“Ẹkabade Ẹtiene Mi, Ndien Ami Nyekabade Ntiene Mbufo”
UBON ke ẹkedara inem inem isan̄ edisan̄a nse mme eto ke akai. Ekem, Peter, andikpri n̄kan, ama osop usụn̄, ebịnede adua osụhọde obot. Ke mbuari, enyọn̄ ama ofụhọ, ndien edịm ama ọtọn̄ọ ndidep. Ke akpa enye okosion̄o n̄ken̄e n̄ken̄e, edi nte ini akade enye ama edep okpon. Ubon ẹma ẹsọp idem ẹtan̄ n̄kpọ mmọ ẹnyụn̄ ẹfehe ẹka n̄kpọisan̄ mmọ. Edi kpukpru owo ẹma ẹyịk ebiet emi Peter okpodude.
Kan̄a kemi, Peter, ke akan̄wana ndifiak mbịne ubon. Ekedi ọkpọsọn̄ n̄kpọ ndida n̄kụt, ndien afan̄usụn̄ usan̄a ndọk obot oro ama ọdọrọ ke edịm oro. Ke mbuari, enye ama obụhọ ke mbat nte enye ọkọduọde odụk ntotụn̄ọ, ndedịbe obube. Enye ama odomo ndidọk n̄wọrọ, edi mben obube oro ama ọdọrọ akaha.
Mmọn̄edịm ama ewet osụhọde obot oro onyụn̄ ọkpọri mbat ọkọyọhọ obube oro. Peter okodu ke ata itiendịk edikpa ke mmọn̄. Edi ekem ete esie ama okụt enye onyụn̄ ada urụk okot enye osio. Ke ukperedem, ẹma ẹsua ẹnọ Peter ọkpọsọn̄ ọkpọsọn̄ ke ndikoyo. Edi sia eka esie akawan̄de enye ke blan̄ket akama ke ubọk, nsuannọ oro ekedi mmemmem n̄kpọ ndibọ.
Ifiọk n̄kpọntịbe emi anam an̄wan̄a se isitịbede inọ ndusụk owo ẹmi ẹkesidude ke otu ikọt Abasi. Mmọ ẹma ẹduọ ẹdụk ntotụn̄ọ obube editịm n̄kpọ emi ẹnyụn̄ ẹyom ndidọk n̄wọrọ nnyụn̄ mfiak ndi ebiet ubọhọ edide esop Jehovah. Edi n̄kpọ inemesịt didie ntem ndifiọk nte ke Jehovah esikop mbọm onyụn̄ odu ke mben̄eidem ‘ndisụhọde urụk nsịn’ nnyụn̄ n̄n̄wam mmọ ndidọk n̄wọrọ!
Mbọm Mbọm Edinam Jehovah
Ko ke edem ke eyo Israel, ke ẹma ẹkekụre edibọp temple, Solomon ama ọbọn̄ akam ediyak nnọ emi enye ekeben̄ede Jehovah ete akpan̄ utọn̄ ke eben̄e oro ediben̄ede ke temple. Ekem enye ama ọdọhọ ete: “Adan̄aemi mmọ [nditọ Israel] ẹdiduede fi, (koro owo baba kiet eke mîduehe fi mîdụhe), ndien afo ama ayat esịt ye mmọ, onyụn̄ ayak mmọ ọnọ mme asua mmọ, . . . edi mmọ ẹma ẹkere ke esịt mmọ ke isọn̄ eke ẹtan̄de mmọ ẹfep ẹka do, ẹnyụn̄ ẹkabarede, ẹkpe fi ubọk ke isọn̄ mmọ eke ẹtan̄de mmọ ẹfep, . . . tie ndien ke enyọn̄, ebietidụn̄ fo, kop akam mmọ, ye n̄kpeubọk mmọ.”—1 Ndidem 8:46-49.
