Ẹdu ke Edidemede ke “Utịt Ini”
“Mbufo ẹtịn̄ enyịn ẹse, ẹkpeme, ẹnyụn̄ ẹbọn̄ akam; koro mbufo mîfiọkke edikem ini.”—MARK 13:33.
1. Didie ke nnyịn ikpanam n̄kpọ nte mme aduai-owo idem n̄kpọntịbe ẹsude ke “utịt ini” emi?
NTE mme aduai-owo idem n̄kpọntịbe ẹyararede ke “utịt ini” emi, didie ke mme Christian ẹkpenam n̄kpọ? (Daniel 12:4) Owo ikpọn̄ke mmọ ke eyịghe. Jesus Christ ama etịn̄ prọfesi emi esịnede ntan̄ndian idiọn̄ọ oro akade iso ndisu ke isua ikie-20 emi. Enye ama ebemiso etịn̄ aban̄a ekese n̄kpọ oro ẹnịmde ini emi idiọn̄ọ toto ke 1914 nte anana mbiet. Ke otịmde emehe ye prọfesi Daniel oro aban̄ade “utịt ini,” Jesus ama adian prọfesi esie do ke ndikpak mme mbet esie ete “ẹtaba idap [“ẹdu ke edidemede,” NW].”—Luke 21:36.
2. Ntak emi akwa ufọn odude ndidu ke edidemede ke n̄kan̄ eke spirit?
2 Ntak anade ẹdu ke edidemede-e? Koro ini emi edi ndiọkn̄kan ini ke mbụk owo. Koro Christian ndiyak idem nnọ idap eke spirit ke ini emi ekpedi n̄kpọ nsobo. Edieke nnyịn ikabarede ikop uyụhọ m̀mê iyakde ekikere uwem emi anam esịt nnyịn odobi, nnyịn ididu ke itiendịk. Ke Luke 21:34, 35, Jesus Christ ama odụri nnyịn utọn̄ ete: “Ẹkpeme idem mbufo, mbak uyụhọ udia ye mmịn ye ekikere uwem emi edinam esịt mbufo odobi, ndien usen oro edibuat mbufo nte ekpọ; koro usen oro eyesịm kpukpru mmọemi ẹdụn̄de ke iso isọn̄.”
3, 4. (a) Nso ke ikọ Jesus ọkọwọrọ ke ndidọhọ ke usen iyatesịt Abasi edibabuat mme owo “nte ekpọ”? (b) Sia mîdịghe Abasi onịm ekpọ oro, ntak emi usen oro edimende owo ye unana idotenyịn ke ofụri ofụri?
3 Ekedi ye eti ntak ke Jesus ọkọdọhọ ete ke usen Jehovah ‘edibuat nte ekpọ.’ Ẹsiwak ndisịn ekpọ ke afia, ndien ẹsida enye ẹmụm mme inuen ye mme unam. Afia esinyene ube, ndien owo ekededi emi asan̄ade odụk enye eyetuak ube oro. Ekpọ oro ndien eyesịk akadiana, onyụn̄ omụm owo unọmọ oro. Kpukpru emi esitịbe ke mbuari. Kpasụk ntre, Jesus ọkọdọhọ ete ke mbon oro mîsọn̄ke idem ke n̄kan̄ eke spirit ẹdi se “usen iyatesịt” Abasi edimende ke mbuari ye unana idotenyịn.—Mme N̄ke 11:4.
4 Ndi Jehovah edi enyeemi onịmde ekpọ emi ọnọ mme owo? Baba, enye itiehe ibet ndimụm owo ndomokiet ke iduenyịn man osobo mmọ. Edi usen oro edibuat mme owo ke ofụri ofụri koro mmọ mînọhọ Obio Ubọn̄ Abasi akpan ntịn̄enyịn. Mmọ ẹbịne se ibehede mmọ ke uwem, ẹfụmide se mme n̄kpọntịbe oro ẹkande mmọ ẹkụk ẹwọrọde. Emi, nte ededi, ikpụhọkede ndutịm Abasi. Enye enyene mmeknnịm ini esie kaban̄a edinam ibat. Ndien, ke mbọm, enye ikpọn̄ke ubonowo ye unana ifiọk kaban̄a ubiereikpe esie emi edide.—Mark 13:10.
