Abasi Ekere Aban̄a Fi

MARY, Christian an̄wan emi odude ke utịt utịt isua 40 esie, ọmọbọ ekese ufen ke uwem esie. Efịbe oro ebe esie ekesịnde ama ada okosụn̄ọ ke usiondọ ke se iwakde ikan isua duop ẹmi ẹkebede. Ke oro ebede, Mary ama an̄wana ndiyọhọ utom esie nte eka oro ọbọkde nditọ inan̄ esie ikpọn̄. Edi enye osụk odu ikpọn̄, ndien ndusụk ini ndobo esitie nte n̄kpọ eke enye mîkemeke ndiyọ. Mary esiyịk ete, ‘Ndi emi ọwọrọ ke Abasi ikereke iban̄a mi m̀mê nditọ mi ẹmi mînyeneke ete?’

Edide afo omosobo ukem idiọk idaha oro m̀mê usoboke, ke akpanikọ afo emekeme ndikop mbọm mban̄a mme ntụk Mary. Kpukpru nnyịn imesiyọ mme idaha oro ẹtiede idomo idomo, ndien ekeme ndidi imesikere iban̄a ini ye usụn̄ nte Jehovah edinamde n̄kpọ ke ibuot nnyịn. Ndusụk ifiọk n̄kpọntịbe ẹmi ẹdi nnennen utịp ẹtode nnyịn ndisọn̄ọ nyịre ke mme ibet Abasi. (Matthew 10:16-18; Utom 5:29) Mmọ eken ẹdi utịp nnyịn ndidi mme anana mfọnmma owo oro idụn̄de ke ererimbot emi Satan akarade. (1 John 5:19) Apostle Paul ekewet ete: “Ofụri ekondo ke omụm mmụm, onyụn̄ odu ke ubiak uman tutu osịm emi.”—Rome 8:22.

Nte ededi, akpanikọ oro nte ke afo omosobo ọkpọsọn̄ idomo iwọrọke ite ke Jehovah ọmọkpọn̄ fi m̀mê nte ke enye inyeneke udọn̄ ke mfọnọn̄kpọ fo. Didie ke afo ekeme ndinịm emi ke akpanikọ? Nso iwụt ite ke Abasi ekere aban̄a fi?

Uwụtn̄kpọ eke Eset

Bible ọnọ in̄wan̄în̄wan̄ uyarade aban̄a ukpeme oro Jehovah ọnọde ikọt esie nte mme owo kiet kiet. Kere ban̄a David. Jehovah ama enyene ọkpọkpọ udọn̄ ke idem akparawa ekpemerọn̄ emi, okụtde enye nte edide ‘owo eke ekemde esịt ye enye.’ (1 Samuel 13:14) Ekem, ke ini David akakarade nte edidem, Jehovah ama ọn̄wọn̄ọ ọnọ enye ete: “[Nyenyụn̄] ndu ye afo ke kpukpru ebiet emi afo akade.”—2 Samuel 7:9.

Ndi emi ọwọrọ ke David okodu uwem “unana mfịna,” ọbọhọde nsọn̄ọn̄kpọ ekededi? Baba, David ama osobo n̄kpọsọn̄ idomo mbemiso ye ke ini ukara esie. Ke ediwak isua mbemiso akabarede edi edidem, Edidem Saul oro akaduakde ndiwot enye ama ebịne enye ifịk ifịk. Ke ufan̄ ini emi ke uwem esie, David ama ewet ete: “Ukpọn̄ mi odu ke otu mme lion . . . kpa nditọ owo ẹmi edet mmọ ẹdide eduat ye idan̄.”—Psalm 57:4.

Edi, ke ofụri afanikọn̄ emi David ama onịm ete ke imenyene san̄asan̄a ukpeme Jehovah. Enye ọkọdọhọ ke akam emi ọkọbọn̄de ọnọ Jehovah ete: “Afo omobụk ediyo mi.” Ih, ye David eketie nte n̄kpọ eke Jehovah ekewetde ofụri afanikọn̄ oro ke n̄wed. Ekem David ama adian ete: “Da mmọn̄eyet mi sịn ke ekpeme fo. Nte mmọ idụhe ke n̄wed fo?”a (Psalm 56:8) Ye uwụtn̄kpọ emi, David ama enyene mbuọtidem nte ke Jehovah ikenyeneke ifiọk iban̄a idaha oro kpọt edi n̄ko odudu oro enye enyenede ke ntụk.

