Mme ikọ apostle Paul esịn un̄wana ke editi n̄kpa Christ ete: “[N̄kọbọ] ke ubọk Ọbọn̄ se n̄konyụn̄ nyakde nnọ mbufo, nte, ke okoneyo oro ẹdade Enye ẹnọ, Ọbọn̄ Jesus emen uyo; ndien ke Enye ama ọkọnọ Abasi ekọm, Enye obụn̄ uyo, onyụn̄ ọdọhọ ete, Emi edi ikpọkidem Mi ọnọ mbufo; ẹnam emi nditi Mi. Kpa ntre n̄ko ke Enye emen cup, ke ẹma ẹkedia n̄kpọ ẹma, ete, Cup emi edi obufa ediomi ke iyịp Mi; ẹnam emi, adan̄a ini nte ẹn̄wọn̄wọn̄, ke editi Mi. Koro adan̄a ini nte ẹdadia uyo emi ẹnyụn̄ ẹn̄wọn̄ cup emi, mbufo ẹkwọrọ n̄kpa Ọbọn̄ tutu Enye edi.”—1 Corinth 11:23-26.

Ẹnịm Enye Ikafan̄?

Nso ke mme ikọ Paul ẹmi: “Adan̄a ini nte ẹdadia uyo emi ẹnyụn̄ ẹn̄wọn̄ cup emi, mbufo ẹkwọrọ n̄kpa Ọbọn̄ tutu Enye edi” ẹwọrọ? Mme anam-akpanikọ Christian oro ẹyetde aran ẹyedia mme n̄kpọ idiọn̄ọ Editi “adan̄a [ediwak] ini” tutu mmọ ẹkpan̄a, ke ukperedem edide se ẹnamde ẹset ẹka uwem eke heaven. Ke iso Abasi ye ererimbot, mmọ ediwak ini ke ntem ẹyetan̄a mbuọtidem mmọ ke enọ uwa Jesus oro Jehovah ọnọde. Ebịghi adan̄a didie? Paul ọkọdọhọ ete, “tutu Enye edi,” nte an̄wan̄ade ọwọrọde ete ke edinam ẹmi eyekaiso tutu Jesus edi ndida mme anditiene enye oro ẹyetde aran n̄ka heaven ebe ke ediset ke n̄kpa ke ini “edidu” esie. (1 Thessalonica 4:14-17, NW) Emi odu ke n̄kemuyo ye mme ikọ oro Christ eketịn̄de ọnọ mme anam-akpanikọ apostle 11 esie ete: “Edieke n̄kade n̄kotịm itie ntre nnọ mbufo, nyefiak ndi ndida mbufo nnọ Idemmi man mbufo ẹnyụn̄ ẹdu ke ebiet eke Ami ndude.”—John 14:3.

Nte ẹkpenyene nditi n̄kpa Christ ke usen ke usen m̀mê ndusụk ke urua ke urua? Ọfọn, Jesus ọkọtọn̄ọ Udia Mbubịteyo Ọbọn̄ ndien ẹkewot enye ke Passover, emi ekedide editi edinyan̄a oro ẹkenyan̄ade Israel ẹsio ke ufụn mbon Egypt. Ke akpanikọ, ẹkot enye “passover nnyịn, kpa Christ” koro enye edi Eyenerọn̄ oro ẹkewade ẹnọ mme Christian. (1 Corinth 5:7) Ẹkesinịm Passover inikiet kpọt ke isua, ke Nisan 14. (Exodus 12:6, 14; Leviticus 23:5) Emi ọnọ ekikere ete ke ẹkpesinyene nditi n̄kpa Jesus adan̄a ediwak ini nte ẹkesitide Passover—ke isua ke isua, idịghe ke usen ke usen m̀mê ke urua ke urua.

Ke ediwak isua ikie ediwak owo ẹmi ẹdọhọde ke idi mme Christian ẹma ẹsiti n̄kpa Jesus inikiet ke isua. Sia mmọ ẹkesinamde ntre ke Nisan 14, ẹkesikot mmọ mbon Quartodeciman, ọwọrọde “mbon ọyọhọ usen duopenan̄.” Kaban̄a mmọ, ewet mbụkeset oro J. L. von Mosheim ekewet ete: “Mme Christian ke Asia Minor ẹma ẹmehe ndidia edisana usọrọ emi, oro ẹkedade ke nditi udia Ọbọn̄ oro ẹkewụkde, ye n̄kpa Jesus Christ, ke ukem ini oro mme Jew ẹkesitade eyenerọn̄ Passover mmọ, oro edi ke mbubịteyo ọyọhọ usen duopenan̄ ke akpa ọfiọn̄ [Nisan]. . . . Mmọ ẹketiene uwụtn̄kpọ Christ ukem nte ẹkpenịmde ibet.”