Ndiyarade “Owo eke Edide Ata Abiatibet”
“Mbufo ikọt Mi, ẹwọn̄ọ ke esịt, mbak mbufo ẹdibuana ke idiọkn̄kpọ esie, ẹdinyụn̄ ẹtiene ẹbọ mme ufen esie.”—EDIYARADE 18:4.
1, 2. (a) Didie ke ẹkeme ndidiọn̄ọ owo eke edide ata abiatibet? (b) Nso idi ekikere Abasi kaban̄a mbon oro ẹdọhọde ke inam n̄kpọ inọ enye edi oro ẹnyenede ubiomikpe iyịp? (Matthew 7:21-23)
IKỌ Abasi ama ebemiso etịn̄ aban̄a edidi oro “owo eke edide ata abiatibet” edidide. Enye n̄ko ama ebemiso etịn̄ ete ke Ebiereikpe Abasi eke heaven oro, Christ Jesus, ‘eyewot onyụn̄ osobo’ abiatibet emi. (2 Thessalonica 2:3-8) Nte ibuotikọ ẹmi ẹkebemde iso ẹwụtde, owo eke edide ata abiatibet mi edi mme ọkwọrọ ederi Christendom. Ke anyanini ẹmi ẹkebede, mmọ ẹma ẹtop mme akpanikọ Ikọ Abasi ẹduọk ẹnyụn̄ ẹda mme ukpepn̄kpọ ukpono ndem ẹnyene, utọ nte Abasi-Ita-ke-Kiet, hell ikan̄, ye ukpọn̄ ikpaha ke nsinsi. Ke adianade do, mmọ ẹmenam mme n̄kpọ ẹmi ẹdude ke ntuaha ye mme ibet Abasi. Nte mbon oro Paul okodụride Titus utọn̄ aban̄a, “mmọ ẹdọhọ ẹte, mmimọ ifiọk Abasi; edi mmọ ẹkan̄ Enye ke ido mmọ, sia mmọ ẹbiamde mbubiam, ẹnyụn̄ ẹsọn̄de ibuot, ẹnyụn̄ ẹbiarade adan̄a nte mmọ mîkemeke ndinam ndomo eti utom kiet.”—Titus 1:16.
2 Jesus ọkọdọhọ ete: “Ẹkpeme idem ẹbak prọfet abian̄a ẹmi ẹfọrọde ikpaerọn̄ ẹdi ke ọtọ mbufo, kpa ke ini mmọ ẹdide anawụri-ekpe ke esịt mmọ. Mbufo ẹyeda mfri mmọ ẹfiọk mmọ.” Mme prọfet abian̄a ẹsision̄o “idiọk mfri.” (Matthew 7:15-17) Uyarade idiọk mfri oro mme ọkwọrọ ederi ẹsion̄ode ẹdi ata akpakịp ubiomikpe iyịp mmọ. Ke ediwak isua ikie mmọ ẹma ẹnọ mme crusade, ukara ufịk, ye ekọn̄ ẹmi ẹkeduọkde iyịp ediwak million owo ibetedem. Mmọ ẹma ẹbọn̄ akam ẹnọ ẹnyụn̄ ẹdiọn̄ udịmekọn̄ n̄kan̄ mbiba ẹmi mme andibuana ke ido ukpono mmọ ẹkewotde kiet eken. Ke edide isio isio, apostle Paul ama ekeme ndidọhọ ete: “Iyịp owo baba kiet ikọbọke mi.” (Utom 20:26) Mme ọkwọrọ ederi ikemeke nditịn̄ ntre. Ye mme utọ owo oro Abasi ọdọhọ ete: “Ke ini mbufo ẹwakde ndibọn̄ akam, ami n̄kopke: iyịp ọmọyọhọ mbufo ke ubọk.”—Isaiah 1:15.
