Ukpepn̄kpọ Ẹnyenede Ẹto Mme Inuen ye Mme Flawa

NSO ke mme owo mfịn ẹsiwak ndikere mban̄a n̄kan n̄kpọ efen ekededi? Ye n̄wakn̄kan owo, edi edinyene n̄kpọ uduuwem oro ekemde nnọ ubon mmọ m̀mê ndikeme ndifori idaha uduuwem mmọ.

Owo ndinyene okụk oro ekemde se esede aban̄a idemesie m̀mê ubon ekedi n̄ko akpan n̄kpọ oro ekebehede mme owo ke ini Jesus Christ okodude ke isọn̄. Edi enye ama odụri owo utọn̄ ete ke n̄kpọ oro enende ndikere mban̄a mi ekeme ndikabade ndi ekikak editịmede esịt emi ababade mme n̄kpọ eke spirit owot. Man anam ikọ esie an̄wan̄a, Jesus ama asian mme mbet esie ete ẹtịm ẹse mme inuen ye mme flawa.

Mme inuen ẹnyene ndidia udia kpukpru usen—ke udomo emi otịmde awak akan eke nnyịn ke ntak se idem mmọ oyomde. Akan oro, mmọ ikemeke nditọ n̄kpasịp, ndidọk, m̀mê ndibon udia nnịm nnọ ini iso. Edi, nte Jesus ọkọdọhọde, “Ete [nnyịn] emi odude ke heaven ọbọk mmọ.” (Matthew 6:26) Kpasụk ntre, Abasi esịne “ekpon̄idem ke ikọt” edisịnen̄kpọ oro eyede akan.—Matthew 6:28-30.

Jesus ama ọsọn̄ọ ọnọ nnyịn ete edieke nnyịn inịmde mme udọn̄ n̄kpọ obụkidem ke nnennen itie inyụn̄ inamde mme n̄kpọ eke spirit ẹdi ebeiso n̄kpọ, Abasi eyekụt ete ke nnyịn n̄ko imenyene udia ye edisịnen̄kpọ oro iyomde. Edieke Jehovah Abasi esede aban̄a mme inuen ye mme flawa, enye ke akpanikọ eyese aban̄a mbon oro ẹmade enye ẹnyụn̄ ‘ẹbemde iso ẹyom Obio Ubọn̄ ye edinen ido esie.’ (Matthew 6:33) Nte afo ke onịm mme udọn̄ n̄kpọ Obio Ubọn̄ Abasi akpa ke uwem fo?