Andibak Ndemede

KE OTU mme eto mfri ikpehe Mediterranean, eto almond edi kiet ke otu ata n̄wọrọnda. Ke utịt utịt January m̀mê February—ata anyanini mbemiso ediwak eto eken—enye esidemede ke itie unana nsehe ini etuep. Ndien nso utọ edidemede! Ofụri idem eto oro ọyọhọ ye ata ediwak mmemmem ndatndat m̀mê mfia frawa, ukperedem emi ebietde afia idet owo usọn̄.—Men Ecclesiastes 12:5 domo.

Mbon Hebrew eset ẹkekot eto almond “andidemede,” etịn̄de aban̄a edibak oro enye abakde osion̄o frawa. Jehovah akada ido emi ndinam akpan etop an̄wan̄a. Ke ntọn̄ọ ntọn̄ọ utom ukwọrọikọ esie, ẹma ẹwụt Jeremiah nsehe eto almond ke n̄kukụt. Nso ke enye ọkọwọrọ? Jehovah ama anam an̄wan̄a ete: “Ami mbabak ndemede mban̄a ikọ mi man nnam enye.”—Jeremiah 1:12.

Kpasụk nte eto almond esibakde ‘edemede,’ kpa ntre ke Jehovah ke ndamban̄a usun̄ ‘esibabak’ ọdọn̄ mme prọfet esie ẹketọt mme owo ẹban̄a mme utịp nsọn̄ibuot. (Jeremiah 7:25) Ndien enye ididuọkke odudu—enye ‘eyedemede’—tutu ẹnam ikọ prọfesi esie ẹma. Ntre ke ekedi ke 607 M.E.N., ke edikem ini, ubiereikpe Jehovah ama osịm idụt nsọn̄ibuot Judah.

Ikọ Abasi ama ebemiso etịn̄ ete ke ukem ubiereikpe oro eyesịm idiọk editịm n̄kpọ emi nnyịn idude mi. (Psalm 37:9, 10; 2 Peter 3:10-13) Ke ẹtịn̄de aban̄a utọ edinam ikpe oro, prọfet Habakkuk ọsọn̄ọ ọnọ nnyịn ete: “Koro n̄kukụt anade kan̄a ọnọ ini emi ẹnịmde . . . Bet enye; koro enye mîditreke ndidi, mîdinyụn̄ ibehe ini.” (Habakkuk 2:3) Ediye nsehe almond eti nnyịn nte ke Jehovah eyedu ke edidemede aban̄a mme ikọ esie man anam enye.

[Ebiet Ẹdade Ndise Ẹto ke Page 32]

Pictorial Archive (Near Eastern History) Est.