Idotenyịn Omụm Akama, Ima Onụk Ẹnam N̄kpọ
“Mbuọtidem, ye idotenyịn, ye ima ẹsụk ẹdu, mmọ mbita; edi andikpon-n̄kan ke otu mmọ edi ima.”—1 CORINTH 13:13.
1. Nso ntọt ke apostle Paul ọnọ nnyịn?
APOSTLE Paul ọtọt nnyịn ete ke mbuọtidem nnyịn ekeme ndiwụre nte nsụn̄ikan̄. Enye etịn̄ aban̄a ‘ediyịre mbuọtidem ye eti esịt n̄kama; koro ndusụk owo ẹma ẹtop enye ẹduọk, ẹnyụn̄ ẹwụre ke uwem mbuọtidem.’ (1 Timothy 1:19) Ke akpa isua ikie E.N., ẹkesida eto ẹbọp ubom. Mmọ ndinen̄ede mfọn ndisan̄a ke inyan̄ ọkọkọn̄ọ ke uduot eto ye ke usọ ubọp ubom.
2. Ntak anade itịm ibọp ubom mbuọtidem nnyịn, ndien nso ke emi oyom oto nnyịn?
2 Ana se ẹkemede ndikot ubom mbuọtidem nnyịn aka iso ọfiọrọ ke enyọn̄ nyoyoho inyan̄ ubonowo. (Isaiah 57:20; Ediyarade 17:15) Ntre ana ẹbọp enye enen̄ede ọfọn, ndien emi ọkọn̄ọ ke nnyịn. Ke ini “inyan̄” eke eyo mme Jew ye mbon Rome ẹkenen̄erede ẹdiọk ye mme akpa Christian, Jude ekewet ete: “Ndima, mbufo ẹbọp idem ke enyọn̄ edisana mbuọtidem mbufo ẹkọri, ẹbọn̄ akam ke Edisana Spirit; ntem ke ẹdimụm idem mbufo ẹnịm ke ima Abasi, ẹnyụn̄ ẹtie ẹbet mbọm Ọbọn̄ nnyịn Jesus Christ emi edisụn̄ọde ke nsinsi uwem.” (Jude 20, 21) Sia Jude eketịn̄de n̄ko aban̄a edin̄wana mban̄a ‘mbuọtidem, emi ẹkeyakde ẹsịn nti ikọt Abasi ke ubọk,’ ekeme ndidi ikọ oro “edisana mbuọtidem” etịn̄ aban̄a ofụri ukpepn̄kpọ Christian, esịnede eti mbụk edinyan̄a. (Jude 3) Christ edi itiat idakisọn̄ mbuọtidem oro. Oyom ọkpọsọn̄ mbuọtidem edieke anade nnyịn isọn̄ọ iyịre ke ata ido ukpono Christian.
Ndiyọ Oyobio “Ndịk Isio N̄ka”
3. Didie ke ndusụk owo ẹda “ndịk isio n̄ka” ẹnam n̄kpọ?
3 Ke mme isua ndondo emi, ediwak enyene-ndịk idaha ẹban̄ade akpakịp uwotidem, uwotowo, ye en̄wan mbon edinam oyomonsia abuanade n̄kpri n̄ka ẹmeda itie. Nte an̄wan̄ade, ediwak owo, esịnede mme andikara ukaraidem, ẹmekere ẹban̄a edikpeme mbon oro mîfiọkke iban̄a, akpan akpan mme uyen, mbiọn̄ọ mme utọ enyene-ndịk n̄ka oro. Nte eyịghe mîdụhe, “abasi eyo emi,” emi edide ntak mme enyene-ndịk ubiatibet ẹmi, omosio se ndusụk owo ẹkotde ndịk isio n̄ka edi, enye ke onyụn̄ ada emi an̄wana ye ikọt Jehovah. (2 Corinth 4:4; Ediyarade 12:12) Ndusụk owo ẹmeda idaha emi ẹbiọn̄ọ utom nnyịn. Ke ndusụk idụt, mmọ ẹnam ubịnikọt emi in̄wan̄în̄wan̄ uduak edide ndikpeme mme owo mbiọn̄ọ “mme enyene-ndịk n̄ka” edi ke ndudue ẹsiakde Mme Ntiense Jehovah ndien ke ntem ẹdade ekpọhọikọ ẹdori nnyịn ikọ. Emi amanam unọ ikọ ntiense eke ufọk ke ufọk edi ọkpọsọn̄ n̄kpọ ke ndusụk idụt ke Europe omonyụn̄ anam ndusụk owo ẹmi ẹkekpepde Bible ye nnyịn ẹtre ukpepn̄kpọ mmọ. Nte utịp, emi amanam idem emem ndusụk nditọete nnyịn.