3. Mme n̄kpọntịbe ewe oro ẹdisịmde ofụri ekondo ẹsan̄a ẹkpere usọp usọp?
3 Ini Abasi ndiwot owo eke edide ata abiatibet ke asan̄a ekpere usọp usọp. Ibịghike, nte Jesus ekebemde iso etịn̄, “akwa ukụt eyedu, orụk eke akanam mîdụhe toto ke editọn̄ọ ererimbot tutu osịm emi, eke mîdinyụn̄ idụhe aba.” (Matthew 24:21) Ini nnanenyịn oro akanam mîdụhe mi editọn̄ọ ye nsobo Akwa Babylon, kpa ukara ererimbot eke nsunsu ido ukpono, emi esịnede mme ido ukpono Christendom. Ukara ukaraidem “[ẹye]biat enye, ẹnyụn̄ ẹnịm enye iferi, ẹnyụn̄ ẹta enye ikpọkidem, ẹnyụn̄ ẹfọp enye ke ikan̄ ẹwot.” (Ediyarade 17:16) Akwa ukụt eyesịm utịt ye nsobo oro ẹdisobode ererimbot Satan oro osụhọde ke Armageddon, kpa “ekọn̄ akwa usen Abasi, Andikara kpukpru n̄kpọ.”—Ediyarade 16:14, 16; 19:11-21.
Mbiomo Edima Mbon En̄wen
4. Nso ke ana mbon oro ẹtuakde ibuot ẹnọ Abasi “ke spirit ye ke akpanikọ” ẹnyene ke ekikere?
4 Sia mme n̄kpọntịbe oro edinyen̄ede ererimbot mi ẹdisịmde mme andidụn̄ isọn̄ ibịghike, mme mbiomo ewe ke mbon oro “[ẹtuakde] ibuot ẹnọ Ete ke spirit ye ke akpanikọ” ẹnyene? (John 4:23) Akpa kan̄a, ana mmọ ẹti ẹte ke Jesus ọkọdọhọ ete: “Edieke mbufo ẹnịmde mbet Mi, mbufo ẹyedụn̄ ke ima Mi; kpa nte Ami n̄konịmde mbet Ete Mi, nnyụn̄ ndụn̄de ke ima Esie. . . . Ibet Mi edi ntem, ete, mbufo ẹma kiet eken, kpa nte n̄kamade mbufo. Baba owo kiet inyeneke ima eke okponde akan enyeemi, owo ndikpayak uwem esie nduọk kaban̄a mme ufan esie. Mbufo ẹdi mme ufan Mi edieke mbufo ẹnamde n̄kpọ eke ntemede mbufo.”—John 15:10-14; 1 John 5:3.
5, 6. (a) Jesus ọkọnọ mme mbet esie uyo ete ẹnam nso oro edinamde ẹdiọn̄ọ mmọ? (b) Ke nso usụn̄ifiọk ke emi ekedi obufa ibet?
5 Mme Christian akpanikọ ke ntem ẹnyene mbiomo edima mbọn en̄wen, akpan akpan nditọete iren ye iban Christian mmọ ke kpukpru idụt. (Utom 10:34; Galatia 6:10; 1 John 4:20, 21) Ke akpanikọ, ana ekemmọ mme Christian ẹnyene ‘ufiop ufiop ima ẹnọ kiet eken.’ (1 Peter 4:8) Orụk ima oro ke udomo eke ofụri ererimbot anam ẹdiọn̄ọ mmọ nte mme ata andituak ibuot, koro Jesus ọkọdọhọ ete: “Mmọnọ mbufo obufa ibet nte, Mbufo ẹma kiet eken; nte, mbufo nde ẹma kiet eken kpa nte n̄kamade mbufo. Mbufo ẹma ẹma kiet eken, kpukpru owo ẹyeda oro ẹfiọk ẹte mbufo ẹdi mbet Mi.”—John 13:34, 35.
6 Nso ikedi obufa ke ibet oro? Ke idak Ibet Moses nte owo ikọnọhọ mme Jew uyo ite, “Ma mbọhọidụn̄ fo nte idemfo”? (Leviticus 19:18) Ih, edi Jesus ama owụt udiana n̄kpọ efen ke ini enye ọkọdọhọde ete, “Kpa nte n̄kamade mbufo.” Ima esie ama esịne enye ndiyak uwem esie nnọ kaban̄a mbon en̄wen, ndien ana mbet esie ẹnyịme ndinam kpasụk ntre. (John 15:13) Oro ekedi ima oro okon̄de akan ke udomo, sia owo mîkoyomke utọ uwa ntre ke Ibet Moses.
