Ndifehe Mbuba ye Ime
“Ẹyak ifehe mbuba eke anade nnyịn ke iso ye ime.”—MME HEBREW 12:1.
1. (a) Nso ke ẹnịm nnyịn ke iso ke ini inamde uyakidem inọ Jehovah Abasi? (b) Nso orụk mbuba ke ana mme Christian ẹtịm idem ẹno?
KE INI ikayakde idem nnyịn inọ Jehovah ebe ke Jesus Christ, Abasi ama onịm nnyịn mbuba ke iso, ke nditịn̄ ke ndamban̄a usụn̄. Ke utịt mbuba oro, ẹyenọ kpukpru mbon oro ẹkekụrede uforo uforo utịp. Nso utịp? Nsinsi uwem! Man enyene ubọn̄ ubọn̄ utịp emi, oyom Christian oro efehede itọk odu ke mben̄eidem, idịghe kaban̄a sụk ibio ibio, itọk usọp, edi kaban̄a itọk anyanusụn̄. Ntre enye eyeyom ime. Enye enyene ndiyọ anyan ọkpọsọn̄ utom mbuba oro ke idemesie ye mme ubiọn̄ọ oro ẹdidude ke ini mbuba oro.
2, 3. (a) Nso idin̄wam nnyịn ke ndifehe mbuba Christian nsịm utịt? (b) Didie ke idatesịt akan̄wam Jesus ndifehe mbuba ye ime?
2 Nso idin̄wam nnyịn ifehe utọ mbuba oro ikosịm utịt? Ọfọn, nso ikan̄wam Jesus ndiyọ ke adan̄aemi enye ekedide owo ke isọn̄? Enye ekenyene ukeme esịtidem oto edu idara. Mme Hebrew 12:1-3 (NW) okot ete: “Ntre, ndien, koro nnyịn inyenede akwa otu ntiense ẹmi ẹkande nnyịn ẹkụk, ẹyak nnyịn nde ikpọnọde kpukpru mbiomo ye idiọkn̄kpọ oro ẹyịrede nnyịn mmemmem mmemmem inịm n̄kan̄ kiet, ẹnyụn̄ ẹyak nnyịn ifehe mbuba oro ẹnịmde nnyịn ke iso ye ime, nte nnyịn iwụkde enyịn ise Jesus, Akpan Isụn̄utom, ye Andinam mbuọtidem nnyịn ọfọn ama. Ke ntak idatesịt oro ẹkenịmde enye ke iso enye ama ọyọ eto ndutụhọ, kpa ye esuene, ama onyụn̄ osụhọde etetie ke ubọk nnasia ebekpo Abasi. Ke akpanikọ, ẹtịm ẹkere enyeemi ọkọyọde utọ idiọk ndutịn̄ oro mme idiọkowo ẹtịn̄de ẹdian ufọn idemmọ, man mbufo ẹkûkop mmemidem ẹnyụn̄ ẹkpa mba ke ukpọn̄ mbufo.”
3 Ke ofụri an̄wan̄wa utom esie, Jesus ama ekeme ndikaiso mfehe mbuha oro ke ntak idatesịt Jehovah. (Men Nehemiah 8:10 domo.) Idatesịt esie ama an̄wam enye ndiyọ idem esuene esuene n̄kpa ke eto ndutụhọ, emi ke oro ebede enye ekenyenede idatesịt oro inua mîkemeke nditịn̄ ke ndiset ke n̄kpa nnyụn̄ ndọk n̄kodu ke ubọk nnasia Ete esie, do ndikụt ẹnamde utom Abasi ẹsịm utịt esie. Otode ke ime esie nte owo ke n̄kan̄ Abasi, enye ama ọsọn̄ọ omụm unen nsinsi uwem esie akama. Ih, nte Luke 21:19 ọdọhọde: “Ẹdida edime ime ke ukụt ẹbọ ukpọn̄ mbufo ẹda ẹnyene.”
