Ibuot 5
Utuakibuot Anie ke Abasi Onyịme?
1. Nso ke n̄wan Samaria okoyom ndifiọk mban̄a utuakibuot?
NTE akanam afo emeyịk ete, ‘Utuakibuot anie ke Abasi onyịme?’ Anaedi n̄wan kiet ama enyene utọ mbụme emi ke ekikere ke ini enye ekenyenede nneme ye Jesus Christ ekpere Obot Gerizim ke Samaria. Ke odụride ntịn̄enyịn owụt ukpụhọde oro odude ke utuakibuot mbon Samaria ye eke mme Jew, enye ama ọdọhọ ete: “Mme ete nnyịn ẹkam ẹtuak ibuot ẹnọ Abasi ke obot emi; ndien mbufo ẹte, ebiet eke owo ẹkpetuakde ibuot ẹnọ Abasi odu ke Jerusalem.” (John 4:20) Ndi Jesus ama ọdọhọ n̄wan Samaria oro ete ke Abasi onyịme kpukpru utuakibuot? Mîdịghe ndi enye ama ọdọhọ ke oyom mme akpan n̄kpọ man ẹnem Abasi esịt?
2. Ke ọbọrọde n̄wan Samaria, nso ke Jesus eketịn̄?
2 Akpa-owo-idem ibọrọ Jesus ekedi: “Ini ke edi, eke mbufo ẹdituakde ibuot ẹnọ Ete, idịghe ke obot emi inyụn̄ idịghe ke Jerusalem.” (John 4:21) Mbon Samaria ke anyanini ẹma ẹbak Jehovah ẹnyụn̄ ẹtuak ibuot ẹnọ mme abasi efen ke Obot Gerizim. (2 Ndidem 17:33) Idahaemi Jesus Christ ọkọdọhọ ke itie oro m̀mê Jerusalem idịghe akpan n̄kpọ ke utuakibuot akpanikọ.
TUAK IBUOT KE SPIRIT YE KE AKPANIKỌ
3. (a) Ntak emi mbon Samaria mîkenen̄ekede ifiọk Abasi? (b) Didie ke mme anam-akpanikọ Jew ye mbon eken ẹkpedi ẹdifiọk Abasi?
3 Jesus ama akaiso ndidọhọ n̄wan Samaria oro ete: “Mbufo ẹtuak ibuot ẹnọ se mbufo mîfiọkke: nnyịn ituak ibuot inọ se ifiọkde: koro edinyan̄a otode mme Jew.” (John 4:22) Mbon Samaria ẹma ẹnyene mme nsunsu ekikere ido ukpono ẹkenyụn̄ ẹnyịme akpa n̄wed ition eke Bible kpọt nte se ẹdade odudu spirit Abasi ẹwet—ndien sụk mmọemi mmọ ẹma ẹkefiak ẹdụn̄ọde ke idemmọ kpọt ẹmi ẹdiọn̄ọde nte Akpa N̄wed Ition Mbon Samaria. Ke ntre, mmọ ikenen̄ekede ifiọk Abasi. Nte ededi, ẹma ẹyak ifiọk N̄wed Abasi ẹsịn mme Jew ke ubọk. (Rome 3:1, 2) N̄wed Abasi ama ọnọ mme anam-akpanikọ Jew ye mmọ eken oro ẹdikpan̄de utọn̄ se mmọ ẹkeyomde man ẹfiọk Abasi.
4. Nte Jesus ọkọdọhọde, nso ke okoyom mme Jew ye mbon Samaria ẹnam edieke akanade Abasi onyịme utuakibuot mmọ?
4 Ke akpanikọ, Jesus ama owụt ke mme Jew ye mbon Samaria ẹkenyene ndinen̄ede usụn̄ utuakibuot mmọ man ẹnem Abasi esịt. Enye ọkọdọhọ ete: “Ini ke edi, omonyụn̄ ededi ama, eke ata mme andituak ibuot ẹdituakde ibuot ẹnọ Ete ke spirit ye ke akpanikọ: koro edi mmọ eke ẹtiede ntem ke Ete oyom ete ẹtuak ibuot ẹnọ Imọ. Abasi edi spirit: ndien mme andituak ibuot nnọ Enye ẹnyene ndituak ibuot ke spirit ye ke akpanikọ.” (John 4:23, 24) Oyom nnyịn ituak ibuot inọ Abasi “ke spirit,” emi esịt oro ọyọhọde ye mbuọtidem ye ima onụkde. Ẹkeme ndituak ibuot nnọ Abasi “ke akpanikọ” ebe ke ndikpep Ikọ esie, kpa Bible, onyụn̄ ebe ke ndituak ibuot nnọ enye nte ekemde ye akpanikọ esie oro ẹyararede. Nte afo emenyene udọn̄ ndinam oro?
