Edinyan̄a Nsịn ke Edinen Obufa Ererimbot
“Ediwak emem ẹyenyụn̄ ẹnem mmọ esịt.”—PSALM 37:11.
1, 2. (a) Didie ke edinyan̄a oro Jehovah edinọde ke ini nnyịn edikpụhọde ye mme edinyan̄a ke eset? (b) Jehovah edida ikọt esie edisịn ke nso utọ ererimbot?
JEHOVAH edi Abasi edinyan̄a. Ke eset, enye ama anyan̄a ikọt esie ke ediwak idaha. Mme edinyan̄a oro ẹkedi ke ibio ini, koro Jehovah ikebiereke ikpe inọ ofụri ererimbot Satan ke nsinsi ke ekededi ke otu mme idaha oro. Edi ke eyo nnyịn, Jehovah ọyọsọp ọnọ kpukpru mme asan̄autom esie n̄kponn̄kan edinyan̄a. Isan̄ enyeemi enye oyosobo kpukpru idiọn̄ọ editịm n̄kpọ Satan efep ke ofụri isọn̄, ndien enye ayada mme asan̄autom esie edisịn ke edinen obufa ererimbot oro edidude ke nsinsi.—2 Peter 2:9; 3:10-13.
2 Jehovah ọn̄wọn̄ọ ete: “Osụk esisịt idiọkowo ididụhe . . . Edi mbon nsụkidem ẹyeda isọn̄ ẹnyene; ediwak emem ẹyenyụn̄ ẹnem mmọ esịt.” (Psalm 37:10, 11) Edibịghi adan̄a didie? “Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.” (Psalm 37:29; Matthew 5:5) Nte ededi, mbemiso oro etịbe, ererimbot emi oyokụt n̄kponn̄kan ini afanikọn̄ oro akanam odude.
“Akwa Ukụt”
3. Didie ke Jesus eketịn̄ aban̄a “akwa ukụt”?
3 Ke 1914 ererimbot emi ama odụk mme “ukperedem ini” esie. (2 Timothy 3:1-5, 13) Nnyịn idahaemi idu ke ọyọhọ isua 83 toto nte ini oro ọkọtọn̄ọ imonyụn̄ ikpere utịt esie emi, nte Jesus ekebemde iso etịn̄, se itienede mi editịbede: “Akwa ukụt oyodu, orụk eke akanam mîdụhe toto ke editọn̄ọ ererimbot tutu esịm emi, eke mîdinyụn̄ idụhe aba.” (Matthew 24:21) Ih, idem ọdiọkde akan Ekọn̄ Ererimbot II, emi akadade n̄kpọ nte uwem owo miliọn 50. Nso ini oro edinyen̄ede ererimbot ekpere ntem usọp usọp!
4. Ntak emi ubiereikpe Abasi esịmde “Akwa Babylon”?
4 “Akwa ukụt” edidi ke ata mbuari, “ke hour kiet.” (Ediyarade 18:10) Edi ikpe oro Abasi edibierede ọnọ kpukpru nsunsu ido ukpono, emi Ikọ Abasi okotde “Akwa Babylon,” edinịm ntọn̄ọ esie idiọn̄ọ. (Ediyarade 17:1-6, 15) N̄wọrọnda ikpehe Babylon eset ekedi nsunsu ido ukpono. Babylon eyomfịn etie nte mbiet esie eke eset onyụn̄ ada aban̄a ukara ererimbot eke nsunsu ido ukpono. Enye edi akpara ebe ke ndidụk ediomi ye mbon ukaraidem. Enye ọmọnọ ekọn̄ mmọ ibetedem onyụn̄ ọdiọn̄ udịmekọn̄ oro ẹn̄wanade ye kiet eken, osụn̄ọde ke mme owo eke ukem ido ukpono ndiwot kiet eken. (Matthew 26:51, 52; 1 John 4:20, 21) Enye anam nte ikwe ndiọi edinam ikọt esie onyụn̄ ọkọbọ mme ata Christian.—Ediyarade 18:5, 24.
