Jehovah Ọnọ Emem ye Akpanikọ Uwak Uwak
“Nyenyụn̄ n̄kọk mmọ, nnyụn̄ nyarade uwak emem ye akpanikọ nnọ mmọ.”—JEREMIAH 33:6.
1, 2. (a) Kaban̄a emem, nso ke n̄wetnnịm n̄kpọ mme idụt owụt? (b) Ke 607 M.E.N., nso ukpepn̄kpọ ke Jehovah ekekpep Israel aban̄a emem?
EMEM! Ẹyom enye didie ntem, edi enye anana didie ntem ke mbụk owo! Ọyọhọ isua ikie 20, akpan akpan, idịghe eyo emem. Utu ke oro, enye okụt ekọn̄ iba oro ẹkamade nsobo ke mbụk owo. Ke akpa ekọn̄ ererimbot ama okokụre, ẹma ẹsiak Esop Ediomi Mme Idụt man ẹmụm emem ererimbot ẹkama. Esop oro ama okpu. Ke ọyọhọ ekọn̄ ererimbot iba ama okokụre, ẹma ẹtọn̄ọ esop Edidiana Mme Idụt ye ukem utịtmbuba oro. Akam oyom nnyịn ikot mme n̄wedmbụk n̄kpọntịbe eke usen ke usen man ikụt nte enye n̄ko okpude idiọk idiọk.
2 Nte nnyịn ikpenyene ndikop n̄kpaidem nte ke mme esop owo ikemeke ndida emem ndi? Baba-o. Ke se iwakde ikan isua 2,500 ẹmi ẹkebede, ẹma ẹkpep ndimek ikọt Abasi, Israel, ukpepn̄kpọ ke afan̄ emi. Ke ọyọhọ isua ikie itiaba M.E.N., Babylon, odudu ererimbot oro akakarade, ama esịn emem Israel ke itiendịk. Israel okodori enyịn ke Egypt kaban̄a emem. Egypt ama okpu. (Jeremiah 37:5-8; Ezekiel 17:11-15) Ke 607 M.E.N., udịmekọn̄ Babylon ama owụri mme ibibene Jerusalem onyụn̄ ọfọp temple Jehovah. Ntem Israel ẹma ẹkpep n̄kpọ ke ọkpọsọn̄ usụn̄ nte ke edi ikpîkpu n̄kpọ ndiberi edem ke mme esop owo. Utu ke ndinyene emem, ẹma ẹnyịk idụt oro ẹda ẹka ntan̄mfep ke Babylon.—2 Chronicles 36:17-21.
3. Ke edisu mme ikọ oro Jehovah eketịn̄de ebe ke Jeremiah, mme onịm-mbụk n̄kpọntịbe ewe ẹkekpep Israel udiana akpan ukpepn̄kpọ kaban̄a emem?
3 Nte ededi, mbemiso iduọ Jerusalem, Jehovah ama ayarade ete ke imọ, idịghe Egypt, idida emem isọk Israel. Ebede ke Jeremiah enye ama ọn̄wọn̄ọ ete: “Nyenyụn̄ n̄kọk mmọ, nnyụn̄ nyarade uwak emem ye akpanikọ nnọ mmọ. Nyenyụn̄ nda nditọ Judah ye nditọ Israel ẹmi ẹketan̄de ẹfep mfiak ndi, nnyụn̄ mbọp mmọ kpa nte ke akpa.” (Jeremiah 33:6, 7) Un̄wọn̄ọ Jehovah ama ọtọn̄ọ ndisu ke 539 M.E.N. ke ini ẹkekande Babylon ẹkenyụn̄ ẹnọde nditọ Israel ẹmi ẹkedude ke ntan̄mfep ifụre. (2 Chronicles 36:22, 23) Ke utịt utịt ikpehe 537 M.E.N., otu nditọ Israel ẹma ẹdia Usọrọ Mme Ataya ke isọn̄ Israel ke akpa ini ke isua 70! Ke usọrọ oro ama okokụre, mmọ ẹma ẹtọn̄ọ ndifiak mbọp temple Jehovah. Emi eketie mmọ didie ke idem? N̄wetnnịm n̄kpọ oro ọdọhọ ete: “Kpukpru owo ẹfiori akamba mfiori, ke ẹtoro Jehovah, koro ẹtọn̄ọde ndibọp ufọk Jehovah.”—Ezra 3:11.