4. Ntak emi ubiọn̄ọ mîkpanamke idem emem nnyịn?
4 Nte ededi, utu ke ndinam idem emem nnyịn, ubiọn̄ọ ekpenyene ndisọn̄ọ edinịm ke akpanikọ nnyịn nte ke nnyịn inam ata Ido Ukpono Christ. (Matthew 5:11, 12) Ẹma ẹdori mme akpa Christian ikọ ẹte mmọ ẹdi n̄ka oro ẹsọn̄de ibuot ye ukara, ndien ẹma “ẹtịn̄ n̄kpọ ẹbiat” mmọ ke kpukpru ebiet. (Utom 24:5; 28:22) Edi apostle Peter ama ọnọ mme ekemmọ andinịm ke akpanikọ nsọn̄ọ, ewetde ete: “Ndima, ẹkûyịk ikan̄-ikan̄ idomo eke odude ke otu mbufo, eke etienede mbufo man ẹdomo mbufo ẹfiọk, nte edide utịbe n̄kpọ ọwọrọ mbufo. Edi adan̄a nte mbufo ẹbuanade ke ndutụhọ Christ, ẹkam ẹdara; man mbufo ẹkpenyụn̄ ẹdat esịt eti-eti ke adan̄aemi ẹdiyararede ubọn̄ Esie.” (1 Peter 4:12, 13) Kpasụk ntre, owo otu ukara eke akpa isua ikie ekewet ete: “Ẹnịm ẹte edi n̄kpọ ọyọhọ idatesịt, nditọ-ete mi, ke ini nsio-nsio idomo ẹsịmde mbufo; ke ẹfiọkde ẹte mbuọtidem mbufo emi ẹma ẹdomo ẹwụt anam ime ọwọrọ. Edi yak ime anam utom esie ama, man mbufo ẹfọn ẹma ẹnyụn̄ ẹsọn̄ ke ukpọn̄, ẹkûnana baba n̄kpọ kiet.” (James 1:2-4) Kpa nte ọkpọsọn̄ oyobio esidomode nte ubom ọfọnde ndiwọrọ akpa, mme oyobio ubiọn̄ọ ẹyeyarade mme mmeme ekededi ke ubom mbuọtidem nnyịn.
Ukụt Anam Ime Ọwọrọ
5. Didie ke nnyịn ikeme nditịm n̄kụt nte ke idotenyịn nnyịn enyene iwụk ke idak ukụt?
5 Mme Christian ẹkeme ndinen̄ede ntịm mfiọk ime mmọ ye nte mbuọtidem mmọ enyenede iwụk n̄kukụre ke ẹma ẹkeyọ mme oyobio ukụt. Ime nnyịn ‘edinam utom esie ama’ ke akpa oro adahade n̄kukụre edieke nnyịn ‘ifọnde ima inyụn̄ isọn̄de ke ukpọn̄, mînanake baba n̄kpọ kiet,’ esịnede ọkpọsọn̄ mbuọtidem. Paul ekewet ete: “Ke kpukpru usụn̄ imowụt ite idi ata mme asan̄autom Abasi, ke akwa edime ime, ke ukụt, ke mfịghe, ke mbaba.”—2 Corinth 6:4.
6. Ntak emi nnyịn ‘ikpobụrede mbụre ke ukụt,’ ndien didie ke emi ọsọn̄ọ idotenyịn nnyịn?
6 Ikpenyene ndida n̄kpọsọn̄ oyobio ukụt oro nnyịn ikemede ndisobo ndusụk ini nte mme ifet ndisọn̄ọ nte ke ubom mbuọtidem nnyịn ọsọn̄ idem onyụn̄ enyene iwụk. Paul ekewet ọnọ mme Christian ke Rome ete: “Nnyịn imobụre mbụre ke ukụt nnyịn n̄ko, sia ifiọkde ite ukụt ọwọrọ ime, ime onyụn̄ ọwọrọ eti edu, eti edu onyụn̄ ọwọrọ idotenyịn: ndien idotenyịn emi iyakke nnyịn ikụt bụt.” (Rome 5:3-5) Nsọn̄ọnda ke idak idomo anam nnyịn inyene unyịme Jehovah. Ndien, emi ọsọn̄ọ idotenyịn nnyịn.
