Isọn Oro Ikamade Mbon En̄wen
1 Apostle Paul ama ọfiọk ke obiomo imọ ndikwọrọ ikọ nnọ mme owo. Enye ama ọfiọk ke Jehovah ama anam kpukpru orụk owo ẹkeme ndinyene nsinsi uwem ebe ke ọsọn̄urua iyịp Eyen Esie. (1 Tim. 2:3-6) Ke ntre Paul ọkọdọhọ ete: “Mmakama mme Greek ye isenowo isọn, ye mbon ọniọn̄ ye mme ọkọi nde.” Enye ama esịn ifịk anam utom ye unana edikpa mba man ekpe isọn oro enye akakamade ekemmọ owo ebe ke ndibuana eti mbụk ye mmọ.—Rome 1:14, 15.
2 Ukem nte Paul, mme Christian mfịn ẹyom ndida kpukpru ifet mbuana eti mbụk ye mbọhọidụn̄ mmọ. Sia “akwa ukụt” enen̄erede asan̄a ekpere, oyom nnyịn isọsọp iyom mbon esịt akpanikọ. Ata ima oro nnyịn inyenede inọ mme owo akpakam onụk nnyịn ndisịn ifịk ke utom unyan̄a uwem emi.—Matt. 24:21; Ezek. 33:8.
3 Ndikpe Isọn Nnyịn: Akpan usụn̄ oro nnyịn isisobode mme owo edi ke ndikwọrọ ikọ to ke enyịnusụn̄ sịm enyịnusụn̄. Ke mme efakutom oro owo mîsiwakke ndidu ke ufọk, ndinịm nnennen n̄wetnnịm n̄kpọ nnyụn̄ mfiak n̄ka ini efen ayanam nnyịn isobo ediwak owo. (1 Cor. 10:33) Nnyịn n̄ko imekeme ndisobo mme owo ke ndikwọrọ ikọ ke efakutom mbubehe, ke efak, ke mme itie unọ idem nduọkodudu, ke mme itie oro ẹkemede ndikụt ediwak owo, ke itie ubon moto, ye ke urụk ukopikọ. Nnyịn imekeme ndibụp idem nnyịn ite, ‘Nte ami ke nsịn ofụri ukeme ndida kpukpru usụn̄ oro ẹkemede ndida n̄kwọrọ ikọ nnam n̄kpọ man mbuana etop uwem emi?’—Matt. 10:11.
4 Asiakusụn̄ kiet ama ọfiọk ke enen̄ede obiomo imọ ndisịm kpukpru owo ke efakutom imọ. Ẹma ẹsiwak ndiberi ọfọn̄ window kpukpru ini ke ufọk kiet, ndien akananam owo ndomokiet idụhe ke ufọk oro. Nte ededi, usen kiet ke ini asiakusụn̄ oro mîkodụhe ke an̄wautom, enye ama okụt ubomisọn̄ ke iso ufọk emi akananam owo mîdụhe mi. Sia mîkoyomke nditaba ifet oro, enye ama amia n̄kanika ufọk oro. Eren kiet ama ọwọrọ edi, ndien akpa nneme oro mmọ ẹkenyenede ama anam eyenete an̄wan emi ye ebe esie ẹfiak ẹka ediwak ini. Ke akpatre, eren emi ama enyịme ukpepn̄kpọ Bible, ndien enye idahaemi edi eyenete oro ama akana baptism. Enye owụt esịtekọm nte ke eyenete emi ama ọfiọk ke obiomo imọ ndikwọrọ ikọ nnọ mbon en̄wen.
5 Nte utịt asan̄ade ekpere, ana ikpe isọn oro ikamade ekemmọ owo idahaemi ebe ke ndisịn ifịk ke utom ukwọrọikọ.—2 Cor. 6:1, 2.