4. Didie ke Jehovah ekedemede nditọ Israel man ẹnam utom edibọp temple, ndien nso un̄wọn̄ọ ke enye akanam aban̄a emem?
4 Nte ededi, ke idara idara ntọn̄ọ oro ama ekebe, mme andibiọn̄ọ ẹma ẹnam idem emem nditọ Israel ẹnyụn̄ ẹtre utom edibọp temple. Ediwak isua ke ukperedem, Jehovah ama anam prọfet Haggai ye Zechariah ẹdaha ẹda man ẹdemede nditọ Israel ndikụre utom edifiak mbọp oro. Anaedi ekedi n̄kpọ nduaidem didie ntem ọnọ mmọ ndikop Haggai etịn̄de aban̄a temple oro ẹdibọpde, ete: “Ubọn̄ ukperedem ufọk eyekpon akan eke akpa: ndien ke ebiet emi ke ndinọ emem, Jehovah mme udịm ọdọhọ”!—Haggai 2:9.
Jehovah Osu Mme Un̄wọn̄ọ Esie
5. Nso idi n̄wọrọnda n̄kpọ kaban̄a ọyọhọ ibuot itiaita eke Zechariah?
5 Ke n̄wed Zechariah eke Bible, nnyịn imokot iban̄a ediwak n̄kukụt ye mme prọfesi eke odudu spirit oro ẹkesọn̄ọde ikọt Abasi idem ko ke ọyọhọ isua ikie itiokiet M.E.N. Mme ukem prọfesi ẹmi ẹkaiso ndinọ nnyịn nsọn̄ọ kaban̄a un̄wam Jehovah. Mmọ ẹnọ nnyịn kpukpru ntak ndinịm nte ke Jehovah ọyọnọ ikọt esie emem ke eyo nnyịn n̄ko. Ke uwụtn̄kpọ, ke ọyọhọ ibuot itiaita ke n̄wed oro ekerede enyịn̄ esie, prọfet Zechariah etịn̄ utịm ikoduop ete: ‘Ntem ke Jehovah ọdọhọ.’ Ini kiet kiet, ikọ Abasi oro enyenede n̄kpọ ndinam ye emem ikọt Abasi ọtọn̄ọ ye ikọ emi. Ndusụk ke otu un̄wọn̄ọ ẹmi ẹma ẹsu do ke eyo Zechariah. Kpukpru ẹmesu mîdịghe ke ẹkaiso ẹsu mfịn.
‘Nyefụbe Ufụp Nnọ Zion’
6, 7. Ke mme usụn̄ ewe ke Jehovah ‘okofụbe ufụp aban̄a Zion ye akamba ifiopesịt’?
6 Ikọ emi ebemiso odu ke Zechariah 8:2, emi nnyịn ikotde: “Ntem ke Jehovah mme udịm ọdọhọ, ete, [Nyefụbe] akamba ufụp nnọ Zion, nyenyụn̄ nda akamba ifiopesịt mfụbe ufụp nnọ enye.” Un̄wọn̄ọ Jehovah ndifụbe ufụp, ndinyene akwa ifịk, mban̄a ikọt esie ọkọwọrọ ke enye eyetịn̄ enyịn ndifiak n̄wụk emem mmọ. Edinam Israel afiak ọnyọn̄ isọn̄ esie ye edifiak mbọp temple ẹkedi uyarade ifịk oro.
