke Jehovah edi edinen

[Mme ndise ke page 18]

Nte afo emetịm enịm ke emenyene mbuọtidem ke Jehovah?