5, 6. (a) Ke ntak ubiereikpe oro edide, nso ima ima ndutịm ke Andibot anam ọnọ mme edibotn̄kpọ ẹdide owo, edi ye nso utịp enyenede kpukpru owo? (b) Nso ke ẹdineme ẹban̄a man an̄wam nnyịn idu ke edidemede?
5 Mbemiso ntọt emi edi ima ima ndutịm ke n̄kan̄ akwa Andibot, emi enyenede udọn̄ ke mfọnọn̄kpọ edibotn̄kpọ esie ẹdide owo mi ke ndamban̄a udori-ukot esie emi. (Isaiah 66:1) Enye ama mme andidụn̄ ebiet emi ẹdọhọde nte ukot esie odorode mi. Ntre ebede ke mme isụn̄utom ye udiana isụn̄utom esie eke isọn̄, enye ọnọ mmọ ntọt aban̄a mme n̄kpọntịbe ẹmi ẹdude mmọ ke iso. (2 Corinth 5:20) Edi, kpa ye kpukpru ntọt ẹmi ẹnọde, mme n̄kpọntịbe oro ẹyedisịm ekpụk ubonowo ye unana idotenyịn nte n̄kpọ eke mmọ ẹdụkde ekpọ. Ntak-a? Koro ata ediwak owo ke ẹde ke n̄kan̄ eke spirit. (1 Thessalonica 5:6) Edi sụk ekpri ibat owo ẹnam item oro ẹdinyụn̄ ẹbọhọ ẹdụk obufa ererimbot Abasi.—Matthew 7:13, 14.
6 Didie, ndien, ke nnyịn ikeme ndidu ke edidemede ke utịt ini emi man ẹkpebat nnyịn ẹsịn ke otu mbon oro ẹdinyan̄ade? Jehovah ọmọnọ un̄wam oro ẹyomde. Ẹyak nnyịn ikere iban̄a n̄kpọ itiaba oro nnyịn ikemede ndinam.
N̄wana ye N̄kpọ Oro Etịmerede Owo Ekikere
7. Nso ntọt aban̄ade n̄kpọ emi etịmerede owo ekikere ke Jesus ọkọnọ?
7 Akpa, ana nnyịn in̄wana ye n̄kpọ oro etịmerede owo ekikere. Ke Matthew 24:42, 44, Jesus ọkọdọhọ ete: “Ẹkpeme ndien: koro mbufo mîfiọkke usen eke Ọbọn̄ mbufo edide. Mmọdo mbufo nde ẹben̄e idem; koro ke ini eke mbufo mîdorike enyịn, Eyen Owo eyedi.” Usem oro Jesus akadade mi owụt nte ke ekese n̄kpọ ntịmede ekikere ẹyedu ke ndiọk eyo emi, ndien n̄kpọ oro etịmerede ekikere ekeme ndida n̄kọsụn̄ọ ke nsobo. Ke eyo Noah mme owo ẹma ẹsịn idem ke ediwak n̄kpọ. Nte utịp, mbon oro ekikere okotịmerede mi ‘ikọdọn̄ke enyịn’ ke se ikakade iso, ndien Ukwọ ama ọkpọri kpukpru mmọ efep. Nte ekemde, Jesus ama odụri owo utọn̄ ete: “Kpasụk ntre ke edidi Eyen Owo eyedi.”—Matthew 24:37-39.
8, 9. (a) Didie ke ikpîkpu edibịne mme n̄kpọ udu uwem ekeme nditịmede nnyịn ekikere ke enyene-ndịk usụn̄? (b) Nso ntọt ke Paul ye Jesus ẹkenọ?