7 Nte ededi, nso kaban̄a mbon oro ẹkebiọn̄ọde ikọt Jehovah? Ifịk emi enye enyenede aban̄a ikọt esie eyesan̄a ekekem ye “akamba ifiopesịt” esie ke idem mme asua ẹmi. Ke ini mme Jew ẹmi ẹkenamde akpanikọ ẹketuakde ibuot ke temple oro ẹkefiakde ẹbọp, mmọ ẹma ẹkeme nditi nsobo oro okosịmde ọkpọsọn̄ Babylon, oro ọduọde idahaemi. Mmọ n̄ko ẹma ẹkeme nditi akwa edikpu oro mme asua ẹmi ẹken̄wanade ndibiọn̄ọ mmọ ndifiak mbọp temple oro ẹkekpude. (Ezra 4:1-6; 6:3) Ndien mmọ ẹma ẹkeme ndikọm Jehovah nte ke enye osu un̄wọn̄ọ esie. Ifịk esie ama ada edikan ọsọk mmọ!
“Obio Akpanikọ”
8. Ke eyo Zechariah, didie ke Jerusalem akakabade edi obio akpanikọ ke okpụhọrede ye eke ini edem?
8 Ọyọhọ ikaba Zechariah ewet ete: “Ntem ke Jehovah ọdọhọ ete.” Nso idi mme ikọ Jehovah isan̄ enyeemi? “Mmọnyọn̄ ndi ke Zion, nyenyụn̄ ndan̄ ke ufọt Jerusalem: ndien Jerusalem eyekere, ete, Obio akpanikọ; ye obot Jehovah mme udịm, edisana obot.” (Zechariah 8:3) Mbemiso 607 M.E.N., Jerusalem ikedịghe obio akpanikọ ke baba usụn̄ kiet. Mme oku ye mme prọfet esie ẹma ẹbiara, ndien mme andidụn̄ ikanamke akpanikọ. (Jeremiah 6:13; 7:29-34; 13:23-27) Idahaemi ikọt Abasi ẹma ẹfiak ẹbọp temple, owụtde edisịn oro mmọ ẹkesịnde idem ke edisana utuakibuot. Jehovah ama afiak odụn̄ ini kiet efen ke spirit ke Jerusalem. Ẹma ẹfiak ẹtịn̄ akpanikọ edisana utuakibuot ke esịt esie, ntre ẹma ẹkeme ndikot Jerusalem “obio akpanikọ.” Ẹma ẹkeme ndikot n̄kokon̄ itie esie “obot Jehovah.”
9. Nso n̄wọrọnda ukpụhọde idaha ke “Israel Abasi” okokụt ke 1919?
9 Ke adan̄aemi ubiereikpe iba ẹmi ẹkenyenede se ẹwọrọde ẹnọ Israel eset, mmọ n̄ko ẹnen̄ede ẹnyene se ẹwọrọde ẹnọ nnyịn nte ọyọhọ isua ikie 20 emi asan̄ade ekpere utịt. Ke se ikperede ndisịm isua 80 ẹmi ẹkebede, ke ini akpa ekọn̄ ererimbot, ibat ibat tọsịn mbon oro ẹyetde aran ẹmi ẹkedade ke ibuot “Israel Abasi” adan̄aoro ẹma ẹka ntan̄mfep eke spirit, kpa nte Israel eset akakade ntan̄mfep ke Babylon. (Galatia 6:16) Ke edu prọfesi, ẹkedọhọ ke mmọ ẹdi okpo ẹmi ẹbonode ke efak. Kpa ye oro, mmọ ẹma ẹnyene udọn̄ esịt akpanikọ ndituak ibuot nnọ Jehovah “ke spirit ye ke akpanikọ.” (John 4:24) Ntem, ke 1919, Jehovah ama osion̄o mmọ ke ntan̄mfep, anamde mmọ ẹset ke n̄kpakpa idaha eke spirit mmọ. (Ediyarade 11:7-13) Ntem Jehovah ama ọbọrọ mbụme prọfesi Isaiah oro ke ọkpọsọn̄ uyo ete Ih: “Nte ofụri obio edimana usen kiet? M̀mê idụt edimana usen kiet?” (Isaiah 66:8) Ke 1919, ikọt Jehovah ẹma ẹfiak ẹdidu ini kiet efen nte idụt eke spirit ke “idụt” mmọ, m̀mê idaha eke spirit ke isọn̄.