7. Ewe ido ukpono inịm ibet ima ke isua ikie emi?
7 Ke isua ikie nnyịn, ewe ido ukpono onịm ibet ima emi? Ke akpanikọ idịghe mme ido ukpono Christendom, koro mmọ ẹma ẹwot kiet eken ke ediwak million ke ekọn̄ ererimbot iba oro ẹken̄wanade ye ke mme en̄wan eken. Edi Mme Ntiense Jehovah ẹnịm ibet ima ke ofụri isọn̄. Mmọ ẹmemụm ata edida san̄asan̄a ẹkama ke ekọn̄ oro mme idụt ẹn̄wanade, koro Jesus ọkọdọhọde ete ke inaha mme anditiene imọ ẹdi “eke ererimbot.” (John 17:16) Ntem, mmọ ẹkeme ndidọhọ, kpa nte Paul ọkọdọhọde, ẹte ke “iyịp owo baba kiet ikọbọke” mmimọ. Nte uwụtn̄kpọ, tịmfiọk ntọn̄ọ ntọn̄ọ ikọ ubiere oro ikọt Jehovah ẹkenyịmede ke mbono oro ẹkenịmde ke Washington, D.C., ke November 27, 1921:
“Nte mme Christian oro ẹn̄wanade ke esịt akpanikọ nditiene mme ukpepn̄kpọ Christ Jesus Ọbọn̄ nnyịn ye mme Apostle esie, nnyịn idọhọ ite: ke ekọn̄ edi ata idiọk afai, se ibiatde-biat nti ido uwem ye n̄kpọ esuene ọnọ mbon oro ẹdide Christian; ke mme edumbet oro Ọbọn̄ Jesus Christ ẹkekpepde akpan mme Christian oro ẹma ẹkeyak idem ẹnọ ndibuana ke ekọn̄, uduọkiyịp m̀mê afai ke uduot ekededi.”
8. Nso ke n̄wetnnịm mbụk etịn̄ aban̄a Mme Ntiense Jehovah ke ini Ekọn̄ Ererimbot II?
8 Didie ke ẹkeda ekikere oro ẹsịn ke edinam ke ini Ekọn̄ Ererimbot II? Ke ndiọk n̄kan ekọn̄ eke ofụri mbụk ubonowo oro, ẹma ẹwot n̄kpọ nte million owo 50. Edi owo Ntiense Jehovah ndomokiet ikowotke baba owo kiet! Ke uwụtn̄kpọ, se ikperede ndidi kpukpru mme ọkwọrọ ederi ke Germany ẹma ẹnọ ukara Nazi ibetedem ọyọhọ ọyọhọ m̀mê ubak ubak. Ke edide isio, Mme Ntiense Jehovah ẹmi ẹkedude ke idak ukara Nazi ẹma ẹnen̄ede ẹda san̄asan̄a ẹnyụn̄ ẹsịn nditoro Hitler m̀mê nditiene mbuana ke udịmekọn̄ esie. Ntem, mmọ ikowotke nditọete mmọ eke spirit ekededi ẹmi ẹdude ke idụt en̄wen, m̀mê owo en̄wen ekededi ke ntak oro. Ndien Mme Ntiense Jehovah ke kpukpru idụt eken ẹma ẹmụm edida san̄asan̄a ẹkama n̄ko.
9. Nso ikotịbe inọ Mme Ntiense Jehovah ke Germany ye Austria ke idak ukara Nazi?
9 Ediwak Ntiense Jehovah ẹma ẹduọk uwem mmọ ke ibuot mme ufan mmọ ke n̄kopuyo nnọ ibet ima. Ndụn̄ọde emi ẹnamde ke n̄wed oro Kirchenkampf in Deutschland (En̄wan oro Mme Ufọkederi Ẹn̄wanade ke Germany), oro Friedrich Zipfel ewetde, etịn̄ aban̄a Mme Ntiense ete: “Ukara N̄kaowo eke Idụt [Nazi] ama ọkọbọ mme andibuana ke ekpri otu ido ukpono emi ke mbahade anan̄-ye-efụteba eke ikie. Ẹma ẹwot mbahade ita ke otu mmọ, ke editop ke ikan̄, ke afai afai edinam eken, biọn̄, udọn̄ọ, m̀mê ke ọkpọsọn̄ utom. Ọkpọsọn̄ ufen emi ikenyeneke mbiet okonyụn̄ oto ntak unana edikan̄ mbuọtidem emi mîkodụhe ke n̄kemuyo ye ekikere Ukara N̄kaowo eke Idụt.” Ke Austria, mbahade 25 eke ikie ke otu Mme Ntiense Jehovah ẹdi se ẹkemiade tutu osịm n̄kpa, mîdịghe ẹkpade ke ntak udọn̄ọ m̀mê mmemidem ke nna ekikere Nazi.