8 Nyene ke ekikere, n̄ko, ete ke ntọt emi ke Luke 21:34, 35, Jesus ekeneme aban̄a mme ọsọ edinam eke uwem, utọ nte edidia udia, edin̄wọn̄ n̄kpọ, mme editịmede esịt mban̄a mme n̄kpọ udu uwem. Mme n̄kpọ ẹmi ẹdi ọsọ n̄kpọ ẹnọ kpukpru owo, esịnede mme mbet Ọbọn̄ Jesus. (Men Mark 6:31 domo.) Mme n̄kpọ ẹmi ẹkeme nditre ndinọ owo unan ke idemmọ, edi edieke ẹyakde, mmọ ẹkeme nditịmede nnyịn ekikere, ẹnam nnyịn inana ini, ndien ke ntre ẹnam nnyịn ide enyene-ndịk idap eke spirit.
9 Ke ntre, ẹyak nnyịn ikûfụmi n̄kpọ oro enyenede akakan ufọn—kpa edinyene unyịme Abasi. Utu ke ndisịn idem ntotụn̄ọ ntotụn̄ọ ke mme ọsọ n̄kpọ eke uwem, ẹyak nnyịn ida mmọ inam n̄kpọ n̄kukụre ke esisịt udomo oro ẹyomde man idu uwem. (Philippi 3:8) Mmọ ikpenyeneke ndibaba mme udọn̄ n̄kpọ Obio Ubọn̄ n̄wot. Nte N̄wed Mbon Rome 14:17 ọdọhọde, “[Obio] Ubọn̄ Abasi idịghe edidia n̄kpọ ye edin̄wọn̄ n̄kpọ, edi edi edinen ido ye emem ye idatesịt emi odude ke edisana spirit.” Ti mme ikọ Jesus ke ini enye ọkọdọhọde ete: “Ẹkam ẹbemiso ẹyom Obio Ubọn̄ Esie ye edinen ido Esie; ndien ẹyedian kpukpru n̄kpọ ẹmi ẹnọ mbufo.” (Matthew 6:33) N̄ko-n̄ko, ke Luke 9:62, Jesus ama etịn̄ ete: “Baba owo kiet emi akabarede ese edem, ke enye ama ekesịn ubọk ke ufụn̄isọn̄, ikemeke ndinam utom Ubọn̄ Abasi.”
10. Nso n̄kpọndịk odu edieke nnyịn mîwụkke enyịn nnennen ise utịtmbuba?
10 Ndondo oro nnyịn itọn̄ọde ufụn̄isọn̄, ke nditịn̄ ke ndamban̄a usụn̄, ana nnyịn isan̄a ke nnennen udịm. Ofụn̄isọn̄ emi esede edem idifụn̄ke ufan̄ ebono nte enende. N̄kpọ otịmede enye ekikere ndien enye ekeme ndifebede nduọ mmemmem mmemmem mîdịghe atuak ada ebe ke ndituak ndusụk n̄kpọ ubiọn̄ọ. Ẹyak nnyịn ikûtie nte n̄wan Lot, emi ekesede edem inyụn̄ ibọhọke. Oyom nnyịn iwụk enyịn nnyịn nnennen ise utịtmbuba ke iso. Man inam oro ana nnyịn in̄wana ye n̄kpọ oro etịmerede owo ekikere.—Genesis 19:17, 26; Luke 17:32.
Bọn̄ Akam ke Ofụri Esịt
11. Nso ke Jesus ọkọsọn̄ọ etịn̄ ke ama okodụri nnyịn utọn̄ aban̄a n̄kpọndịk oro odude ke n̄kpọ oro etịmerede owo ekikere?
11 Nte ededi, ekese n̄kpọ ẹdu oro nnyịn ikemede ndinam man idu ke edidemede. Ọyọhọ akpan usụn̄ iba edi: Bọn̄ akam ke ofụri esịt. Ke ama okodụri nnyịn utọn̄ aban̄a n̄kpọndịk oro odude ke owo ndidi se mme ọsọ n̄kpọ eke uwem emi ẹtịmerede, Jesus ama ọnọ item emi ete: “Edi mbufo ẹtaba idap kpukpru ini, ẹnyụn̄ ẹkpe ubọk, man mbufo ẹkpekeme ndibọhọ kpukpru n̄kpọ oro ẹdiwọrọde, nnyụn̄ nda ke iso Eyen Owo.”—Luke 21:36.