4. Nso utọ uwụtn̄kpọ ke Jesus okonịm ọnọ ekemmọ mbonitọk esie, ndien ke nso ke ikpesịn esịt nnyịn?
4 Jesus Christ ama ọnịm mfọnn̄kan uwụtn̄kpọ ọnọ ekemmọ mbonitọk, ndien uwụtn̄kpọ esie ọsọn̄ọ ọnọ nnyịn nte ke nnyịn n̄ko imekeme ndikan. (1 Peter 2:21) Se Jesus ọdọhọde nnyịn inam, nnyịn imekeme ndinam. Nte enye ọkọyọde, nnyịn imekeme n̄ko. Ndien nte nnyịn isọn̄ọde ida ke ndikpebe enye, ana nnyịn iwụk ekikere nnyịn ke mme ntak oro nnyịn inyenede ndikop idatesịt. (John 15:11, 20, 21) Idatesịt eyesọn̄ọ nnyịn idem ndisịn ifịk mfehe mbuba ke utom Jehovah tutu ibọ ubọn̄ ubọn̄ utịp nsinsi uwem.—Colossae 1:10, 11.
5. Didie ke nnyịn ikeme ndikop idatesịt ye nsọn̄idem kaban̄a mbuba eke ẹnịmde nnyịn ke iso?
5 Man an̄wam nnyịn ndisịn ifịk ke mbuba oro, Jehovah ọmọnọ odudu oro akande eke owo. Ke ini ẹkọbọde nnyịn, odudu oro ye ndifiọk ntak emi ẹyakde nnyịn isobo ukọbọ ẹsisọn̄ọ nnyịn idem. (2 Corinth 4:7-9) N̄kpọ ekededi oro isobode ke ntak edikpono enyịn̄ Abasi nnyụn̄ nsọn̄ọ mmụm itie edikara esie n̄kama edi ntak idatesịt oro owo ndomokiet mîkemeke ndibọ nnyịn. (John 16:22) Emi anam an̄wan̄a ntak emi mme apostle, ke ẹma ẹkemia mmọ ke ewụhọ Sanhedrin mme Jew ke nditie ntiense mban̄a mme utịben̄kpọ oro Jehovah akanamde ke ebuana ye Jesus, ẹkedarade “koro ẹbatde ẹte mmọ ẹmedot ndibọ esuene kaban̄a enyịn̄ Jesus.” (Utom 5:41, 42) Idatesịt mmọ ikotoho ukọbọ oro ke idemesie edi okoto ntotụn̄ọ esịt uyụhọ ndifiọk nte ke mmimọ ke ikenem Jehovah ye Jesus esịt.
6, 7. Ntak emi Christian efehe-itọt ekemede ndidara idem ke adan̄aemi enye okụtde ukụt, ndien ye nso utịp?
6 Odudu efen oro omụmde owo akama ke uwem nnyịn edi idotenyịn oro Abasi onịmde nnyịn ke iso. Nte Paul ekesịnde enye: “Ẹyak nnyịn inyene emem ye Abasi ebe ke Ọbọn̄ nnyịn Jesus Christ, emi ebede ke enye n̄ko nnyịn inyene usụn̄ ndisan̄a ke mbuọtidem ndụk mfọnido oro owo mîdotke mi emi nnyịn kemi idade; ndien ẹyak nnyịn idara, oto ke idotenyịn ubọn̄ Abasi. Inyụn̄ ikụrede ke oro, edi ẹyak nnyịn idara ke adan̄aemi ikụtde ukụt, sia nnyịn ifiọkde ite ukụt anam ime ọwọrọ; ime, n̄ko, anam idaha emi ẹnyịmede ọwọrọ; idaha emi ẹnyịmede, n̄ko, anam idotenyịn ọwọrọ, ndien idotenyịn emi idaha isịm edikpu.”—Rome 5:1-5, NW.
