Uwem ye Utom Jesus

Eneni Asiaha

MBEMISO ke mbubịteyo, Jesus ama ekpep eti ukpepn̄kpọ edinam nsụhọdeidem ke ndiyet mme apostle esie ukot. Ekem, ama enye ọtọn̄ọ usọrọ Editi n̄kpa esie oro asan̄ade ekpere. Idahaemi, akpan akpan ke ekerede aban̄a se ikosụk idade itie, n̄kpọ n̄kpaidem otịbe. Mme apostle esie ẹma ẹsịn idem ke ọkpọsọn̄ eneni kaban̄a m̀mê anie ke otu mmimọ edi n̄kpon n̄kan! Nte an̄wan̄ade, emi edi ubak mfan̄a oro osụk akade iso.

Ti ete ke ẹma ẹkekpụhọde mbiet Jesus ke obot, mme apostle ẹma eneni m̀mê anie ke otu mmimọ edi n̄kpon n̄kan. Akande oro, James ye John ẹma ẹben̄e ikpọ itie ke Obio Ubọn̄, osụn̄ọde ke utọk efen efen ke otu mme apostle. Idahaemi, ke akpatre okoneyo esie oro enye odude ye mmọ, anaedi Jesus okop mfụhọ didie ntem ndikụt mmọ ẹfiakde ẹtọn̄ọ eneni! Nso ke enye anam?

Utu ke nditọk ye mme apostle emi ke ntak edu mmọ, Jesus ke ime ama afiak ọkọk ibuot ye mmọ ini kiet efen ete: “Ndidem mme Gentile ẹkara mmọ; ẹnyụn̄ ẹkot mmọemi ẹnyenede odudu ndikara mmọ, ẹte Mme anam-ufọn. Edi inyeneke ndidi ntre ye mbufo: . . . Koro anie owo edi andikpon n̄kan? Ndi enyeemi etiede ke itieudia, m̀mê enyeemi adade mbet? Nte idịghe enyeemi etiede ke itieudia okpon akan?” Ekem, ke etide mmọ aban̄a uwụtn̄kpọ esie, enye ọdọhọ ete: “Edi Ami ndu ke otu mbufo nte enyeemi adade mbet.”

Kpa ye unana mfọnmma mmọ, mme apostle ẹmi ẹma ẹsọn̄ọ ẹda ye Jesus ke ini idomo esie. Ntre enye ọdọhọ ete: “Kpa nte Ete Mi okonịmde Obio Ubọn̄ ọnọ Mi, kpasụk ntre ke Ami nnyụn̄ nnịm nnọ mbufo.” Ọkpọ ọkpọ ediomi emi ke ufọt Jesus ye mme anam-akpanikọ anditiene enye adian mmọ ye enye ndibuana ubọn̄ ubọn̄ ukara esie. Ibat ibat owo 144,000 kpọt ke ẹda ẹsịn ke obufa ediomi Obio Ubọn̄ emi.

Okposụkedi ẹnọde mme apostle utịbe utịbe idotenyịn edibuana ye Christ ke ukara Obio Ubọn̄, mmọ kemi isụk isọn̄ke idem ke n̄kan̄ eke spirit. Jesus ọdọhọ ete, “Kpukpru mbufo ẹyeduọn̄ọ ke idomo kaban̄a Mi ke okoneyo emi.” Ke asiande Peter ete ke Imọ ima ibọn̄ akam ke ibuot esie, Jesus akpak ete: “Ke ini editọn̄ọde ntak akabade, sọn̄ọ nditọete fo idem.”

“N̄kpri nditọ,” Jesus anam an̄wan̄a, “nnyene ndidu ye mbufo kan̄a ke ekpri ini. Mbufo ẹyeyom Mi: ndien, kpa nte n̄kọdọhọde mme Jew nte, Mbufo ikemeke ndisịm ọtọ nte n̄kade, ndọhọ mbufo sụk ntre kemi. Mmọnọ mbufo obufa ibet nte, mbufo ẹma kiet eken; nte, mbufo nde ẹma kiet eken kpa nte n̄kamade mbufo. Mbufo ẹma ẹma kiet eken, kpukpru owo ẹyeda oro ẹfiọk ẹte mbufo ẹdi mbet Mi.”

Peter obụp ete, “Ọbọn̄, Afo akaka m̀mọ̀n̄?”

Jesus ọbọrọ ete, “Ukemeke nditiene Mi n̄ka ọtọ nte n̄kade kemi; edi eyetiene Mi usụk usụk.”

“Ọbọn̄, nsidi ntak eke mmendikemeke nditiene Fi ke idem idahaemi?” Peter oyom ndidiọn̄ọ. “Nyeyak uwem mi nduọk kaban̄a Fi.”

Jesus obụp ete, “Nte eyeyak uwem fo ọduọk kaban̄a Mi? Ke akpanikọ ke ndọhọ fi nte, mfịn emi, kpa ke okoneyo emi, ke ini ekikọ mîkpọkke kan̄a utịm ikaba, afo eyekan̄ Mi utịm ikata.”

Peter afan̄a ete, “Akpanana nte n̄kpa ye Afo, ndikan̄ke Fi.” Ndien ke adan̄aemi mme apostle eken ẹdiande uyo ẹdọhọ kpa ntre, Peter anam inua ete: “Kpukpru owo ẹkpeduọn̄ọ kaban̄a Fi, ami ndiduọhọ tutu amama.”

Ke etịn̄de aban̄a ini oro enye okosiode mme apostle esie ọdọn̄ isan̄ ukwọrọikọ ke Galilee ye unana ekpatokụk ye ekpatudia, Jesus obụp ete: “Nte n̄kpọ ama anana mbufo?”

Mmọ ẹbọrọ ẹte “N̄kpọ inanake.”

Enye ọdọhọ ete, “Edi kemi, owo eke enyenede ekpatokụk emen, onyụn̄ ada ekpatudia n̄ko; owo eke mînyụn̄ inyeneke ofụt, yak enye anyam ekụra edep. Koro ndọhọ mbufo nte, se ẹkewetde ete, Ẹbat Enye ẹsịn ke otu mme abiatibet, enyene ndiwọrọ nnọ Mi: Koro mme n̄kpọ eke ẹketịn̄de ẹban̄a Mi enyene ndisu.”

Jesus ke owụt ini oro ẹdiwotde enye ye mme idiọkowo, m̀mê mme abiatibet. Enye n̄ko owụt ete ke mme anditiene imọ eyesobo ọkpọsọn̄ ukọbọ ke oro ebede. Mmọ ẹdọhọ ẹte, “Ọbọn̄, sese, ofụt iba mi.”

Enye ọbọrọ ete, “Ekem adan̄aoro.” Nte nnyịn idikụtde, ofụt ndidu ye mmọ eyenam Jesus ke mîbịghike ekpep mmọ akpan ukpepn̄kpọ efen. Matthew 26:31-35; Mark 14:27-31; Luke 22:24-38; John 13:31-38; Ediyarade 14:1-3.

◆ Ntak emi eneni mme apostle akpade owo idem-e?

◆ Didie ke Jesus ese aban̄a eneni oro?

◆ Nso ke ediomi oro Jesus anamde ye mbet esie anam?

◆ Obufa ibet ewe ke Jesus ọnọ, ndien didie ke enye edi akpan n̄kpọ?

◆ Nso n̄kohodeidem ke Peter owụt, ndien nso ke Jesus ọdọhọ?

◆ Ntak item Jesus ẹban̄ade ẹdikama ekpatokụk ye ekpatudia ẹkpụhọrede ye mmọemi enye ọkọnọde mbemiso?