10. Ọtọn̄ọde ke 1919, nso mme edidiọn̄ ke mme Christian oro ẹyetde aran ẹdara ke “idụt” mmọ?
10 Ke ẹnyenede ifụre ke idụt oro, mme Christian oro ẹyetde aran ẹma ẹnam utom ke akwa temple Jehovah eke spirit. Ẹkot mmọ “asan̄autom emi anamde akpanikọ, onyụn̄ enyenede ọniọn̄,” ẹmi ẹnyịmede ndibiom mbiomo edise mban̄a mme inyene Jesus ke isọn̄, kpa ifetutom oro mmọ ẹkade iso ndise mban̄a nte ọyọhọ isua ikie 20 emi ekperede utịt esie. (Matthew 24:45-47) Mmọ ẹtịm ẹfiọk ukpepn̄kpọ oro nte ke Jehovah edi “Abasi emem.”—1 Thessalonica 5:23.
11. Didie ke mme adaiso ido ukpono Christendom ẹwụt ke mmimọ idi mme asua ikọt Abasi?
11 Nso, ndien, kaban̄a mme asua Israel Abasi? Ifịk Jehovah kaban̄a ikọt esie asan̄a ekekem ye ifiopesịt esie ye mme andibiọn̄ọ. Ke ini akpa ekọn̄ ererimbot, mme adaiso ido ukpono Christendom ẹma ẹda ọkpọsọn̄ mfịghe ẹtiene ekpri otu mme Christian ẹmi ẹketịn̄de akpanikọ mi nte mmọ ẹkedomode—ẹnyụn̄ ẹkpude—ndisọhi mmọ mfep. Ke ini ọyọhọ ekọn̄ ererimbot iba, mme asan̄autom Christendom ẹkediana kiet ke n̄kpọ kiet kpọt: Ke n̄kan̄ mbiba ẹmi ẹken̄wanade ekọn̄, mmọ ẹma ẹkpak ukara ẹte ẹtre utom Mme Ntiense Jehovah. Idem mfịn emi, ke ediwak idụt mme adaiso ido ukpono ke ẹsịn nsọk ẹnọ ukara ẹte ẹdori ukpan m̀mê ẹtre utom ukwọrọikọ Christian eke Mme Ntiense Jehovah.
12, 13. Didie ke Jehovah owụt ifiopesịt esie ke idem Christendom?
12 Emi idịghe se Jehovah mîkwe. Ke akpa ekọn̄ ererimbot ama okokụre, Christendom, ọkọrọ ye mme ikpehe Akwa Babylon eken, ẹma ẹduọn̄ọ. (Ediyarade 14:8) Iduọ Christendom ama ana in̄wan̄în̄wan̄ ke ini, ọtọn̄ọde ke 1922, ẹken̄wan̄ade udịm udịm ndamban̄a ufen ẹduọk, ẹyararede n̄kpakpa idaha eke spirit esie an̄wan̄wa ẹnyụn̄ ẹtọtde ẹban̄a nsobo esie. (Ediyarade 8:7–9:21) Nte uyarade nte ke edin̄wan̄a ufen emi nduọk ke akaiso, ẹma ẹnọ utịn̄ikọ oro “Utịt Nsunsu Ido Ukpono Emekpere” ke ofụri ererimbot ke April 23, 1995, etienede ye edisuan oro ẹkesuande ediwak miliọn san̄asan̄a nsiondi Mbụk Obio Ubọn̄ ke mme itie ikie.
13 Mfịn, Christendom enyene mbọm. Ke ofụri ọyọhọ isua ikie 20 emi, mme andibuana ke enye ẹmewot kiet eken ke mme enyene-ndịk ekọn̄ ẹmi mme oku ye mme asan̄autom esie ẹdiọn̄de. Ke ndusụk idụt enye akam ekpere nditre ndinyene odudu ke idem mme owo. Enye ebet nsobo ọtọkiet ye mme ikpehe Akwa Babylon eken.—Ediyarade 18:21.
