Ntak Emi Mme Ntiense Jehovah Mîsitieneke Inam Mme N̄kpọ Emi Ẹsinamde Man Ẹkpono Idụt Mmọ?
Mme Ntiense Jehovah ẹsikpono ukara, mmọ isinyụn̄ isehe idiọn̄ọ idụt mmọ ke mbio. Nnyịn isiyatke esịt ke ini mbon en̄wen ẹn̄wọn̄ọde ke ida ye idụt mmimọ, ẹkọmde flag m̀mê ẹkwọde national anthem.
Edi, Mme Ntiense Jehovah isitieneke inam mme n̄kpọ oro mme owo ẹsinamde man ẹkpono idụt mmọ sia idịghe se Bible ekpepde edi oro. Imesiyom mme owo ẹkpono se ibierede emi ukem nte isinyụn̄ ikponode se mbon en̄wen ẹbierede n̄ko.
Ke ibuotikọ emi
Nso ke Bible etịn̄ aban̄a n̄kpọ emi?
N̄kpọ iba emi an̄wam nnyịn idiọn̄ọ se ikpebierede:
Abasi ikpọn̄ ke ana ituak ibuot inọ. Bible ọdọhọ ete: “Edi Jehovah Abasi fo ke ana afo atuak ibuot ọnọ, onyụn̄ edi enye ikpọn̄ ke ana afo anam edisana utom ọnọ.” (Luke 4:8) Ntre ndikwọ national anthem nnyụn̄ ndian ubọk ke esịt n̄n̄wọn̄ọ ke ida ye idụt nnyịn ọwọrọ ke imama idụt nnyịn ikan owo m̀mê n̄kpọ en̄wen ekededi. Ntre Mme Ntiense Jehovah ẹda ke ifọnke mmimọ itiene inam mme utọ n̄kpọ oro.
Mme Ntiense Jehovah ẹda ndikọm flag nte ndituak ibuot nnọ flag mîdịghe ndikpono flag, ndien Bible akpan utọ n̄kpọ oro. (1 Corinth 10:14) Ndusụk mme ewetmbụk eset ẹdọhọ ke flag edi idiọn̄ọ ido ukpono. Ewetmbụk eset emi ekerede Carlton J. H. Hayes ekewet ete: ‘Flag etie nte idiọn̄ọ ido ukpono ke mme idụt kiet kiet, ndien ndisikọm flag edi ndituak ibuot nnọ idiọn̄ọ idụt oro.’ a Ewetn̄wed kiet emi ekerede Daniel P. Mannix eketịn̄ ntem aban̄a mme Christian eyo mme apostle: ‘Mme Christian oro ikesimaha ndiwa uwa nnọ Akwa Edidem Rome, ndien oro onyụn̄ etie nte nditre ndikọm flag idahaemi.’b
Kpa ye oro Mme Ntiense Jehovah mîsikọmke flag, mmọ isiwakke flag, ifọpke flag, m̀mê ndinam n̄kpọ en̄wen emi owụtde ke mmọ ikponoke flag oro m̀mê idiọn̄ọ idụt mmọ ekededi.
Abasi ada kpukpru owo ukem ukem. (Utom 10:34, 35) Bible ọdọhọ ke Abasi “anam kpukpru idụt ubonowo ẹwọn̄ọ ẹto owo kiet.” (Utom 17:26) Ntre, Mme Ntiense Jehovah ẹnịm ke ifọnke ẹda ke idụt kiet m̀mê ekpụk kiet ọfọn akan enye eken. Mme Ntiense Jehovah ẹsikpono kpukpru owo ọkpọkọm mmọ ẹdụn̄ ke m̀mọ̀n̄ m̀mê ẹnyụn̄ ẹto m̀mọ̀n̄.—1 Peter 2:17.
Nso edieke ibet ọdọhọde ke ana Mme Ntiense Jehovah ẹtiene ẹnam?
Mme Ntiense Jehovah isuaha ukara ndomokiet. Mmọ ẹnịm ke ukara oro odude edi “ndutịm Abasi.” (Rome 13:1-7) Mmọ ẹnịm n̄ko ke akpana mme Christian ẹsụk ibuot ẹnọ ukara.—Luke 20:25.
Edi nso edieke ibet ọdọhọde ẹnam se Abasi mîmaha? Ndusụk ini, Mme Ntiense Jehovah ẹsiwet ẹdọhọ ukara ẹkpụhọ ndusụk ibet m̀mê ẹnam afiak efere.c Edieke owo mîkpụhọkede n̄kpọ ndomokiet ke ibet, Mme Ntiense Jehovah ẹsisụhọde idem ‘ẹkop uyo Abasi nte andikara utu ke uyo owo.’—Utom 5:29.
Ndi Mme Ntiense Jehovah ẹnyene ebiet emi mmọ ẹdade ẹnọ ke n̄kpọ ukara m̀mê mmọ ẹdomo ndiwụt ke mmimọ imaha se ukara ẹnamde?
Ihih. Mme Ntiense Jehovah isisịnke idem ke n̄kpọ pọlitiks isinyụn̄ iwụtke ke mmimọ imaha se ukara ẹnamde. Nnyịn nditre ndikwọ national anthem, ndian ubọk ke esịt n̄n̄wọn̄ọ ke ida ye idụt nnyịn, mîdịghe n̄kọm flag iwọrọke ke idi n̄ka emi ẹsin̄wanade ye ukara. Utu ke oro, isinam se Bible etịn̄de.