“ETE NNYỊN EMI ODUDE KE HEAVEN”

4. Nso ke ikọ emi “Ete nnyịn” eti nnyịn, ndien didie ke Jehovah edi “Ete” mbon emi ẹdoride enyịn ndidu uwem ke isọn̄?

⁴ Ndidọhọ “Ete nnyịn” utu ke ndidọhọ “Ete mi” owụt ke kpukpru nnyịn inyene ete kiet, idi nditọete imonyụn̄ inen̄ede ima kiet eken. (1 Pet. 2:17) Ata akwa n̄kpọ ke Abasi ọnọ nnyịn emi! Jehovah ada mme Christian oro ẹyetde aran, emi ẹdikade ẹkedu uwem ke heaven, nte nditọ esie, ntem enye edi ata ata “Ete” mmọ. (Rome 8:15-17) Mme Christian emi ẹdoride enyịn ndidu uwem ke nsinsi ke isọn̄ ẹkeme n̄ko ndikot Jehovah “Ete,” koro enye ọnọ mmọ uwem onyụn̄ ọnọ mmọ kpukpru se inanade mmọ. Edi Jehovah edidi ata ata Ete mmọ ke ini mmọ ẹdifọnde ẹma ẹdinyụn̄ ẹsọn̄ọde ẹda ẹbe akpatre udomo.—Rome 8:21; Edi. 20:7, 8.

“YAK ẸNAM ENYỊN̄ FO ASANA”

7. Nso akwa ifet ke ikọt Abasi ẹnyene, ndien nso ke ana nnyịn inam?

⁷ Edi ata akwa n̄kpọ ndifiọk ata enyịn̄ Abasi mfiak n̄kere enyịn̄ ndian Abasi. (Utom 15:14; Isa. 43:10) Imesiben̄e Ete nnyịn eke heaven ite, “yak ẹnam enyịn̄ fo asana.” Ke ima ikọbọn̄ utọ akam emi, nnyịn idiyomke ndinam m̀mê nditịn̄ n̄kpọ ndomokiet emi ekemede ndisuene edisana enyịn̄ Abasi. Nnyịn iyomke nditie nte ndusụk Christian ke eyo mme apostle emi mîkanamke-nam se mmọ ẹkekwọrọde. Apostle Paul ọkọdọhọ mmọ ẹte: “Ke ntak mbufo ke ẹsụn̄i enyịn̄ Abasi ke otu mme idụt.”—Rome 2:21-24.

8, 9. Nọ mbụk emi owụtde nte Jehovah an̄wamde mbon emi mîsiyomke ndisuene enyịn̄ esie.

⁸ Imesidomo ofụri ukeme nnyịn ndinam enyịn̄ Abasi asana. Ebe sista kiet ke Norway ama akpa ọkpọn̄ enye ye eyen isua iba ke ubọk. Eyenete an̄wan oro ọdọhọ ete: “Ibuot ama oyon̄ mi. N̄kesibọn̄ akam kpukpru usen. Ekesidi mma ntie ntie mben̄e Abasi nte an̄wam mi mbak ndikanam se mmen̄kpanamke nsuene enyịn̄ esie nnyụn̄ nnọ Satan se adade osụn̄i enye. N̄koyomke ndida mbat nyet enyịn̄ Jehovah, n̄konyụn̄ nyom eyen mi afiak okụt ete esie ke Paradise.”—N̄ke 27:11.

⁹ Ndi Jehovah ama eyere akam ofụri esịt sista emi? Ih, ama eyere! Enye ndidian idem ye nditọete eken ke esop kpukpru ini ama enen̄ede an̄wam enye. Ke isua ition ama ẹkebe, ebiowo kiet ama emen enye ọdọ. Eyen esie oro esịm isua 20 idahaemi, ama onyụn̄ ana baptism. Eyenete an̄wan oro ọdọhọ ete: “Esịt enem mi etieti. Ebe mi an̄wam mi nse mban̄a eyen mi.”

10. Ẹdisan̄a didie ẹnam enyịn̄ Abasi asana ofụri ofụri ke ini iso?

¹⁰ Ẹdisan̄a didie ẹnam enyịn̄ Abasi asana ofụri ofụri ke ini iso? Ana Jehovah osio kpukpru mbon emi mîyomke-yom ndikụt enye akarade efep ke isọn̄ emi mbemiso enyịn̄ esie asanade. (Kot Ezekiel 38:22, 23.) Enye ayan̄wam mme owo sụn̄sụn̄ tutu mmọ ẹfọn ẹma. Nnyịn ke ibet ini emi owo ndomokiet m̀mê angel ndomokiet mîdisueneke enyịn̄ Jehovah. Ini oro ndien ke edima Ete nnyịn eke heaven edidi “kpukpru n̄kpọ ọnọ kpukpru owo.”—1 Cor. 15:28.