7 Ukụt ke idemmọ idịghe n̄kpọ idatesịt, edi emem emem mfri oro mmọ ẹsion̄ode ke oro ebede, edi. Mfri ẹmi ẹdi ime, idaha emi ẹnyịmede, idotenyịn, ye edisu idotenyịn oro. Ime oro nnyịn imede eyeda okosịm nnyịn ndinyene unyịme Abasi. Ke ini nnyịn inyenede unyịme Abasi, nnyịn ye uko imekeme ndidori enyịn ndinyene mme un̄wọn̄ọ oro enye ọkọn̄wọn̄ọde. Idotenyịn emi omụm nnyịn akama ke nnennen usụn̄ onyụn̄ ọsọn̄ọ nnyịn idem ke idak ukụt tutu idotenyịn oro osu.—2 Corinth 4:16-18.
Inemesịt Odu Ọnọ Mmọ Oro Ẹmede Ime!
8. Ntak emi ini edibet emi mîdịghe ubiatini inọ nnyịn?
8 Ke adan̄aemi itiede ibet ini emi Abasi okonịmde ndideme mme utịp nnọ mbonitọk, odu mme ukpụhọde n̄kpọ oro nnyịn ikụtde. Mmọemi ẹdi n̄kọri eke spirit ke idem nnyịn emi osụn̄ọde oto edisobo mme idomo uforo uforo, ndien mmọ ẹnam nnyịn inyene akwa unyịme ye Abasi. Mmọ ẹwụt se nnyịn idide ẹnyụn̄ ẹnọ nnyịn ifet ndiwụt ukem edu oro mbon mbuọtidem eke eset, akpan akpan uwụtn̄kpọ nnyịn, Jesus Christ, ẹkewụtde. Mbet James ọdọhọ ete: “Ẹnịm ẹte edi n̄kpọ ọyọhọ idatesịt, nditọete mi, ke ini nsio nsio idomo ẹsịmde mbufo; ke ẹfiọkde ẹte mbuọtidem mbufo emi ẹma ẹdomo ẹwụt anam ime ọwọrọ. Edi ẹyak ime anam utom esie ama, man mbufo ẹfọn ẹma ẹnyụn̄ ẹsọn̄ ke ukpọn̄, ẹkûnana baba n̄kpọ kiet.” (James 1:2-4) Ih, nnyịn imekeme ndidori enyịn ndikụt nsio nsio idomo, edi mmọemi ẹyenam n̄kpọ ke ndinam nnyịn ikọri nnennen edu. Nnyịn ke ntre iwụt ite ke nnyịn iyesọn̄ọ idu ke mbuba emi tutu ibọ utịp, inamke n̄kpọ sededi utọ ubiọn̄ọ oro isobode.
9, 10. (a) Ntak emi mbon oro ẹyọde idomo ẹnemde esịt, ndien didie ke nnyịn ikpasak iso ise mme idomo? (b) Mmanie ẹkedi mbon inemesịt eke eset, ndien didie ke ẹkpebat nnyịn ẹsịn ke otu mmọ?
9 Eyịghe idụhe, ndien, James ọkọdọhọde ete: “Ọfọfọn ye owo eke ọsọn̄ọde ada ke idomo, koro ke ẹma ẹkedomo enye ẹfiọk ẹte ọfọn, ẹnọnọ enye anyanya uwem, emi Ọbọn̄ ọkọn̄wọn̄ọde ndinọ mmọemi ẹmade Enye”! (James 1:12) Ẹyak nnyịn ye iwụk isak iso ise mme idomo, isịnede mme edu Abasi oro ẹdisọn̄ọde nnyịn idem ndikan mmọ.—2 Peter 1:5-8.