5. Didie ke “akwa ukụt” ọtọn̄ọ?
5 “Akwa ukụt” ọtọn̄ọ ke ini mbon ukaraidem ke mbuari ẹwọn̄ọrede ẹn̄wana ye “Akwa Babylon.” Mmọ “ẹyesua akpara oro, ẹnyụn̄ ẹbiat enye, ẹnyụn̄ ẹnịm enye iferi, ẹnyụn̄ ẹta enye ikpọkidem, ẹnyụn̄ ẹfọp enye ke ikan̄ ẹwot.” (Ediyarade 17:16) Ke oro ebede, n̄kani ufan esie ‘ẹyetuan̄a ẹnyụn̄ ẹseme ẹban̄a enye.’ (Ediyarade 18:9-19) Edi mme asan̄autom Jehovah ẹma ẹdori enyịn ẹban̄a emi ke anyanini, ndien mmọ ẹyefiori ẹte: “Hallelujah; . . . koro mme ikpe Esie ẹdi ata akpanikọ ẹnyụn̄ ẹnen; koro Enye ama ebiere ikpe akwa akpara, emi akadade use esie abiat isọn̄, Enye onyụn̄ ada usiene iyịp ikọt Esie odori enye ke ibuot.”—Ediyarade 19:1, 2.
Ẹda En̄wan Ẹbịne Mme Asan̄autom Abasi
6, 7. Ntak emi ikọt Jehovah ẹkemede ndinyene mbuọtidem ke ini ẹn̄wanade ye mmọ ke ini “akwa ukụt”?
6 Ke ama okosobo nsunsu ido ukpono, mbon ukaraidem ẹwọn̄ọde ẹse mme asan̄autom Jehovah. Satan, kpa “Gog, isọn̄ Magog” ke prọfesi, ọdọhọ ete: “Nyọdọk ke isọn̄ obio in̄wan̄; nyesịm mmọ eke ẹtiede ke ifụre, ẹmi ẹdụn̄de ke ndueidem.” Ke ekerede ete ke mmọ ẹdi mmemmem n̄kpọ udia, enye ayanam ‘ediwak otuowo ẹmi ẹbietde obubịt enyọn̄ ofụk isọn̄’ ẹda en̄wan ẹbịne mmọ. (Ezekiel 38:2, 10-16) Ikọt Jehovah ẹfiọk ẹte ke en̄wan emi oyokpu sia mmọ ẹbuọtde idem ke Jehovah.
7 Ke ini Pharaoh ye udịmekọn̄ esie ẹkekerede ke imokụk mme asan̄autom Abasi isịn ke Ididuot Inyan̄, Jehovah ke utịbe utịbe usụn̄ ama anyan̄a ikọt esie onyụn̄ osobo udịmekọn̄ Egypt. (Exodus 14:26-28) Ke ini “akwa ukụt,” emi mme idụt ẹdikerede ke imokụk ikọt Jehovah isịn, enye ke utịbe utịbe usụn̄ ayafiak edi ndinọ ubọhọ: “Ke usen oro . . . ifụtesịt oyodụk mi ke ibuo. Nyonyụn̄ nda ufụp mi, nda ikan̄ ifụtesịt mi ndọhọ.” (Ezekiel 38:18, 19) Ata-utịt “akwa ukụt” eyekpere adan̄aoro!
8. Mme n̄kpọntịbe ewe ẹmi ẹkande odudu owo ẹdida itie mbemiso Jehovah osobode mme idiọkowo, ndien ye nso utịp?
8 Ke ndusụk ini ke “akwa ukụt” ama ọkọtọn̄ọ, edi mbemiso Jehovah ebierede ikpe ọnọ ikpehe ererimbot eken, mme n̄kpọntịbe ẹmi ẹkande odudu owo ẹyetịbe. Tịm fiọk utịp oro mmọ ẹdinyenede. “Adan̄aoro ke idiọn̄ọ Eyen Owo [Christ] oyowụt idem ke enyọn̄: adan̄aoro ke kpukpru mme idụt isọn̄ ẹyenyụn̄ ẹfụhọ, mmọ ẹyenyụn̄ ẹkụt Eyen Owo odorode ke obubịt enyọn̄ edi ye odudu ye akwa ubọn̄.” (Matthew 24:29, 30) “Mme idiọn̄ọ ẹyedu ke utịn ye ọfiọn̄ ye ntantaọfiọn̄; . . . idem eyeyemede owo oto ke ndịk ye edikama enyịn nse mme n̄kpọ eke ẹdiwọrọde ẹnọ ekondo.”—Luke 21:25, 26.
