Mfafaha Usụn̄ Adade Osịm Ifụre
IBAT ibat mme ọfiọkn̄kpọ owo ẹneni ẹte ke mme oto-obot ibet ẹkara ekondo. Ibet ẹmi ẹkara kpukpru n̄kpọ ọtọn̄ọde ke ata ekpri atọm tutu osịm ata ikpọ uyọ ntantaọfiọn̄ ẹmi ẹdọn̄ọde ediwak biliọn ntantaọfiọn̄. Ke ekpedide isio ye oro, owo ikpekemeke nditịm n̄kpọ ndien ifiọk ikpodụhe; uwem ke idemesie ikpodụhe. Ebede ke ndifiọk oto-obot ibet nnyụn̄ nnam n̄kpọ ke n̄kemuyo ye mmọ, owo emekeme ndinam mme n̄kpọ oro ẹnyenede ndyọ, utọ nte edisan̄a ke ọfiọn̄ nnyụn̄ ntie ke ebiet ekededi ke isọn̄ m̀mê ke ebiet oro akam oyomde usụn̄ ọkpọn̄ n̄kann̄kụk isọn̄ nsio mme ndise ẹmi ẹnyenede uduot man ẹdidụk iso television ke ufọk nnyịn.
Edi nso kaban̄a ibet ido uwem? Nte edisọn̄ọ nyịre ke mmọ enyene ufọn onyụn̄ on̄wụm mfri ukem ntre? Etie nte ediwak owo ẹkere ke ibet ido uwem idụhe ẹnyụn̄ ẹmek ukpepn̄kpọ akwaifiọk unam se ẹmade m̀mê ido ukpono emi ekemde ye mme udọn̄ idemmọ.
Nte ededi, odu ndusụk owo ẹmi ẹmekde usụn̄ efen, kpa ‘mfafaha usụn̄ emi adade osịm uwem’ nte ẹwụtde ke Bible. Nnyịn ikpenyeneke ndikop n̄kpaidem nte ke mbon oro ẹmekde emi iwakke, koro Jesus eketịn̄ aban̄a mfafaha usụn̄ ete: “Mme andikụt enye iwakke.” (Matthew 7:14) Ntak mîwakke?
Koro ibet ye mme edumbet Abasi ẹdori ukpan ke mfafaha usụn̄. Enye n̄kukụre edemede udọn̄ owo emi ke ofụri esịt oyomde ndidu uwem ekekem ye mme idaha Abasi. Ke edide ata isio ye ntatara usụn̄, emi ọnọde abian̄a abian̄a ekikere ifụre edi emi ke ata idem n̄kpọ esịnde owo ke ufụn, mfafaha usụn̄, emi etiede ukpan ukpan, osio owo ke ufụn ke kpukpru akpan ikpehe. Edi “ata edifọn ibet Abasi emi anamde owo ọwọrọ ufụn” onịm mme adan̄a esie.—James 1:25.
Nte Mfafaha Usụn̄ Osiode Owo ke Ufụn
Edi akpanikọ, isidịghe mmemmem n̄kpọ kpukpru ini ndidu ke mfafaha usụn̄. Kpukpru owo oro ẹdude uwem ẹdi mme anana mfọnmma ẹnyụn̄ ẹnyene ndammana ntụhọ ndinam idiọk. Ntre owo ekeme ndinyene ntụhọ editụn usụn̄ esisịt. Nte ededi, mme ufọn edisọn̄ọ nyịre ke ‘usụn̄ oro esịrede’ ẹdot ye unọ idem ntụnọ m̀mê mme edinen̄ede ekededi oro oyomde, koro Abasi ‘ekpep nnyịn usụn̄ udori.’—Isaiah 48:17; Rome 3:23.
Ke ndinam an̄wan̄a: Mme ete ye eka ẹmi ẹnyenede eti ibuot ẹsinam ndutịm ‘mfafaha usụn̄’ udia ẹnọ nditọ mmọ. Ndusụk ini emi esiwọrọ ndinyene iwụk ke mme ini udia. Edi ke ini nditọ ẹkọride ẹkponi, mmọ ẹyedara ima ima ntụnọ ete ye eka mmọ. Nte ikpọ owo, eyedi mmọ ẹma ẹkọri udọn̄ ẹnọ nti udia. Ndien ediwak orụk nti udia ẹdude idiyakke mmọ ẹdede ẹkere ke ẹdori mmimọ ukpan.
Ke usụn̄ eke spirit, Abasi anam ukem ntre ye mbon oro ẹdude ke mfafaha usụn̄ emi adade osịm uwem. Enye esịn nti udọn̄ ẹmi ẹdade ẹkesịm inemesịt ye ata ifụre ke esịt mbon nsụhọdeidem. Enye anam emi ebe ke ndinọ Ikọ esie, kpa Bible. Adianade do, enye ọdọhọ nnyịn ibọn̄ akam iben̄e spirit esie man an̄wam nnyịn, enye onyụn̄ owụk nnyịn ete isisop idem ye ekemmọ mme Christian, ẹmi ẹkemede ndisịn udọn̄ nnọ nnyịn man isọn̄ọ idu ke mfafaha usụn̄. (Mme Hebrew 10:24, 25) Ih, Abasi edi ima, ndien akakan edu emi akara mme uduak ye kpukpru usụn̄ unam n̄kpọ esie.—1 John 4:8.