10 Ti ete ke usụn̄ nte Abasi anamde n̄kpọ ye nnyịn idịghe obufa m̀mê esen esen. Ẹma ẹnam n̄kpọ ye mme anam-akpanikọ “otu ntiense” ke ukem usụn̄ oro nte mmọ ẹkewụtde nsọn̄ọnda mmọ ke Abasi. (Mme Hebrew 12:1) Ẹma ẹwet unyịme oro Abasi okonyịmede mmọ ke Ikọ esie, ndien nnyịn ibat ite ke kpukpru mmọ ẹma ẹkop inemesịt koro mmọ ẹkesọn̄ọde ẹda ke idak idomo. James ọdọhọ ete: “Nditọete, ẹda mme prọfet, ẹmi ẹketịn̄de n̄kpọ ke enyịn̄ Jehovah, nte uwụtn̄kpọ ke edisọn̄ esịt mbiom ukụt. Sese, nnyịn idọhọ ite, ọfọfọn ye mmọemi ẹma ẹbiom ukụt: mbufo ẹmekop ẹban̄a ime Job, ẹmenyụn̄ ẹkụt se Ọbọn̄ anamde enye ke akpatre, nte Ọbọn̄ enyenede esịtmbọm, onyụn̄ atuade owo mbọm.” (James 5:10, 11) Ẹma ẹbemiso ẹtịn̄ ẹte ke idiọk ukperedem usen ẹmi, ndusụk owo ẹmi ẹdinamde n̄kpọ Jehovah ye nsọn̄ọnda ẹyewọrọ ẹwụt idem ke ererimbot, kpa nte mme prọfet oro ẹkenamde ke mme ini eset. Nte nnyịn ikopke inemesịt ndidi mbon oro ẹnamde ntre?—Daniel 12:3; Ediyarade 7:9.
Ndibọ Nsịnudọn̄ Nto Ikọ Jehovah
11. Didie ke Ikọ Abasi ekeme ndin̄wam nnyịn ndiyọ, ndien ntak emi nnyịn mîkpetiehe nte isọn̄ itiat eke n̄ke Jesus?
11 Paul ama anyan ubọk owụt un̄wam efen ke ndiyọ ke ini enye ọkọdọhọde ete “ebede ke ime ime ediyọ, onyụn̄ ebede ke nsịnudọn̄ oro inyenede ito N̄wed Abasi, nnyịn imekeme ndisọn̄ọ mmụm idotenyịn nnyịn n̄kama.” (Rome 15:4, The Twentieth Century New Testament) Akpanikọ Ikọ Abasi ana akabade enyene ntotụn̄ọ orụn̄ ke idem nnyịn man owụt nnyịn nnennen n̄kpọ oro ikpanamde kpukpru ini. Nnyịn ibọhọ ufọn ndomokiet ke nditie nte isọn̄ itiat oro Jesus eketịn̄de ke n̄ke asuan n̄kpasịp ete: “Ẹmi ẹdi mmọemi n̄kpasịp ẹduọn̄ọde ke isọn̄ itiat, ke adan̄aemi mmọ ẹkekopde ikọ, mmọ ẹbọ kpa idaha oro ye idatesịt; edi mmọ inyeneke orụn̄ ke idemmọ, edi ẹbịghi ke ini esisịt; ndien ke ini ukụt mme isịnenyịn otịbede kaban̄a ikọ, idaha oro ẹduọ.” (Mark 4:16, 17) Akpanikọ otode Ikọ Abasi ikabakede inyene ntotụn̄ọ orụn̄ ke idem utọ mbon oro; ntre, ke ini ukụt, mmọ ikemeke ndida enye nnam n̄kpọ nte ata itie odudu ye idotenyịn.
12. Nso ke nnyịn mîkpabian̄ake idem nnyịn ke ini inyịmede eti mbụk?
12 Owo ekededi oro onyịmede eti mbụk Obio Ubọn̄ ikpafịnake idemesie iban̄a se iditienede. Enye etiene usụn̄uwem oro edidade ukụt m̀mê ukọbọ idi. (2 Timothy 3:12) Edi enye ekpenyene ndibat nte n̄kpọ “ọyọhọ idatesịt” ndinyene ifet ndisobo nsio nsio ukọbọ ke ndisọn̄ọ mmụm Ikọ Abasi n̄kama nnyụn̄ ntịn̄ enye nnọ mmọ en̄wen.—James 1:2, 3.
