Mmọ Ẹma Ẹnam Uduak Jehovah

Akakan Owo Anam Usụhọde Utom

JESUS ama ọdiọn̄ọ ete ke mme akpatre hour imọ ye mme apostle imọ ẹdidi ata akpan ini. Ke mîbịghike, ẹmọn̄ ẹmụm enye, ndien ẹyedomo mbuọtidem esie nte akanam owo mîdomoke. Jesus ama ọdiọn̄ọ n̄ko ete ke ikpọ edidiọn̄ ke ẹkebet ke iso. Ke mîbịghike ẹyemenede enye ẹnịm ke ubọk nnasia Abasi ẹnyụn̄ ẹnọ enye “enyịn̄ emi okon̄de akan kpukpru enyịn̄; man ke enyịn̄ Jesus kpukpru ẹdọn̄ ẹkpetọn̄ọ ẹnọ Abasi, ye eke mme andidu ke heaven, ye eke mme andidu ke isọn̄, ye eke mme andidu ke idak isọn̄.”—Philippi 2:9, 10.

Edi, editịmede esịt kaban̄a n̄kpa esie oro ekekperede m̀mê ọkpọsọn̄ udọn̄ kaban̄a mme utịp oro ẹken̄wọn̄ọde ẹnọ enye ikọwọn̄ọkede ntịn̄enyịn Jesus ikpọn̄ udọn̄ mme apostle esie. Enye “ama mmọ tutu akpatre,” John ekewet ntre ke ukperedem ke Gospel esie. (John 13:1) Ndien ke mme n̄wọrọnda akpatre hour ẹmi ke uwem esie nte mfọnmma owo, Jesus ama ekpep mme apostle esie akpan ukpepn̄kpọ.

Ukpepn̄kpọ Nsụhọdeidem

Mme apostle ẹkedu ye Jesus ke ubet enyọn̄ ke Jerusalem ndidia Passover. Ke mbemiso, Jesus ama okop mmọ ẹnenide ẹban̄a owo emi ekedide andikpon n̄kan ke otu mmọ. (Matthew 18:1; Mark 9:33, 34) Enye ama eneme n̄kpọ emi ye mmọ ama onyụn̄ odomo ndinen̄ede ekikere mmọ. (Luke 9:46) Nte ededi, idahaemi, Jesus akada isio isio usụn̄ ndisọn̄ọ n̄kpep mme ukpepn̄kpọ oro. Enye ikemekke nditetịn̄ kpọt nnọ mmọ mban̄a nsụhọdeidem edi ndinanam n̄wụt.

Jesus “adaha ke itie-udia, osio ọfọn̄-idem Esie enịm n̄kan̄ kiet,” nte John ewetde. “Ada ukwọhọde-idem awan̄ ke n̄kụk. Ndien Enye ọtọhọ mmọn̄ esịn ke akpan̄kpan̄, onyụn̄ ọtọn̄ọ ndiyet mbet Esie ukot nnyụn̄ nda ukwọhọde-idem emi Enye awan̄de ke n̄kụk n̄kwọhọde mmọ ukot.”—John 13:4, 5.

Ke ufiop ufiop eyo Ufọt Ufọt Edem Usiahautịn eset, mme owo ẹkesiwak ndisịne ana-in̄wan̄ ikpaukot nte mmọ ẹsan̄ade ke ntọn̄-ntọn̄ usụn̄. Ke ẹma ẹkedụk ufọk usụhọde owo, enyeneufọk, emi ọnọde mmọ akpan̄kpan̄ ye mmọn̄ ndida nyet ukot, ọyọkọm mmọ. Ke mme ufọk imọ, ofụn ekesiyet mme owo ukot.—Judges 19:21; 1 Samuel 25:40-42.

Ke ubet enyọn̄, Jesus ye mme apostle esie ikedịghe isen inọ owo. Enyeneufọk ikodụhe ndinọ akpan̄kpan̄, ndien ifụn ikodụhe ndiyet mmọ ukot. Ke ini Jesus ọkọtọn̄ọde ndiyet mmọ ukot, bụt ama anam mme apostle. Sese Enye Emi ekedide akakan ke otu mmọ akanam nsụhọde-n̄kan utom!