12. Nso orụk akam ke ẹyom, ndien ye nso utịp?
12 Ntem, ana nnyịn ibọn̄ akam kpukpru ini kaban̄a enyene-ndịk idaha nnyịn ye nte oyomde nnyịn idu ke edidemede. Ntre ẹyak nnyịn ke akam ika ibịne Abasi ye eben̄e ofụri esịt. Paul ọdọhọ ke N̄wed Mbon Rome 12:12 ete: “Ẹkọbọ ke edibọn̄ akam.” Ndien ke N̄wed Mbon Ephesus 6:18, nnyịn ikot ite: “Ẹda kpukpru akam ye n̄kpeubọk ẹbọn̄ akam ke spirit kpukpru ini, . . . ẹkpeme ndinam ntem.” Emi idịghe sụk edibọn̄ akam nte n̄kpọ eke enye edide mbabuat n̄kpọ oro mînyeneke akwa utịp. Ata uwem nnyịn odu ke itiendịk. Oyom nnyịn ke ntre ibọn̄ akam ke ofụri esịt iyom un̄wam Abasi. (Men Mme Hebrew 5:7 domo.) Ke usụn̄ oro nnyịn iyesọn̄ọ ida ke n̄kan̄ Jehovah. Idụhe n̄kpọ oro editịmde enyene ufọn ke ndin̄wam nnyịn inam emi akan nnyịn ‘ndibọn̄ akam kpukpru ini.’ Adan̄aoro Jehovah eyenam nnyịn itịn̄ enyịn idu ke ukpeme. Edi akpan n̄kpọ didie ntem, ndien, ndikọbọ ke akam!
Sọn̄ọ Yịre ye Esop Abasi ye Utom Esie
13. Nso utọ ebuana ke ẹyom man ẹdu ke edidemede?
13 Nnyịn iyom ndibọhọ kpukpru n̄kpọ ẹmi ẹdisịmde ererimbot. Nnyịn iyom ndida ke iso Eyen owo, inyenede unyịme esie. Ye emi ke ekikere, ọyọhọ n̄kpọ ita odu emi nnyịn ikemede ndinam: Sọn̄ọ yịre ketket ye esop ukara Jehovah. Oyom nnyịn ibuana ọyọhọ ọyọhọ ye esop oro inyụn̄ ibuana ke mme edinam esie. Ke usụn̄ emi nnyịn iyewụt idem nnyịn ata in̄wan̄în̄wan̄ nte mme Christian ẹmi ẹdude ke ukpeme.
14, 15. (a) Ndisịn idem ke ewe utom edin̄wam nnyịn idu ke edidemede? (b) Anie ebiere ini emi utom ukwọrọikọ editrede, ndien didie ke nnyịn ikpekere iban̄a enye? (c) Ke akwa ukụt ebede, nso ke nnyịn idifiọk ke ini ifiakde ikere iban̄a ukwọrọikọ Obio Ubọn̄ oro ẹkenamde?
14 Se iyịrede ye emi edi ọyọhọ n̄kpọ inan̄ emi ekemede ndin̄wam nnyịn idu ke edidemede. Ana nnyịn idu ke otu mbon oro ẹnọde mme owo ntọt ẹban̄a utịt editịm n̄kpọ emi edide mi. Ata utịt akani editịm n̄kpọ emi ididaha itie tutu ẹkwọrọ ‘gospel obio ubọn̄ emi’ ke udomo oro Ata Ọkpọsọn̄ Abasi akaduakde. (Matthew 24:14) Mme Ntiense Jehovah idịghe mmọ oro ẹdibierede ini emi ẹdinamde utom ukwọrọikọ emi ẹma. Jehovah onịm unen enyeoro ọnọ idemesie. (Mark 13:32, 33) Nnyịn, nte ededi, imebiere ndinam utom ọkpọsọn̄ nte ikekeme ye adan̄a nte ẹyomde ke ndikwọrọ mban̄a mfọnn̄kan ukara oro ubonowo ekemede ndinyene, kpa Obio Ubọn̄ Abasi. “Akwa ukụt” editịbe ke adan̄aemi nnyịn isụk ibuanade ke utom emi. (Matthew 24:21) Ke nsinsi, mbon oro ẹnyan̄ade ẹyekeme ndida ekikere mfiak edem nnyụn̄ nnyịme nte ke Jesus Christ ikedịghe prọfet nsu. (Ediyarade 19:11) Ẹyenam utom ukwọrọikọ ẹkeyọhọ ke udomo oro otịmde okpon akan se mbon oro ẹbuanade ke enye ẹkedoride enyịn.