Emem Ẹnọde Ikọt Jehovah
14. Nso ndise ntịn̄nnịm ikọ ke ẹnọ ẹban̄a mme owo oro ẹdude ke emem?
14 Ke n̄kan eken, ke isua 1996 emi, ikọt Jehovah ẹnyene ediwak emem ke isọn̄ mmọ oro ẹfiakde ẹwụk, nte ẹtịn̄de ke ọyọhọ ubiereikpe Jehovah ita: “Ntem ke Jehovah mme udịm ọdọhọ ete, N̄kaniren ye n̄kaniban ẹyetie kan̄a ke an̄wa Jerusalem, kpukpru owo ye esan̄ ke ubọk oto ke ata usọn̄. Ndien nditọiren ye nditọiban ẹyenyụn̄ ẹyọhọ ke an̄wa obio emi, ke ẹbre mbre ke an̄wa esie.”—Zechariah 8:4, 5.
15. Kpa ye ekọn̄ eke mme idụt, nso emem ke mme asan̄autom Jehovah ẹnyene?
15 Ndise oro ndinem ikọ ẹmi ẹwụtde ẹda ẹban̄a n̄wọrọnda n̄kpọ ke ererimbot emi ekọn̄ abiatde mi—mme owo ẹdude ke emem. Ọtọn̄ọde ke 1919, mme ikọ prọfesi Isaiah ẹmesu: “Jehovah ọdọhọ ete, Mbot . . . emem, emem nnọ owo eke oyomde usụn̄ ye owo eke ekperede, ndien nyekọk enye. Ndien . . . Abasi mi ọdọhọ mme idiọkowo, Emem idụhe.” (Isaiah 57:19-21) Nte ededi, ke adan̄aemi ikọt Jehovah mîdịghe eke ererimbot, mmọ ikemeke nditre ndidi se ndutịme eke mme idụt otụkde. (John 17:15, 16) Ke ndusụk idụt, mmọ ẹsiyọ n̄kpọsọn̄ idaha, ndien ẹma ẹwot ibat ibat ke otu mmọ. Kpa ye oro, mme ata Christian ẹnyene emem ke akpan usụn̄ iba. Akpa, mmọ ẹnyene “emem ye Abasi oto ke Ọbọn̄ [mmọ] Jesus Christ.” (Rome 5:1) Ọyọhọ iba, mmọ ẹnyene emem ke idemmọ. Mmọ ẹkọri “eti ibuot emi otode ke enyọn̄,” emi edide “edisana ke mbemiso, onyụn̄ etie emem emem.” (James 3:17; Galatia 5:22-24) Akan oro, mmọ ẹdori enyịn ndinyene emem ata ọyọhọ ọyọhọ ke ini ‘mbon nsụkidem ẹdidade isọn̄ ẹnyene; ediwak emem edinyụn̄ enemde mmọ esịt.’—Psalm 37:11.
16, 17. (a) Didie ke “n̄kaniren ye n̄kaniban” ọkọrọ ye “nditọiren ye nditọiban” ẹsọn̄ọ esop Jehovah idem? (b) Nso iwụt emem oro ikọt Jehovah ẹnyenede?