Ke utịt utịt uwem esie, David ama ekeme ndiwet nto ọkpọkpọ ifiọk n̄kpọntịbe ete: “Jehovah otịm onịm ikpat eti owo, onyụn̄ amama usụn̄ esie. Koro enye eyeduọ, edi idinyanakede ina: koro Jehovah omụmde enye ubọk akama.” (Psalm 37:23, 24) Afo n̄ko emekeme ndinyene mbuọtidem nte ke idem edieke mme idomo oro ẹsịmde fi ẹtiede uyịre uyịre ẹnyụn̄ ẹkade-ka iso, Jehovah okụt onyụn̄ ada ime oro afo enyenede ke ọsọn̄urua n̄kpọ. Paul ekewet ete: “Abasi ikwan̄ake nte efrede utom mbufo ye ima enyịn̄ Esie eke mbufo ẹwụtde, ke emi mbufo ẹkenamde n̄kpọ ẹnọ ikọt Abasi, ẹnyụn̄ ẹsụk ẹnanam.”—Mme Hebrew 6:10.

N̄ko-n̄ko, Jehovah ekeme ndinam n̄kpọ ke ibuot fo ebe ke ndinọ fi ukeme ndiyọ se ededi n̄kpọ ubiọn̄ọ oro ẹnịmde ke usụn̄ fo. David ekewet ete: “Ediwak ukụt ẹsịm eti owo; edi Jehovah osio enye ke mmọ kpukpru.” (Psalm 34:19) Ke akpanikọ, Bible asian nnyịn ete ke enyịn Jehovah “[ẹsasan̄a] ke ofụri ererimbot, ete isọn̄ọ imụm mmọ eke ofụri esịt mmọ odude ye enye ikama.”—2 Chronicles 16:9.

Jehovah Odụri Fi Ada

Ẹkeme ndikụt udiana uyarade oro aban̄ade ọkpọkpọ ukpeme oro Jehovah ọnọde ke mme ikọ Jesus. Enye ọkọdọhọ ete: “Baba owo kiet ikemeke nditiene Mi, ibọhọke Ete emi ọkọdọn̄de Mi odụri enye edi.” (John 6:44) Ih, Jehovah an̄wam owo kiet kiet ndibọ ufọn nto mme ufọn uwa Christ. Didie? Ke akamba udomo, emi ebe ke utom ukwọrọikọ Obio Ubọn̄. Edi akpanikọ, utom emi anam n̄kpọ nte ‘ntiense ọnọ kpukpru mme idụt,’ kpa ye oro enye osịm mme owo kiet kiet. Akpanikọ oro nte ke afo ke akpan̄ utọn̄ ọnọ onyụn̄ anam n̄kpọ aban̄a etop eti mbụk edi uyarade ọkpọkpọ udọn̄ oro Jehovah enyenede ke idem fo.—Matthew 24:14.

Ebede ke edisana spirit, Jehovah esidụri mme owo ọsọk Eyen esie ye idotenyịn nsinsi uwem. Emi esin̄wam owo kiet kiet ndifiọk nnyụn̄ nda mme akpanikọ eke spirit nsịn ke edinam kpa ye ndammana unana ukeme ye unana mfọnmma ekededi. Ke akpanikọ, owo ikemeke ndifiọk mme uduak Abasi ke mîtoho ke un̄wam spirit Abasi. (1 Corinth 2:11, 12) Nte Paul ekewetde ọnọ mbon Thessalonica, “idịghe kpukpru owo ẹnyene mbuọtidem.” (2 Thessalonica 3:2) Mbon oro ẹwụtde unyịmesịt kpọt ke Jehovah esinọ spirit esie ndisịk n̄kpere enye.

Jehovah esidụri mme owo koro enye amade mmọ nte mme owo kiet kiet onyụn̄ oyom mmọ ẹnyene edinyan̄a. Nso ọkpọsọn̄ uyarade ke emi edi ntem aban̄a ọkpọkpọ ukpeme oro Jehovah ọnọde! Jesus ọkọdọhọ ete: “Idịghe uduak Ete [mi] ke heaven ete kiet ke otu n̄kpri nditọwọn̄ ẹmi akpatak.” (Matthew 18:14) Ih, ke enyịn Abasi kpukpru owo ẹdi akpan n̄kpọ nte san̄asan̄a owo kiet kiet. Ntak edi oro Paul ekekemede ndiwet ete: ‘Enye eyenọ kpukpru owo kiet kiet utịp nte ekemde ye utom esie.’ (Rome 2:6) Ndien apostle Peter ama ọdọhọ ete: “Abasi iten̄eke owo enyịn: edi ke kpukpru idụt Enye adadara owo ekededi [owo kiet kiet] eke abakde Enye onyụn̄ anamde nti ido.”—Utom 10:34, 35.