“Edifak Mbufo ke Asan̄a Ekpere”
9. Ntak emi mme asan̄autom Jehovah ẹkemede ‘ndimenede ibuot mmọ ke enyọn̄’ ke ini mme n̄kpọntịbe ẹmi ẹkande odudu owo ẹtịbede?
9 Ke ini oro, prọfesi eke Luke 21:28 enyene n̄kpọ ndinam. Jesus ọkọdọhọ ete: “Ke ini mme n̄kpọ ẹmi ẹtọn̄ọde ndiwọrọ, ẹmenede enyịn ke enyọn̄, ẹnyụn̄ ẹmenede ibuot mbufo ke enyọn̄, koro edifak mbufo ke asan̄a ekpere.” Mme asua Abasi ẹyenyek idem ke ndịk koro mmọ ẹyefiọk ẹte ke mme n̄kpọntịbe oro ẹkande odudu owo ẹmi ẹdade itie ẹto Jehovah. Edi mme asan̄autom Jehovah ẹyekop idatesịt koro mmọ ẹyefiọk ẹte ke edinyan̄a mmimọ ke asan̄a ekpere.
10. Didie ke Ikọ Abasi etịn̄ aban̄a ata-utịt “akwa ukụt”?
10 Adan̄aoro Jehovah ọyọtọ editịm n̄kpọ Satan emi ita n̄kpa: “Nyada idiọk udọn̄ọ ye iyịp n̄kpe ikpe ye [Gog]; nnyụn̄ nnam akwa edịm, ye edịm itiat, ye ikan̄, ye brimstone, ẹdep enye ke idem, ye ke idem mme udịm esie . . . Ndien mmọ ẹyefiọk ẹte ke ami ndi Jehovah.” (Ezekiel 38:22, 23) Ẹsobo kpukpru ikpehe editịm n̄kpọ Satan emi. Ẹsọhi ofụri n̄ka owo eke mbon oro mîten̄eke Abasi ẹfep. Oro edi Armageddon ata-utịt “akwa ukụt.”—Jeremiah 25:31-33; 2 Thessalonica 1:6-8; Ediyarade 16:14, 16; 19:11-21.
11. Ntak emi ẹdinyan̄ade mme asan̄autom Jehovah ẹbe “akwa ukụt”?
11 Ẹyenyan̄a ediwak miliọn mme andituak ibuot nnọ Jehovah ke ofụri isọn̄ ebe “akwa ukụt.” Mmọemi ẹdinam “akwa otuowo” ẹmi ẹtode ke “kpukpru obio ye esien ye idụt ye usem.” Ntak ẹnyan̄ade mmọ ke utọ enyene-uten̄e usụn̄ oro? Koro mmọ “ẹnam n̄kpọ ẹnọ [Jehovah] uwemeyo ye okoneyo.” Ntre mmọ ẹbọhọ utịt ererimbot emi ẹnyụn̄ ẹda mmọ ẹdụk edinen obufa ererimbot. (Ediyarade 7:9-15) Ntem, mmọ ẹkụt nte un̄wọn̄ọ Jehovah emi osude: “Dori enyịn ke Jehovah nyụn̄ san̄a ke usụn̄ esie, ndien enye eyemenede fi enịm ke enyọn̄ man ada isọn̄ enyene. Ke ini ẹsobode mme idiọkowo, afo oyokụt.”—Psalm 37:34, NW.
Obufa Ererimbot
12. Mme andibọhọ Armageddon ẹkeme ndidori enyịn ke nso?
12 Nso ini nduaidem ke emi edidi ntem—ẹsio idiọkido ẹfep ndien ata ubọn̄ ubọn̄ ini ke ofụri mbụk owo ọtọn̄ọ! (Ediyarade 20:1-4) Mme andibọhọ Armageddon ẹdiwụt esịtekọm didie ntem ẹnọ Jehovah ke ndidụk nyayama, edisana idaha oro Abasi anamde, kpa obufa ererimbot, ke isọn̄ oro ẹdinamde akabade edi paradise! (Luke 23:43) Ndien mmọ idikpaha tutu amama! (John 11:26) Ke akpanikọ, ọtọn̄ọde ke ini oro ka iso, mmọ ẹyenyene ndyọ ndyọ, utịbe utịbe idotenyịn ndidu uwem adan̄a nte Jehovah odude!
