Ẹn̄wọn̄ọ Ndinọ Ererimbot Udia Oro Ekemde ke Ewe Usụn̄?

“EKEME ndidi mfọnn̄kan ukeme nnyịn idikemeke ndinam udia ofụri ererimbot oro nnyịn itịmde ifiọk ke isua ikie emi akaiso odu,” ntre ke Lester Brown, etieibuot Worldwatch Institute ke Washington, D.C. ọdọhọ. Nte magazine New Scientist ọdọhọde, ke ntọn̄ọ ntọn̄ọ 1995, udomo ibokpot ofụri ererimbot ama osụhọde akan nte akanam edide ke tọn 255—ekemde se ẹnọde ererimbot ke usen 48 kpọt. Ke mme isua ẹmi ẹkebede emi ibokpot oro ẹkenịmde nte nsụhọ okosụhọrede akan udomo oro ẹkpedade ẹbọk ererimbot ke usen 60, udomo ibokpot ama afiak ọdọk. Edi idahaemi Worldwatch itịmke ifiọk ukeme oro isọn̄ enyenede ndifiak n̄n̄wụm mbun̄wụm.

Ke isua ita oro idọk mîkọfọnke ẹma ẹkebe ndien mme idụt oro ẹtọn̄ọde-tọn̄ọ uforo ẹkamade ibokpot ndida mbọk ufene, ibokpot iwakke aba ikem inọ mme ubuene ẹmi ẹyomde enye nte akpan udia mmọ. New Scientist odụri owo utọn̄ ete ke edieke owo mîsọpke inam n̄kpọ iban̄a idaha oro odude, owo biliọn kiet ẹmi ẹdade mbahade 70 eke ikie ke otu okụk mmọ ẹdep udia ẹkeme nditọn̄ọ nditie biọn̄.

Bible ama ebemiso etịn̄ ete ke mme andidụn̄ isọn̄ ke ini nnyịn ẹyekụt “akan̄.” (Luke 21:11) Edi Abasi inanake udọn̄ iban̄a mfịna oro. Ke akpanikọ, ẹyekụt udọn̄ oro enye enyenede aban̄a nnanenyịn owo ke akpatre ke ini Obio Ubọn̄ esie edisede aban̄a mme mbubehe isọn̄. Ke ini oro “isọn̄ [oyo]n̄wụm mbun̄wụm esie.” “Uwak ibokpot ẹyedu ke isọn̄ ke nsom ikpọ obot.” (Psalm 67:6; 72:16) Adan̄aoro mme ikọ prọfesi ẹmi ẹban̄ade Andibot mi ẹyesu: “Afo emedi edise isọn̄, onyụn̄ ebịt enye etieti . . . ibokpot onyụn̄ esịne [ke] mme itịghede.”—Psalm 65:9, 13.

Nte utịbe utịbe un̄wọn̄ọ oro enem fi? Nte afo akpama ndifiọk usụn̄ nte ekemede ndidi ubak esie? Do dọhọ Mme Ntiense Jehovah ẹtịn̄ n̄kpọ efen efen ẹnọ fi ẹban̄a Paradise oro ẹn̄wọn̄ọde mi ini efen oro mmọ ẹwahade ke enyịnusụn̄ fo. Edieke afo edimade owo edi ufọk fo edinịm ukpepn̄kpọ Bible mfọn ye afo, mbọk wet n̄wed nọ ẹsọk Watch Tower, P.M.B. 1090, Benin City, Edo State, Nigeria, mîdịghe nọ ẹsọk nnennen adres oro odude ke page 2.

[Ebiet Ẹdade Ndise Ẹto ke page 32]

Esịne-esịt: Pictorial Archive (Near Eastern History) Est.