16 “N̄kaniren ye n̄kaniban” ẹsụk ẹdodu ke otu ikọt Jehovah, mbon oro ẹyetde aran ẹmi ẹtide mme ntọn̄ọ ntọn̄ọ edikan oro esop Jehovah akakande. Ẹnen̄ede ẹdara mbuọtidem ye ime mmọ. N̄kparawa oro ẹyetde aran ẹma ẹda iso ke mme ikan̄îkan̄ iduọk isua eke 1930 ye Ekọn̄ Ererimbot II, ọkọrọ ye mme isua idatesịt kaban̄a n̄kọri oro ẹketienede. N̄ko-n̄ko, akpan akpan ọtọn̄ọde ke 1935, “akwa otuowo” eke “mme erọn̄ en̄wen” ọmọwọrọ owụt idem. (Ediyarade 7:9; John 10:16) Nte mme Christian oro ẹyetde aran ẹnen̄ede ẹsọn̄ ẹnyụn̄ ẹkabade ẹkpri ke ibat, mme erọn̄ en̄wen ẹmen utom ukwọrọikọ ẹnam ẹnyụn̄ ẹnam enye atara osịm ofụri isọn̄. Ke mme isua ndondo emi, mme erọn̄ en̄wen ke ẹbụn̄ọ ẹdụk idụt ikọt Abasi. Kamse, isua oko kpọt, owo 338,491 ke otu mmọ ẹkena baptism ke idiọn̄ọ ediyak idem nnọ Jehovah! Ke nditịn̄ ke usụn̄ eke spirit, mme utọ mbufa owo oro ẹnen̄ede ẹdi ata n̄kpri owo. Nsehe ye ifiopesịt mmọ ẹdi ọsọn̄urua n̄kpọ nte mmọ ẹnamde udịm mbon ẹmi ẹkwọde itoro ekọm ẹnọ ‘Abasi nnyịn emi etiede ke ebekpo, ye Eyenerọn̄,’ ọkọri.—Ediyarade 7:10.
17 Mfịn, ‘an̄wa obio ọyọhọ ye nditọiren ye nditọiban,’ kpa Mme Ntiense oro ẹnyenede nsọn̄idem nte n̄kparawa. Ke isua utom 1995, ẹma ẹbọ ibatutom ẹto idụt ye mme isuo inyan̄ibom 232. Edi ndomoidem eke idụt, usua ekpụk, idiọk ufụp, idụhe ke ufọt mbon oro ẹyetde aran ye mme erọn̄ en̄wen. Kpukpru mmọ ẹkọri ọtọkiet ke spirit, ẹdiana kiet ke ima. Itie nditọete ofụri ererimbot eke Mme Ntiense Jehovah enen̄ede edi n̄wọrọnda ke n̄kpọntịbe ererimbot.—Colossae 3:14; 1 Peter 2:17.
Nte Ọsọn̄ Akan Jehovah?
18, 19. Ke mme isua ẹmi ẹtọn̄ọde ke 1919, didie ke Jehovah anam mme n̄kpọ oro ẹketiede nte ẹsọn̄ ẹkaha ke enyịn owo?
18 Ko ke 1918 ke ini nsụhọ oro ẹyetde aran ẹkedide sụk tọsịn owo ifan̄ oro ẹkekopde mmemidem ke itie ntan̄mfep eke spirit, owo ndomokiet ikekemeke ndikụt nte mme n̄kpọ ẹditiede. Edi, Jehovah ama ọfiọk—nte ọyọhọ ntịn̄nnịm ikọ esie inan̄ owụtde: “Ntem ke Jehovah mme udịm ọdọhọ, ete, Koro eyedi utịben̄kpọ ke enyịn mbio ẹmi ẹsụhọde ke ini oro: nte eyenyụn̄ edi utịben̄kpọ ke enyịn mi? Jehovah mme udịm ọdọhọ.”—Zechariah 8:6.
19 Ke 1919, spirit Jehovah ama ọsọn̄ọ ikọt esie idem ọnọ utom oro akanade ke iso. Kpa ye oro, ama oyom mbuọtidem man ẹsọn̄ọ ẹda ye ekpri esop eke mme andituak ibuot nnọ Jehovah. Mmọ ẹkedi ata ibat ibat, ndien ediwak n̄kpọ ikan̄wan̄ake. Nte ededi, sụn̄sụn̄ Jehovah ama ọsọn̄ọ mmọ idem nte esop onyụn̄ otịm mmọ idem man ẹnam utom Christian eke edikwọrọ eti mbụk ye edinam mme mbet. (Isaiah 60:17, 19; Matthew 24:14; 28:19, 20) Sụn̄sụn̄, enye ama an̄wam mmọ ẹfiọk mme utọ akpan n̄kpọ nte edida san̄asan̄a ye itie edikara ofụri ererimbot. Nte ama enen̄ede ọsọn̄ Jehovah ndida ekpri otu Mme Ntiense oro nyọhọ uduak esie? Ibọrọ enen̄ede edi baba! Ẹsọn̄ọ emi ke page 12 osịm 15 ke magazine emi, emi owụtde chart utom Mme Ntiense Jehovah ke isua utom 1995.
