‘Ndinyene Ifiọk Aban̄ade Abasi ye Jesus’
“NDIEN nsinsi uwem oro edi ndifiọk Fi, ata Abasi kierakiet, ye Enyeemi Afo ọkọdọn̄de, kpa Jesus Christ.” (John 17:3) Ntre ke Jesus eketịn̄ ke akam oro enye ọkọbọn̄de ọnọ Ete esie ke heaven, ndien ke usụn̄ emi enye ama owụt akpan n̄kpọ kiet oro ẹyomde ke owo ndinyene nsinsi uwem. Nte ededi, ntak emi New World Translation akabarede ufan̄ikọ emi “ndinyene ifiọk aban̄ade . . . Abasi” utu ke “ndifiọk . . . Abasi,” nte ekese edikabade Bible eken ẹsịnde enye?—Se n̄ko ikọ idakisọn̄ ke John 17:3.
Ikọ Greek oro ẹkabarede mi nte ‘nyene ifiọk’ m̀mê “fiọk” edi orụk ikọedinam gi·noʹsko. Ndien ẹnọ edikabade ke New World Translation man osio se ikọ oro ọwọrọde edi ọyọhọ ọyọhọ nte ekekeme. Ata se gi·noʹsko ọwọrọde edi “[ndi]fiọk,” edi ikọ Greek oro enyene nsio nsio n̄kpri ukpụhọde ke se enye ọwọrọde. Tịmfiọk mme edikabade oro ẹtienede mi:
“GINŌSKŌ (γινώσκω) owụt ndikaiso nnyene ifiọk, ndidi ndifiọk, diọn̄ọ, fiọk, m̀mê ndifiọk n̄kpọ ọyọhọ ọyọhọ.” (Expository Dictionary of New Testament Words, eke W. E. Vine) Ntem, ndikabade gi·noʹsko ‘ndinyene ifiọk’ idịghe ‘edikpụhọde Bible’ nte mme okụt ndudue nnọ New World Translation ẹdọhọde. Ke nneme aban̄ade n̄kpri ukpụhọde oro odude ke se enye ọwọrọde emi ikọ oro ekemede ndinyene, ọwọrọetop ewet n̄wed ukabadeikọ oro, James Hope Moulton ọdọhọ ete: “Mmemmem, γινώσκειν, idahaemi akaka iso, ‘ndika iso nnyene ifiọk.’”—A Grammar of New Testament Greek.
A Grammatical Analysis of the Greek New Testament anam gi·noʹsko an̄wan̄a nte odude ke John 17:3 nte “owụtde edinam oro akade-kaiso.” N̄kaiso editịn̄ mban̄a ikọ Greek emi odu ke Word Studies in the New Testament, eke Marvin R. Vincent. Enye ọdọhọ ete: “Nsinsi uwem esịne ke ifiọk, m̀mê ke edibịne ifiọk, sia ikọ oro adade ọnọ edinam idahaemi owụtde ifiọk oro akade-kaiso, n̄kọri.” (Sịghi sịghi ubọkn̄wed edi eke esie.) Word Pictures in the New Testament eke A. T. Robertson ọnọ ekikere ndikabade ikọ oro nte “ẹkpenyene ndika iso mfiọk.”
Ke ntre, ke akpasarade ikọ Greek, ikọ Jesus oro ke John 17:3 owụt n̄kaiso ukeme man ẹfiọk ata Abasi ye Eyen esie, Jesus Christ, ndien emi edi se ẹwụtde mfọn mfọn ke edikabade oro ke New World Translation. Nnyịn inyene ifiọk emi ebe ke ndikpep Ikọ Abasi ifịk ifịk ye ke ndisụk ibuot nnam uwem nnyịn ekekem ye mme edumbet esie. (Men Hosea 4:1, 2; 8:2; 2 Timothy 3:16, 17 domo.) Nso eti utịp ina ibet mbon oro ẹtịmde ẹmehe ye edu Abasi ye eke Eyen esie ndien ekem ẹdomode ndikpebe mmọ? Nsinsi uwem!