15 Nte ekemde, ke akpan ini oro ẹdidade utom emi ẹkeyọhọ nte Abasi onyịmede, anaedi ediwak owo efen efen ẹyebuana ke enye ẹkan nte akanam ẹbuanade ke mbemiso. Nnyịn idiwụt esịtekọm didie ntem ke ndikenyene ebuana ke akwa utom emi! Apostle Peter ọsọn̄ọ ọnọ nnyịn ete ke Jehovah “iyomke baba owo kiet atak, edi oyom kpukpru owo ẹtua n̄kpọfiọk ẹkabade esịt.” (2 Peter 3:9) Mmọdo, anamutom odudu Ata Ọkpọsọn̄ Abasi ke anam utom mfịn ọkpọsọn̄ ọkpọsọn̄ akan nte akanam edide, ndien Mme Ntiense Jehovah ẹyom ndikaiso ke utom emi spirit onụkde ẹnam mi. Ntre, sọn̄ọ yịre ye esop Jehovah, nyụn̄ yọhọ ke an̄wan̄wa utom ukwọrọikọ. Emi eyedi un̄wam ke afo ndidu ke edidemede.
Dụn̄ọde Idemfo
16. Ntak emi nnyịn ikpọdụn̄ọrede idem nnyịn kaban̄a idaha eke spirit oro nnyịn idude idahaemi?
16 Odu ọyọhọ n̄kpọ ition oro nnyịn ikemede ndinam man idu ke edidemede. Nte owo kiet kiet, nnyịn ikpenyene ndidụn̄ọde idaha oro idude kemi. Emi odot ndinam idahaemi akan nte akanam edide ke mbemiso. Oyom nnyịn iwụt m̀mê nnyịn ibiere ndida ke n̄kan̄ anie. Ke N̄wed Mbon Galatia 6:4, Paul ọkọdọhọ ete: “Yak owo kiet kiet odomo utom esie ọfiọk.” Dụn̄ọde idemfo ke n̄kemuyo ye mme ikọ Paul ke 1 N̄wed Thessalonica 5:6-8: “Ẹyak nnyịn ikûde idap, nte mmọ eken, edi ẹyak nnyịn itaba idap ikpeme, imụm idem ikama. Koro mmọ eke ẹdede idap ẹde ke okoneyo; mmọ eke ẹnyụn̄ ẹkpade mmịn ẹkpa mmịn ke okoneyo. Edi ẹyak nnyịn, emi idide nditọ uwemeyo, imụm idem nnyịn ikama, isịne mbuọtidem ye ima nte n̄kpọ ikpanaesịt, inyụn̄ iyara idotenyịn edinyan̄a nte ndụn ibuot.”
17. Ke ini idụn̄ọrede idem nnyịn, mme mbụme ewe ke nnyịn ikpobụp idem nnyịn?
17 Nso kaban̄a nnyịn? Ke ini nnyịn idụn̄ọrede idem nnyịn ke un̄wana N̄wed Abasi, ndi nnyịn imokụt ite ke nnyịn ke idu ke edidemede, iyarade idotenyịn edinyan̄a nte ndụn ke ibuot? Nte nnyịn idi mbon oro inen̄erede idianade idem ikpọn̄ akani editịm n̄kpọ emi inyụn̄ inyịmeke mme ekikere esie aba? Nte nnyịn imenen̄ede inyene edu obufa ererimbot Abasi? Nte nnyịn imodu ke edidemede ọyọhọ ọyọhọ kaban̄a ebiet oro editịm n̄kpọ emi asan̄ade aka? Ke edide ntre, usen Jehovah idibuatke nnyịn nte n̄kpọ eke nnyịn idide mme inọ.—1 Thessalonica 5:4.
