Ntak Emi Nnyịn Ikpade?
“Ofụri enyọn̄ obot odobo idahaemi, ọsọsọn̄ afo ndikop ẹkotde ibifịk ke enyọn̄ eto; mme inuen ke ẹde ke mme eto: bet; ke mîbịghike afo ọyọduọk odudu ukem nte mmọ ẹmi.”—JOHANN WOLFGANG VON GOETHE, EWET UTO OWO GERMANY.
1, 2. (a) Ẹkebot mme owo ye nso udọn̄? (b) Nso orụk uwem ke akpa owo iba oro ẹkedara?
ABASI okobot mme owo ye udọn̄ ndidu uwem ke nsinsi. Ke akpanikọ, Bible ọdọhọ ke enye ama esịn “ekikere nsinsi ini ke esịt mmọ.” (Ecclesiastes 3:11, Beck) Edi Abasi ama anam se ikande edinọ mme owo udọn̄ ndidu uwem ke nsinsi. Enye ama ọnọ mmọ ifet n̄ko ndinam ntre.
2 Ẹkebot akpa ete ye eka nnyịn, Adam ye Eve, mfọnmma, ye unana ndo ke ekikere m̀mê ikpọkidem. (Deuteronomy 32:4) Kere ban̄a oro—uyịre uyịre mbiakidem ye ubiak ikodụhe, ndiọi ndịk m̀mê mme editịmede esịt ikodụhe! N̄ko-n̄ko, Abasi ekesịn mmọ ke ediye paradise ebietidụn̄. Abasi akaduak ete owo odu uwem ke nsinsi ndien nte ini akade isọn̄ ọkpọyọhọ ye mfọnmma nditọ esie. (Genesis 1:31; 2:15) Ntak, ndien, emi nnyịn ikpade?
Ntụtutọn̄ Ada N̄kpa Edi
3. Nsinsi uwem Adam ye Eve ọkọkọn̄ọ ke nso?
3 Abasi okowụk Adam ete: “Dia kpukpru eto in̄wan̄; Edi ama edi eto ifiọk, eti ye idiọk, kûdia ke esịt: koro ke usen eke afo adiade ke esịt afo ayakpa n̄kpa.” (Genesis 2:16, 17) Ntre nsinsi uwem Adam ye Eve ọkọkọn̄ọ ke n̄kpọ; ọkọkọn̄ọ ke mmọ ndikop uyo nnọ Abasi.
4. Ke ini Adam ye Eve ẹkenamde idiọkn̄kpọ, ntak emi mmọ ẹkeduọkde idotenyịn ndidu uwem ke nsinsi ke Paradise?
4 Ke mfụhọ, nte ededi, Adam ye Eve ikenịmke ibet Abasi. (Genesis 3:1-6) Ke ndinam ntre, mmọ ẹma ẹkabade ẹdi mme anamidiọk, koro “idiọk-n̄kpọ edi edibiat ibet.” (1 John 3:4) Nte utịp, Adam ye Eve ikenyeneke aba idotenyịn nsinsi uwem. Ntak-a? Koro “n̄kpọ-eyen-utom idiọk-n̄kpọ edi n̄kpa.” (Rome 6:23) Ntem, ke ini ekebierede ikpe ọnọ Adam ye Eve, Abasi ọkọdọhọ ete: “Koro afo edide ntan, oyonyụn̄ afiak ke ntan.” Do ẹma ẹbịn akpa ete ye eka nnyịn ẹfep ke Paradise ebietidụn̄ mmọ. Ke usen oro mmọ ẹkenamde idiọkn̄kpọ, Adam ye Eve ẹma ẹtọn̄ọ ndikpa sụn̄sụn̄ edi ke usụn̄ enyenede iwụk.—Genesis 3:19, 23, 24.
“N̄kpa Onyụn̄ Ebe Esịm Kpukpru Owo”
5. N̄kpa akasan̄a didie atara esịm ofụri orụk owo?
5 Ke emi idiọkn̄kpọ ama enen̄ede odụk nsenubon Adam ye Eve. Ntem, mmọ ikekemeke ndision̄o mfọnmma nditọ ndi, kpa nte anana-mfọnmma n̄kpọ mîkemeke ndisio mfọnmma n̄kpọ ndi. (Job 14:4) Ke akpanikọ, emana owo kiet kiet ọsọn̄ọ nte ke akpa ete ye eka nnyịn ẹma ẹtaba mfọnmma nsọn̄idem ye nsinsi uwem eke idemmọ ye eke mme andito ubon mmọ. Christian apostle Paul ekewet ete: “Idiọk-n̄kpọ [okoto] owo kiet odụk ke ererimbot, n̄kpa onyụn̄ [oto] ke idiọk-n̄kpọ oro odụk; n̄kpa onyụn̄ ebe esịm kpukpru owo, koro kpukpru owo ẹma ẹnam idiọk-n̄kpọ.”—Rome 5:12; men Psalm 51:5 domo.
6. Ntak emi nnyịn ikpade?
6 Mfịn ntaifiọk ikam ifiọkke ntak emi mme owo ẹkọride ẹsọn̄ ẹnyụn̄ ẹkpade. Nte ededi, Bible anam an̄wan̄a nte ke nnyịn ikpa koro imanade nte mme anamidiọk, idade idaha emi imana ito akpa ete ye eka nnyịn. Edi nso itịbe inọ nnyịn ke ini nnyịn ikpade?