5. (a) Nso ke “utuakibuot” ọwọrọ? (b) Nso ke ana nnyịn inam edieke nnyịn iyomde Abasi onyịme utuakibuot nnyịn?
5 Jesus ama ọsọn̄ọ etịn̄ ete ke Abasi oyom utuakibuot akpanikọ. Emi owụt ke odu mme orụk utuakibuot ẹmi Jehovah mînyịmeke. Ndituak ibuot nnọ Abasi ọwọrọ ndinọ enye ukpono oro asan̄ade ye uten̄e nnyụn̄ nnam edisana utom nnọ enye. Edieke afo okpoyomde ndiwụt ukpono nnọ okopodudu andikara, anaedi ọkpọdọn̄ fi ndinam utom nnọ enye nnyụn̄ nnam se inemde enye esịt. Do, ke akpanikọ, oyom nnyịn inem Abasi esịt. Utu ke ikpîkpu edidọhọ, ‘Ido ukpono mi ekem ye ami,’ oyom nnyịn ke ntre ikụt ite ke utuakibuot nnyịn ekem ye mme n̄kpọ oro Abasi oyomde.
NDINAM UDUAK ETE
6, 7. Ntak emi Jesus mîfiọkke ndusụk mmọ oro ẹdọhọde ke idi mbet esie?
6 Ẹyak nnyịn ikot Matthew 7:21-23 inyụn̄ ise m̀mê nnyịn imekeme ndisio akpan n̄kpọ kiet oro ebierede m̀mê Abasi onyịme kpukpru utuakibuot. Jesus ọkọdọhọ ete: “Idịghe kpukpru owo ẹmi ẹkotde Mi ẹte, Ọbọn̄, Ọbọn̄, ẹdidụk ke Obio Ubọn̄ Heaven; edi owo eke anamde uyo [“uduak,” NW] Ete Mi emi odude ke heaven. Ediwak owo ẹyedọhọ Mi ke usen oro, ẹte, Ọbọn̄, Ọbọn̄, nte nnyịn iketịn̄ke nte prọfet ke enyịn̄ Fo, inyụn̄ idaha enyịn̄ Fo iduọn̄ọ mme demon [ndiọi edibotn̄kpọ eke spirit], inyụn̄ idaha enyịn̄ Fo inam ediwak n̄kpọ odudu? Ndien nyedọhọ mmọ adan̄aoro, nte, Akananam ndiọn̄ọke mbufo: ẹdianade Mi, mbufo mme anam ukwan̄n̄kpọ.”
7 Ndinyịme Jesus Christ nte Ọbọn̄ edi akpan n̄kpọ ke utuakibuot akpanikọ. Edi n̄kpọ anana ke utuakibuot ediwak mbon oro ẹdọhọde ke idi mme mbet Jesus. Enye ọkọdọhọ ete ke ndusụk owo ẹnam “n̄kpọ odudu,” utọ nte inua-okot utịbe utịbe ukọkudọn̄ọ. Nte ededi, mmọ ẹkpu ndinam se Jesus ọkọdọhọde ke edi akpan n̄kpọ. Mmọ ‘inamke uduak Ete Esie.’ Edieke nnyịn iyomde ndinem Abasi esịt, ana nnyịn ikpep se uduak Ete edide ndien ekem inam oro.
NNENNEN IFIỌK—N̄KPỌ UKPEME
8. Edieke anade nnyịn inam uduak Abasi, nso ke oyom, ndien nso ukwan̄ ekikere ke ana nnyịn ifep?
8 Ndinam uduak Abasi oyom nnennen ifiọk Jehovah Abasi ye Jesus Christ. Utọ ifiọk oro ada osịm nsinsi uwem. Do, ke akpanikọ, oyoyom kpukpru nnyịn ida edinyene nnennen ifiọk otode Ikọ Abasi, kpa Bible, ke akpan n̄kpọ. Ndusụk owo ẹdọhọ ke ufọn idụhe nditịmede esịt adan̄a nte nnyịn inyenede esịt akpanikọ inyụn̄ isịnde ifịk ke utuakibuot nnyịn. Mbon en̄wen ẹdọhọ ẹte, ‘Edieke enyenede esisịt ifiọk, ẹyom esisịt n̄kpọ ẹto fi.’ Edi, Bible esịn udọn̄ ọnọ nnyịn ndikọri ke ifiọk Abasi ye eke uduak esie.—Ephesus 4:13; Philippi 1:9; Colossae 1:9.