13. Didie ke Jesus afiak ọtọn̄ọ utom ukọkudọn̄ọ oro enye ọkọtọn̄ọde ke isọn̄?
13 Jesus, emi Jehovah ekemekde nte Edidem eke heaven, eyese aban̄a mme utịbe utịbe edidiọn̄ oro mbon ẹmi ẹnyan̄ade ẹdinyenede. Ke ini okodude ke isọn̄, enye ama atat nnan enyịn onyụn̄ esịrede utọn̄ mbon inan onyụn̄ ọkọk “kpukpru orụk udọn̄ọ ye kpukpru orụk mmemidem.” (Matthew 9:35; 15:30, 31) Ke obufa ererimbot, enye ayafiak ọtọn̄ọ akamba utom ukọkudọn̄ọ oro edi ke udomo ofụri ererimbot. Nte Isụn̄utom Abasi, enye oyosu un̄wọn̄ọ emi: “[Abasi] ọyọkwọhọde kpukpru mmọn̄eyet ke enyịn mmọ ẹfep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebeiso n̄kpọ ẹma ẹbe ẹfep.” (Ediyarade 21:4) Owo idiyomke aba mbiaibọk usọbọ m̀mê mme anam ndutịm ubụk owo!—Isaiah 25:8; 33:24.
14. Nso edinyan̄a ke mme asan̄autom Jehovah oro ẹma ẹkekpan̄a ẹdinyene?
14 N̄ko mbon efen oro ẹdinyan̄ade ẹdidi mme anam-akpanikọ asan̄autom Abasi ẹmi ẹkekpan̄ade ke eset. Ke obufa ererimbot, ẹyenyan̄a mmọ ẹsio ke n̄kpọkọbi udi. Jehovah ọnọ ubiọn̄ ete: “Nti owo ye mme idiọkowo ẹyeset ke n̄kpa.” (Utom 24:15) Eyedi “nti owo” ẹyebak ẹset ẹnyụn̄ ẹtịp n̄kpọ ẹsịn ke nditat Paradise. Edidi inem n̄kpọ didie ntem ọnọ mme andibọhọ Armageddon ndikop mme ifiọkutom mme anam-akpanikọ mbon oro ẹkekpan̄ade ke anyanini ẹmi ẹkebede, ẹmi ẹfiakde ẹdidu uwem idahaemi!—John 5:28, 29.
15. Tịn̄ ndusụk idaha oro ẹdidude ke obufa ererimbot.
15 Kpukpru mbon oro ẹdude uwem adan̄aoro ẹyekụt nte se andiwet psalm eketịn̄de aban̄a Jehovah edide akpanikọ: “Afo atat ubọk fo, onyụn̄ ọnọ kpukpru mme andidu uwem se mmọ ẹmade, ẹyụhọ.” (Psalm 145:16) Biọn̄ idụhe aba: Ẹyefiak ẹnam isọn̄ ọfọn onyụn̄ osion̄o mbun̄wụm uwak uwak. (Psalm 72:16) Mbon oro mînyeneke ufọkidụn̄ idụhe aba: “Mmọ ẹyebọp ufọk ẹnyụn̄ ẹdụn̄ ke esịt,” ndien kpukpru mmọ “ẹyetie ke idak vine mmọ ye ke idak fig mmọ; ndien baba owo kiet eke edinamde mmọ ndịk ididụhe.” (Isaiah 65:21, 22; Micah 4:4) Ndịk idụhe aba: Ekọn̄, afai, m̀mê ubiatibet ididụhe aba. (Psalm 46:8, 9; Mme N̄ke 2:22) “Ofụri ekondo ke ana sụn̄, ọduọk odudu; mmọ ẹsio n̄kpo idara.”—Isaiah 14:7.
16. Ntak emi edinen ido ediyọhọde obufa ererimbot?
16 Ke obufa ererimbot, ẹyesio ndutịm usuanetop Satan ẹfep. Utu ke oro ndidu, “mme andidụn̄ ererimbot [ẹyekpep] se inende.” (Isaiah 26:9; 54:13) Ye eti item eke spirit kpukpru isua, “ifiọk Jehovah ọyọyọhọ ke ererimbot, kpa nte mmọn̄ ofụkde inyan̄.” (Isaiah 11:9) Mme ekikere ye mme edinam oro ẹbọpde-bọp ẹyekara ofụri ubonowo. (Philippi 4:8) Kere, n̄kaowo ke ofụri ererimbot oro ẹbọhọde ubiatibet, n̄kohodeidem, ufụp—otu nditọete ofụri ererimbot emi kpukpru owo ẹsion̄ode mbun̄wụm spirit Abasi. Ke akpanikọ, idem idahaemi akwa otuowo ke ẹsion̄o mme utọ edu oro.—Galatia 5:22, 23.
