Okụk Ifan̄ ke Afo Ọkpọnọ ke Emi?

NTE afo ọmọfiọk n̄kpọ ekededi oro otịmde ọsọn̄ urua oro afo okponyịmede ndinọ kpukpru se afo enyenede man enyene enye? Jesus ama ọfiọk, ndien enye ama etịn̄ aban̄a n̄kpọ oro ọnọ mme anditiene enye.

Enye ọkọdọhọ ete: “Obio Ubọn̄ Heaven ebiet owo urua eke oyomde ndiye pearl; ndien ke enye ama okụt pearl kiet emi okponde ekọmurua, aka akanyam kpukpru se enyenede, edep pearl oro.”—Matthew 13:45, 46.

Owo urua oro ama onyịme ndiyak ofụri se enye enyenede atak man enyene “pearl” oro, kpa Obio Ubọn̄ Abasi. Ntak-a? Koro idụhe n̄kpọ ndomokiet ke ererimbot emi oro ẹkemede ndimen ndomo ye enye. Obio Ubọn̄ Abasi eyekọk mme mfịna oro owo mîkemeke ndikọk, utọ nte ekọn̄, biọn̄, ubiatibet, ye ufịk. (Psalm 72:4-8, 13, 14) Ke idak Obio Ubọn̄ emi, idem idiọkn̄kpọ, udọn̄ọ, ye n̄kpa ididụhe aba. (Ediyarade 21:4, 5) Eyịghe idụhe ọyọhọ eben̄e iba ke Akam Ọbọn̄ (kpa “Ete Nnyịn”) edide, “Yak Ubọn̄ Fo edi”!—Matthew 6:9, 10.

Nso ke afo edinọ man abuana ke mme edidiọn̄ Obio Ubọn̄ emi? Ke akpanikọ, mme edidiọn̄ ẹmi ẹdi ke mfọn. Edi man enyene mmọ, afo enyene ndifiọk se Obio Ubọn̄ emi edide, onịm ke akpanikọ nte ke enye edi ata idem n̄kpọ, onyụn̄ onịm enye ke akpa itie ke uwem fo. Nte afo emekeme ndinam oro? Ntọt odu ke Bible oro edin̄wamde fi. Ntak mûyakke Mme Ntiense Jehovah ẹn̄wam fi ndikpep mban̄a Obio Ubọn̄ Abasi nnyụn̄ mfiọk nte enye ekemede ndinyene ufọn nnọ fi idem idahaemi.