9. Didie ke nnennen ifiọk ekpeme nnyịn, ndien ntak emi nnyịn iyomde utọ ukpeme oro?
9 Utọ ifiọk oro iyakke ẹsabarede utuakibuot nnyịn. Apostle Paul ama etịn̄ aban̄a edibotn̄kpọ eke spirit kiet emi anamde nte idi “angel un̄wana.” (2 Corinth 11:14) Ntem ke okpụhọrede uduot, edibotn̄kpọ eke spirit emi—Satan—odomo ndinam nnyịn inam n̄kpọ ẹmi ẹtuahade ye uduak Abasi. Mme edibotn̄kpọ eke spirit eken ẹmi ẹbuanade ye Satan ẹmesabarede utuakibuot owo n̄ko, koro Paul ọkọdọhọ ete: “Se mme Gentile ẹwade, ke ẹwa ẹnọ mme demon, iwaha inọ Abasi.” (1 Corinth 10:20) Anaedi, ediwak owo ẹma ẹkere ke mmimọ ikatuak ibuot ke nnennen usụn̄, okposụkedi mmọ mîkanamke se Abasi okoyomde. Ẹma ẹtụn mmọ usụn̄ ẹsịn ke ndedehe nsunsu utuakibuot. Nnyịn iyekpep n̄kpọ efen efen iban̄a Satan ye mme demon nte ini akade, edi mme asua Abasi ẹmi ẹmenen̄ede ẹsabade utuakibuot ubonowo.
10. Nso ke afo akpanam edieke owo okpokoide-koi esịn ibọkn̄kpa ke ebiet emi edin̄wọn̄ mmọn̄ fo otode, ndien nso ke nnennen ifiọk Ikọ Abasi otịm nnyịn idem ndinam?
10 Edieke afo ọkpọfiọkde ke owo ama okokoi esịn ibọkn̄kpa ke ebiet emi edin̄wọn̄ mmọn̄ fo otode, nte afo akpakaiso ndin̄wọn̄ mmọn̄ nto enye? Ke akpanikọ, afo akpanam n̄kpọ usọp usọp ndiyom ebiet emi edinyenede eti, edisana mmọn̄. Ọfọn, nnennen ifiọk Ikọ Abasi otịm nnyịn idem ndidiọn̄ọ ido ukpono akpanikọ nnyụn̄ nsịn ndedehe n̄kpọ ẹmi ẹnamde Abasi okûnyịme utuakibuot.
ITEM OWO KE UKPEPN̄KPỌ
11. Nso ikakwan̄a ke utuakibuot ediwak mme Jew?
11 Ke ini Jesus okodude ke isọn̄, ediwak mme Jew ikanamke n̄kpọ nte ekemde ye nnennen ifiọk Abasi. Mmọ ke ntre ẹma ẹtaba ifet edinyene edisana idaha ke iso Jehovah. Kaban̄a mmọ, Paul ekewet ete: “Ndi ntiense nnọ mmọ, nte mmọ ẹnyene ifiopesịt ẹban̄a Abasi, edi ifiopesịt mmọ isan̄ake ye ifiọk.” (Rome 10:2) Mmọ ẹma ẹbiere ẹnọ idemmọ nte ẹdikponode Abasi utu ke ndikpan̄ utọn̄ nnọ se enye eketịn̄de.
12. Nso ikasabade utuakibuot Israel, ndien ye nso utịp?
12 Nditọ Israel ke akpa ẹkenam edisana ido ukpono oro Abasi ọkọnọde, edi ẹma ẹda mme item ye mme ukpepn̄kpọ akwaifiọk owo ẹsabade emi. (Jeremiah 8:8, 9; Malachi 2:8, 9; Luke 11:52) Okposụkedi mme adaiso ido ukpono mme Jew oro ẹkediọn̄ọde nte mme Pharisee ẹkekerede ke Abasi ama onyịme utuakibuot mmimọ, Jesus ama asian mmọ ete: “Isaiah ototịm etịn̄ nte prọfet aban̄a mbufo, mbon mbubịk, nte ẹwetde ẹte, Mbio ẹmi ẹkpono Mi ke n̄kpọkinua mmọ, edi esịt mmọ ada nsannsan ye Ami; edi mmọ ẹkpono Mi ikpîkpu, sia ẹkpepde item owo ke ukpepn̄kpọ mmọ.”—Mark 7:6, 7.
