Mme Mbụme Ẹtode Mme Andikot

“Enyọn̄-Ukpeme” eke November 1, 1995, okowụk ntịn̄enyịn ke se Jesus eketịn̄de aban̄a “emana emi,” nte nnyịn ikotde ke Matthew 24:34. Ndi emi ọwọrọ ete ke eyịghe ekededi odu kaban̄a m̀mê ẹma ẹwụk Obio Ubọn̄ Abasi ke heaven ke 1914?

Nneme oro ke Enyọn̄-Ukpeme ikpụhọkede n̄kpọ ndomokiet ke akpan ukpepn̄kpọ nnyịn aban̄ade 1914. Jesus ama ọnọ idiọn̄ọ oro ediwụtde edidu esie ke odudu Obio Ubọn̄. Nnyịn imenyene uyarade oro ekemde nte ke idiọn̄ọ emi omosu toto ke 1914. Mme akpanikọ ẹban̄ade mme ekọn̄, akan̄, ndiọi udọn̄ọ, mme unyekisọn̄, ye mme uyarade eken ẹwụt ẹte ke toto ke 1914, Jesus ke anam utom nte Edidem Obio Ubọn̄ Abasi. Emi owụt ete ke toto ke ini oro nnyịn idu ke utịt editịm n̄kpọ emi.

Nso, ndien, ke Enyọn̄-Ukpeme oro akanam an̄wan̄a? Nte ededi, ukpọhọde ekedi usụn̄ifiọk emi Jesus akadade ikọ oro “emana” etịn̄ ikọ ke Matthew 24:34. Ufan̄ikọ oro okot ete: “Ke akpanikọ ke ndọhọ mbufo, Emana emi idibehe ifep tutu kpukpru n̄kpọ ẹmi ẹwọrọ ẹsu.” Nso ke Jesus nditịn̄ mban̄a “emana” ọkọwọrọ, ke eyo esie ye ke eyo nnyịn?

Ediwak itien̄wed Abasi ẹsọn̄ọ nte ke Jesus ikadaha “emana” itịn̄ ikọ iban̄a ndusụk ekpri m̀mê san̄asan̄a otu, edide n̄kukụre mme adaiso mme Jew m̀mê mme anam-akpanikọ mbet esie kpọt. Utu ke oro, enye akada “emana” etịn̄ ikọ ndibiom otu mme Jew oro ẹkesịnde enye ikpe. Nte ededi, ke idara, mme owo ẹkeme ndinam se apostle Peter ekesịnde udọn̄ ọnọ ke usen Pentecost, ẹkabade esịt ẹnyụn̄ “ẹnyan̄a idem . . . ẹsio ke n̄kwan̄a emana emi.”—Utom 2:40.

Ke ikọ oro, nte an̄wan̄ade, Peter ikowụtke akpan isua emana m̀mê uniọn̄ ini, m̀mê enye ndimen “emana” oro n̄kabuan ye akpan usenọfiọn̄. Enye ikọdọhọke mme owo ẹnyan̄a idem ẹsio ke emana oro akamanade ke ukem isua oro Jesus akamanade m̀mê oro akamanade ke 29 E.N. Peter eketịn̄ aban̄a mme Jew oro mîkenịmke ke akpanikọ ke ini oro—ekemede ndidi ndusụk ẹkedi ata n̄kpri, mbon eken ata ikpọ owo—ẹmi ẹkekopde ukpepn̄kpọ Jesus, ẹkekụtde m̀mê ẹkekopde ẹban̄a mme utịben̄kpọ esie, ndien inyịmeke enye nte Messiah.

Oro edi nte Jesus ndida ikọ oro “emana” ntịn̄ ikọ akan̄wan̄ade Peter ke ini enye ye mme apostle ita eken ẹkedude ye Jesus ke Obot Olive. Nte ekemde ye ntịn̄nnịm ikọ Jesus, mme Jew ini oro—akpan akpan, mbon eyo Jesus—ẹkenyene ndikụt m̀mê ndikop mban̄a mme ekọn̄, mme unyekisọn̄, akan̄, ye mme uyarade eken nte ke utịt editịm n̄kpọ mme Jew ama ekpere. Ke akpanikọ, emana oro ikebehe ifep mbemiso utịt ekedide ke 70 E.N.—Matthew 24:3-14, 34.

Ana inyịme nte ke nnyịn kpukpru ini ikesidaha mme ikọ Jesus ke usụn̄ifiọk oro. Mme anana mfọnmma owo ẹnyene ntụhọ ediyom ndifiọk nnennen ini emi utịt edidide. Ti ete ke idem mme apostle ẹma ẹyom ata nnennen ini, ẹbụpde ẹte: “Ọbọn̄, nte Afo ọmọn̄ ọtọn̄ọ ntak ayak Obio Ubọn̄ ọnọ Israel kemi?” (Sịghisịghi ubọkn̄wed edi eke nnyịn.)—Utom 1:6.

Ye ukem eti uduak oro, mme asan̄autom Abasi ke eyomfịn ẹdomo ndinyene nnennen ini nto se Jesus eketịn̄de aban̄a “emana” ebe ke nditọn̄ọ ke 1914 mbat ini. Ke uwụtn̄kpọ, ekikere kiet edi nte ke emana ekeme ndidi isua 70 m̀mê 80, emi mme owo oro ẹkponide ẹkem ndifiọk se akpa ekọn̄ ererimbot ye mme n̄kpọntịbe eken ẹkewọrọde, ẹnamde; ntem nnyịn imekeme ndida oro mbat nte utịt ekperede.

Inamke n̄kpọ m̀mê ekikere oro ọkọfọn adan̄a didie, ndi enye ama ekem ye item oro Jesus akakade iso ọnọ? Jesus ọkọdọhọ ete: “Baba owo kiet ifiọkke iban̄a usen oro m̀mê hour oro, kpa mme angel ke heaven, Eyen inyụn̄ ifiọkke, ke mîbọhọke Ete ikpọn̄. . . . Ẹkpeme ndien: koro mbufo mîfiọkke usen eke Ọbọn̄ mbufo edide.”—Matthew 24:36-42.

Ntre ntọt eke ndondo emi ke Enyọn̄-Ukpeme aban̄ade “emana emi” ikpụhọkede ifiọk oro nnyịn inyenede iban̄a se iketịbede ke 1914. Edi enye ọnọ nnyịn ifiọk oro etịmde an̄wan̄a akan kaban̄a Jesus ndida ikọ oro “emana,” an̄wamde nnyịn ndikụt nte ke enye ndida ikọ oro ikedịghe isọn̄ ndida mbat—itọn̄ọde ke 1914 ibat—adan̄a nte nnyịn ikperede utịt.