10. Nso mbuọtidem ke mbon oro ẹkekpan̄ade ke ntak edinịm ibet ima, ẹkenyene?
10 Mbon oro ẹwotde ke ntak ẹnịmde ibet ima ẹnyene mbuọtidem nte ke “Abasi ikwan̄ake nte efrede utom [mmọ] ye ima enyịn̄ Esie eke [mmọ] ẹwụtde.” (Mme Hebrew 6:10) Mmọ ẹma ẹdiọn̄ọ ẹte ke “ererimbot ke ebebe efep, ye mbumek esie; edi owo eke anamde se Abasi amade odudu ke nsinsi.” (1 John 2:17) Mmọ ẹma ẹnyene ọyọhọ idotenyịn ẹte ke ẹyenam mmimọ iset ididu uwem | ke nsinsi.—John 5:28, 29; Utom 24:15.
11. Ke nso usụn̄ ke mme asan̄autom Jehovah ẹdi n̄wọrọnda, ndien ewe prọfesi isu mmọ ke idem?
11 Mme asan̄autom Abasi ẹdi n̄wọrọnda ke ndinịm ewụhọ oro Peter ye mme apostle eken ẹkesiande esop enyọn̄ ete: “Nnyịn inyene ndikop uyo Abasi n̄kan uyo owo.” (Utom 5:29) Sia Mme Ntiense Jehovah ẹnamde emi, “edisana spirit, emi Abasi ọnọde mmọemi ẹkopde uyo Esie,” ọnọ mmọ ibetedem. (Utom 5:32) Edi odudu emi an̄wam mmọ ndisu prọfesi oro odude ke Isaiah 2:2-4. Enye ama ebemiso etịn̄ ete ke ẹyefiak ẹwụk utuakibuot akpanikọ ke eyo nnyịn ye nte ke mme owo ẹtode kpukpru idụt ye ido ukpono ẹyebụn̄ọ ẹka do. Utịp kiet edidi nte ke: “Mmọ ẹyeda ofụt mmọ ẹdom n̄kpọ ufụn̄isọn̄, ẹda eduat mmọ ẹdom ikwa udiọn̄ vine: idụt idimenke ofụt itiene idụt, mmọ idinyụn̄ ikpepke aba ekọn̄.” Sia mme asan̄autom Abasi ẹtịmde idem ndidu uwem ke emem emem obufa ererimbot, mmọ idikpepke aba ekọn̄. Mmọ ẹkpep ibet ima.—John 13:34, 35.
12. Nso ke ana mbon oro ẹnịmde ibet ima ẹnam ẹnọ mbon en̄wen?
12 Sia ima Christian esịnede ‘ndima mbọhọidụn̄ fo nte idemfo,’ mme asan̄autom Abasi ikemeke ndidi ibụk kaban̄a se mmọ ẹdiọn̄ọde. (Matthew 22:39) Ediwak owo en̄wen ẹsụk ẹdodu ẹmi ẹkpemade ndinam n̄kpọ Abasi nnyụn̄ ndu uwem ke obufa ererimbot esie. Ke adan̄aemi ini osụk odude, mmọemi n̄ko ẹnyene ndikpep n̄kpọ mban̄a ibet ima ye ediwak akpanikọ eken oro ẹnyenede ebuana ye Andikara Ofụri Ekonde, Jehovah Abasi. Ana ẹkpep mmọ nte ke Jehovah ikpọn̄îkpọn̄ odot ndibọ utuakibuot nnyịn ye nte ẹkpewụtde utọ utuakibuot ntre. (Matthew 4:10; Ediyarade 4:11) Mbon oro ẹma ẹkekpekpep n̄kpọ ẹmi ẹnyene mbiomo editịn̄ nnọ mbon en̄wen mban̄a mmọ man otodo mmọ n̄ko ẹkpekeme ndibọ mfọn Jehovah.—Ezekiel 33:7-9, 14-16.