Eben̄e Solomon ama osu ke ediwak idaha ke mbụk idụt Israel. Ediwak ini, ikọt Abasi ẹma ẹsiwọn̄ọde edem ẹwụt enye ẹnyụn̄ ẹkpọn̄ enye. Ekem mmọ ẹma ẹsikụt ndudue mmọ ẹnyụn̄ ẹfiak edem, ẹyomde enye. Ndien Jehovah ama efen mmọ. (Deuteronomy 4:31; Isaiah 44:21, 22; 2 Corinth 1:3; James 5:11) Ebede ke Malachi, Jehovah ama etịn̄ ibio ibio aban̄a tọsịn isua kiet oro enye akanamde n̄kpọ ye ikọt Esie ke ini Enye ọkọdọhọde ete: “Toto ke eyo mme ete mbufo, mbufo ẹmekabade ẹkpọn̄ mme ewụhọ mi, inyụn̄ inịmke: mbufo ẹkabade ẹtiene mi, ndien ami nyekabade ntiene mbufo.”—Malachi 3:7.
Mme N̄kpọ Iduọ
Nte ekedide ye nditọ Israel, ediwak ikọt Abasi mfịn ẹmewọn̄ọde edem ẹwụt ẹnyụn̄ ẹdianade idem ẹkpọn̄ esop Jehovah. Ntak-a? Ndusụk owo ẹbịne mme n̄kpọ oro ke akpa ẹtiede nte idiọkke, nte Peter emi ekebịnede adua. Emi edi se ikotịbede inọ Ada. N̄wan emi obụk ete: “Ekesidi ido kpukpru nnyịn nsan̄autom ndisisan̄a kiet n̄ka udia uwemeyo ke itie unyamudia mbọhọ oro ke uwemeyo. Ntre ke ini mmọ ẹkenọde mi ikot ẹte ndin̄wọn̄ kọfi ke utịt usen oro, ikedịghe ọkpọsọn̄ n̄kpọ ndinyịme. Mma n̄kere ke ndaha ini oro n̄kpadade n̄ka mme mbonoesop m̀mê ukwọrọikọ. N̄kọfiọkke ke emi ekeme ndidi edikpu ndinam edumbet oro odude ke 1 Corinth 15:33.
“Ibịghike, mma nsika uwat enan̄-mbakara ye mmọ ke mme Saturday. Ekem mma nsika senima ye efembre kọnsat ye mmọ. Oro ama ada okosịm ami ndisitaba ndusụk mbonoesop. Ke akpatre, n̄kesikaha mbonoesop ndomokiet aba m̀mê nditiene mbuana ke utom ukwọrọikọ. Ke ini n̄kọfiọkde se ikotịbede, n̄kabuanake ye esop aba.”
Ke mme idaha efen ntak ekeme ndidi akwa ndedịbe idiọkn̄kpọ oro anamde owo ekere ke idotke ndinam n̄kpọ Abasi. (Psalm 32:3-5) Mîdịghe owo ekeme ndituak ukot nduọ ke se nsan̄a Christian eketịn̄de m̀mê anamde, ye unana edidiọn̄ọ, nte Solomon eketịn̄de, nte ke idụhe “owo baba kiet eke mîduehe.”—1 Ndidem 8:46; James 3:2.
N̄ko mbon en̄wen ẹsikop mmemidem ke ini mmọ ẹbọde ntụnọ. (Mme Hebrew 12:7, 11) Mbukpek oro usụn̄uwem inyene obụkidem enyenede ama anam ediwak owo ẹtre ndinam n̄kpọ Abasi. Ediwak ini, ke ndiyom uforo eke ererimbot, mmọ ẹma ẹdụk ẹnyịne ofụri ofụri ke utom idịbi udia tutu ufan̄ ndomokiet idụhe aba ke uwem mmọ inọ utom Abasi. (Matthew 13:4-9; 1 Timothy 6:9, 10) Nte idaha utọ mbon oro anana idotenyịn?
Nte Afo Eyeyere Ikot Oro Jehovah Ọnọde?