Ntak Mbuọtidem Ndusụk Owo Owụrede
7. (a) Nte mme ikọ Paul ẹwụtde, didie ke ndusụk owo ẹkewụre ke n̄kan̄ eke spirit? (b) Didie ke ndusụk owo ẹwọn̄ọde ẹkpọn̄ akpanikọ mfịn?
7 Ke ini Paul ọkọtọtde aban̄a mbuọtidem ‘ndiwụre,’ enye ekekere aban̄a ndusụk owo ẹmi ‘ẹketopde’ eti esịt mmọ “ẹduọk,” ẹkenyụn̄ ẹduọkde mbuọtidem mmọ. (1 Timothy 1:19) Ndusụk ke otu mmọ ẹkedi Hymenaeus ye Alexander ẹmi ẹkeduọde ẹdụk nsọn̄ibuot, ẹwọn̄ọrede ẹkpọn̄ akpanikọ, ẹnyụn̄ ẹtịn̄de ikọ isụn̄i. (1 Timothy 1:20, ikọ idakisọn̄ NW; 2 Timothy 2:17, 18) Mfịn, mbon nsọn̄ibuot, ẹmi ẹwọn̄ọrede ẹkpọn̄ akpanikọ, ẹda ikọ inua ẹmia “asan̄autom emi anamde akpanikọ, onyụn̄ enyenede ọniọn̄,” ke nditịm ntịn̄ ẹdomde ubọk emi ọkọnọde mmọ udia ke n̄kan̄ eke spirit. Ndusụk ẹbiet “idiọk asan̄autom,” ke usụn̄ en̄wen ẹdọhọde ẹte, “Ete mi ebịghi edidi.” (Matthew 24:44-49; 2 Timothy 4:14, 15) Mmọ ẹfan̄a ẹte ke utịt editịm n̄kpọ emi ikpereke ẹnyụn̄ ẹkụt ndudue ẹnọ otu asan̄autom oro ẹnamde ikọt Abasi ẹsọn̄ọ ẹnyene nte ini edide usọp usọp ke ekikere. (Isaiah 1:3) Utọ mbon nsọn̄ibuot oro ẹkụt unen ke ‘ndibiat mbuọtidem ndusụk owo,’ ẹdade n̄wụre ke n̄kan̄ eke spirit ẹdi.—2 Timothy 2:18.
8. Nso inam ndusụk owo ẹwụri m̀mê ẹsịp ubom mbuọtidem mmọ?
8 Mme Christian eken oro ẹma ẹkeyak idem ẹnọ ẹma ẹwụri ubom mbuọtidem mmọ ebe ke nditop ubieresịt mmọ nduọk nnyụn̄ nsịn idem ke anana-ukpan uyom inemesịt ererimbot emi ye oburobụt idan̄ esie. (2 Peter 2:20-22) Ndien ndusụk owo ẹsịp ubom mbuọtidem mmọ koro ke ekikere mmọ, ebiet ubọhọ edide obufa editịm n̄kpọ itiehe nte ekpere kan̄a. Sia mîkemeke ndibat ini kaban̄a edisu ndusụk prọfesi, ẹnyụn̄ ẹsiode “usen Ọbọn̄” ẹfep ke ekikere mmọ, mmọ ẹkpọnọde utuakibuot akpanikọ ẹnịm. (2 Peter 3:10-13; 1 Peter 1:9) Ke mîbịghike mmọ ẹfiak ẹkụt idemmọ ke inyan̄ editịm n̄kpọ emi oro ọyọhọde ye ntụhube ye afanikọn̄. (Isaiah 17:12, 13; 57:20) Ndusụk owo oro ẹma ẹketre ndibuana ye esop Christian ẹsụk ẹnenịm ke akpanikọ ẹte ke enye edi ido ukpono akpanikọ. Nte ededi, etie nte mmọ ẹnana ime oro oyomde man ẹbet obufa ererimbot oro Jehovah Abasi ọn̄wọn̄ọde. Uwem ke Paradise isọpke idi nte mmọ ẹkekerede.