Ndiyarade Owo eke Edide Ata Abiatibet
13. Nte ubak ikọ ntiense oro inọde ke ofụri ererimbot, nso ke ana nnyịn inam ẹdiọn̄ọ, ndien ntak-a?
13 Jesus ọkọdọhọ ete ke “ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.” (Matthew, 24:14) Nte ubak ikọ ntiense emi ẹnọde ke ofụri ererimbot, mme asan̄autom Abasi ẹnyene mbiomo edinam ẹdiọn̄ọ ubiereikpe esie ke idem nsunsu ido ukpono, akpan akpan mme ọkwọrọ ederi Christendom. Mmọemi ẹnen̄ede ẹnyene nduduọhọ ke enyịn Abasi sia mmọ ẹdọhọde ke idi Christian. Ana ẹyarade mmọ man otodo mbon oro ẹyomde ndinam n̄kpọ Abasi ẹkeme ndiwọrọ ke idak ukara mmọ ẹnyụn̄ ẹkeme ndinam nnennen usio-ukot kaban̄a edinyan̄a. Nte Jesus ọkọdọhọde ete: “Akpanikọ eyenyụn̄ anam mbufo ẹwọrọ ufụn.”—John 8:32.
14. Nso in̄wan̄în̄wan̄ etop ke ana ẹtan̄a kaban̄a nsunsu ido ukpono?
14 Ntem, ana Mme Ntiense Jehovah ẹnam ẹdiọn̄ọ etop eke odudu spirit emi aban̄ade nsunsu ido ukpono: “Mbufo ikọt Mi, ẹwọn̄ọ ke esịt, mbak mbufo ẹdibuana ke idiọkn̄kpọ esie, ẹdinyụn̄ ẹtiene ẹbọ mme ufen esie; koro mme idiọkn̄kpọ esie ẹma ẹboho ẹkon̄ ẹsịm enyọn̄, Abasi omonyụn̄ eti mme ukwan̄n̄kpọ esie. . . . Ke usen kiet ke mme ufen ẹdibuat enye, n̄kpan̄a ye ntuan̄a ye akan̄; ẹyenyụn̄ ẹfọp enye ke ikan̄; koro Ọbọn̄ Abasi, emi ekpede ikpe ye enye, edide Ọkpọsọn̄.”—Ediyarade 18:4-8.
15. Didie ke isua 1914 ekenyene n̄kpọ ndinam ke ubatini Jehovah, ndien nso ikotịbe ke Ekọn̄ Ererimbot I ebede?
15 Mme prọfesi Bible ẹwụt ẹte “ke ukperedem ini” eke editịm n̄kpọ emi ọkọtọn̄ọ ke isua nnanenyịn oro, 1914. (2 Timothy 3:1-5, 13; Matthew 24:3-13) Ọtọn̄ọde ke isua oro nnyịn idu ke “utịt ini.” (Daniel 12:4) Ndondo oro Ekọn̄ Ererimbot I okụrede, ke n̄kemuyo ye ubatini Jehovah, mme asan̄autom esie ye ifịk ẹma ẹtọn̄ọ nditat ntọt oro mmọ ẹtọtde ẹban̄a Obio Ubọn̄ Abasi nte ẹkebemde iso ẹtịn̄ ke Matthew 24:14. Mmọ n̄ko ẹma ẹtọn̄ọ ndiyarade nsunsu ido ukpono ata ọkpọsọn̄ ọkpọsọn̄, akpan akpan abiatibet otu mme ọkwọrọ ederi Christendom oro ẹdide mbon mfiakedem.
