San̄a Kpere Abasi
Ndi N̄kpọ Ndomokiet Ekeme “Ndidianade Nnyịn ke Ima Abasi”?
ANIE mîyomke ẹma imọ? Ke akpanikọ, esinen̄ede enem nnyịn ke ini ifiọkde ke ubon ye mme ufan nnyịn ẹma nnyịn. Nte ededi, edi n̄kpọ mfụhọ nditịn̄ nte ke mme owo ẹkeme ndima fi mfịn, edi imaha fi aba n̄kpọn̄. Mme ufan ye iman nnyịn ẹkeme ndiyat nnyịn esịt, ẹfre nnyịn, idem ẹsọn nnyịn. Edi odu owo oro amade nnyịn kpukpru ini. Rome 8:38, 39 etịn̄ orụk ima oro Jehovah Abasi amade ikọt esie.
Apostle Paul ọdọhọ ete, “Mmenịm ke akpanikọ” nte ke n̄kpọ ndomokiet ikemeke “ndidianade nnyịn ke ima Abasi.” Paul ndidọhọ “nnyịn” owụt ke idịghe enye kpọt ekenịm emi ke akpanikọ, edi n̄ko ke kpukpru mbon oro ẹsọn̄ọde ẹda ẹnam n̄kpọ Abasi ẹtiene ẹnịm. Paul ama abat mme n̄kpọ oro mîkemeke ndinam Jehovah etre ndima mme anam-akpanikọ asan̄autom esie.
“N̄kpa m̀mê uwem.” Jehovah esisụk amama ikọt esie idem ke mmọ ẹma ẹkekpan̄a. Enye ifreke mmọ, oyonyụn̄ anam mmọ ẹset ke edinen obufa ererimbot man owụt ke isụk imama mmọ. (John 5:28, 29; Ediyarade 21:3, 4) Kan̄a ke emi, Abasi osụk amama mme anam-akpanikọ ikọt esie inamke n̄kpọ m̀mê nso ke mmọ ẹsobo ke ererimbot emi.
“Mme angel m̀mê mme ukara.” Mbon oro ẹwọrọde etop m̀mê mme ukara ẹkeme ndinam owo anam se enye mîkpamaha ndinam, edi Jehovah ikemeke ndibak owo ndomokiet enyịn nnam se enye mîkpamaha ndinam. Mme angel, utọ nte enye oro akakabade edi Satan, ikemeke ndinam Abasi etre ndima mbon oro ẹtuakde ibuot ẹnọ Enye. (Ediyarade 12:10) N̄ko, okposụkedi ukara ẹkemede ndikọbọ ata mme Christian, oro ikemeke ndikpụhọde usụn̄ oro Abasi esede ikọt esie.—1 Corinth 4:13.
“Mme n̄kpọ eke ẹdude ke emi m̀mê mme n̄kpọ eke ẹdidide.” Ima Abasi isibịtke. Idụhe n̄kpọ ndomokiet oro ekemede nditịbe nnọ mme asan̄autom esie idahaemi m̀mê ke ini iso oro edinamde Abasi etre ndima mmọ.
“Mme odudu.” Paul etetịn̄ aban̄a “mme angel” emi ẹdude ke heaven ye “mme ukara” emi ẹdude ke isọn̄—edi idahaemi enye etịn̄ aban̄a “mme odudu.” Ikọ Greek oro ẹkabarede odudu, ọwọrọ nsio nsio n̄kpọ. Inamke n̄kpọ m̀mê nso ke ikọ emi enen̄ede ọwọrọ, nnyịn imetịm ifiọk n̄kpọ kiet, oro edi ke baba odudu kiet ke heaven m̀mê ke isọn̄ ikemeke ndinam Jehovah etre ndima ikọt esie.
“Uniọn̄ m̀mê utụn̄ọ.” Jehovah esima ikọt esie inamke n̄kpọ m̀mê n̄kpọ etie didie ye mmọ—ọfọfọn m̀mê ọdọdiọk.
“Edibotn̄kpọ efen ekededi.” Paul ndidọhọ edibotn̄kpọ efen ekededi ọwọrọ ke idụhe n̄kpọ ndomokiet oro ekemede ndinam Jehovah etre ndima mbon oro ẹsọn̄ọde ẹda ẹtuak ibuot ẹnọ Enye.
Ima oro Abasi amade mbon oro ẹbuọtde idem ye enye itiehe nte ima emi owo amade ekemmọ owo. Abasi esima ikọt esie ke nsinsi, edi ima owo ekeme ndibịt. Ke akpanikọ, ndifiọk kpukpru emi anam nnyịn itetịm isan̄a ikpere Jehovah onyụn̄ anam isịn ukeme iwụt ke nnyịn imama enye.