Ke akpa, Peter ama esịn ndiyak Jesus eyet enye ukot. Edi Jesus ama asian enye ete: “Edieke mmenyetke fi, afo usan̄ake n̄kpọ ye Ami.” Ke Jesus ama ekeyet kpukpru mme apostle ukot okụre, enye ama ọdọhọ ete: “Nte mbufo [ẹmefiọk] se n̄kanamde mbufo? Mbufo ẹkot Mi Andikpep ye Ọbọn̄, ndien ẹmetịm ẹkot, koro ndide se ẹdọhọde. Edieke Ami ndien, emi ndide Ọbọn̄ ye Andikpep, n̄keyetde mbufo ukot, mbufo nde ẹkpeyet kiet eken ukot. Koro mmọnọ mbufo uwụt-n̄kpọ nte, mbufo nde ẹnam kpa nte Ami n̄kanamde mbufo.”—John 13:6-15.

Jesus ikọtọn̄ọke ido edinam eke ediyet mme owo ukot. Utu ke oro, enye akan̄wam mme apostle esie ndinyene obufa ekikere—eke nsụhọdeidem ye unyịme ndinam mme nsụhọde-n̄kan utom ke ufọn nditọete mmọ. Nte an̄wan̄ade, emi ama an̄wan̄a mmọ. Kere ban̄a se iketịbede ediwak isua ke ukperedem ke ini mbụme aban̄ade edina mbobi ekedemerede. Okposụkedi ẹma “ẹkeneni ediwak eneni,” mbon oro ẹkedude ẹma ẹnam n̄kpọ ke eti ndutịm ẹnyụn̄ ẹkpan̄ utọn̄ ukpono ukpono ẹnọ mme ekikere kiet eken. N̄ko-n̄ko, etie nte ke enye emi eketiede ibuot ke mboho oro ekedi mbet oro James—idịghe kiet ke otu mme apostle, nte nnyịn ikpodoride enyịn, sia mmọ ẹkedude. Ọyọhọ ntọt emi ke mbụk odude ke Utom owụt nte ke mme apostle ẹma ẹnam akwa n̄kọri ke ndiwụt nsụhọdeidem.—Utom 15:6-29.

Ukpepn̄kpọ Odude ọnọ Nnyịn

Ke ndikeyet mme apostle esie ukot, Jesus ama ọnọ okopodudu ukpepn̄kpọ nsụhọdeidem. Ke akpanikọ, mme Christian ikpenyeneke ndikere ke mmimọ idi ata akpan n̄kpọ ndien ke mbon en̄wen ẹkpenyene ndinam n̄kpọ nnọ mmimọ kpukpru ini, mmọ ikponyụn̄ inyeneke udọn̄ ikpọ itie ukpono ye uku. Utu ke oro, mmọ ẹkpenyene nditiene uwụtn̄kpọ Jesus, emi “mîkedịghe, man ẹnam n̄kpọ ẹnọ Enye, edi man Enye anam n̄kpọ ọnọ owo, onyụn̄ ọnọ uwem Esie ndifak ediwak owo.” (Matthew 20:28) Ih, mme anditiene Jesus ẹkpenyene ndinyịme ndinam mme utom oro ẹsụhọrede ẹkan nnọ mbon en̄wen.

Eti ntak ama odu Peter ndiwet nte: “Ẹbọbọ nsụkidem ke idem nte mbọbọ, ẹnam n̄kpọ ẹnọ kiet eken: koro Abasi an̄wan̄wana ye mbon iseri, edi ọfọn ido ye mbon nsụkidem.” (1 Peter 5:5) Ikọ Greek adade ọnọ “ẹbọbọ” oto ikọ emi ọwọrọde “ọfọn̄ emi ofụn ọbọbọde ọbọ mbat,” emi ẹkesitebede ke enyọn̄ nduọ nduọ edisịnen̄kpọ. Ndi ekeme ndidi Peter eketịn̄ aban̄a Jesus ndida ukwọhọdeidem n̄wan̄ ke n̄kụk nnyụn̄ nyet mme apostle esie ukot? Owo ikemeke ndisọn̄ọ emi. Nte ededi, usụhọde utom oro Jesus akanamde ama otụk Peter esịt nte mîkemeke ndifre, kpa nte okpotụkde esịt kpukpru mbon oro ẹyomde ndidi mme anditiene Christ.—Colossae 3:12-14.