13. Didie ke nnyịn ikeme ndinam n̄kpọ nte mme Pharisee ẹkenamde?
13 Ndi nnyịn imekeme ndinam nte mme Pharisee ẹkenamde? Emi ekeme nditịbe edieke nnyịn itienede mme ido edinam ido ukpono oro ẹkeyakde ẹnọ nnyịn utu ke ndidụn̄ọde se Abasi etịn̄de aban̄a utuakibuot. Ke odụride owo utọn̄ aban̄a n̄kpọndịk emi, Paul ekewet ete: “Spirit enen̄ede ọdọhọ ete, ke ukperedem ini owo ẹyefiak edem ẹkpọn̄ mbuọtidem, ẹnyụn̄ ẹkpan̄ utọn̄ ẹnọ mme spirit abian̄a ye ukpepn̄kpọ mme demon.” (1 Timothy 4:1) Ntre ikpîkpu edikere ke utuakibuot nnyịn enem Abasi esịt ikemke. Ukem nte n̄wan Samaria oro okosobode Jesus, ekeme ndidi nnyịn ikadada usụn̄ utuakibuot nnyịn imana ito ete ye eka nnyịn. Edi oyom nnyịn ikụt ite ke nnyịn ke inam n̄kpọ ẹmi ẹnyenede unyịme Abasi.
KPEME BIỌN̄Ọ EDIDUE ABASI
14, 15. Idem edieke nnyịn inyenede ndusụk ifiọk uduak Abasi, ntak oyomde nnyịn ikpeme idem?
14 Ibọhọke nnyịn ikpeme idem, nnyịn imekeme ndinam n̄kpọ oro Abasi mînyịmeke. Ke uwụtn̄kpọ, apostle John ama ọduọ ke ukot angel kiet ‘ete ituak ibuot inọ enye.’ Edi angel oro ama odụri enye utọn̄ ete: “Kûnam: ndi asan̄autom ye afo ye nditọete fo ẹmi ẹnyenede ikọ ntiense Jesus: tuak ibuot nọ Abasi.” (Ediyarade 19:10) Nte afo ke ntre omokụt ediyom oro oyomde fi okụt ete ke owo isabakede utuakibuot fo ebe ke orụk ukpono ndem ekededi?—1 Corinth 10:14.
15 Ke ini ndusụk Christian ẹketọn̄ọde ndinam mme ido edinam ido ukpono ẹmi mîkenemke Abasi esịt, Paul ama obụp ete: “Nsinam mbufo ẹfiakde ẹbịne mmeme nditaha mme odudu oro, ẹnyụn̄ ẹyom nditọn̄ọ ntak ndụk ufụn nnọ mmọ? Mbufo ke ẹnenịm usen ye ọfiọn̄ ye ini ye isua. Mmenyene ndịk mban̄a mbufo, nte ndusụk n̄kakpa utom ikpîkpu ke idem mbufo.” (Galatia 4:8-11) Mme owo oro ẹma ẹnyene ifiọk Abasi edi ke ukperedem ẹma ẹdue ebe ke ndinịm mme ido edinam ido ukpono ye ndisana usen ẹmi Jehovah mîkonyịmeke. Nte Paul ọkọdọhọde, oyom nnyịn ‘idomo ifiọk se itịmde inem Ọbọn̄ esịt.’—Ephesus 5:10.
