3. Ewe item aban̄ade ubiereikpe ke Jesus ọnọ ke Ukwọrọikọ oro ke Obot?

³ Nte Jesus akade iso ke Ukwọrọikọ esie ke Obot, ikọ efen efen ẹma ẹwọn̄ọ edi emi anade mme Christian ẹdomo nditiene. Kiet edi emi oro etiede nte emem ekem, edi enye obiom kiet ke otu ata n̄kpọsọn̄ ntụhọ oro ọsọn̄de owo ndisio mfep ikpe: “Ẹkûsion̄o owo ndo, mbak ẹdision̄o mbufo ndo. Koro nte mbufo ẹsion̄ode owo ndo, kpa ntre ke ẹdision̄o mbufo ndo. Ndien udomo eke mbufo ẹdade ẹdomo, ke ẹdida ẹdomo ẹnọ mbufo. Nsinam afo esede ekpri mbio eke odude ke enyịn eyenete fo, edi mûkereke obukpọk oro odude fi ke enyịn? M̀mê edinam didie ọdọhọ eyenete fo, ete, Yak nsio fi mbio ke enyịn; ndien sese, obukpọk odu fi ke enyịn. Afo mbubịk! bemiso sio obukpọk oro ke enyịn fo fep, ndien eyetịm okụk usụn̄ nte adade osio mbio ke enyịn eyenete fo efep.”​—Matthew 7:1-5.

5. Ntak emi edide ata mmemmem n̄kpọ ndikụt mme ndudue mbon en̄wen n̄kan eke nnyịn-e?

⁵ Ke akpa isua ikie C.E., ke ntak mme item owo, mme Pharisee ke ofụri ofụri ẹma ẹnyene ntụhọ edibiere ikpe nsọn̄ido nsọn̄ido nnọ mbon en̄wen. Owo ekededi ke otu mme andikpan̄ utọn̄ nnọ Jesus oro ekesinamde ido oro ekenyene nditre. Edi ata mmemmem n̄kpọ ndikụt mbio ke enyịn mbon en̄wen akan obukpọk ẹmi ẹdude ke enyịn nnyịn​—ndinyụn̄ ntotịm nnyene mbuọtidem n̄kan ke nte ikụtde idem nnyịn! Nte eren kiet ọkọdọhọde ete, “Ami mmesima ndisụk mbon en̄wen uyo koro emi esinamde mi n̄kop idem inem ata etieti!” Ndinyene ido edisua nnọ mbon en̄wen ekeme ndinọ nnyịn ekikere eti ido oro etiede nte ọnọ usiene ke ndudue nnyịn oro nnyịn iyomde ndidịp. Edi edieke oyomde ẹnọ edinen̄ede, ẹkpenyene ndinọ ke sụn̄sụn̄ edu. Owo oro ọnọde edinen̄ede ekpenyene nditotịm ndu ke edidemede mban̄a mme ndudue esiemọ.​—Galatia 6:1.

6. Ke nso isọn̄ ke ubiereikpe nnyịn, ke ini edide se ẹyomde, ọkpọkọn̄ọ, ndien nso un̄wam ke nnyịn ikpoyom mbak nnyịn idikụt ndudue ikaha?

⁶ Jesus ikedịghe ndibiere ikpe nnọ ererimbot edi ekedi ndinyan̄a enye. Ubiereikpe ekededi oro enye ekebierede ikedịghe eke idemesie edi ẹkekọn̄ọ ke ikọ ẹmi Abasi ọkọnọde enye ete etịn̄. (John 12:47-50) Ubiereikpe ekededi oro nnyịn ibierede ekpenyene ndidu n̄ko ke n̄kemuyo ye Ikọ Jehovah. Ana nnyịn ifịk ntụhọ owo nditie ikpe ikpe inịm. Ke ndinam emi, nnyịn ikpọkọbọ ke ndibọn̄ akam nnọ Jehovah nyom un̄wam: “Ẹben̄e, ndien ẹyenọ mbufo; ẹyom, ndien mbufo ẹyekụt; ẹtuak, ndien ẹyesio usụn̄ ẹnọ mbufo: koro kpukpru owo eke ẹben̄ede ẹbọde; owo eke oyomde okụtde; ẹdinyụn̄ ẹsiode usụn̄ ẹnọ owo eke atuakde.” (Matthew 7:7, 8) Jesus akakam ọdọhọ ete: “Ami n̄kemeke ndinam baba n̄kpọ kiet ke Idem Mi: adan̄a nte n̄kopde ke mbiere ikpe; ndien ubiereikpe Mi edi edinen; koro mbịneke uduak Idem Mi, edi mbịne uduak Andidọn̄ Mi.”​—John 5:30.