Nte Afo Emeti?

Nte afo ama ama ndikot nsiondi Enyọn̄-Ukpeme eke ndondo emi? Ọfọn, se m̀mê afo emekeme ndibọrọ mme mbụme ẹtienede mi:

◻ Nso isọn̄ ntak ke mme ekpemerọn̄ eke spirit ẹnyene ndinam usio-ukot edisobo mbon oro ẹkesiode ẹfep man ẹse m̀mê ẹkeme ndinam mmọ ẹkabade esịt?

Idem ke adan̄aemi nditọ Israel ẹkedude ke ntan̄mfep inyụn̄ ikabakede esịt kan̄a, Jehovah, ukem nte ekpemerọn̄, ama anam usio-ukot ke ndiyom mmọ, ọdọn̄de mme prọfet esie ẹtiene mmọ. Mme Christian oro ẹdide mme ekpemerọn̄ ẹnyene udọn̄ ndin̄wam mbon oro ẹkabarede esịt oro ẹkemede nditie nte erọn̄ oro okosopde. (Men Luke 15:4-7 domo.)—4/15, page 21-23.

◻ Didie ke uwụtn̄kpọ Jesus oro aban̄ade idiọk udọ owụt se ikpedide ekikere ye edinam nnyịn ke ini ẹfiakde ẹda owo ke esop Christian? (Luke 15:22-32)

Utịtmbuba nnyịn ekpedi ndikpebe ete, emi ekenemde esịt ke edinyọn̄ oro idiọk eyen esie ọkọnyọn̄de edi. Ntem, nnyịn ikpenyene nditịn̄ ikọ ifụre ifụre ye eyenete oro ẹfiakde ẹda inyụn̄ isịn udọn̄ inọ enye ndinam n̄kọri ke akpanikọ.—4/15, page 25.

◻ Nso nti ukpeme ke ẹkeme ndida man ẹfep edidi owo unọmọ ubiatibet?

Ini ekededi ekemede, fep ndidu ke okoneyo ke ikpehe oro n̄kpọndịk odude. Dịp n̄kpọmbana fo, nnyụn̄ sịn mme utọ n̄kpọ nte ukwak usio ndise ke ekpat. Du ke ukpeme ban̄a edisan̄a ke ata mbenusụn̄, akpan akpan edieke akamade ekpatisan̄ m̀mê ekpatubọk. (Se Mme N̄ke 3:21-23.)—5/1, page 5-6.

◻ Ntak emi prọfesi oro ke Zephaniah 2:3 ọdọhọde ete: “M̀mê mbufo ẹyedịbe ke usen iyatesịt Jehovah”?

Edinyan̄a nsịn ke uwem ọkọn̄ọ ke edinam akpanikọ ye edime ime. (Matthew 24:13) Ntem, mbon oro ẹdude uwem ekekem ye ndisana edumbet Abasi ẹnyụn̄ ẹkade iso ndisem edisana usem kpọt ke edidịp ke usen iyatesịt Jehovah. (Zephaniah 2:1, 2)—5/1, page 14.

◻ Ndinịm Abasi akpa ke uwem ubon abuana nso?

Mme ete ye eka ye nditọ ẹnyene ndituak ibuot nnọ Jehovah nnyụn̄ nda ekekem ye mme n̄kpọ oro enye oyomde nte ẹwụtde ke Bible.—5/15, page 5.

◻ Ntak emi Jehovah mîsimiaha mme anamidiọk ufen ke ndondo oro-o?

Ntak kiet edi nte ke ana ẹnam ẹdiọn̄ọ enyịn̄ Abasi ke ofụri isọn̄. (Men Rome 9:17 domo.) Ntak efen edi man ẹnam ini odu ndibiere mme eneni ẹban̄ade itie edikara Abasi ye nsọn̄ọnda owo, emi okosụn̄ọde oto nsọn̄ibuot ke Eden. N̄ko, anyan-ime Abasi ọnọ mme anamidiọk ifet nditua n̄kpọfiọk nnyụn̄ n̄kpụhọde usụn̄ uwem mmọ. (2 Peter 3:9)—5/15, page 11-12.

◻ Nso akpanikọ itie ntiense nte ke Bible oto akakan owo?

N̄kpọ nte nsio nsio owo 40 ẹkewet Bible, emi ẹketode kpukpru idaha ke uwem ẹnyụn̄ ẹdude uwem ke se ibede ufan̄ isua 1,600; kpa ye oro kpukpru mme andiwet ẹtiene akpan ibuotikọ kiet. N̄kemuyo odude ke esịt Bible ikpodụhe edieke ekpedide ke mbuari m̀mê ẹkpọn̄de ẹnọ usụhọde owo ndida usụn̄.—6/1, page 5.

◻ Nso esen esen edinam ye utịbe utom oro ẹkebemde iso etịn̄ ke Isaiah 28:21, ke Jehovah edinam ke eyo nnyịn?

Ntọt oro odude ke Ediyarade 17:16 owụt nte ke usen kiet mme ufan ukaraidem Akwa Babylon ẹyewọn̄ọde ẹn̄wana ye enye. Nte utịp, ẹyesobo Christendom ọkọrọ ye kpukpru nsunsu ido ukpono eken ofụri ofụri. Emi edidi esen esen edinam Jehovah ye utịbe utom esie ke eyo nnyịn.—6/1, page 23.

◻ Nso ikpedi ekikere Christian iban kaban̄a edida n̄kpọ mban̄a ye n̄kpọ mmaidem?