18. Mme n̄kaiso mbụme ewe ke ẹkeme ndiyom ibụp idem nnyịn, ndien ye nso utịp?
18 Nso, nte ededi, edieke edidụn̄ọde idem nnyịn owụtde ete ke nnyịn ke in̄wana ndidu ediye, ifụre, inem inem, usụn̄uwem oro ọyọhọde ye nduọkodudu? Nso edieke ikụtde ite ke enyịn eke spirit nnyịn ẹkabade ẹdobi ẹnyụn̄ ẹtie idap idap? Nte nnyịn idu ke ndap ndap idaha, ifehede ibịne ndusụk mfụmmfụm ekikere eke ererimbot emi? Ke edide ntre, do ẹyak nnyịn idemede!—1 Corinth 15:34.
Tie Kere Mme Prọfesi Oro Ẹsude
19. Nso idi ndusụk prọfesi ẹmi nnyịn ikụtde nte ẹsụde?
19 Nnyịn idahaemi imedisịm ọyọhọ n̄kpọ itiokiet oro edin̄wamde nnyịn ndidu ke edidemede. Tie kere ban̄a ekese prọfesi oro ẹsude ke utịt ini emi. Nnyịn imebebe ọyọhọ isua 77 tọn̄ọ nte edimek ini mme idụt eketre ke 1914. Nte nnyịn ifiakde ise mbahade ita ke itie inan̄ ke isua ikie emi ebede, nnyịn imekeme ndikụt nte mme prọfesi ẹsude ke adiana ke adiana—edifiak n̄n̄wụk utuakibuot akpanikọ; edinyan̄a nsụhọ oro ẹyetde aran, ọkọrọ ye nsan̄a mmọ, nsịn ke paradise eke spirit; edikwọrọ eti mbụk Obio Ubọn̄ ke ofụri isọn̄; akwa otuowo ndiwọrọ ndi. (Isaiah 2:2, 3; ibuot 35; Zechariah 8:23; Matthew 24:14; Ediyarade 7:9) Ẹmenam akwa enyịn̄ ye unen itie edikara ofụri ekondo Jehovah okpon, ọkọrọ ye n̄kọri ke ndinam ekpri akabade edi tọsịn, esisịt onyụn̄ akabade edi ọkpọsọn̄ idụt, ye Jehovah anamde enye awara ke ekemini esie. (Isaiah 60:22; Ezekiel 38:23) N̄ko n̄kukụt apostle John ke mbụk eke Ediyarade ke ẹkpere ata utịt mmọ idahaemi.
20. Nso edinịm ke akpanikọ ke Mme Ntiense Jehovah ẹbuana, ndien nso ke mmọ ẹnen̄ede ẹdi?
20 Ke ntre, ke akande nte akanam edide, Mme Ntiense Jehovah ẹsọn̄ọ ẹnịm ẹte ke ifiọk oro mmimọ inyenede iban̄a se mme n̄kpọntịbe ererimbot emi ẹwọrọde toto ke 1914 edi akpanikọ. Ke ẹnyenede utọ nsọn̄ọ oro, mmọ ẹwụt nte idide n̄kpọutom ke ubọk Ata Edikon̄ Abasi. Mmọ ẹdi mbon oro ẹyakde utom edinọ etop Abasi ke ata akpan ini emi ẹsịn ke ubọk. (Rome 10:15, 18) Ih, ikọ Jehovah ẹban̄ade utịt ini ẹmewọrọ ẹsu. (Isaiah 55:11) Emi, n̄ko, ekpenyene ndidemede nnyịn ndikaiso tutu nnyịn ikụt akpatre edisu emi kpukpru un̄wọn̄ọ Abasi ẹsụde ebe ke Jesus Christ.
