UKPEPN̄KPỌ 55
Tiene N̄wam Esop Emi Odude
Ikọt Jehovah ẹsiboho nte esop ke nsio nsio itie ẹkpono Jehovah. Esop emi awak etieti ke ofụri ererimbot. Esinenem mmọ ndisop idem ntre n̄kpep Ikọ Abasi nnyụn̄ mbọ nti item, mmọ ẹsinyụn̄ ẹma ndin̄wam nnam nsio nsio n̄kpọ ke esop emi mmọ ẹdude. Ndi emesitiene anam ntre ke esop emi afo odude?
1. Nso ye nso ke afo ekeme nditiene nda ini ye odudu fo nnam man an̄wam esop emi afo odude?
Kpukpru nnyin imekeme ndin̄wam esop nnyịn. Ke uwụtn̄kpọ, ndi enyene owo ke esop mbufo emi ọsọn̄de m̀mê ọdọn̄ọde? Ndi emekeme ndin̄wam mme owo ntre ẹkeme ndisitiene ndụk mbono esop, ndin̄wam n̄kedep n̄kpọ nsọk mmọ, m̀mê ndin̄wam mmọ nnam ndusụk n̄kpọ ke ufọk? (Kot James 1:27.) Imekeme n̄ko nditiene n̄n̄wam ntịm Ufọkmbono Obio Ubọn̄ n̄kama. Owo isikpakke-kpak owo anam kpukpru emi. Ima emi imade Abasi ye nditọete nnyin esinam ‘nnyịn inyịme’ nditiene n̄n̄wam nnam kpukpru emi.—Psalm 110:3.
Mbon emi ẹnade baptism ẹkeme ndin̄wam esop ke mme n̄kpọ en̄wen n̄ko. Irenowo emi ẹnen̄erede ẹma n̄kpọ Abasi ẹkeme ndidi mme asan̄autom unamutom m̀mê mbiowo. Irenowo ye iban emi ẹnade baptism ẹkeme ndidi mme asiakusụn̄ man ẹsịn idem ẹn̄wam esop ẹnam utom ukwọrọikọ. Ndusụk ikọt Abasi ẹsitiene ẹn̄wam ẹbọp mme ufọk esop Abasi, mîdịghe ẹwọrọ ẹken̄wam ke mme esop emi ẹyomde un̄wam.
2. Didie ke ikeme ndida okụk ye inyene nnyịn n̄n̄wam esop?
Imekeme ndida “ọsọn̄urua inyene [nnyịn]” ikpono Jehovah. (Mme N̄ke 3:9) Edi ata n̄kpọ ukpono nditiene nnọ okụk ye se inyenede man ẹda ẹn̄wam esop, ẹnyụn̄ eda ẹn̄wam yak ẹnam utom ukwọrọikọ ke ofụri ererimbot. (Kot 2 Corinth 9:7.) Ẹsida okụk oro inọde ẹdian n̄ko ẹn̄wam nditọete ke mme itie emi ata idiọk oyobio m̀mê n̄kpọ ntre etịbede abiat n̄kpọ. Ediwak owo ẹsima ndisio se mmọ ẹdinọde man ẹda ẹdian ẹnam n̄kpọ Abasi ẹnịm n̄kan̄ kiet. (Kot 1 Corinth 16:2.) Emekeme nditiene nsịn okụk ke ekebe ke ebiet ekededi isisopde idem ikpono Abasi mîdịghe aka donate.jw.org ọkọnọ. Se idade okụk ye inyene nnyịn inam esiwụt m̀mê imama Jehovah m̀mê imaha.
SỊN IDEM KPEP
Se nsio nsio n̄kpọ emi afo ekemede ndinam n̄n̄wam esop.
3. Imekeme ndida se inyenede n̄n̄wam esop
Jehovah ye Jesus ẹsima mbon oro ẹnọde n̄kpọ ke ofụri esịt. Ke uwụtn̄kpọ, Jesus ama enen̄ede otoro ebekpa kiet ke ekpri se enye ọkọnọde man ẹda ẹnam utom Abasi. Kot Luke 21:1-4, ekem ẹbọrọ mbụme emi ẹnyụn̄ ẹneme ẹban̄a mmọ:
Ndi edi tutu inọnọ ediwak okụk esịt enem Jehovah?
Didie ke Jehovah ye Jesus ẹsida enọ emi inọde ke ofụri esịt?