“Ami Nyenyụn̄ Ndi Abasi Mmọ”
20. Ẹketịn̄ prọfesi nte ke editan̄ ikọt Abasi mbok editara adan̄a didie?
20 Ọyọhọ ubiereikpe ition akaiso owụt idaha inemesịt eke Mme Ntiense Jehovah mfịn: “Ntem ke Jehovah mme udịm ọdọhọ, ete, Sese, ami nyenyan̄a ikọt mi ke idụt edem usiahautịn, ye ke idụt usoputịn mfep; nnyụn̄ nda mmọ ndi, ndien mmọ ẹyedụn̄ ke ufọt Jerusalem: ndien mmọ ẹyedi ikọt mi, ami nyenyụn̄ ndi Abasi mmọ ke akpanikọ ye ke edinen ido.”—Zechariah 8:7, 8.
21. Ke usụn̄ ewe ke uwak emem ikọt Jehovah akaiso odu onyụn̄ atara?
21 Ke 1996 nnyịn imekeme ndidọhọ ye unana edimen̄e nte ke ẹkwọrọ eti mbụk ẹkanade ererimbot, ọtọn̄ọde ke “idụt edem usiahautịn” tutu osịm “idụt usoputịn.” Ẹmenam mme owo ke kpukpru idụt ẹdi mme mbet, ndien mmọ ẹmekụt nte un̄wọn̄ọ Jehovah emi osude: “Jehovah eyenyụn̄ eteme kpukpru nditọ fo; ndien emem nditọ fo okpon.” (Isaiah 54:13) Nnyịn imenyene emem koro Jehovah ekpepde nnyịn. Ye emi ke ekikere, ẹmịn̄ mme n̄wed ke se ibede usem 300. Ke isua oko kpọt, ẹma ẹdian usem 21 efen efen. Ẹmịn̄ magazine Enyọn̄-Ukpeme idahaemi ukem ini ke usem 111, ye Awake! ke usem 54. Mme mbono ofụri idụt ye eke ofụri ererimbot ẹnọ an̄wan̄wa uyarade kaban̄a emem ikọt Abasi. Mme mbonoesop eke urua ke urua ẹdian nnyịn ọtọkiet ẹnyụn̄ ẹnọ nnyịn nsịnudọn̄ oro nnyịn iyomde man isọn̄ọ ida. (Mme Hebrew 10:23-25) Ih, Jehovah ke ọnọ ikọt esie ukpep “ke akpanikọ ye ke edinen ido.” Enye ke ọnọ ikọt esie emem. Nnyịn inyene edidiọn̄ didie ntem ndibuana ke uwak emem oro!
Nte Afo Emekeme Ndinam An̄wan̄a?
◻ Ke eyomfịn, didie ke Jehovah ‘ofụbe ufụp ye akamba ifiopesịt’ aban̄a ikọt esie?
◻ Didie ke ikọt Jehovah ẹnyene emem, idem ke mme idụt oro ekọn̄ abiatde?
◻ Ke usụn̄ ewe ke ‘an̄wa obio ọyọhọ ye nditọiren ye nditọiban’?
◻ Nso mme ndutịm ke ẹnam man Jehovah ekeme ndikpep ikọt esie?
[Chart ke page 12-15]
IBATUTOM ISUA UTOM 1995 EKE MME NTIENSE JEHOVAH KE OFỤRI ERERIMBOT
(Se magazine)
[Ndise ke page 8, 9]
Ke ọyọhọ isua ikie itiokiet M.E.N., mme anam-akpanikọ Jew oro ẹkefiakde ẹbọp temple ẹma ẹfiọk ẹte ke Jehovah ekedi n̄kukụre ebiet emi emem otode oro ẹkemede ndiberi edem