16. Didie ke John 17:16 ye 1 Peter 4:3 ẹn̄wam nnyịn ndibiere m̀mê mme usen nduọkodudu ye mme ido edinam ẹnem Abasi esịt?
16 Ana nnyịn ikụt ite ke imefep mme usen nduọkodudu ido ukpono ye mme ido edinam eken oro ẹbiatde mme edumbet Abasi. (1 Thessalonica 5:21) Ke uwụtn̄kpọ, Jesus eketịn̄ aban̄a mme anditiene enye ete: “Mmọ idịghe eke ererimbot, kpa nte Ami mmendịghe eke ererimbot.” (John 17:16) Nte ido ukpono fo esibuana ke mme usọrọ ye mme usen nduọkodudu ẹmi ẹbiatde edumbet edida san̄asan̄a ke mme mbubehe ererimbot emi? Mîdịghe ndi mme andibuana ke ido ukpono fo ndusụk ini ẹsibuana ke mme ido edinam ye mme usọrọ oro ẹkemede ndibuana ido oro edide ukem ye enyeoro apostle Peter eketịn̄de aban̄a? Enye ekewet ete: “Ini emi ama ebe ekem mbufo ndida nnam se idọn̄de mme Gentile itọn̄, kpa ini emi mbufo ẹsan̄ade ẹdu uwem ke use, ye idiọkitọn̄, ye ediyụhọ mmịn, ye otịme otịme ido, ye edin̄wọn̄ mmịn, ye obukpo edikpono ndem.”—1 Peter 4:3.
17. Ntak emi nnyịn ikpefepde n̄kpọ ekededi emi owụtde edu ererimbot?
17 Apostle John ama ọsọn̄ọ etịn̄ ediyom oro oyomde ẹfep edinam ekededi oro owụtde edu ererimbot oro mîbakke Abasi emi akande nnyịn okụk. John ekewet ete: “Ẹkûma ererimbot, ye se idude ke ererimbot. Edieke owo ekededi amade ererimbot, ima Ete idụhe enye ke esịt. Koro ofụri ofụri se idude ke ererimbot, mbumek obụkidem, ye mbumek enyịn, ye ikpîkpu ubọn̄ uwem emi, itoho Ete, edi oto ke ererimbot. Ndien ererimbot ke ebebe efep, ye mbumek esie; edi owo eke anamde se Abasi amade [“uduak Abasi,” NW] ododu ke nsinsi.” (1 John 2:15-17) Ndi afo ama okụt ke mmọ oro ‘ẹnamde uduak Abasi’ ẹdidu ke nsinsi? Ih, edieke nnyịn inamde uduak Abasi inyụn̄ ifepde mme edinam oro ẹwụtde edu ererimbot emi, nnyịn imekeme ndinyene idotenyịn nsinsi uwem!
NỊM MME N̄KOKON̄ IDAHA ABASI
18. Didie ke ndusụk mbon Corinth ẹkenam ndudue kaban̄a edu, ndien nso ke nnyịn ikpekpep ito emi?
18 Abasi oyom mbon oro ẹnamde n̄kpọ ekekem ye mme n̄kokon̄ idaha ido uwem esie nte mme andituak ibuot nnọ enye. Ndusụk owo ke Corinth eset ke ndudue ẹkekere ke Abasi eyeyọ oburobụt ido uwem. Nnyịn imekeme ndikụt adan̄a nte mmọ ẹkeduede ke ndikot 1 Corinth 6:9, 10. Edieke anade nnyịn ituak ibuot inọ Abasi ke usụn̄ oro enye onyịmede, ana nnyịn inem enye esịt ke ikọ ye ke edinam. Nte orụk utuakibuot fo ke an̄wam fi ndinam oro?—Matthew 15:8; 23:1-3.
19. Didie ke utuakibuot akpanikọ otụk nte nnyịn inamde n̄kpọ ye mbon en̄wen?
19 Edinam nnyịn ye mmọ en̄wen ẹkpenyene n̄ko ndiwụt mme idaha Abasi. Jesus Christ ekesịn udọn̄ ọnọ nnyịn ete inam n̄kpọ ye mbon en̄wen nte nnyịn ikpoyomde mmọ ẹnam ye nnyịn, koro emi edi ubak utuakibuot akpanikọ. (Matthew 7:12) Tịmfiọk se enye eketịn̄de n̄ko aban̄a ediwụt ima nditọete: “Mbufo ẹma ẹma kiet eken, kpukpru owo ẹyeda oro ẹfiọk ẹte mbufo ẹdi mbet Mi.” (John 13:35) Ana mme mbet Jesus ẹma kiet eken ẹnyụn̄ ẹnam se ifọnde ẹnọ ekemmọ andituak ibuot ye mbon en̄wen.—Galatia 6:10.
UTUAKIBUOT OFỤRI UKPỌN̄
20, 21. (a) Nso orụk utuakibuot ke Abasi oyom? (b) Ntak emi Jehovah ekesịnde utuakibuot Israel ke eyo Malachi?