Ntak Ebịghide Ntre?
17. Ntak emi Jehovah ebetde ebịghi ntre mbemiso adade utịt ọsọk idiọkido?
17 Nte ededi, ntak emi Jehovah ebetde ebịghi ntre ndisio idiọkido mfep nnyụn̄ nnyan̄a ikọt esie nsịn ke obufa ererimbot? Kere se anade nte ẹnam. Se idide akpan n̄kpọ ikan edi ediwụt unen itie edikara Jehovah, unen esie ndikara. Ebede ke ndinọ ini oro ọniọn̄de ekem, enye owụt ke usụn̄ oro owo mîkemeke ndineni nte ke ukara owo ke ọwọrọde ọkpọn̄ ukara esie edi akwa edikpu. (Jeremiah 10:23) Ntre idahaemi Jehovah enen̄ede enen ke ndida ukara Obio Ubọn̄ esie eke heaven ke idak Christ n̄kpụhọ ukara owo.—Daniel 2:44; Matthew 6:9, 10.
18. Ini ewe ke mme andito ubon Abraham ẹkeda isọn̄ Canaan ẹnyene?
18 Se idade itie ke ofụri isua ikie ẹmi edi ukem ye se iketịbede ke ini Abraham. Jehovah ama ọdọhọ Abraham ete ke mme andito ubon esie ẹyeda isọn̄ Canaan ẹnyene—edi mmọ ẹkenyene ndibet ke isua ikie inan̄ “koro mme idiọkn̄kpọ mme Amorite [ikakam] iyọhọke kan̄a.” (Genesis 12:1-5; 15:13-16) Mi eyedi ikọ oro “mme Amorite” (ekpụk oro akawakde akan) ada aban̄a mbon Canaan ke ofụri ofụri. Ntre n̄kpọ nte isua ikie inan̄ ẹma ẹbe mbemiso Jehovah akayakde ikọt esie ẹda Canaan ẹnyene. Kan̄a kemi Jehovah ama ayak mme idụt oro ke Canaan ndinyene n̄kaowo mmọ. Ye nso utịp?
19, 20. Nso orụk n̄kaowo ke mbon Canaan ẹkenyene?
19 Bible Handbook, eke Henry H. Halley, ọdọhọ ete ke Megiddo, mme ọdọkisọn̄ nyom n̄kpọeset ẹma ẹkụt mme n̄wụre temple Ashtoreth, abasi-an̄wan edide n̄wan Baal. Enye ewet ete: “Itie ubụkowo ama odu ikpat ifan̄ ọkpọn̄ temple emi, ke ebiet emi ẹkekụtde ediwak aban̄, ẹsịnede utak-usụhọ mbak idem nseknditọ ẹmi ẹkewade ke temple emi . . . Mme prọfet Baal ye Ashtoreth ẹkedi mbon oro ẹnọde unen ndiwot n̄kpri nditọwọn̄.” “Edinam itekesịt efen ekedi [se] mmọ ẹkesikotde ‘mme uwa itiat idakisọn̄.’ Ke ini ẹyomde ndibọp ufọk, ẹyewa eyenọwọn̄, ẹnyụn̄ ẹbụk okpo esie ke ibibene.”
20 Halley etịn̄ ete: “Utuakibuot nnọ Baal, Ashtoreth, ye mme abasi Canaan eken ama esịne ikpọ idat idat usọrọ; mme temple mmọ ẹkedi iwụk ebiet ndiọi edinam. . . . Mbon Canaan ẹkesituak ibuot, ẹbe ke ndisịn idem ke oburobụt ido, . . . ndien ekem, ẹbe ke ndiwot akpa nditọ mmọ, nte uwa ẹnọde kpasụk mme abasi oro. Etie nte, ke akamba udomo, isọn̄ Canaan ama akabade etie nte Sodom ye Gomorrah ke udomo eke ofuri idụt. . . . Nte ntatenyịn eke utọ mbubiam mbubiam ye obom obom ido ntre ama enyene unen ekededi ndika iso ndu? . . . Mme ọdọkisọn̄ nyom n̄kpọeset ẹmi ẹkedọkde n̄wụre ke mme obio Canaan ẹyeyịk ntak emi Abasi mîkọsọpke isobo mmọ nte Enye okosobode.”—Men 1 Ndidem 21:25, 26 domo.