9. Nso ke ibat ibat Christian oro ẹma ẹkeyak idem ẹnọ ẹnam, ndien nso ke mme n̄kpọ ẹmi ẹkpenam nnyịn ikere iban̄a?
9 Ke ndusụk ikpehe ererimbot etie nte ibat ibat Christian oro ẹma ẹkeyak idem ẹnọ ẹfịt afara ubom mbuọtidem mmọ. Ubom mmọ osụk ọfọfiọrọ, edi utu ke ndisịn ifịk n̄ka iso ke ọyọhọ mbuọtidem, mmọ ẹdiwat eyen eyen. Ke ẹdide se idotenyịn “Paradise ke mîbịghike” odụride, ndusụk owo ẹma ẹben̄e idem ndisịn ofụri ukeme ndidu do—ẹsịnde ifịk ke utom ukwọrọikọ ẹnyụn̄ ẹdụkde kpukpru mbono esop, n̄kpri mbono, ye ikpọ mbono kpukpru ini. Idahaemi ke ẹkerede ke edisu idotenyịn mmimọ ebịghi akan nte mmimọ ikodoride enyịn, mmọ iyomke aba ndisịn idem ọkpọsọn̄. Ẹkụt emi ke editek ubọk ke utom ukwọrọikọ, edidụk mme mbono esop ntomo ntomo, ye edinyịme nditaba mme ikpehe ke ndutịm n̄kpri mbono m̀mê eke ikpọ mbono. Mbon en̄wen ẹsịn ini efen efen ke unọ idem inemesịt ye ke edinyene mme n̄kpọ obụkidem. Mme akpanikọ ẹmi ẹnam nnyịn ikere iban̄a se ikpedide odudu oro akarade uwem nnyịn ke ikerede iban̄a uyakidem nnyịn nnọ Jehovah. Ndi ifịk nnyịn ke utom esie ọkpọkọn̄ọ ke idotenyịn “Paradise ke mîbịghike”?
Ẹmen Idotenyịn Ẹdomo ye Ukwak Ubom
10, 11. Paul ekemen idotenyịn nnyịn odomo ye nso, ndien ntak emi edimen ndomo emi okodotde?
10 Paul ama osio owụt nte ke Jehovah ama ọn̄wọn̄ọ edidiọn̄ emi editode Abraham. Ekem apostle oro ama anam an̄wan̄a ete: “Abasi . . . ada un̄wọn̄ọ edisịn: man okpoto ke n̄kpọ iba ẹmi mîkemeke ndikpụhọde [ikọ esie ye un̄wọn̄ọ esie], emi Abasi mîkemeke ndisu nsu ke esịt, nnyịn ikpenyene akwa nsọn̄-esịt, kpa nnyịn ẹmi ima ifehe iyom ubọhọ ke edimụm idotenyịn emi ẹnịmde nnyịn ke iso: idotenyịn oro ke nnyịn inyene nte ukwak ubom ukpọn̄ nnyịn, eke mîdikpụhu nnyịn, edi ọsọn̄ọde omụm isọn̄.” (Mme Hebrew 6:17-19; Genesis 22:16-18) Idotenyịn oro ẹnọde mme Christian oro ẹyetde aran edi uwem unana n̄kpa ke heaven. Mfịn, ata ediwak ke otu mme asan̄autom Jehovah ẹnyene ata eti idotenyịn nsinsi uwem ke paradise isọn̄. (Luke 23:43) Ke utọ idotenyịn oro mîdụhe, owo ikemeke ndinyene mbuọtidem.