Ini kiet Jesus ama etịn̄ n̄kpọ oro ọkọsọn̄de ndidiọn̄ọ, ndien ndusụk owo ẹma ẹduọn̄ọ. N̄wetnnịm n̄kpọ oro ọdọhọ ete: “Ediwak mbet Esie ẹfiak edem, inyụn̄ isan̄ake aba ye Enye.” Edi idịghe kpukpru mmọ ẹkeduọn̄ọ. Mbụk Bible oro akaiso ete: “Jesus obụp mbet Esie duopeba ete, Nte ke ọdọn̄ mbufo n̄ko ndidianade nnyọn̄? Simon Peter ọbọrọ Enye ete, Ọbọn̄, nnyịn iditiene anie? Afo enyene ikọ uwem nsinsi.” (John 6:66-68) Mme apostle Jesus ke ọniọn̄ ẹma ẹdiọn̄ọ ẹte ke ndikpọn̄ Jesus ediwọrọ nsobo.
Ndusụk owo oro ẹkeduọde ẹkpọn̄ usụn̄ ke akpatre ẹma ẹdisịm ukem ubiere oro. Mmọ ẹfiọk ẹte ke ndikpọn̄ esop Abasi ekedi edinam usio-ukot oro adade aka nsobo ye nte ke mmọ ẹdinyene ikọ oro ẹdade ẹsịm uwem ẹto Jehovah ye Christ ikpọn̄îkpọn̄. Ndondo oro mmọ ẹdide ẹdisịm utọ ifiọk oro, mmọ n̄ko ẹkpenyene ndifiọk nte ke ini ibehe ikaha ndifiak n̄kere, mben̄e Jehovah edifen nnọ, nnyụn̄ mfiak ntiene enye. Ekedi Jehovah ke idemesie ọkọnọ ikot emi: “Ẹkabade ẹtiene mi, ndien ami nyekabade ntiene mbufo.”—Malachi 3:7.
Ke akpanikọ, m̀mọ̀n̄ ke Christian oro enyenede esịt akpanikọ ekeme ndinyene inemesịt ke ebede ke ndinam n̄kpọ Jehovah? Edieke owo ọfiọrọde ọkpọn̄ usụn̄ ke ama ekedi ubak esop Abasi ke ndusụk ini, nso ina ibet enye ke an̄wa ererimbot? Enye eyesọsọp ọdiọn̄ọ ete ke imọ idahaemi ididi ubak eke ererimbot oro etiede afai afai akan. Enye eyekụt idemesie etienede abuana ke editịm n̄kpọ emi ọyọhọde ye mbubịk, nsu, n̄wo, ye oburobụt ido, ererimbot oro enyenede ndịk onyụn̄ ọdiọkde nte obube mbat oro ekesịnde uwem ekpri Peter ke itiendịk. Ke ini enyịn edide edin̄wan̄a enye onyụn̄ ọdiọn̄ọde ete ke nsinsi uwem imọ odu ke itiendịk, enye ikpabiatke ini ndomokiet ke ndiyom un̄wam man osio idemesie efep ke itie oro. Edi, ekeme ndidi ọkpọsọn̄ n̄kpọ ndifiak ndi.
Nte afo edi owo oro okodomode ndifiak ntiene Jehovah edi okụt nte edide ọkpọsọn̄ n̄kpọ? Do fiọk ete ke imọ imoyom un̄wam. Ndien nịm ke akpanikọ ete ke nditọete fo iren ye iban ke esop Abasi ẹdu ke mben̄eidem ndinọ fi un̄wam. Edi, afo enyene ndisịn ukeme man owụt Jehovah udọn̄esịt fo. Ini edi emi ‘enyịn ndin̄wan̄a fi’ ndinyụn̄ ‘nnen̄ede mfiak ntiene Jehovah.’—1 Ndidem 8:47.
Ẹma Ẹn̄wam Ndifiak Ndi
Ada anam an̄wan̄a se ikan̄wamde enye ndifiak ntiene Jehovah ete: “Ke ata nnennen ini, eyenete an̄wan oro ekekpepde n̄kpọ ye ami ama ọnọ mi ikot ndidụk mbono circuit ye enye. Enye ama ọfọn etieti! Ndien enye ikesueneke mi ndomo esisịt! Enye ama owụt mi akamba ima. Isua kiet ama ebe tọn̄ọ nte n̄kodụk akpatre mbonoesop mi, edi ami ke n̄kekere ukpọk ukpọk idaha eke ererimbot ye akpanikọ oro nte ke mfụhọ, edikpu, ye oburobụt ido, ẹdu ke edem enyọn̄ enyọn̄ n̄kpọ ẹtabi. Ntre mma mbiere ndidụk mbono oro. Ndondo oro nsịmde efembre oro ẹkenịmde mbono oro, mma nnyọn̄ udịm n̄kpọitie edem nnyụn̄ n̄kedịbe ke itụn̄ufọk kiet. N̄koyomke nditọete ẹkụt mi ẹnyụn̄ ẹbụp mi mbume.