20 Ke esịt fo, afo emekeme ndiyom ndituak ibuot nnọ Abasi ke usụn̄ oro enye onyịmede. Edieke edide ntre, ana afo enyene ekikere Jehovah kaban̄a utuakibuot. Mbet oro James ama ọsọn̄ọ etịn̄ ke ekikere Abasi edi akpan n̄kpọ, idịghe eke nnyịn. James ọkọdọhọ ete: “Ido Abasi eke asanade, mînyụn̄ ideheke ke iso Abasi Ete nnyịn edi, ndisan̄a nse nditọakpa ye mme ebeakpa ke ukụt mmọ, ndinyụn̄ n̄kpeme idem ke idiọkn̄kpọ emi odude ke ererimbot.” (James 1:27) Ye udọn̄ ndinem Abasi esịt, oyom nnyịn owo kiet kiet idụn̄ọde utuakibuot nnyịn man ikụt ite ke owo idaha mme edinam unana uten̄e Abasi isabade m̀mê ke nnyịn itreke ndinam n̄kpọ oro enye adade nte akpan n̄kpọ.—James 1:26.
21 Utuakibuot oro asanade, edide eke ofụri ukpọn̄ kpọt enem Jehovah esịt. (Matthew 22:37; Colossae 3:23) Ke ini idụt Israel ọkọnọde Abasi se isụhọrede ikan oro, enye ọkọdọhọ ete: “Eyen okpono ete, ofụn onyụn̄ okpono andinyene enye: edi edieke ami ndide ete, ukpono mi odu m̀mọ̀n̄? Edieke ami nnyụn̄ ndide andinyene, uten̄e mi odu m̀mọ̀n̄?” Mmọ ẹma ẹdue Abasi ke ndiwa mme unam ẹmi ẹkedide nnan, mbụn̄ọ, ẹnyụn̄ ẹdọn̄ọde nnọ enye, ndien enye ama esịn orụk edinam utuakibuot oro. (Malachi 1:6-8) Jehovah odot utuakibuot oro asanade akan ndien enye onyịme san̄asan̄a utuakibuot kpọt.—Exodus 20:5; Mme N̄ke 3:9; Ediyarade 4:10b.
22. Edieke nnyịn iyomde Abasi onyịme utuakibuot nnyịn, nso ke nnyịn idifep, ndien nso ke nnyịn idinam?
22 Etie nte n̄wan Samaria oro ekenyenede nneme ye Jesus do ama enyene udọn̄ ndituak ibuot nnọ Abasi ke usụn̄ oro Abasi onyịmede. Edieke oro edide udọn̄ nnyịn, nnyịn iyefep kpukpru ukpepn̄kpọ ye edinam ẹmi ẹsabarede. (2 Corinth 6:14-18) Utu ke oro, nnyịn iyesịn̄ede idem nnyịn man inyene nnennen ifiọk Abasi inyụn̄ inam uduak esie. Nnyịn iyesọn̄ọ iyịre ketket ke mme n̄kpọ oro enye oyomde kaban̄a utuakibuot oro ẹnyịmede. (1 Timothy 2:3, 4) Mme Ntiense Jehovah ẹdomo ndinam kpa oro, mmọ ẹnyụn̄ ẹsịn udọn̄ ẹnọ fi ufiop ufiop ndibuana ye mmọ ke ndituak ibuot nnọ Abasi “ke spirit ye ke akpanikọ.” (John 4:24) Jesus ọkọdọhọ ete: “Edi mmọ eke ẹtiede ntem ke Ete oyom ete ẹtuak ibuot ẹnọ Imọ.” (John 4:23) Ẹdori enyịn ke afo edi utọ owo oro. Ukem nte n̄wan Samaria oro, afo nte eyịghe mîdụhe akpama ndinyene nsinsi uwem. (John 4:13-15) Edi afo emesikụt mme owo ẹkọride ẹsọn̄ ẹnyụn̄ ẹkpan̄ade. Ibuotikọ oro etienede anam ntak an̄wan̄a.
DOMO IFIỌK FO SE
Nte ẹwụtde ke John 4:23, 24, ewe utuakibuot ke Abasi onyịme?
Didie ke nnyịn ikeme ndidiọn̄ọ m̀mê Abasi ama ndusụk ido edinam ye usọrọ?
Nso idi ndusụk n̄kpọ oro ẹyomde kaban̄a utuakibuot oro ẹnyịmede?
[Ndise ke page 44]