Edinyan̄a Ekpere Akan Ini Emi Nnyịn Ikakabarede Idi Mme Andinịm ke Akpanikọ
21. Ewe un̄wam itiaba ke ndidu ke edidemede ke n̄kan̄ eke spirit ke nnyịn inyene?
21 Ke akpatre, ọyọhọ un̄wam itiaba ndin̄wam nnyịn idu ke edidemede: Nyene ke ekikere ete ke edinyan̄a ekpere akan nte ekedide ke ini nnyịn ke akpa ikakabarede idi mme andinịm ke akpanikọ. Ke edide akpan n̄kpọ akan oro, ediwụt unen itie edikara ofụri ekondo Jehovah ye edinam enyịn̄ esie asana otịm ekpere akan. Ntre ufọn ndidu ke edidemede ototịm edi usọp usọp n̄kpọ akan nte akanam edide. Apostle Paul ewet ete: “Sia mbufo ẹfiọkde edikem ini, ẹte ini ekekem nte mmimọ ikpedemede ke idap: koro edinyan̄a ekpere nnyịn kemi, akan nte ekekperede ke ini nnyịn inịmde ke akpanikọ. Okoneyo ọnyọn̄ ebe efep, uwemeyo ke ekpere.”—Rome 13:11, 12.
22. Didie ke edikpere oro edinyan̄a nnyịn ekperede okpotụk nnyịn?
22 Ye edinyan̄a nnyịn otịmde ekpere kemi, ana nnyịn idu ke edidemede! Inaha nnyịn iyak ọkpọkpọ udọn̄ m̀mê eke ererimbot onịme esịtekọm oro inyenede inọ se Jehovah anamde ọnọ ikọt esie ke utịt ini emi. (Daniel 12:3) Oyom nnyịn iwụt nsịnifịk ikan nte akanam edide man nnyịn idiwọn̄ọde ikpọn̄ usụn̄ oro Ikọ Abasi etemede nnyịn in̄wan̄în̄wan̄. (Matthew 13:22) Uyarade owụt in̄wan̄în̄wan̄ nte ke ererimbot emi odu ke mme akpatre usen esie. Ke mîbịghike ẹyesobo enye ẹfep ke nsinsi man ẹnam ufan̄ odu ọnọ obufa ererimbot edinen ido.—2 Peter 3:13.
23. Ke nso usụn̄ ke Jehovah an̄wam nnyịn, ndien ye nso utịp oro ẹdiọn̄de?
23 Ẹyak nnyịn, ndien, idu ke edidemede ke kpukpru usụn̄. Idu ke edidemede kaban̄a ebiet emi nnyịn idude nte ini ebede ikan nte akanam edide ke mbemiso. Ti ete, ke tutu amama Jehovah ididehe idap kaban̄a n̄kpọ emi. Utu ke oro, enye kpukpru ini eyen̄wam nnyịn ndidu ke edidemede ke utịt ini emi. Okoneyo ọnyọn̄ ebe efep, uwemeyo ke ekpere. Ntre du ke edidemede! Ibịghike nnyịn iyekụt usen oro eyede akan kpukpru usen, nte Obio Ubọn̄ Messiah osude uduak Jehovah kaban̄a isọn̄!—Ediyarade 21:4, 5.
Nso Idi Mme Ibọrọ Fo?
◻ Nso ke ikọ Jesus ọkọwọrọ ke ini enye ọkọdọhọde ete ke usen iyatesịt Abasi edibuat mme owo “nte ekpọ”?
◻ Ntak anade in̄wana ye n̄kpọ oro etịmerede owo ekikere, ndien didie ke nnyịn ikeme ndinam ntre?
◻ Nso orụk akam ke ẹyom man idu ke edidemede?
◻ Nso orụk ebuana edi akpan n̄kpọ?
◻ Ntak anade idụn̄ọde idaha eke spirit nnyịn?
◻ Nso udeme ke prọfesi enyene ke nnyịn ndidu ke edidemede?