16. Didie ke ediyarade oro ẹyararede owo eke edide ata abiatibet ọkọri ke odudu ke se ibede isua 70?
16 Ke se ibede isua 70 idahaemi, ye ukeme oro okponde-kpon akan, mme asan̄autom Abasi ẹmefọi mme owo ẹwụt abian̄a abian̄a edinam oro owo eke edide ata abiatibet anamde. Ibat ibat tọsịn Ntiense ifan̄ ẹkenam emi ke ini Ekọn̄ Ererimbot I okokụrede. Edi idahaemi mmọ ẹmekabade ẹdi “ọkpọsọn̄ idụt” eke mme ifịk ifịk asan̄autom ẹwakde ẹbe million ita ye ubak oro ẹtịmde ẹdọn̄ ke se ibede esop 60,000 ke ofụri isọn̄. (Isaiah 60:22) Ke ntatara udomo, mme asan̄autom Abasi ke ẹtan̄a Obio Ubọn̄ Abasi ye ifiopesịt nte n̄kukụre idotenyịn ubonowo, ndien, ke ukem ini oro, ke ẹyarade mme ọkwọrọ ederi ke se mmọ edide—abian̄a abian̄a owo eke edide ata abiatibet.
Ntak Ọsọn̄de Odudu Ntre?
17. Ntak emi mme asan̄autom Jehovah ẹyarade owo eke edide ata abiatibet odudu odudu-e?
17 Ntak emi mme asan̄autom Abasi ẹsọn̄de odudu ntre ke ndiyarade owo eke edide ata abiatibet ke ofụri isua ẹmi-e? Koro ana ẹkpeme ediwak million erọn̄ Jehovah oro ẹdide akwa otuowo oro ẹdude ke usụn̄ edinyan̄a mbak ererimbot Satan ye nsunsu ido ukpono esie. (John 10:16; Ediyarade 7:9-14) Akande oro, ke owo mîyarakede mme ọkwọrọ ederi, mme ẹnyene esịt akpanikọ oro mîkabakede idi ubak erọn̄ Abasi kan̄a ididiọn̄ọke nte ẹkemede ndifep idem ke idiọk usụn̄. Ntre ana ẹsian mmọ, kpasụk nte Jesus akasiande mme owo ke ini enye eketịn̄de aban̄a mbubịk mbubịk mme adaiso ido ukpono eke eyo esie ete: “Mmọ ẹdi nnan mme adausụn̄. Ndien nnan ama ada nnan usụn̄, mmọ mbiba ẹyeduọn̄ọ ke ukpe.”—Matthew 15:13b, 14; se n̄ko 2 Corinth 4:4; 11:13-15.
18. Nso ke ana mbon oro ẹyomde akpanikọ ẹdiọn̄ọ?
18 Mme ọkwọrọ ederi ẹdi ubak ererimbot Satan. (John 8:44) Edi enye edi ererimbot oro Abasi edisọhide efep ibịghike. (2 Peter 3:11-13; 1 John 2:15-17) Ntem ikọ Abasi odụri owo utọn̄ ete: “Mmọdo owo ekededi eke oyomde ndidi ufan ye ererimbot anam idem usua ye Abasi.” (James 4:4) Mme ọkwọrọ ederi ẹmefụmi ntọt oro ẹnyụn̄ ẹkaiso ndinọhọ ke mme mbubehe ukaraidem. Mmọ ẹsitịn̄ ẹnọ mme anditiene mmọ ẹte ke mme ukeme oro mme akara ukaraidem ẹsịnde eyeda eti ererimbot edi. Oro edi abian̄a abian̄a idotenyịn, sia ererimbot oro odude ke idak Satan mi ke anam isan̄ aka utịt esie. Ntem ẹbabian̄a mme owo oro ẹkọn̄de idotenyịn ke ererimbot emi. Oyom ẹtịn̄ ẹnọ mmọ akpanikọ oro aban̄ade ebiet emi ererimbot anamde isan̄ aka ye se ididade itie esie.—Mme N̄ke 14:12; 19:21; Matthew 6:9, 10; Ediyarade 21:4, 5.
