Enye Ama Okụt se Esịt Esie Okoyomde
NTE edi udọn̄ esịt fo ndikụt Obio Ubọn̄ Messiah akarade ofụri isọn̄? Ke edide ntre, afo emenyene udọn̄ onyụn̄ ọbọn̄ akam aban̄a mme edidiọn̄ eke isọn̄ oro ẹken̄wọn̄ọde ke idak Obio Ubọn̄ eke heaven oro. Nyene ime, ndien, koro “ndibọ se ẹyomde edi eto uwem.”—Mme N̄ke 13:12; James 5:7, 8.
Ke se ikperede ndisịm isua 2,000 ẹmi ẹkebede, Simeon, eren emi ekedide “edinen owo emi eten̄ede Abasi” ama odu ke Jerusalem. Enye ama enyene mbuọtidem ke mme prọfesi ẹban̄ade Messiah ndien “etiede ebet ndọn̄esịt Israel” ye ime.—Luke 2:25.
Mme Prọfesi Ẹban̄ade Messiah Ẹnọ Idotenyịn
Jehovah ekedi anditịn̄ akpa prọfesi aban̄ade Messiah—kiet oro ọkọnọde anamidiọk ye n̄kpakpa ubonowo idotenyịn. Abasi ama ebemiso etịn̄ aban̄a edidi eke Mfri “n̄wan” m̀mê esop ofụri ekondo esie.—Genesis 3:15.
Ẹkediọn̄ọ Enyeoro nte mfri Abraham, ndien Jacob ama ebemiso etịn̄ aban̄a edidi esie. (Genesis 22:17, 18; 49:10) Ẹma ẹmenede ubọn̄ Obio Ubọn̄ Messiah ke enyọn̄ ke mme psalm. (Psalm 72:1-20) Isaiah ama ebemiso etịn̄ nte ke eyenan̄wan oro mîfiọkke erenowo ediman Mfri oro, ndien Micah ama etịn̄ prọfesi ete ke emana oro edida itie ke Bethlehem. (Isaiah 7:14; Micah 5:2) Mmọemi ẹdi sụk ifan̄ ke otu mme prọfesi ẹban̄ade Messiah.
Edi Messiah Idịghe!
Ti se ikotịbede ke edem, nyụn̄ kere nte akpa isua ikie E.N. asan̄ade ekpere. Akpa prọfesi Abasi aban̄ade Messiah kemi ebịghi ke isua 4,000. Mme Jew ẹma ẹkụt nsobo temple Jehovah, isọn̄ emana mmọ ndina ndon, ntan̄mfep isua 70 ke Babylon, ye edidu ke idak mme andikara ẹdide mme Gentile ke isua 500 efen efen. Edi Messiah idịghe!
Didie ke mme Jew ẹmi ẹbakde Abasi ẹkenyene udọn̄ ẹban̄a edidi Messiah ntem! Otode ke enye mme edidiọn̄ ẹyefiọrọ ẹsịm mmọ ye kpukpru mme idụt.
Eren Oro Eten̄ede Abasi
Ke otu mme Jew oro ẹten̄ede Abasi emi ẹkenyenede udọn̄ ẹban̄a ẹnyụn̄ ẹbọn̄de akam ẹyom ẹdidi Messiah edi Simeon, anam-akpanikọ akanieren asan̄autom Jehovah odude ke ibuot obio Judea. N̄kpọ oro edide san̄asan̄a otịbe ọnọ Simeon.
Abasi ọnọ Simeon edisana spirit esie ama onyụn̄ ọnọ enye ediyarade nte utịp. Simeon idikpaha tutu enye okụt Enyeemi edidide Messiah. Edi mme usen ye ọfiọn̄ ke ẹbe. Simeon ke ọsọn̄ aka onyụn̄ ọsọsọn̄ ndidori enyịn ke iyedu uwem enen̄ede ebịghi. Nte un̄wọn̄ọ oro Abasi ọkọn̄wọn̄ọde ọnọ enye eyesu?
Usen kiet (ke 2 M.E.N.), n̄kparawa ebe ye n̄wan ye nsekeyen ẹto Bethlehem ẹdi temple. Edisana spirit ayarade ọnọ Simeon ete ke emi edi usen oro ẹketiede ẹbet ke anyanini. Enye asan̄a aka temple, ke ebiet emi enye edikụtde Enyeemi mme prọfet ẹkewetde ẹban̄a. Ke asan̄ade ọsọp adan̄a nte idem akani owo esie ayakde, enye okụt Joseph, Mary, ye nsekeyen.
Nso n̄kpọ idara ke edi ntem ke Simeon emende ekpri Jesus akama ke ubọk esie! Enyeemi edidi Messiah oro ẹken̄wọn̄ọde—“Christ emi Jehovah ọdọn̄de.” Ke utọ ini usọn̄ oro, Simeon ikemeke ndidori enyịn ndikụt Jesus osude utom ẹkedọn̄de Enye edinam ke isọn̄. Edi, edi utịben̄kpọ ndikụt enye nte nsekeyen. Mme prọfesi ẹban̄ade Messiah ẹmetọn̄ọ ndisu. Simeon okop inemesịt didie ntem! Idahaemi enye eyekop uyụhọ ndide ke n̄kpa tutu osịm ediset ke n̄kpa.—Luke 2:25-28.
Mme Ntịn̄nnịm Ikọ Simeon
Nte Simeon emenerede uyo esie nditoro Jehovah, nnyịn imokop nte enye ọdọhọde ete: “Kemi, O Ọbọn̄, Afo ke ayak owo Fo ọnyọn̄ ke ifụre, nte Afo ọkọdọhọde; koro enyịn mi ẹmekụt edinyan̄a Fo, eke Afo okonịmde ke iso kpukpru mme idụt; ete, edi un̄wana eke ẹdiyararede n̄kpọ ọnọ mme Gentile, onyụn̄ edi ubọn̄ ikọt Fo Israel.” Joseph, kpa ete ekesede Jesus enyịn, ye eka Esie, Mary, ẹkaiso ndiyịk mban̄a mme ikọ ẹmi.—Luke 2:29-33.