11 Ukwak ubom edi okopodudu n̄kpọ ukpeme, ata akpan n̄kpọ kaban̄a edimụm ubom nnịm ke itie nnyụn̄ n̄kpan enye ndifiọrọ n̄wọrọ. Awat-inyan̄ ndomokiet ikpedehede idian̄ade ke esụk ye unana ukwak ubom. Sia ubom Paul ekesịpde ediwak ini, enye ama ọfiọk oto ifiọk n̄kpọntịbe nte ke uwem mme awat-inyan̄ awak ndikọn̄ọ ke mme ukwak ubom mmọ. (Utom 27:29, 39, 40; 2 Corinth 11:25) Ke akpa isua ikie, nsụn̄ikan̄ ikenyeneke engine man anam etubom nsụn̄ikan̄ anam nte enye akpamade. Ke mîbọhọke mme nsụn̄ikan̄ ekọn̄ ẹmi ẹkesidade ubọi ẹwat, mme nsụn̄ikan̄ ẹkesiberi edem akpan akpan ke ofụm man ẹsan̄a. Edieke nsụn̄ikan̄ esie okodude ke itiendịk ediwat n̄kọdọk itiat, n̄kukụre un̄wam oro etubom nsụn̄ikan̄ ekenyenede ekedi ndiduọk ukwak ubom nnyụn̄ mbọhọ oyobio oro, enyenede mbuọtidem nte ke ukwak ubom iditreke ndimụm isọn̄ n̄kama. Ke ntre Paul ekemen idotenyịn Christian odomo ye “ukwak ubom ukpọn̄ nnyịn, eke mîdikpụhu nnyịn, edi ọsọn̄ọde omụm isọn̄.” (Mme Hebrew 6:19) Ke ini nnyịn in̄wanade ye mme oyobio ubiọn̄ọ m̀mê isobode mme idomo eken, utịbe utịbe idotenyịn nnyịn ebiet ukwak ubom oro anamde nnyịn inyene iwụk nte mme odu-uwem ukpọn̄, man otodo ubom mbuọtidem nnyịn okûfiọrọ odụk enyene-ndịk utan eyịghe m̀mê akama-nsobo itiat nsọn̄ibuot.—Mme Hebrew 2:1; Jude 8-13.
12. Didie ke nnyịn ikeme ndifep ndiwọn̄ọde n̄kpọn̄ Jehovah?
12 Paul ọkọtọt mme Christian ẹdide mme Hebrew ete: “Nditọ-ete, ẹkpeme mbak ndusụk idiọk esịt unana mbuọtidem edidu owo mbufo kiet ke idem, ke ediwọn̄ọde n̄kpọn̄ Abasi uwem.” (Mme Hebrew 3:12) Ke uwetn̄kpọ Greek, “ediwọn̄ọde n̄kpọn̄” ke ata ata usụn̄ ọwọrọ “ndision̄o idem n̄kpọn̄,” oro edi, ndisọn̄ ibuot. Edi nnyịn imekeme ndifep utọ ọyọhọ ọyọhọ n̄wụre oro. Mbuọtidem ye idotenyịn ẹyen̄wam nnyịn ndisọn̄ọ nyịre ye Jehovah idem ke ini ndiọkn̄kan oyobio idomo. (Deuteronomy 4:4; 30:19, 20) Mbuọtidem nnyịn idibietke nsụn̄ikan̄ emi oyobio ukpepn̄kpọ nsọn̄ibuot emende otop. (Ephesus 4:13, 14) Ndien ye idotenyịn nte ukwak ubom nnyịn, nnyịn iyekeme ndiyọ mme oyobio uwem nte mme asan̄autom Jehovah.
Ima ye Edisana Spirit Ẹnụk Ẹnam N̄kpọ
13, 14. (a) Ntak emi ukwak ubom idotenyịn nnyịn kpọt mîkemke? (b) Nso ikpedi odudu oro onụkde owo ke ndinam edisana utom nnọ Jehovah, ndien ntak-a?
13 Christian idinamke n̄kọri ikesịm obufa editịm n̄kpọ edieke n̄kukụre uduak esie ndinam n̄kpọ Jehovah edide idotenyịn edidu uwem nsinsi ke paradise isọn̄. Ke adan̄aemi enịmde ukwak ubom idotenyịn esie nte n̄kpọ oro anamde enye enyene iwụk ke uwem, oyom enye ada odudu ima oro onụkde-nụk adian ke enye ye ke mbuọtidem esie. Paul ama ọsọn̄ọ akpanikọ emi ke ini enye ekewetde ete: “Mbuọtidem, ye idotenyịn, ye ima ẹsụk ẹdu, mmọ mbita; edi andikpon-n̄kan ke otu mmọ edi ima.”—1 Corinth 13:13.