13. Didie ndien ntak emi Paul akadarade aban̄a mme Christian ke Thessalonica?
13 Ke akpa isua ikie, mme andibiọn̄ọ ke Thessalonica ẹma ẹsịn ntịme ke ntak ukwọrọikọ Paul. Ke ini Paul akakade Beroea, mme andikọbọ ẹmi ẹma ẹtiene enye do man ẹkedemede ntịme efen efen. Apostle oro ẹkekọbọde mi ama ewet n̄wed ọnọ ẹsọk mme anam-akpanikọ mbon oro ẹkesụhọde ke Thessalonica, ete: “Ana nte nnyịn ikọm Abasi kpukpru ini iban̄a mbufo, nditọete, kpa nte odotde nnyịn ndinam ntre, koro mbuọtidem mbufo ọkọride etieti, ima emi kpukpru mbufo ẹmade kiet eken onyụn̄ okponde; tutu nnyịn ke idem nnyịn ibụre mbụre iban̄a mbufo ke mme ufọk Abasi, ke ime ye mbuọtidem eke mbufo ẹnyenede ke kpukpru isịnenyịn ye ukụt eke mbufo ẹkụtde: emi edide in̄wan̄în̄wan̄ idiọn̄ọ edinen ikpe Abasi; man ẹbat ẹte mbufo ẹmedot ndidụk ke Obio Ubọn̄ Abasi, ẹmi ẹkụtde ndutụhọ ẹban̄a enye.” (2 Thessalonica 1:3-5) Kpa ye ukụt mmọ ke ubọk mme asua, mme Christian ẹtode Thessalonica ẹma ẹkọri edu Christ ye ke ibat. Didie ke oro ekedi mmemmem n̄kpọ? Koro mmọ ẹma ẹbọ odudu ẹto ikọ nsịnudọn̄ otode Jehovah. Mmọ ẹma ẹnịm ewụhọ Ọbọn̄ ẹnyụn̄ ẹfehe mbuba ye ime.—2 Thessalonica 2:13-17.
Kaban̄a Edinyan̄a Mmọ En̄wen
14. (a) Ke mme nso ntak ke nnyịn isọn̄ọ idu ke utom ukwọrọikọ ye idatesịt kpa ye nsọn̄ọn̄kpọ? (b) Nnyịn ibọn̄ akam iban̄a nso, ndien ntak-a?
14 Akpan akpan kaban̄a ediwụt unen Abasi, nnyịn ke edinam akpanikọ ye unana n̄kụni imọyọ nsọn̄ọn̄kpọ ye mme ukọbọ. Edi odu ntak unana ibụk efen oro anamde nnyịn isụk idem inọ mme utọ n̄kpọ ntre: man ikeme ndinam etop Obio Ubọn̄ ebe osịm mmọ en̄wen man otode ẹkeme ndinam mme asuanetop Obio Ubọn̄ Abasi efen efen ẹnam ‘an̄wan̄wa uyarade kaban̄a edinyan̄a.’ (Rome 10:10) Mbon oro ẹdude ke edinam ke utom Abasi ẹnyene ndibọn̄ akam nte yak Etubom idọk ọdiọn̄ utom mmimọ ke ndinọ mme asuanetop Obio Ubọn̄ efen efen. (Matthew 9:38) Paul ekewet Timothy ete: “Nyụn̄ men mme ikọ ẹmi okokopde mi ke inua ke iso ediwak ntiense, yak nọ mbon akpanikọ, eke ẹdikemede ndikpep owo en̄wen n̄ko. Tiene mi biom ukụt, nte eti owoekọn̄ Christ Jesus.”—2 Timothy 2:2, 3.
15. Ntak anade nnyịn ikama idem nnyịn nte mbonekọn̄ ye mbon oro en̄wanade “ke mbre”?
15 Owoekọn̄ esidianade idemesie efep ye uwem mbio obio ẹmi ẹnyenede esisịt ukpan. Ukem ntre, ikpanaha ikọmọ idem nnyịn ye mme mbubehe mbon oro mîdịghe mbonekọn̄ Ọbọn̄ edi emi, ke akpanikọ, ẹdude ke idaha ndibọbiọn̄ọ. Ntem, Paul ama akaiso ewet Timothy ete: “Baba owo kiet eke akade ekọn̄ idaha idem ikọkọmọ ke mbubehe uwem emi, man enye enem andisịn enyịn̄ esie ke n̄wed mbonekọn̄ esịt. Onyụn̄ edieke owo an̄wanade ndikan ke mbre, iyarake enye anyanya ke enye mîsan̄ake ke mme item in̄wana.” (2 Timothy 2:4, 5) Ke ndin̄wana ndikan ke mbuba “anyanya uwem,” ana mbonitọk ẹnyene mfara ke idem ẹnyụn̄ ẹfep ikpîkpu mbiomo ye n̄kûkọmọ. Ke usụn̄ emi ke mmọ ẹkeme ndisịn idem ke ndida eti mbụk edinyan̄a nsọk mmọ en̄wen.—James 1:12; men 1 Corinth 9:24, 25 domo.