Mme Utịben̄kpọ Jesus

Ẹma ẹwụt ọkpọkpọ udọn̄ oro Abasi enyenede ke idem mme owo ke usụn̄ otụkde owo ke idem ebe ke mme utịben̄kpọ oro Eyen esie, Jesus, akanamde. Mme ukọkudọn̄ọ ẹmi ẹkesan̄a ye ntotụn̄ọ ntụk. (Mark 1:40, 41) Sia Jesus “[mî]kemeke ndinam baba n̄kpọ kiet ke Idem Esie, ke mîbọhọke se okụtde nte Ete anamde,” mbọm esie owụt ima ima edikere mban̄a oro Jehovah enyenede ọnọ mme asan̄autom esie kiet kiet.—John 5:19.

Kere ban̄a mbụk aban̄ade utịben̄kpọ oro Jesus akanamde, nte ẹwetde ke Mark 7:31-37. Mi Jesus ama ọkọk eren kiet emi ekedide inan mîkonyụn̄ ikemeke nditịn̄ ikọ. Bible ọdọhọ ete enye “ada [eren] oro ke idem esie ikpọn̄ [ọwọrọ].” Ekem, “emenede enyịn ese enyọn̄, onyụn̄ omụm mmụm, onyụn̄ ọdọhọ enye ete, Ephphatha, oro edi, Yak esịrede.”

Ntak emi Jesus akadade owo emi ọwọrọ ke otuowo? Ọfọn, etie nte owo oro edide inan emi mîkemeke nditịn̄ ikọ okpokop bụt ke iso mme ndanse. Ekeme ndidi Jesus ama okụt nte bụt anamde owo emi, ndien oro ekedi ntak emi enye ekemekde ndikọk enye ke odude ikpọn̄. Eyen ukpepn̄kpọ Bible kiet ọdọhọ ete: “Ofụri mbụk oro owụt nnyịn in̄wan̄în̄wan̄ ete ke Jesus ikakam idaha owo oro nte owo udọn̄ọ; enye akada enye nte san̄asan̄a owo. Owo oro ama enyene san̄asan̄a udọn̄ ye san̄asan̄a mfịna, ndien ye ata ima ima edikere mban̄a Jesus ama anam n̄kpọ ye enye ke usụn̄ oro mînọhọ ntụk esie unan ye ke usụn̄ oro akan̄wan̄ade enye.”

Mbụk emi owụt ete ke Jesus ama enyene ọkpọkpọ udọn̄ aban̄a mme owo. Afo emekeme ndinịm ke akpanikọ nte ke enye akam enyene udọn̄ ke idem fo. Edi akpanikọ, n̄kpa uwa esie ekedi usụn̄ ndiwụt ima nnọ ofụri ererimbot ubonowo oro odotde ẹnyan̄a. Edi, afo emekeme ndinam edinam oro ebehe fi ọkpọkpọ, nte Paul akanamde, emi ekewetde ete: ‘Eyen Abasi emi akamama mi onyụn̄ ayak idemesie ọnọ aban̄a mi.’ (Galatia 2:20) Ndien sia Jesus ọkọdọhọde ete ‘owo oro okokụtde imọ okokụt Ete,’ nnyịn imekeme ndinịm ke akpanikọ ite ke Jehovah enyene ukem udọn̄ oro ke idem mme asan̄autom esie kiet kiet.—John 14:9.

Jehovah Akabade Edi Andinọ Utịp

Ndibọ ifiọk Abasi abuana edidi ndifiọk ikpehe edu esie kiet kiet nte ẹyararede enye ke Bible. Enyịn̄ oro Jehovah ọwọrọ “Enye Anam Akabade Edi,” owụtde ete ke Jehovah ekeme ndikabade ndi se ededi oro enye emekde man anam uduak esie. Ke ofụri mbụk, enye amanam nsio nsio utom, esịnede eke Andibot, Ete, Ọbọn̄ Andikara, Ekpemerọn̄, Jehovah mme udịm, Andikop akam, Ebiereikpe, Akwa Anditeme, ye Andifak.b

Man idiọn̄ọ se enyịn̄ Abasi ọwọrọde ọyọhọ ọyọhọ, ana nnyịn n̄ko idiọn̄ọ Jehovah nte Andinọ Utịp. Paul ekewet ete: “Ke mbuọtidem mîdụhe, owo ikemeke ndinem Abasi esịt; koro owo eke asan̄ade ekpere Abasi enyene ndinịm ete Enye ododu, onyụn̄ edi Andinọ mmọ ẹmi ẹyomde Enye utịp.”—Mme Hebrew 11:6.

Jehovah ọn̄wọn̄ọ ndinọ mbon oro ẹmekde ndinam n̄kpọ esie mfịn ke ofụri esịt nsinsi uwem ke paradise isọn̄. Idịghe ibụk ndisak iso nse edisu akwa un̄wọn̄ọ oro, inyụn̄ idịghe n̄wụtidem owo ndikere nte idude do. Moses ‘ama owụk enyịn ese utịp oro ẹdinọde.’ (Mme Hebrew 11:26) Kpasụk ntre, Paul ama enen̄ede odori enyịn ndikụt edisu un̄wọn̄ọ Abasi aban̄ade mme anam-akpanikọ nsụhọ Christian. Enye ekewet ete: “Mmesịn ifịk n̄ka iso mbịne utịt mbuba, man n̄kpọbọ utịp akwa ikot eke Abasi okokotde mi ke Christ Jesus.”—Philippi 3:14.