19. Didie ke ẹkeyarade edu ererimbot oro ndusụk ọkwọrọ ederi ẹnyenede ke n̄wedmbụk n̄kpọntịbe ke ndondo emi?
19 Ẹma ẹkam ẹyarade edu ererimbot oro ndusụk ọkwọrọ ederi ẹnyenede ke n̄wedmbụk n̄kpọntịbe ke ndondo emi, nte uwụtn̄kpọ, oburobụt ye ọkpọmiọk ọkpọmiọk usụn̄uwem ndusụk mme ọkwọrọ ederi TV. Ewetikwọ eyomfịn kiet ama ewet ikwọ kiet ke ibuotikọ oro: “Ndi Jesus Ọkpọbọbọ [n̄kanika ubọk] Rolex oro Akpade [$10,000] ke Edinam Television Esie?” Ikwọ oro akaiso ndidọhọ ete: “Nte Jesus ekpedi owo ukara edieke enye akpafiakde edi isọn̄, enyene udiana ufọkidụn̄ Esie ke [ọkpọmiọk ọkpọmiọk] Palm Springs onyụn̄ odomo ndidịp se Enye enyenede?” Ke adianade do, mme ọkwọrọ ederi efen efen ẹnyịme mîdịghe ẹbuana ke idan̄-ukem-uduot. Idem idahaemi Ufọkederi Catholic ke United States ke ekpe ediwak million dollar nte isop ke ntak ubiomikpe oro mme oku ẹnyenede ke ndisabade nditọn̄wọn̄.—Rome 1:24-27; 1 Corinth 6:9, 10.
20. Ntak emi anade mme asan̄autom Abasi ẹkaiso ndiyarade owo eke edide ata abiatibet-e?
20 Mme asan̄autom Abasi ikemeke ndifụmi utọ idiọk edinam ntre edi ana ẹyarade ke ufọn mbon en̄wen. Ana ẹkpeme akwa otuowo ẹdide mme erọn̄ en̄wen ẹsio ke ubọk mbon oro ẹdomode ndida mmọ usụn̄ man ẹbiat mme ibet Abasi. Ndien oyom ẹyom mbon oro “ẹsemede ẹnyụn̄ ẹtuade ẹban̄a kpukpru mbubiam ido ẹmi . . . ẹnamde” ẹnyụn̄ ẹtan̄ mmọ ẹbok ke idak ukpeme eke ndausụn̄ Akwa Ekpemerọn̄, Jehovah Abasi, ye “eti ekpemerọn̄,” Christ Jesus.—Ezekiel 9:4; John 10:11; Mme N̄ke 18:10.
21. Nso ke Mme Ntiense Jehovah ẹdikaiso ẹtan̄a?
21 Ntre, ikọt Abasi idimen̄eke nditan̄a usiene esie ndori ofụri ererimbot Satan ke idem, esịnede owo eke edide ata abiatibet esie, kpa mme ọkwọrọ ederi Christendom. Ye odudu, mmọ ẹyetan̄a etop angel ke Ediyarade 14:7 ẹte: “Mbufo ẹten̄e Abasi, ẹnyụn̄ ẹnọ Enye ubọn̄; koro ekem ini ikpe Esie.” Ndien editan̄a oro mmọ ẹtan̄ade mi eyesịne usọp usọp ntọt oro odude ke Ediyarade 18:4 emi aban̄ade nsunsu ido ukpono ete: “Mbufo ikọt Mi, ẹwọn̄ọ ke esịt, mbak mbufo ẹdibuana ke idiọkn̄kpọ esie, ẹdinyụn̄ . . . ẹbọ mme ufen esie.”
Mme Mbụme Ndụn̄ọde:
◻ Nso iditịbe nọ owo eke edide ata abiatibet, ndien ntak-a?
◻ Nso mbiomo ke mme asan̄autom abasi ẹnyene kaban̄a mbon en̄wen?
◻ Didie ke iyịp owo baba kiet mîkọbọke ikọt Jehovah?
◻ Ana nnyịn inam nso kaban̄a Akwa Babylon?
◻ Ntak emi nnyịn idikade iso ke ndinọ okopodudu etop nnyịn oro aban̄ade owo eke edide ata abiatibet-e?
[Ndise ke page 23]
Mme apostle ẹkesian esop enyọn̄ ẹte: “Nnyịn inyene ndikop uyo Abasi n̄kan uyo owo”
[Ndise ke page 24]
Oyom mme owo ẹmi ẹnyenede esịt akpanikọ ẹdiọn̄ọ ebiet emi ererimbot ye mme ido ukpono esie ẹnamde isan̄ ẹka