Koro Enye Ọkọbọn̄de Akam

KE 1 Thessalonica 5:17, 18, apostle Paul ọkọdọhọ ete: “Ẹkûdop akam; ẹnọ ekọm ke kpukpru n̄kpọ; koro emi edi se Abasi amade mbufo ẹnam ke Christ Jesus.” Nte ededi, ndi afo ke ndusụk idaha emesikop ifem ndinọ ekọm ke ini adiade udia ke ebiet emi owo ẹwakde, utọ nte itie unyamudia? Ke ekerede aban̄a item oro Jesus ọkọnọde ndisua nnọ akam n̄wụtidem, an̄wan̄a nte ke owo ekeme ndiyom editre ndidụri ntịn̄enyịn nnọ idemesie nte mîdotke. (Matthew 6:5, 6) Edi, ndibọn̄ akam ke ọniọn̄ ọniọn̄ usụn̄ ekeme n̄ko ndidụri eti ntịn̄enyịn.

Emi ekedi ifiọkutom akparawa asan̄autom kiet emi anamde utom ke Bethel Brooklyn, kpa ibuot itieutom ofụri ererimbot eke Mme Ntiense Jehovah. Enye akadia udia usenubọk ke itie unyamudia kiet, anamde ndutịm ndika esop oro enye abuanade man okosobo ye otu oro edibuanade ke utom edikwọrọ Obio Ubọn̄. Ke ini udia esie ekedisịmde, enye ama ọbọn̄ akam nte ido esie edide. Ke atatde enyịn, enye ama okụt eyenan̄wan kiet oro esimende udia ọsọk owo nte adade owụk enyịn ese enye. Eyenan̄wan oro ama obụp ete “Ndi afo ọkọbọn̄ akam?” Ke enye ama ọkọbọrọ ih, eyenan̄wan oro ama ọdọhọ ete: “Anaedi afo edi owo Ntiense Jehovah. Ete ye eka mi ẹdi mmọ n̄ko. Akananam ami nnen̄ekede nsịn idem ke ido ukpono mmọ, edi mmọfiọk nte ke akpana nsịn idem. Iso-ọfọn ami nyetobo Enyọn̄-Ukpeme ye Awake! Ndi mmekeme ndinyene mmọ nto fi?”

Akparawa eyenete emi etịn̄ ete, “Ayak esịt udia akpakpan̄a mi.” Edi, enye ama ekeme ndibọ etịbe iba onyụn̄ onịm mbufa magazine iba ye eyenan̄wan oro onyụn̄ anam ndutịm ọnọ mfiakn̄ka​—kpukpru ẹmi koro enye ọkọbọn̄de akam.