Afo n̄ko emekeme ndisak iso nse utịp oro Jehovah ọn̄wọn̄ọde ndinọ mbon oro ẹyọde. Ndidori enyịn ndinyene utịp oro edi akpan ubak ifiọk Abasi oro afo enyenede ye ime oro afo enyenede ke utom esie. Ntre tie kere kpukpru usen ban̄a mme edidiọn̄ oro Jehovah onịmde ọnọ fi. Mary, emi ẹkesiakde ke ntọn̄ọ ntọn̄ọ, ama esịn san̄asan̄a ukeme ndinam emi. Enye ọdọhọ ete: “Ke akpa ini ke uwem mi, ami mmenyịme ke ndondo emi nte ke uwa ufak Jesus enyene n̄kpọ ndinam ye ami. Ami mmọtọn̄ọ ndikere nte ke Jehovah ekere aban̄a mi nte owo. Ami ndi Christian ke se ibede isua 20, edi edi sụk ke ndondo emi ke nnen̄ede ntọn̄ọ ndinịm emi ke akpanikọ.”

Ebede ke ukpepn̄kpọ ye editie n̄kere Bible ke ofụri esịt, Mary, ọkọrọ ye ediwak miliọn mbon en̄wen, ẹdi ẹdifiọk nte ke Jehovah ekere aban̄a ikọt esie idịghe nte otu kpọt edi n̄ko nte owo kiet kiet. Apostle Peter ama otịm onịm emi ke akpanikọ tutu enye ekewet ete: “Ẹtop kpukpru ọkpọsọn̄ ekikere eke otịmerede mbufo esịt ẹduọk ẹdori [Abasi], koro Enye ke ekere mbufo.” (1 Peter 5:7) Ih, Abasi ekere aban̄a fi!

[Mme Ikọ idakisọn̄]

[Ekebe ke page 6]

Ediset ke N̄kpa​—⁠Uyarade Nte ke Abasi Ekere Aban̄a

ẸKỤT uyarade oro ọnọde nsọn̄ọ aban̄a udọn̄ oro Abasi enyenede ke idem owo kiet kiet ke Bible ke John 5:​28, 29: “Ini ke edi eke kpukpru mme andidu ke [udi editi, NW] ẹdikopde [Jesus] uyo ẹwọn̄ọ ẹdi.”

Nte enemde, ẹda ikọ Greek oro mne·meiʹon (udi editi) mi utu ke taʹphos (udi). Ikọ oro taʹphos n̄kukụre akama ekikere aban̄ade edibụk. Edi mne·meiʹon ọnọ ekikere nte ke ẹti mbụk aban̄ade owo oro akpade mi.

Ke afan̄ emi, kam kere ban̄a se ediset ke n̄kpa ediyomde oto Jehovah Abasi. Man anam owo afiak edidu uwem, enye enyene ndifiọk kpukpru n̄kpọ aban̄ade owo oro​—⁠esịnede mme ndammana edu esie ye ọyọhọ ukeme uti n̄kpọ esie. Adan̄aoro kpọt ke ẹkeme ndinam owo oro afiak edi ukem se enye ekedide.

Nte ededi, ke ekikere owo emi ikemeke nditịbe, edi “Abasi emekeme ndinam kpukpru n̄kpọ.” (Mark 10:27) Enye ekeme idem ndifiọk se idude ke esịt owo. Idem edieke owo ama akakpa ke ediwak isua ikie, ukeme oro Abasi enyenede nditi enye ikpụhe; enye ifreke. (Job 14:​13-⁠15) Ntem, ke ini asiakde Abraham, Isaac, ye Jacob, Jesus ama ekeme ndidọhọ idem ediwak isua ikie ke mmọ ẹma ẹkekpa ete ke Jehovah ‘idịghe Abasi mme akpa-n̄kpa, edi edi eke mme odu-uwem: koro kpukpru owo ẹdu uwem ẹnọ enye.’​—⁠­Luke 20:38.

Ntem, ediwak biliọn owo ẹmi ẹma ẹkekpan̄a ẹdu ọyọhọ ọyọhọ ke ibuot uti n̄kpọ Jehovah Abasi. Nso uyarade oro akpade owo idem ke emi edi ntem nte ke Abasi ekere aban̄a mme owo nte owo kiet kiet!

[Ndise ke page 7]

Jesus ama enyene ọkpọkpọ udọn̄ ke idem mbon oro enye ọkọkọkde udọn̄ọ