UKPEPN̄KPỌ 07

Jehovah Edi Nso Utọ Owo?

Printed Edition

Ekere ke Jehovah Abasi etie didie? Ndi ada Abasi nte owo emi enen̄erede enyene uten̄e, emi afo mûdukemeke ndikpere tutu amama? Ndi ada enye nte n̄kpọ emi enen̄erede enyene odudu, edi emi mînyeneke uwem? Jehovah ededi nso utọ owo, enye etetie didie? Bible etịn̄ utọ owo emi Jehovah edide, onyụn̄ owụt ke enye ama fi.

1. Nso inam owo mîsikwe Abasi?

“Abasi edi Spirit.” (John 4:24) Jehovah inyeneke utọ idem emi nnyịn ikemede ndikụt. Enye edi Spirit onyụn̄ odụn̄ ke heaven; nnyịn ikemeke ndikụt heaven.

2. Nso utọ owo ke Jehovah edi?

Kpa ye oro owo mîkemeke ndikụt Jehovah, Jehovah do. Enye enyene nti edu oro esinamde mbon oro ẹdiọn̄ọde enye ẹma enye. Bible ọdọhọ ke ‘Jehovah ama unenikpe, ke enye idikpọn̄ke mbon emi ẹsọn̄ọde ẹda ye enye.’ (Psalm 37:28) Enye “enen̄ede enyene esịt ima onyụn̄ atua owo mbọm,” akpan akpan mbon emi ẹbọde ufen. (James 5:11) ‘Jehovah ekpere mbon oro esịt obụn̄ọde; Enye esinyụn̄ anyan̄a mbon oro spirit mmọ anuahade.’ (Psalm 34:18) Ndi ọmọdiọn̄ọ ke se afo esinamde ekeme ndinam Jehovah okop inemesịt m̀mê ofụhọ? Esibiak Jehovah owo ama ọsọn̄ esịt anam idiọkn̄kpọ. (Psalm 78:40, 41) Edi esịt esinem enye owo ama anam se ifọnde.—Kot Mme N̄ke 27:11.

3. Nso iwụt ke Jehovah ama nnyịn?

Akpa John 4:8 ọdọhọ ete: “Abasi edi ima.” Emi owụt ke akakan edu Abasi edi ima. Bible ye mme n̄kpọ emi Jehovah okobotde ẹwụt ke enye edi Abasi ima. (Kot Utom 14:17.) Da nte enye okobotde nnyịn ke uwụtn̄kpọ. Enye ama obot nnyịn anam ikeme ndidiọn̄ọ ndiye n̄kpọ, inyụn̄ ikeme ndikop inem ikwọ ye inem nsio nsio udia. Enye oyom uwem enenem nnyịn.

SỊN IDEM KPEP

Se se Jehovah akadade obot mme n̄kpọ emi akpade owo idem, ye nte Jehovah owụtde utọ owo emi enye enen̄erede edi.

4. Edisana spirit edi odudu emi Abasi esidade anam n̄kpọ kpukpru ini

Ndise: Mme n̄kpọ emi Abasi akadade edisana spirit esie anam. 1. Ofụri ekondo. 2. Ada spirit esie anam owo ewet Bible.

Nnyịn isida ubọk nnyịn inam n̄kpọ, edi Jehovah esida edisana spirit esie anam. Bible owụt ke edisana spirit edi odudu emi Abasi esidade anam n̄kpọ kpukpru ini. Kot Luke 11:13 ye Utom 2:17, ekem ẹbọrọ mbụme emi ẹnyụn̄ ẹneme ẹban̄a mmọ:

Abasi esinọ owo edisana spirit esie owo ama eben̄e enye. Ndi oro owụt ke edisana spirit edi Abasi m̀mê owụt ke edi odudu Abasi? Nso inam ọdọhọ ntre?

Jehovah esida edisana spirit esie anam n̄kpọ emi akpade owo idem. Kot Psalm 104:30 ye 2 Peter 1:20, 21, ekem ẹbọrọ mbụme emi ẹnyụn̄ ẹneme ẹban̄a enye:

Nso ye nso isịne ke otu n̄kpọ emi Jehovah akadade edisana spirit esie anam?

5. Jehovah enen̄ede ọfọn ido

Moses ekedi ata owo Abasi; ama ọdọn̄ enye ndinen̄ede ndiọn̄ọ Abasi. Enye ama eben̄e Abasi ete: “Nam mi mfiọk usụn̄ fo, man mfiọk fi.” (Exodus 33:13) Jehovah ama etịn̄ utọ owo emi imọ idide ọnọ enye ekpri. Kot Exodus 34:4-6, ekem ẹbọrọ mbụme emi ẹnyụn̄ ẹneme ẹban̄a mmọ:

Jehovah akanam Moses ọdiọn̄ọ ke imọ idi nso utọ owo?
Ke otu ofụri n̄kpọ emi afo ọdiọn̄ọde aban̄a Jehovah, ewe ye ewe ke enen̄ede ama?

6. Jehovah ama mme owo

Ufen emi nditọ Israel eset ẹkebọde ini mmọ ẹdide ifịn ke Egypt eketie Jehovah didie? Bre DRAMA emi kop, mîdịghe Kot Exodus 3:1-10. Ekem ẹbọrọ mbụme oro ẹtienede ẹnyụn̄ ẹneme ẹban̄a mmọ.

DRAMA: Ufen Mmọ Ẹkebọde Ama Abiak Jehovah (2:45)

Mbụk oro owụt ke esitie Jehovah didie enye ama okụt mme owo ẹbọde ufen?—Se ufan̄ikọ 7 ye 8.
Ndi emekere ke Jehovah enen̄ede aduak ndinyan̄a nnyịn? Nso inam ọdọhọ ntre?

7. Se ikụtde ke ekondo owụt utọ owo emi Jehovah edide

Ndise: Isọnsi ye eyen esie, flawa, ye nsasak.

Se Jehovah okobotde owụt utọ owo emi enye edide. Se VIDIO emi. Ekem Kot Rome 1:20, ẹma ẹkot ẹma ẹbọrọ mbụme oro etienede ẹnyụn̄ ẹneme ẹban̄a enye.