“Nte ededi, ndutịm oro ama ọnọ item oro n̄koyomde ọkpọsọn̄ ọkpọsọn̄. Ke ini mbono oro akasuanade, n̄kebiereke ndifiak ntiene ikọt Jehovah ikpọn̄îkpọn̄ edi n̄ko ndiyak idemmi nnọ enye ke ofụri esịt mi. Nditọete ẹma ẹdara mi ufiop ufiop ndien ‘idiọk eyen oro’ ama afiak ọnyọn̄ ufọk.” (Luke 15:11-24) Kpukpru oro okotịbe ndusụk ini emi ekebede, ndien idahaemi Ada odu ke utom uyọhọ-ini ke se ibede isua 25.
N̄kpọ aban̄ade owo efen emi okoyode ọkpọn̄ usụn̄ ama enyene ukem inem inem utịp oro. Ndusụk mbiowo ẹma ẹnọ José item oro okotịmde owụt ekikere idemmọ akan mme edumbet Bible. José, ke okopde mmemidem ye iyatesịt, ke akpatre ikanamke utom aba. Ke isua itiaita enye ama adianade idem ọkpọn̄ ikọt Abasi, ndien ke ufan̄ ini emi enye ama ọdọ owo emi mînịmke ke akpanikọ onyụn̄ obon nditọ, ẹmi enye akayakde ẹnịm kiet ke otu mmọ baptism ke Ufọkederi Catholic.
Ke akpatre, ẹma ẹn̄wam enye ke ini esenyịn circuit akanamde utom ubọkerọn̄ ye enye onyụn̄ esịn udọn̄ ọnọ mbiowo ete ẹnam kpasụk ntre. Ẹma ẹfiak ẹnam enye okop nsọn̄idem enye ama onyụn̄ okop inemesịt ndikụt n̄wan esie enyenede udọn̄ ke akpanikọ. José idahaemi anam utom nte ebiowo ke esop. Nte ifiọkutom iba ẹmi ẹwụtde, Jehovah isịnke ndida mme edidiọn̄ esie nnọ mbon oro ẹnamde n̄kpọ ẹban̄a ima ima ikot esie ndifiak ndi.
Man ẹdara mme utọ edidiọn̄ oro, nte ededi, oyom owo ebemiso owụt esịtekọm ke un̄wam oro ẹnọde onyụn̄ anam n̄kpọ aban̄a enye. Ke ata ediwak esop nditọete ẹsiti enyịn̄ mbon oro mînamke utom aba ẹnyụn̄ ẹka ẹkese mmọ ke ini ke ini, ẹdomode ndin̄wam mmọ. Ndinam n̄kpọ mban̄a utọ un̄wam oro owụt esịtekọm oro ẹnyenede ẹban̄a mbọm oro Jehovah owụtde.—James 5:19, 20.
Ke akpanikọ, ini edi emi ndinam n̄kpọ mban̄a ikot oro Jehovah ọnọde ete: “Ẹkabade ẹtiene mi.” (Malachi 3:7; Isaiah 1:18) Kûnam ubịghi aba. Mme n̄kpọntịbe ererimbot ke ẹda itie ata usọp usọp. Mfọnn̄kan itie ndidu ke ini oyobio oro edide ke iso edi ke esop Jehovah, mbọ ubọhọ ke idak ukpeme esie. Edi sụk mbon oro ẹyomde ubọhọ ẹto Jehovah ẹnyene ọkpọsọn̄ idotenyịn ndidịbe mbọhọ ifụtesịt esie ke akwa usen iyatesịt esie.—Zephaniah 2:2, 3.
[Ndise ke page 30]
Nte afo eyenam n̄kpọ aban̄a ikot oro Jehovah ọnọde ete, “Ẹkabade ẹtiene mi”?