Iso Simeon ayama nte enye ọdiọn̄de Joseph ye Mary, nte an̄wan̄ade eben̄ede edidiọn̄ Jehovah ọnọ mmọ ke ndise mban̄a mbiomo mmọ kaban̄a eyen oro. Ekem iso akanieren oro enyene uten̄e. Ke ẹtịn̄de ikọ ọnọ Mary ikpọn̄, enye adian ete: “Sese, ẹma ẹnịm Eyen emi, man ediwak owo ke Israel ẹduọn̄ọ ẹnyụn̄ ẹdaha ẹda; man Enye onyụn̄ edi Idiọn̄ọ eke ẹtịn̄de ikọ ẹdian (ofụt eyenyụn̄ okịm fi ukpọn̄ n̄ko) man ekikere ediwak esịt ẹkpeyarade.”—Luke 2:34, 35.
Ikọ Oro Simeon Etịn̄de Ọnọ Mary
Kere nte eketiede Mary ke idem. Ikọ Simeon ọkọwọrọ nso? Ndusụk owo ẹyenyịme Christ ẹyenyụn̄ ẹmenede mmọ ẹkpọn̄ usụhọde idaha oro mmọ ẹma ẹkedọduọ ẹdụk. Nte ededi, mmọ eken ẹyesịn enye, ẹtuak ukot ke ntak esie, ẹnyụn̄ ẹduọn̄ọ. Nte ẹkebemde iso ẹtịn̄, Jesus ama akabade edi itiat iduọ ọnọ ediwak mme Jew. (Isaiah 8:14; 28:16) Mme ikọ Simeon iwọrọke ite ke eyen Israel kiet kiet eyebem iso ọduọ ke unana edinịm ke akpanikọ ndien ekem adaha ada ke edinịm ke akpanikọ ebe ke ndinyịme Jesus. Utu ke oro, nte nsio nsio owo ẹdinamde n̄kpọ ye enye eyekpụhọde, ayararede mme ekikere oro ẹdude ke esịt ediwak owo onyụn̄ adade osịm ubiereikpe Abasi kaban̄a mmọ edide ke eti m̀mê ke idiọk. Ye mmọ oro mînịmke ke akpanikọ, enye editie nte idiọn̄ọ, m̀mê nte n̄kpọ esuene. Ebede ke ndibuọt idem ke enye, ẹyemenede mbon en̄wen ẹsio ke ukwan̄n̄kpọ ye idiọkn̄kpọ, ndien eyedidara edinen idaha ye Abasi. Nte mme owo ẹnamde n̄kpọ ẹban̄a Messiah eyewụt se ikodude mmọ ke esịt.
Nso kaban̄a mme ikọ Simeon oro: “Ofụt eyenyụn̄ okịm fi ukpọn̄ n̄ko”? N̄kpọ ndomokiet idụhe ke N̄wed Abasi ndiwụt nte ke ẹma ẹda ataata ofụt ẹkịm Mary. Edi, n̄wakn̄kan ibatowo ndikesịn Jesus ama ada mfụhọ ọsọk enye. Ndien ekedi ubiak ubiak n̄kpọ didie ntem ọnọ Mary ndikụt ẹkọn̄de Jesus ke eto! Emi eketie nte edida ofụt n̄kịm enye.
Simeon Abuan Mme Prọfesi Ẹban̄ade Messiah
Spirit Abasi ama onụk Simeon ndida mme prọfesi ẹban̄ade Messiah ntịn̄ mban̄a Jesus. Simeon ama ekeme ndikpa ke emem, m̀mê ifụre, ‘koro enyịn esie ẹma ẹkụt usụn̄ oro Abasi adade ọnọ edinyan̄a oro Enye akanamde odu ke enyịn kpukpru owo, un̄wana ndida nyarade n̄kpọ oro ofụkde mme idụt ye ubọn̄ ikọt Esie Israel.’ (Luke 2:30-32) Didie ke emi etịn̄ aban̄a mme ntịn̄nnịm ikọ Isaiah nte ọfọnde ntem!
Prọfet oro ama ebemiso etịn̄ ete: “Ubọn̄ Jehovah eyeyarade, kpukpru owo ọtọkiet ẹyenyụn̄ ẹkụt enye.” “Ami [Jehovah] nyenyụn̄ nnịm fi [Messiah] ke un̄wana mme idụt, man afo ekpedi edinyan̄a mi tutu osịm ke utịt ererimbot.” (Isaiah 40:5; 42:6; 49:6; 52:10) N̄wed Abasi Mme Christian Usem Greek ye mme uyarade oro ẹkụtde ke enyịn ẹwụt totoko nte ke Messiah, Jesus Christ, edi ata un̄wana mme idụt, kpa Enyeemi edimende ufụhọn̄kpọ ekịm eke spirit efep onyụn̄ ada edinyan̄a ọsọk mme owo.
Ikọ Abasi itịn̄ke n̄kpọ aba iban̄a akanieren Simeon. Nte uyarade owụtde enye ama akpa mbemiso Christ ekebederede usụn̄ ọnọ uwem eke heaven. Ibịghike, ndien, Simeon eyeset edidu uwem ke isọn̄. Nso idara ke enye—ye afo—ẹdikeme ndinyene ntem ke obufa ererimbot ke idak Obio Ubọn̄ Abasi eke Messiah!