Edieke oyomde ndidiọn̄ọ se ẹsidade okụk emi ọnọde ẹnam, se VIDIO emi. Ekem ẹbọrọ mbụme emi ẹnyụn̄ ẹneme ẹban̄a enye.
Didie ke ẹsida okụk oro afo ọnọde ẹn̄wam esop ke ofụri ererimbot?
4. Imekeme nditiene n̄n̄wam
Ikọt Jehovah, ke ata ata eset, ẹma ẹsima ndinen̄ede ntịm ufọk Jehovah n̄kama. Idịghe sụk okụk ikpọn̄ ke mmọ ẹkesinọ. Kot 2 Chronicle 34:9-11, ekem ẹbọrọ mbụme emi ẹnyụn̄ ẹneme ẹban̄a enye:
Didie ke nditọ Israel ẹken̄wam yak ẹse ẹban̄a itie oro mmọ ẹkesisopde idem ẹkpono Jehovah?
Edieke oyomde ndidiọn̄ọ m̀mê Mme Ntiense Jehovah ẹsinam ukem nte mbon eyo Bible ẹkesinamde, se VIDIO emi. Ekem ẹbọrọ mbụme emi ẹnyụn̄ ẹneme ẹban̄a mmọ.
Ntak ọfọnde isinam Ufọkmbono Obio Ubọn̄ nnyịn asana inyụn̄ idiọn̄ se ibiarade?
Nso ye nso ke afo ekeme ndinam man etiene an̄wam?
5. Nditọete iren ẹkeme ndin̄wam nnam mme n̄kpọ en̄wen ke esop
Bible ọdọhọ yak irenowo emi ẹdude ke otu ikọt Jehovah ẹnam se ẹkekeme man ẹn̄wam esop. Okpoyom ndidiọn̄ọ nte ekemede nditiene n̄n̄wam esop, se VIDIO emi. Ekem ẹbọrọ mbụme oro etienede ẹnyụn̄ ẹneme ẹban̄a enye.
Ke vidio oro, nso ke Ryan akanam man enen̄ede an̄wam esop?
Bible etịn̄ se irenowo ke otu ikọt Jehovah ẹkpenamde man ẹdot ndidi mme asan̄autom unamutom ye mbiowo. Kot 1 Timothy 3:1-13, ekem ẹbọrọ mbụme emi ẹnyụn̄ ẹneme ẹban̄a mmọ:
Nso ke irenowo ke otu ikọt Jehovah ẹkpenam man mmọ ẹdi mme asan̄autom unamutom ye mbiowo?
Nso ke ubon mmọ ẹkpenam?—Se ufan̄ikọ 4 ye 11.
Irenowo emi ẹdude ke otu ikọt Jehovah ẹkpeda ofụri esịt mmọ ẹnam se ẹbatde emi, nso ufọn ke mme owo ke esop ẹdidia?
NDUSỤK OWO ẸKEME NDIBỤP: “Mme Ntiense Jehovah ẹsida okụk ke m̀mọ̀n̄ ẹnam utom mmọ?”
Nso ke ọkpọbọrọ utọ owo oro?
SE IKPEPDE
Jehovah enen̄ede ama ida ini, odudu, ye inyene nnyịn in̄wam ke esop esie.
Se M̀mê Emeti
Didie ke ikpada ini ye odudu nnyịn in̄wam esop emi idude?
Didie ke ikeme ndida inyene nnyịn n̄n̄wam esop emi idude?
Nso ke akpama ndinam man an̄wam esop emi odude?
KPEP N̄KPỌ EN̄WEN
Se ntak emi Abasi mîyomke ikọt esie ẹkpe tithe aba.
Bible etịn̄ utom emi nditọete irenowo oro ẹnade baptism ẹkpenamde. Edi nso edieke oyomde eyenete an̄wan emi ama akana baptism anam utom oro?
“Odudu Emi Jehovah Ọnọde Mbiowo“ (Enyọn̄-Ukpeme, February 2021)
Se ndusụk irenowo emi ẹkesinamde se ẹkekeme man ẹmen n̄wed ikọ Abasi ẹsọk ikọt Jehovah nte mmọ.
Kot man okụt ke nte isisan̄ade inyene okụk ida inam utom Abasi okpụhọde ye nte mbon en̄wen ẹsinamde.