Enye Ikọsọn̄ke Ibe Ndinam N̄kpọ Jehovah

EDIWAK n̄kani owo ẹkere ẹte ke mme isua ẹmi ẹsụhọde ẹnọ mmimọ ikamake idotenyịn inemesịt. Ọwọrọetop owo edinam kọnsat kiet emi edide akanian̄wan akakam ọdọhọ ete: “Mmabiat uwem mi, ndien ini ebe akaha ndikpụhọde enye . . . Ke ini nnamde isan̄ ikpọn̄, mmesikere mban̄a uwem mi ini edem, ndien ami n̄kopke inemesịt mban̄a usụn̄ oro n̄kadade enye nnam n̄kpọ . . . Mmanana nduọkodudu ke kpukpru ebiet nnyụn̄ n̄kemeke ndisụhọde ntie ọtọkiet.”

Akanian̄wan kiet oro okodude uwem ke se ikperede ndisịm isua 2,000 ẹmi ẹkebede ikenyeneke utọ mfịna oro ndomokiet. Enye ekedi ebeakpa isua 84 ke emana, edi enye ama okop idem, okop inemesịt, onyụn̄ enyene mfọn Abasi ke utịbe utịbe usụn̄. Enyịn̄ esie ekedi Anna, ndien enye ama enyene akpan ntak ndikop idatesịt. Nso ikedi oro?

“Enye Ikpọn̄ke Temple”

Andiwet Gospel oro Luke emen nnyịn owụt Anna. Enye ọdọhọ ete, “Prọfet an̄wan kiet onyụn̄ odu, emi ekerede Anna, eyen Phanuel, emi otode ke esien Asher” ke Israel. Nte prọfet an̄wan, enye ama enyene enọ edisana spirit, m̀mê anamutom odudu Abasi, ke san̄asan̄a usụn̄ifiọk. Ndien Anna ama enyene akwa ifet nditịn̄ prọfesi ke n̄wọrọnda idaha kiet.

Luke obụk ete: “Enye edi ata ebiowo, emi okodude ye ebe isua itiaba tọn̄ọ enye ọkọdọ ndọ, enye ama onyụn̄ edi ebeakpa ke isua anan̄ ye inan̄.” (Luke 2:​36, 37) Eyedi Anna akakabade edi ebeakpa ke ini okosụk edide ekpri n̄kaiferi. Iban Christian ẹdide ebeakpa ke isua emana ekededi ẹfiọk nte edide n̄kpọ mfụhọ ndiduọk edima ebe ke n̄kpa. Nte ededi, ukem nte ediwak iban oro ẹbakde Abasi ke eyo nnyịn, Anna ikayakke mfụhọ mfụhọ n̄kpọntịbe emi etre utom oro enye akanamde ọnọ Abasi.

Luke asian nnyịn ete ke Anna ‘ikọkpọn̄ke temple’ ke Jerusalem. (Luke 2:37) Enye ama enen̄ede owụt esịtekọm aban̄a edidiọn̄ oro otode edinam utom ke ufọk Abasi. Mme edinam esie ẹma ẹyarade ẹte ke enye, ukem nte David andiwet psalm ye edidem eke Israel, ekeben̄e Jehovah n̄kpọ kiet kpọt. Ndien nso ikedi oro? David ọkọkwọ ke ikwọ ete: “Mmeben̄e Jehovah n̄kpọ kiet, ndien nyeyom enye; nte ndụn̄ ke ufọk Jehovah ke ofụri uwem mi, man nse uyai Jehovah, nnyụn̄ ntịm mbụp ke temple esie.” (Psalm 27:4) Ke afan̄ emi, n̄ko, Anna ebiet iban Christian mfịn oro ẹkopde idatesịt ke ndidu kpukpru ini ke itie utuakibuot Jehovah.

Anna ama esinam edisana utom ọnọ Jehovah okoneyo ye uwemeyo. Enye akanam emi “ke editre udia ye n̄kpeubọk,” owụtde eseme ye udọn̄ esịt akpanikọ. (Luke 2:37) Ekeme ndidi edidu oro mme Jew ẹkedude ke idak odudu ukara Gentile ke ediwak isua ikie, adianade ye ndiọi idaha ido ukpono oro akakam osịmde temple ye itie oku esie, nte odotde ama otịp n̄kpọ esịn ke Anna nditre udia nnyụn̄ n̄kpe Jehovah Abasi ubọk. Edi enye n̄ko ama enyene ntak ndikop inemesịt, akpan akpan ke ntak n̄wọrọnda n̄kpọ oro okotịbede ke ata akpan usen kiet ke isua 2 M.E.N.

Edidiọn̄ Oro Owo Mîkodorike Enyịn

Ke ata akpan usen emi, Mary, eka Jesus, ye Joseph, ete oro ekemende enye akama, ẹma ẹmen nsekeyen oro Jesus ẹka temple ke Jerusalem. Akanieren oro Simeon ama okụt nsekeyen emi onyụn̄ etịn̄ mme ntịn̄nnịm ikọ ke ini oro. (Luke 2:​25-⁠35) Anna ama odu ke temple nte ido esidide. Luke obụk ete, “Enye onyụn̄ odụk edi kpa idaha oro.” (Luke 2:38) Anaedi Anna okokop inemesịt didie ntem nte enye ke ini usọn̄ okokụtde Messiah ini iso!