Ke ini ima, emem, eti ido, mfara ke idem, ye mbun̄wụm spirit Abasi eken ẹkarade, mfafaha usụn̄ itiehe ukpan ukpan. Nte N̄wed Abasi ọdọhọde, “baba ibet kiet ibiọn̄ọke orụk edu ẹmi.” (Galatia 5:22, 23) “Ọtọ nte Spirit Ọbọn̄ odude, ubọhọ-ufụn etiene odu do n̄ko.” (2 Corinth 3:17) Idem idahaemi, mme ata Christian ke ẹtabi ifụre emi ẹse. Mmọ ẹbọhọ ediwak ndịk ẹmi ẹnọmọde mme owo mfịn, utọ nte ndịk ẹnyenede ẹban̄a ini iso ye ndịk ndịk nsunsu ekikere aban̄ade n̄kpa. Edi n̄kpọ nduaidem didie ntem nditie n̄kere mban̄a ini iso ke ini “ifiọk Jehovah [ọyọhọde] ke ererimbot, kpa nte mmọn̄ ofụkde inyan̄”! (Isaiah 11:9) Adan̄aoro, idem ndịk ubiatibet ididụhe aba. Ukpọhọde ye mme ukwak ukpeme ididụhe aba ke nsinsi. Kpukpru owo ẹyenyene emem ye ifụre—uwemeyo ye okoneyo, ke ufọk ye ke an̄wa. Oro edidi ifụre ke akpanikọ!
Ẹnọ Nnyịn Nsọn̄ọ Un̄wam Abasi
Edi akpanikọ, ndida mme idaha Abasi ndu uwem oyom ukeme, kpa ye oro “mbet Esie ibiakke owo idem,” idem ye mme anana mfọnmma owo. (1 John 5:3) Nte nnyịn ikpụhọrede ida ekekem ye mfafaha usụn̄ inyụn̄ ibọde mme ufọn edisan̄a ke enye, nnyịn iyekọri ọkpọsọn̄ usua inọ mme usụn̄ ye mme ekikere ẹmi ẹdade ẹdiọn̄ọ mbon ẹmi ẹdude ke ntatara usụn̄. (Psalm 97:10) Ndinịm ibet Abasi edemede udọn̄ eti uduot oro esịnede kpukpru nnyịn ke idem. Utu ke “ubiak esịt” ye “ndutụhọ spirit” ẹmi ẹdide edu ediwak owo, Abasi ọn̄wọn̄ọ ete: “Sese, ikọt mi ẹyekwọ ke idatesịt.” Ih, esịt oro Jehovah ọnọde ukpep adara onyụn̄ enyene ifụre.—Isaiah 65:14.
Jesus akakpa man nnyịn ikeme ndinyene ata ifụre. Bible ọdọhọ ete: “Abasi akamama ererimbot ntem, tutu Enye osio ikpọn̄îkpọn̄ Eyen emi Enye obonde ọnọ, man owo ekededi eke ọbuọtde idem ye enye okûtak, edi enyene nsinsi uwem.” (John 3:16) Kemi, nte Edidem Obio Ubọn̄ Abasi eke heaven, Jesus ke ada mme ufọn uwa oro anam n̄kpọ. Ibịghike, ke “akwa ukụt” ama ekebe, ke ini ntatara usụn̄ ye mmọ oro ẹsan̄ade ke enye ẹdisịmde utịt, enye ke ime eyetọn̄ọ ndida okopitem ubonowo nsan̄a ke mfafaha usụn̄ oro osụhọde tutu osịm utịt esie, mfọnmma eke owo. (Ediyarade 7:14-17; Matthew 24:21, 29-31) Ke akpatre nnyịn iyekụt nte utịbe utịbe un̄wọn̄ọ emi osude: “Ẹyenyan̄a ekondo ke idemesie nde ẹsio ke itie ufụn mbiara, ẹsịn ke itie eyenisọn̄ emi enyenede ubọn̄ eke nditọ Abasi.” Idụhe se ikemede ndikan ifụre emi Abasi ọnọde mi. Ẹyekam ẹsio n̄kpa ẹfep.—Rome 8:21; Ediyarade 21:3, 4.
Ebede ke ndikụt nnyụn̄ mfiọk ebiet emi mfafaha usụn̄ adade owo aka in̄wan̄în̄wan̄, owo ekeme ndinen̄ede mmek usụn̄ enyeemi onyụn̄ akaiso asan̄a ke enye. Ẹn̄wam n̄kparawa owo akpan akpan mbak ẹdikụt n̄kpọ ibio ibio mbak ẹdinyụn̄ ẹyat esịt ke se mmọ ẹkerede ke ẹdi ukpan ẹmi mme idaha Abasi ẹdoride. Mmọ ẹkpep ndikụt mmọemi nte uyarade ima Abasi ye nte se ikwide mmimọ ibiọn̄ọ ndiọi n̄kpọ ntatara usụn̄. (Mme Hebrew 12:5, 6) Nte ededi, oyom owo enyene ime, etide ete ke esida ini man owo ọkọri mme edu ye mme udọn̄ uten̄e Abasi, kpa nte esidade ini man eto mfri osion̄o nti mfri. Edi eto oro eyen̄wụm edieke ẹsede ẹban̄a ẹnyụn̄ ẹbọkde ke mmọn̄.
