Eti Mbụk Enyenede Ofụri Ubonowo!
“N̄KỤT angel en̄wen efefe ke ufọt enyọn̄ emi enyenede nsinsi gospel ete ikwọrọ inọ mmọemi ẹdụn̄de ke isọn̄, ye kpukpru idụt ye esien ye usem ye obio.” (Ediyarade 14:6) Ye ikọ ẹmi, akanieren apostle John ama etịn̄ aban̄a ntịn̄nịm n̄kukụt eke odudu spirit esie, kpa n̄kukụt oro osude ke usen nnyịn. Nso nsụkesịt ke edi ntem ndidiọn̄ọ nte ke eti mbụk odu ke emana n̄kọri ke afai, usabade-n̄kpọ, edinam oyomonsia, ekọn̄, ye ntatara unana iwụk ke ndutịm uforo! Edi ewe mbụk ọkpọfọn ntre tutu eyedi se oyomde angel ọtọt enye? Ewe etop akpakama idara ekem ndidi se oyomde ẹtan̄a ẹnọ kpukpru idụt ye esien ye usem ye obio?
Nnyịn imekeme ndinọ ibọrọ edieke nnyịn ikerede ifiak edem ikosịm n̄kpọntịbe efen emi angel ke idemesie akatan̄ade eti mbụk. Emi akada itie ke ini akpa isua ikie B.C.E. akasan̄ade ekpere utịt, ekperede ndidi isua ikie mbemiso John okokụtde n̄kukụt esie. Mme ekpemerọn̄ ẹkedu ke an̄wa ye otuerọn̄ mmọ ke in̄wan̄ ekpere Bethlehem, ndien angel ama ọbiọn̄ọde nditọt emana Jesus, ọdọhọde ete: “Sese, mmada eti mbụk akwa idatesịt, eke edinyenede kpukpru owo, nsọk mbufo; koro Andinyan̄a, emi edide Christ Ọbọn̄, amana ọnọ mbufo mfịn ke obio David.”—Luke 2:10, 11.
Emana Jesus ke akpanikọ ekedi “eti mbụk akwa idatesịt.” Enye ama ọkọri akabade edi Christ ye Andinyan̄a emi ẹken̄wọn̄ọde, kpa enyeemi ọkọnọde mfọnmma uwem esie nte owo man otodo mme andinịm ke akpanikọ oro ẹnyenede eti esịt ẹkpedu uwem. Akande oro, enye ekenyene ndikabade ndi Edidem Obio Ubọn̄ Abasi, kpa “Ọbọn̄ Emem,” emi unenikpe ye emem ke idak ukara esie ẹdisịmde ubonowo ke akpatre. (Isaiah 9:6; Luke 1:33) Edi akpanikọ, emana esie ekedi eti mbụk oro okodotde angel atan̄a!
Jesus Edi Edidem
Ke edem ko ke akpa isua ikie, Jesus ama osu ediwak uduak oro Abasi akaduakde aban̄a enye, edi owo ikodorike enye adan̄aoro ke ebekpo nte Edidem Obio Ubọn̄ Abasi. Nte magazine emi esinyande ubọk owụt kpukpru ini, oro ikadaha itie ibọhọke tutu ke 1914. Nte edisu prọfesi owụtde in̄wan̄în̄wan̄, ke isua oro ẹma ẹwụk Obio Ubọn̄ Abasi ke mme heaven. (Ediyarade 12: 10, 12) Okposụkedi ata idiọk mbụk okodude ke 1914—Ekọn̄ Ererimbot I ndisiaha—emana Obio Ubọn̄ Abasi ekedi mfọn n̄kan mbụk. Oro ekedi ntak Jesus eketịn̄de prọfesi aban̄a usen nnyịn ete: “Eyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.”—Matthew 24:14.
Nte prọfesi Jesus osu? Ibọrọ edi ih! Ndien ntịn̄nịm n̄kukụt John omosu n̄ko. Edi akpanikọ, nnyịn ikemeke ndikụt angel oro owo mîkemeke ndikụt emi John okokụtde. Edi ẹmekụt Mme Ntiense Jehovah mfọn mfọn nte mmọ ẹtan̄ade eti mbụk angel oro ẹnọ “kpukpru idụt ye esien ye usem ye obio.” Ke idụt ye isuo inyan̄ibom 212, ẹmekop uyo mmọ. Ndien akwa udịmowo ke ẹyere ikot. Ifiọkutom ndusụk mmọemi ẹyekam ẹwụt nte mbụk aban̄ade Obio Ubọn̄ Abasi enen̄erede edi eti.