21. Nso mbiet idu ke idaha oro mbon Canaan ẹkedude ye eke eyo nnyịn?
21 Idiọkido mme Amorite ama ‘ọyọhọ.’ Ntre Jehovah kemi ama okụt nte ke enen ndisobo mmọ. Ntre ke edi mfịn. Ererimbot emi ọyọhọ ye afai, oburobụt ido, ye ediwụt unana ukpono nnọ ibet Abasi. Ndien sia nnyịn nte enende ikopde itekesịt iban̄a mme enyene-ndịk ediwa nditọwọn̄ emi ke Canaan, nso kaban̄a ediwa ediwak ata miliọn n̄kparawa owo ke mme ekọn̄ ererimbot emi, ọdiọkde akan n̄kpọ ekededi oro ẹkenamde ke Canaan? Ke akpanikọ, Jehovah kemi etịm okụt nte enende ndida idiọk editịm n̄kpọ emi nsịm utịt.
Ndinam N̄kpọ En̄wen
22. Nso ke ime oro Jehovah emede anam ke eyo nnyịn?
22 Ime oro Jehovah emede ke ukperedem ini ẹmi ke anam n̄kpọ en̄wen. Enye ke ayak ini odu man ẹtan̄ akwa otuowo, ẹmi kemi ẹwakde ẹbe miliọn ition, ẹbok, ẹnyụn̄ ẹnọ ukpep. Ke idak ndausụn̄ Jehovah, ẹtịm mmọ ẹdọn̄ ke esop oro akade iso iso. Ke ẹnọ iren, iban, ye mme uyen ukpep ndikpep mbon en̄wen akpanikọ Bible. Ebede ke mme mbonoesop ye mme n̄wed Bible mmọ, mmọ ẹkpep mme ima ima usụn̄ Abasi. (John 13:34, 35; Colossae 3:14; Mme Hebrew 10:24, 25) Ke adianade do, mmọ ke ẹbọ ukpep ubọpn̄kpọ, udiọn̄ mme ukwakutom ilektrọnik, umịn̄n̄wed, ye ke mme utom efen man ẹn̄wam ke utom edikwọrọ “gospel.” (Matthew 24:14) Etie nte ẹyeda mme utọ usọ unọ ukpep ye eke ubọpn̄kpọ oro ẹnam n̄kpọ ntatara ntatara ke obufa ererimbot.
23. Ntak edide ifet ndidu uwem ke ini emi?
23 Ih, mfịn Jehovah ke etịm mme asan̄autom esie idem ndibe “akwa ukụt” ndụk edinen obufa ererimbot. Do Satan ye idiọk ererimbot esie ididụhe aba ndin̄wana mbiọn̄ọ, udọn̄ọ, eseme, ye n̄kpa ididụhe aba. Ye akwa ifiopesịt ye idara, ikọt Abasi ẹyetọn̄ọ utom edibọp paradise ye inemesịt, ke ebiet emi ‘ata inemesịt’ edidude kpukpru usen. Nnyịn inyene ifet didie ntem ndidu uwem ke ata-utịt ini emi, ndifiọk nnyụn̄ nnam n̄kpọ Jehovah, ndinyụn̄ mfiọk nte ke ibịghike nnyịn ‘iyemenede ibuot nnyịn ke enyọn̄ koro edifak nnyịn ke asan̄a ekpere’!—Luke 21:28; Psalm 146:5.
Mme Mbụme Ndụn̄ọde
◻ Nso idi “akwa ukụt,” ndien didie ke enye ọtọn̄ọ?
◻ Ntak emi en̄wan oro Gog edidade ebịne mme asan̄autom Jehovah edikpude?
◻ Didie ke “akwa ukụt” etre?
◻ Nso utịbe utịbe ufọn ke obufa ererimbot edinọ?
◻ Ntak emi Jehovah ebetde ebịghi ntre mbemiso adade utịt ọsọk editịm n̄kpọ emi?
[Ndise ke page 16]
Ẹyenam ofụri isọn̄ akabade paradise