Ntre kpep Ikọ Abasi, buana ye mme Christian eken, ndien ‘kûdop akam’ ọbọn̄de eben̄e edisana spirit. (1 Thessalonica 5:17) Buọt idem ke Abasi man an̄wam fi ‘enen̄ede usụn̄ fo onịm.’ (Mme N̄ke 3:5, 6) Edi ndi kpukpru emi owụt ifiọk? Nte enye enen̄ede enyene ufọn? Ih, enye ama enyene ufọn ọnọ Tom onyụn̄ enyene ọnọ Mary, ẹmi ẹkesiakde ke akpa ibuotikọ.
Mmọ Ẹma Ẹtre Ndisan̄a ke Ntatara Usụn̄
Tom ewet ete: “Ke ufọt ufọt iduọk isua 1970, nnyịn ima idisobo ye Mme Ntiense Jehovah ke ini kiet ke otu mmọ akawahade ufọk nnyịn. Nneme oro ama ada okosịm ukpepn̄kpọ Bible. Mma ntọn̄ọ ndinam uwem mi asana sụn̄sụn̄. Mma nna baptism ke 1982 ndien ami idahaemi nnam utom ye esop n̄kann̄kụk. Eyeneren nnyịn n̄ko ana baptism idahaemi. Mmọkọm n̄wan mi ke ndikọyọ mi ke ofụri isua oro mbemiso n̄kekpepde akpanikọ. Ndien ke akande kpukpru mmọkọm Jehovah ye Christ Jesus Eyen esie, ke kpukpru n̄kpọ oro mmọ ẹnọde nnyịn ye ke idotenyịn oro nnyịn inyenede idahaemi iban̄a ini iso.”
Ndien nso kaban̄a Mary? Ọfọn, enye ekekere ke tutu amama Abasi idifenke inọ imọ, edi enye ama oyom ndikpep n̄kpọ mban̄a Enye ke ntak nditọ esie. Ke ini enye okokopde ete ke Mme Ntiense Jehovah ke ẹkekpep mbọhọidụn̄ esie Bible, enye n̄ko ama esịn eben̄e oyom un̄wam. Nte ededi, ndiọi edu esie oro ẹma ẹkedọn̄ n̄kam ẹma ẹnam n̄kọri edi ọkpọsọn̄ n̄kpọ. Ukpepn̄kpọ emi ekedi aka iso afiak edem. Nte ededi, ekpri eyenan̄wan esie ekedide isua itiaba ama esisịn udọn̄ ọnọ enye. “Mama, kûkpa mba. Afo emekeme ndinam!” ntem ke enye edidọhọ. Do Mary eyenen̄ede esịn ukeme.
Ke ini ebe emi ọkọdọde enye nte ekemde ye ido obio, emi n̄ko ekedide ada n̄kpọsọn̄ ibọk ke idiọk usụn̄, ọkọnyọn̄de edi ufọk, enye n̄ko ama etiene abuana ke ukpepn̄kpọ oro. Ke akpatre mmọ mbiba ẹma ẹkan ndiọi edu mmọ. Ekem, ke ẹma ẹkesịn ndọ mmọ ke n̄wed nte ekemde ye ibet ẹnyụn̄ ẹna baptism, mmọ ẹma ẹnen̄ede ẹkop inemesịt onyụn̄ etie mmọ ke idem nte ata ubon ke akpa ini. Ke mfụhọ, AIDS ke akpatre ama ada uwem Mary, edi enye akakpa ye esịt esie owụhọde ke un̄wọn̄ọ Bible aban̄ade ediset ke n̄kpa ye uwem ke paradise isọn̄, ẹmi ẹnamde asana ọbọhọ kpukpru mbọn ubiak ntatara usụn̄.
Ih, ẹkeme ndiwọrọ ke ntatara ye n̄wan̄a n̄wan̄a usụn̄ emi adade aka nsobo. Christ Jesus ọkọdọhọ ete: “Ndien nsinsi uwem oro edi ndifiọk Fi, ata Abasi kierakiet, ye Enyeemi Afo ọkọdọn̄de, kpa Jesus Christ.” (John 17:3) Do, ntak mûbiereke ndisan̄a ke mfafaha usụn̄ emi adade osịm uwem? Ebede ke ndida se afo ekpepde oto Ikọ Abasi ke akpan n̄kpọ nnyụn̄ nda nsịn ke edinam, afo emekeme ndikụt inem inem un̄wọn̄ọ Bible emi osude ke idemfo: “Mbufo ẹyefiọk akpanikọ, akpanikọ eyenyụn̄ anam mbufo ẹwọrọ ufụn.”—John 8:32.