16. Nso ke owo mîkemeke ndikọbi, ndien nnyịn ikeme ndiyọ ke ufọn mmanie?
16 Koro nnyịn imade Abasi ye mbon mbieterọn̄ oro ẹyomde ndikụt enye, nnyịn ye idatesịt imesiyọ ekese n̄kpọ man ikeme ndisịm mmọ en̄wen ye eti mbụk edinyan̄a. Mme asua ẹkeme ndikọbi nnyịn ke ntak oro ikwọrọde Ikọ Abasi. Edi owo ikemeke ndikọbi Ikọ Abasi, owo inyụn̄ ikemeke ndisịn editịn̄ enye kaban̄a edinyan̄a mmọ efen ke ebuka. Paul ama anam an̄wan̄a Timothy ntak emi enye okonyịmede ndisobo idomo ete: “Ti Jesus Christ, emi ekesetde ke n̄kpa, emi okotode ke ubon David, nte n̄kwọrọde ke gospel; emi n̄kụtde ukụt ke esịt, tutu ẹsịn mi ke n̄kpọkọbi nte anamidiọk: edi owo ikọbike ikọ Abasi. Ntre ke mme ime ye kpukpru n̄kpọ mban̄a mmọemi Abasi ekemekde, man mmọ n̄ko ẹnyene edinyan̄a emi odude ke Christ Jesus, ẹnyụn̄ ẹbọ nsinsi ubọn̄.” (2 Timothy 2:8-10) Mfịn nnyịn imenyene ke ekikere idịghe ekpri nsụhọ mbon oro ẹdude ke udịm Obio Ubọn̄ eke heaven ikpọn̄îkpọn̄ edi n̄ko akwa otuowo eke mme erọn̄ en̄wen eke Eti Ekpemerọn, Jesus Christ, kpa akwa otuowo ẹmi ẹnyenede Paradise eke isọn̄ ke idak Obio Ubọn̄ Christ.—Ediyarade 7:9-17.
17. Ntak emi nnyịn mîkpetreke ndifehe mbuba, ndien nso idisụn̄o edieke nnyịn ikade iso ke mbuba tutu osịm utịt?
17 Edieke nnyịn idide mme osio usiene, nnyịn idin̄wamke idem nnyịn m̀mê owo en̄wen ekededi ndinyene edinyan̄a. Ebede ke ndiyọ ke mbuba Christian, kpa ye ubiọn̄ọ oro isobode, nnyịn isọn̄ọ inịm idem nnyịn ke idaha ndibọ utịp, imonyụn̄ ikeme ndin̄wam mmọ en̄wen nnennen nnennen ndisịm edinyan̄a, ke adan̄aemi idide okopodudu uwụtn̄kpọ ukeme inọ mbon en̄wen. Sededi idotenyịn oro nnyịn inyenede, edide eke heaven m̀mê eke isọn̄, edu Paul ‘ndibịne utịtmbuba utịp oro’ edi eti uwụtn̄kpọ kiet ndikpebe.—Philippi 3:14, 15.