Usen aba ke mbemiso, angel Abasi ama etịn̄ ikọ nduaidem ọnọ mme ekpemerọn̄ ekpere Bethlehem ye mme ikọ ẹmi: “Sese, mmada eti mbụk akwa idatesịt, eke edinyenede kpukpru owo, nsọk mbufo; koro Andinyan̄a, emi edide Christ Ọbọn̄, amana ọnọ mbufo mfịn ke obio David.” Udịm mbon heaven ẹma ẹtoro Jehovah ẹnyụn̄ ẹdian do ẹte: “Ubọn̄ enyene Abasi ke ata enyọn̄. Emem onyụn̄ odu ke isọn̄ ke otu owo ẹmi Enye enende iso ye mmọ.” (Luke 2:​8-⁠14) Kpasụk ntre, kemi Anna ama etie ntiense aban̄a Enyeemi edidide Messiah!

Ke okụtde nsekeyen oro Jesus, Anna n̄ko ‘ama ọkọm Abasi, onyụn̄ etịn̄ aban̄a Eyen oro ọnọ kpukpru owo ẹmi ẹtiede ẹbet edifak Jerusalem.’ (Luke 2:38) Ukem nte akanieren oro Simeon, oro ekenyenede ifet ndikụt nsekeyen oro Jesus ke temple, nte eyịghe mîdụhe ama ọdọn̄ enye, enye ama esibọn̄ akam, onyụn̄ ebet Andinyan̄a oro ẹken̄wọn̄ọde. Eti mbụk oro nte ke Jesus ekedi Owo oro ekedi n̄kpọ inemesịt tutu enye ikekemeke nditre nditịn̄ nnọ mbon efen.

Okposụkedi ekemede ndidi Anna ikodorike enyịn ke iyedu ke uwem ke ini Jesus ọkọride okpon, nso ke enye akanam? Enye ke idatesịt ama ọnọ mbon efen ikọ ntiense aban̄a ubọhọ oro ẹdinyenede ebe ke Messiah oro edide

Eti Uwụtn̄kpọ Anna

Mbon ido ukpono ererimbot ifan̄ ẹnọ utọ ikọ ntiense oro mîdịghe ẹsụk ẹtuak ibuot okoneyo ye uwemeyo ke isua 84? Eyedi mmọ ẹkpekeyom okụk ukpọn̄ utom anyanini ko ke edem. Anna ye Simeon ẹma ẹnyene ukpụhọde. Mmọ ẹma ẹnịm nti uwụtn̄kpọ ẹnọ kpukpru asan̄autom Jehovah oro ẹsọn̄de. Ke akpanikọ, mmọ ẹma ẹma ufọk utuakibuot Jehovah ẹnyụn̄ ẹtoro enye ke ofụri esịt mmọ.

Nnyịn imenyene ata eti uwụtn̄kpọ ebeakpa oro eten̄ede Abasi ito Anna. Ke akpanikọ, nte Luke obụkde aban̄a osụhọdeidem akanian̄wan emi otịm emen udomo ye se inamde owo odot nte ebeakpa emi ẹwụtde ke 1 Timothy 5:​3-⁠16. Do apostle Paul ọdọhọ ete ke utọ ebeakpa oro “eyịre ke akam ye n̄kpeubọk ke okoneyo ye uwemeyo,” edi “n̄wan emi ọkọdọde ebe kiet,” onyụn̄ “esịnde idem anam kpukpru orụk nti utom.” Anna ekedi utọ an̄wan oro.

Mfịn, nnyịn imokụt mme anam-akpanikọ ebeakpa oro ẹsọn̄de ẹnamde edisana utom ẹnọ Abasi okoneyo ye uwemeyo ke ediwak tọsịn esop Mme Ntiense Jehovah ke ofụri isọn̄. Nnyịn ikop inemesịt ndinyene “mme Anna” eke eyomfịn ẹmi didie ntem ke otu nnyịn!

Idem ke isua usọn̄, iren ye iban ẹkeme ndiyak idem nnọ Abasi ẹnyụn̄ ẹwụt emi ebe ke baptism mmọn̄. Mbonusọn̄ akananam isọn̄ke ibe ndinam n̄kpọ Jehovah ndinyụn̄ nnọ ikọ ntiense mban̄a Obio Ubọn̄ Messiah oro ẹma ẹkewụk idahaemi ke heaven oro edinyụn̄ adade akpakịp edidiọn̄ ọsọk okopitem ubonowo ke mîbịghike. Mbonusọn̄ oro ẹnamde edisana utom ẹnọ Abasi idahaemi ẹkeme nditịn̄ mban̄a edidiọn̄ Jehovah oro mmọ ẹbọde, kpa nte ẹkediọn̄de Anna ke san̄asan̄a usụn̄ ke ediwak isua ikie ẹmi ẹkebede. Enye ikọsọn̄ke ibe ndinam n̄kpọ Jehovah nnyụn̄ ntoro edisana enyịn̄ esie​—⁠mmọ inyụn̄ isọn̄ke ibe.