Bible ikpanke edida mme n̄kpọ uyai ntre. (Exodus 32:2, 3; Esther 2:7, 12, 15) Edi edinyene iso o-bụt ekpenyene ndibe iso. N̄wan ekeme ndikpebe n̄kon̄ine eke ererimbot mmemmem mmemmem, adade tido n̄kpọkinua, tido mfụk, m̀mê tido n̄kpọkenyịn ebe ubọk, idem nte Jezebel akanamde. (2 Ndidem 9:30) Ẹkpenyene ndiwụt ukpeme mbak edida n̄kpọ ndiọn̄idem ebe ubọk enyụn̄ eda n̄kpọ mbana ke n̄wụtidem.—6/1, pages 30-31.

◻ Didie ke nditọ Israel ẹkekeme ndibọhọ kpukpru “idiọk udọn̄ọ Egypt” oro okodude ke ini eset? (Deuteronomy 7:15)

Nte an̄wan̄ade mmọ ẹkebọhọ utọ udọn̄ọ oro akamba akamba ke ntak edinịm n̄kokon̄ idaha usanaidem oro Ibet ediomi okodoride mmọ.—6/15, page 4.

◻ Ntak emi Abasi okowụkde ete owo okûdia iyịp? (Genesis 9:3, 4; Leviticus 17:10, 11; Utom 15:22-29)

Uwem edi enọ otode Abasi ndien uwem owo ọkọn̄ọ ke mmọn̄ibọk oro anamde uwem akaiso emi ẹkotde iyịp. (Psalm 36:9) Ebede ke edikpono iyịp nte akpan n̄kpọ, mme owo ẹwụt ibetedem oro mmọ eberide ke Abasi kaban̄a uwem. Ke ntre, akpan ntak ke ewụhọ Abasi aban̄ade iyịp ikedịghe ke ntak oro edidia iyịp ekemede ndisụn̄o ke unana nsọn̄idem, edi nte ke iyịp enyene akpan n̄kpọ oro ọwọrọde ọnọ Abasi.—6/15, pages 8-9.

◻ Didie ke mme ete ye eka ye mme uyen ẹdide Christian ẹkeme ndisọn̄ọ idotenyịn oro nte ke ẹkeme ndikpono edifan̄a oro ekpri eyen afan̄ade edikịm iyịp nsịn ke idem?

Okposụkedi enye mîdịghe kan̄a akwa owo nte ekemde ye ibet, uyen Christian ekpenyene ndinam an̄wan̄a nnyụn̄ nsọn̄ọ ntịn̄ ọkpọsọn̄ ntak ido ukpono esie ke nditre ndida iyịp. Mme ete ye eka ẹkpenyene ndinịm ini ukpep ye nditọ mmọ man otodo nditọ mmọ ẹkeme ndinyene ifiọk nte ẹdikemede ndinam se mmọ ẹnịmde ke akpanikọ ẹn̄wan̄a.—6/15, page 18.

◻ Didie ke ẹkediọn̄ iban akamba akamba ke ini utom ukwọrọikọ Jesus ke isọn̄?

Jesus ama ọtọn̄ọ utom oro akadade ndọn̄esịt, idotenyịn, ye obufa uku ọsọk iban ẹtode kpukpru orụk. Enye ama ekpep iban ntotụn̄ọ akpanikọ eke spirit. (John 4:7, 24-26) Ke ini utom ukwọrọikọ esie enye ama onyịme edinam oro iban ẹkenamde n̄kpọ ẹnọ enye nte enye akasan̄ade ke kpukpru idụt. (Mark 15:40, 41)—7/1, page 14-15.

◻ Nso ido ukpepn̄kpọ Jesus ke mme ete ye eka ẹkụt nte enyenede ufọn ọnọ nditọ mmọ?

Mme ete ye eka ẹyenam ọfọn ndida mme uwụtn̄kpọ nnam mme akpanikọ Christian ẹtie inem inem ke esịt nditọ mmọ, ndien mmọ ẹkeme ndida mme mbụme oro ẹnamde ẹfiọk ekikere owo ndifiọk se inen̄erede idi ekikere ikpọ nditọ mmọ. (Men Matthew 17:24-27 domo.)—7/1, page 26.

◻ Ntak emi nnyịn ikpebịnede ima-mfọnido-o?

Edu ima-mfọnido anam Abasi ye mmọ en̄wen ẹma nnyịn. Enye emenede ntatubọk ke enyọn̄ onyụn̄ anam nnyịn itịm inyene edikere mban̄a. Enye ọsọn̄ọ mbọbọ ke ubon ye ke esop Christian. Ke akande kpukpru, ima-mfọnido ada ubọn̄ ọsọk Jehovah.—7/15, page 22.

◻ Ntak emi edide mmemmem n̄kpọ nditụn Christian usụn̄ ke n̄kpọ aban̄ade nsan̄a-a? (1 Corinth 15:33)

Owo ekeme nditie ufan ufan onyụn̄ ọfọn ido, edi edieke enye mîbuanake ekikere Christian kaban̄a utom Jehovah m̀mê idem ndinịm Bible ke akpanikọ, enye edi idiọk nsan̄a. Ntak-a? Koro uwem esie ọkọn̄ọ ke isio isio edumbet, ndien mme n̄kpọ oro ẹdide ata akpan n̄kpọ ọnọ Christian ẹkeme ndidi n̄kpọ oro ẹnyenede esisịt ufọn ẹnọ enye.—7/15, page 23.

◻ Ntak emi Usen Ikpe edide ini idotenyịn?

Usen Ikpe edi ikpehe ini esịnede tọsịn isua kiet. Edi Abasi editie ibuot ye Eyen esie, Christ Jesus, emi Abasi emekde man anam utom nte Ebiereikpe. Emi edidi ini ndifiak nnọ ubonowo mfọnmma uwem eke owo oro Adam ọkọbọde nditọ esie ọduọk. (1 Corinth 15:21, 22)—8/1, page 5-7.