14 Odudu oro onụkde nnyịn ndinam edisana utom ekpenyene ndidi ima ofụri esịt inyenede inọ Jehovah, ke ndinam n̄kpọ mban̄a anana-mbiet ima oro enye enyenede ọnọ nnyịn. Apostle John ekewet ete: “Owo eke mîmaha ima ifiọkke Abasi, koro Abasi edi ima. Abasi akada emi ayarade ima emi Enye amade nnyịn, ke emi Enye okosiode edibon Eyen Esie kierakiet ọdọn̄ ke ererimbot, kpan̄ nnyịn ikpodu uwem oto ke Enye. Nnyịn ima ima, koro Enye ekebemde iso ama nnyịn.” (1 John 4:8, 9, 19) Ke ntak esịtekọm inyenede inọ Jehovah, akpan udọn̄ nnyịn ikpedịghe ndinyene ọkpọkpọ edinyan̄a nnyịn edi ndikụt ẹnamde edisana enyịn̄ esie asana ye ediwụt unen edinen itie edikara esie.
15. Didie ke ima oro inyenede inọ Jehovah enyene ebuana ye mbụme aban̄ade itie edikara esie?
15 Jehovah oyom nnyịn inam n̄kpọ inọ enye koro nnyịn imade enye, idịghe ke ntak Paradise kpọt. N̄wed ofụri orụk ifiọk Bible oro Insight on the Scripturesa ọdọhọ ete: “Jehovah ada ubọn̄ ke akpanikọ oro nte ke itie edikara esie ye ibetedem oro mme edibotn̄kpọ esie ẹnọde ọkọn̄ọ akpan akpan ke ima. Enye ama mbon oro ẹmade itie edikara esie ke ntak nti edu esie ye ntak emi enende, ẹmi ẹmade itie edikara esie ẹkan en̄wen ekededi. (1Co 2:9) Mmọ ẹmek ndinam utom ke idak itie edikara esie utu ke ndidomo ndida ke idem—ẹnam emi koro mmọ ẹfiọkde enye ye ke ntak ima, unenikpe, ye ọniọn̄ esie, ẹmi mmọ ẹfiọkde ke enen̄ede akan eke mmimọ. (Ps 84:10, 11)”—Eboho 2, page 275.
16. Didie ke ima inyenede inọ Jesus edi odudu oro onụkde-nụk ke uwem nnyịn?
16 Nte mme Christian, nnyịn imowụt ima n̄ko inọ Jesus ke ndinam n̄kpọ mban̄a ima oro enye enyenede ọnọ nnyịn. Paul ọkọkọk ibuot ete: “Ima Christ efefịk nnyịn; koro ida ntem ite, Owo kiet ama akakpa aban̄a kpukpru owo, kpukpru owo ẹkpan̄a ndien; Enye okonyụn̄ akpa aban̄a kpukpru owo, man mme odu-uwem ẹkûdu uwem aba ẹnọ idem mmọ, edi ẹdu uwem ẹnọ Enye emi akakpade aban̄a mmọ, onyụn̄ esetde.” (2 Corinth 5:14, 15) Christ edi n̄kukụre itiat idakisọn̄ emi ẹbọpde uwem eke spirit nnyịn, mbuọtidem nnyịn, ye idotenyịn nnyịn ẹdori. Ima oro inyenede inọ Christ Jesus ọnọ idotenyịn nnyịn odudu onyụn̄ anam mbuọtidem nnyịn enyene iwụk, akpan akpan ke mme ini oyobio oyobio idomo.—1 Corinth 3:11; Colossae 1:23; 2:6, 7.
17. Nso ọkpọsọn̄ odudu ke Jehovah ọnọ nnyịn, ndien didie ke ẹwụt nte enye edide akpan n̄kpọ ke Utom 1:8 ye Ephesus 3:15, 16?