Ndisọn̄ọ Nda N̄kaiso ke Mbuba
18. Ndibọ utịp ọkọn̄ọ ke nso, edi man ẹsọn̄ọ ẹda ẹsịm utịt, nso ke ana ẹfep?
18 Ndikụre utom Christian nnyịn ye edikan kaban̄a unen Jehovah ye edibọ utịp oro enye onịmde ọnọ nnyịn ọkọn̄ọ ke nnyịn ndisọn̄ọ nda n̄kaiso ke ofụri uniọn̄ ini mbuba oro. Ke ntre, nnyịn ikemeke ndisọn̄ọ nda nsịm utịt edieke nnyịn inamde idem nnyịn odobi ye mme n̄kpọ oro mîdịghe ke ufọn edinen ido. Idem ke ini ikọmọde mme utọ n̄kpọ oro ifep ke idem, n̄kpọ oro ẹyomde ẹsụk ẹyeyom se ikemde man inyene ofụri uko oro nnyịn ikemede ndinyene. Ke ntre, Paul ọnọ item ete: “Ẹyak nnyịn nde ikpọnọde kpukpru mbiomo inịm n̄kan̄ kiet, ye idiọkn̄kpọ eke eyịrede nnyịn ke kpukpru edem; ẹnyụn̄ ẹyak ifehe mbuba eke anade nnyịn ke iso ye ime.” (Mme Hebrew 12:1) Ukem nte Jesus nnyịn ikpenyeneke ndisọn̄ọ ntịn̄ n̄kaha mban̄a ndutụhọ eke ikụtde edi ikpada mmọ nte esisịt ekọmurua ndikpe nnọ idara idara utịp.—Men Rome 8:18 domo.
19. (a) Nso mbuọtidem ke Paul okowụt ke ekperede utịt uwem esie? (b) Nte nnyịn isan̄ade ikpere utịt mbuba ime, nso mbuọtidem ke nnyịn ikpenyene iban̄a utịp oro ẹken̄wọn̄ọde?
19 Ke ekperede utịt uwem esie, Paul ama ekeme ndidọhọ ete: “Mma n̄wana eti en̄wan, mma mfehe mbuba mi mma, mma nsọn̄ọ mmụm mbuọtidem n̄kama. Ẹma ẹnịm anyanya eti ido ẹben̄e mi.” (2 Timothy 4:7, 8) Nnyịn idu ke mbuba ediyọ emi man ibọ utịp nsinsi uwem inyene. Edieke ime nnyịn osịmde utịt, n̄kukụre koro etiede nte mbuba oro ọniọn̄ akan nte ikodoride enyịn ke ini ikọtọn̄ọde enye, nnyịn iyekpu ke ini nnyịn ikperede ndibọ utịp oro ẹken̄wọn̄ọde. Kûnam ndudue oro. Eyịghe ndomokiet idụhe utịp oro mmọdo.
20. Nso ikpedi ubiere nnyịn tutu osịm utịt mbuba oro?
20 Ntre ẹyak enyịn nnyịn okûkpa mba ke ndisak iso nse akwa ukụt nditọn̄ọ, adade nsobo ke akpa ọsọk Akwa Babylon ndien ekem nsụhọ esop Devil eken. (2 Peter 3:11, 12) Ke ikerede iban̄a kpukpru ikpọ idiọn̄ọ oro ẹkande nnyịn ẹkụk, nnyịn ikpakam isak iso ise ini iso ye mbuọtidem. Nnyịn ikpakam ikpaha odudu ediyọ nnyịn ke isịn, ndien nnyịn ikpakam ikaiso ye odudu ke mbuba emi Jehovah Abasi onịmde nnyịn ke iso, tutu isịm utịt inyụn̄ ibọ idara idara utịp, ke unen Jehovah ebe ke Jesus Christ.
Didie ke Afo Ọkpọbọrọ?
◻ Nso orụk mbuba ke ana Christian otịm idem ọnọ?
◻ Ntak emi idatesịt edide akpan n̄kpọ ntre ke ndifehe mbuba?
◻ Ke nso akpan ntak ke nnyịn isọn̄ọ idu ke utom ukwọrọikọ kpa ye nsọn̄ọn̄kpọ?
◻ Ntak emi nnyịn mîkpetreke ndifehe mbuba oro Abasi onịmde nnyịn ke iso?
[Ndise ke page 15]
Mme Christian ẹnyene ndiyọ nte n̄kpọ eke ẹdude ke mbuba anyanusụn̄
[Ndise ke page 17]
Ke ndiyanade mbịne “anyanya uwem,” ana mbonitọk ẹnyene mfara ke idem