Nte Edinịm ke Akpanikọ Ekpenyene Ndikọn̄ọ ke Ukeme Ukere N̄kpọ?
“Odu ata ediwak mbon ‘ido ukpono’ emi ẹdide mbon ido ukpono n̄kukụre man ẹfep ndida ukeme ukere n̄kpọ mmọ nnam n̄kpọ,” ntem ke etubom ufọkn̄wed ukpepn̄kpọ ido ukpono ke United States ewet. Enye adian do ete: “Mmọ n̄kukụre ẹyom ndinyịme kpukpru n̄kpọ ‘ye unana edinyene nsọn̄ọ.’”
SE EMI ọwọrọde edi nte ke ata ediwak mbon oro ẹnịmde se ido ukpono ekpepde ke akpanikọ isikereke iban̄a ntak emi mmọ ẹnịmde mme ukpepn̄kpọ oro ke akpanikọ mîdịghe m̀mê eti isọn̄ odu kaban̄a se mmọ ẹnịmde ke akpanikọ. Idịghe n̄kpọ n̄kpaidem nte ke ido ukpono akabade edi ibuot nneme oro ediwak owo ẹmen̄ede ndineme.
Ke mfụhọ, mme utọ edinam nte edikama ndisọi mbiet ido ukpono ye edifiak ntịn̄ mme akam oro ẹkemụmde ẹdọn̄ ke ibuot n̄ko isịnke udọn̄ inọ owo ndida ukeme ukere n̄kpọ esie nnam n̄kpọ. Mme edinam emi, ke adianade ye ndiye ufọk, ikpọ ndiye window akrasi, ye ndinem ikwọ, ke usụn̄ kiet m̀mê eken ẹwụt se ido ukpono ediwak miliọn owo aban̄ade. Okposụkedi ndusụk ufọkabasi ẹdọhọde ke se mmimọ inịmde ke akpanikọ ẹkọn̄ọ ke Bible, etop mmọ oro, ‘nịm Jesus ke akpanikọ ndien ẹyenyan̄a fi’ isịnke udọn̄ inọ ifịk ifịk ukpepn̄kpọ Bible. Mbon eken ẹwọn̄ọde ẹbịne edikwọrọ gospel n̄kaowo m̀mê gospel ukaraidem. Nso idi utịp kpukpru emi?
Kaban̄a idaha oro odude ke Edem Edere America, ewetn̄wed ido ukpono kiet ọkọdọhọ ete: “Etie nte . . . Ido Ukpono Christ inyeneke orụn̄, [ndien] mme andibuana ke enye inen̄ekede ifiọk mme edinịm ke akpanikọ mmọ.” Anam ndụn̄ọde kiet ama akam aka anyan ekesịm edidọhọ ke United States edi “idụt emi mînyeneke ifiọk Bible.” Ke nditịn̄ akpanikọ, se ẹtịn̄de emi edi ntre n̄ko ke mme idụt eken oro mme inua-okot Ido Ukpono Christ ẹyọhọde. Kpasụk ntre ediwak ido ukpono oro mîdịghe eke Christian isịnke udọn̄ inọ edida ukeme ukere n̄kpọ nnam n̄kpọ, utu ke oro ẹsịn udọn̄ ẹnọ ikwọ, mme ikpîkpu akam, ye nsio nsio orụk editie n̄kere n̄kpọ oro ẹbuanade ndedịbe odudu, utu ke eti usụn̄ ukere n̄kpọ.
Edi, ke uwem ofụri usen mmọ, kpa mme owo emi mîsidaha ini ikere m̀mê mme edinịm ke akpanikọ ido ukpono mmimọ ẹnen ẹnyụn̄ ẹdi akpanikọ ẹsiwak ndida ini ntie n̄kere mban̄a mme n̄kpọ efen. Nte itiehe fi esen esen ndikop nte owo oro anamde ekese ndụn̄ọde n̄kukụre man edep ubomisọn̄—emi ẹdiduọkde ke itie uduọn̄ọ mbio usen kiet—etịn̄de aban̄a ido ukpono esie ete, ‘Edieke enye ọkọfọnde ye ete ye eka mi, enye ọfọn ye ami’?
Edieke nnyịn inen̄erede inyene udọn̄ ndinem Abasi esịt, nte nnyịn ikpenen̄ekede ikere m̀mê se nnyịn inịmde ke akpanikọ iban̄a enye enen? Apostle Paul ama etịn̄ aban̄a ndusụk mbon ido ukpono eyo esie oro ẹkenyenede “ifiopesịt ẹban̄a Abasi, edi ifiopesịt mmọ isan̄ake ye [nnennen ifiọk, NW].” (Rome 10:2) Ẹkeme ndimen mme utọ owo oro ndomo ye andiyet ndom ke ufọk oro ẹkpede utom, emi anamde utom ọkpọsọn̄ edi adade idiọk uduot ndom eyet ke ufọk koro enye mîkakpan̄ke utọn̄ ke item enyene-ufọk. Andiyet ndom oro ekeme ndikop inemesịt ke utom esiemmọ, edi nte enyene-ufọk eyenem esịt ke utom oro?
Nso inem Abasi esịt iban̄a utuakibuot akpanikọ? Bible ọbọrọ ete: “Emi edi se ifọnde inyụn̄ inemde Abasi Andinyan̄a nnyịn esịt; emi oyomde kpukpru owo ẹnyene edinyan̄a, ẹnyụn̄ ẹsịm [nnennen, NW] ifiọk akpanikọ.” (1 Timothy 2:3, 4) Ndusụk owo ẹkeme ndikere ke owo ikemeke ndikụt utọ ifiọk oro ke otu ediwak ido ukpono oro ẹdude mfịn. Edi kere—edieke edide uduak Abasi nte mme owo ẹnyene nnennen ifiọk akpanikọ, ndi enye ekpedịp mmọ ifiọk oro? Oro ikpekemke ye Bible, emi ọdọhọde ete: “Afo ama oyom [Abasi], oyokụt enye.”—1 Chronicles 28:9.
Didie ke Abasi ayarade idemesie owụt mbon oro ẹyomde enye ke esịt akpanikọ? Ibuotikọ oro etienede ọyọnọ ibọrọ.