17 Ke adan̄aemi ima oro inyenede inọ Abasi ye Eyen esie edide akpan odudu ke uwem nnyịn nte mme Christian, Jehovah ọnọ n̄kpọ en̄wen oro onụkde nnyịn, ọnọde nnyịn odudu, onyụn̄ ọnọde nnyịn ukeme ndika iso ke utom esie. Enye edi anamutom odudu esie, m̀mê edisana spirit. Ikọ Hebrew ye Greek oro ẹkabarede “spirit” etịn̄ akpan akpan aban̄a ofụm ndibara, utọ nte ọkpọsọn̄ ofụm. Mme utọ ubom afara nte mmọ oro Paul ekesidụkde ẹkeberi edem ke odudu ofụm oro enyịn mîkwe man ẹsịm ebiet oro mmọ ẹkekade. Ukem ntre, nnyịn imoyom ima ye edinam anamutom odudu Abasi oro enyịn mîkwe edieke anade ubom mbuọtidem nnyịn awat nnyịn aka iso iso ke utom Jehovah.—Utom 1:8; Ephesus 3:15, 16.
Ndika Iso Nsan̄a N̄ka Ebiet Ikade!
18. Nso idin̄wam nnyịn ndiyọ mme udomo mbuọtidem nnyịn ekededi ke ini iso?
18 Ẹkeme ndinen̄ede ndomo mbuọtidem ye ima nnyịn mbemiso isịmde obufa editịm n̄kpọ. Edi Jehovah ọmọnọ nnyịn ukwak ubom “eke mîdikpụhu nnyịn, edi ọsọn̄ọde omụm isọn̄”—kpa utịbe utịbe idotenyịn nnyịn. (Mme Hebrew 6:19; Rome 15:4, 13) Ke ini ubiọn̄ọ m̀mê mme idomo eken ẹtụhọrede nnyịn, nnyịn imekeme ndiyọ edieke idotenyịn nnyịn enen̄erede omụm nnyịn akama. Ke oyobio kiet okụrede edi mbemiso en̄wen ọtọn̄ọde, ẹyak nnyịn ibiere ndisịn odudu ke idotenyịn nnyịn nnyụn̄ nsọn̄ọ mbuọtidem nnyịn.
19. Didie ke nnyịn ikeme ndinam ubom mbuọtidem nnyịn aka iso ọfiọrọ inyụn̄ isịm ebiet ubọhọ edide obufa ererimbot Abasi?
19 Mbemiso akasiakde “ukwak ubom ukpọn̄,” Paul ọkọdọhọ ete: “Ọdọn̄ nnyịn nte kpukpru mbufo ẹwụt kpa orụk ifịk oro [“ẹnam wap,” ikọ idakisọn̄ NW], man ẹnyene ọyọhọ idotenyịn tutu esịm utịt: man mbufo ẹkûkop ifem, edi ẹdi [mme andikpebe] mmọ ẹmi ẹkesan̄ade ke mbuọtidem ye ime ẹbọ mme un̄wọn̄ọ Abasi ẹnyene.” (Mme Hebrew 6:11, 12) Ke ima inyenede inọ Jehovah ye Eyen esie onụkde, inyụn̄ idide se edisana spirit ọnọde odudu, ẹyak nnyịn inam ubom mbuọtidem nnyịn aka iso ọfiọrọ tutu nnyịn isịm ebiet ubọhọ edide obufa ererimbot oro Abasi ọn̄wọn̄ọde.
[Mme Ikọ idakisọn̄]
a Watchtower Bible and Tract Society of New York, Inc., osio.
Ke Ndidụn̄ọde
◻ Kaban̄a mbuọtidem nnyịn, nso ntọt ke Paul ọkọnọ nnyịn?
◻ Didie ke ubom ndusụk owo owụre ke n̄kan̄ eke spirit, ndien didie ke mbon en̄wen ẹtek ke ifịk?
◻ Ewe edu Abasi ke oyom ida idian ke mbuọtidem nnyịn?
◻ Nso idin̄wam nnyịn ndisịm ebiet ubọhọ edide obufa ererimbot oro Abasi ọn̄wọn̄ọde?
[Ndise ke page 16]
Ana itịm ibọp ubom mbuọtidem nnyịn man ọsọn̄ọ ada ọbiọn̄ọ mme oyobio uwem
[Ndise ke page 17]
Mbuọtidem nnyịn ekeme ndiwụre
[Ndise ke page 18]
Idotenyịn edi ukwak ubom uwem nnyịn nte mme Christian