‘Ẹyesobo N̄kpa Ẹfep’
“Akpatre usua emi Enye edisobode edi n̄kpa.”—1 CORINTH 15:26.
1, 2. (a) Nso idotenyịn ke apostle Paul ọkọnọ mbonima oro ẹkpan̄ade? (b) Nso mbụme aban̄ade ediset ke n̄kpa ke Paul eneme?
“MMENỊM . . . ediset ikpọkidem, ye nsinsi uwem ke akpanikọ.” Ntre ke Ikọ Mbuọtidem Mme Apostle ọdọhọ. Mbon Catholic ye mbon Protestant ẹsitịn̄ ẹfiak ẹtịn̄ enye ke ofụri esịt, ye unana edifiọk nte ke mme edinịm ke akpanikọ mmọ ẹnen̄ede ẹbiet ukpepn̄kpọ akwaifiọk mbon Greece akan se ededi oro mme apostle akanam ẹnịmde. Apostle Paul, nte ededi, ama esịn ukpepn̄kpọ akwaifiọk mbon Greece ikonyụn̄ inịmke ukpọn̄ oro mîkemeke ndikpa ke akpanikọ. Edi, enye ama enịm uwem ini iso ke akpanikọ onyụn̄ ewet ke idak edisana spirit ete: “Akpatre usua emi Enye edisobode edi n̄kpa.” (1 Corinth 15:26) Edi nso ke oro ọwọrọ ọnọ n̄kpakpa ubonowo?
2 Ke ibọrọ, ẹyak nnyịn ifiak ibịne nneme Paul aban̄ade ediset ke n̄kpa oro ẹkewetde ke 1 Corinth ibuot 15. Afo eyeti ete ke mme ntọn̄ọ ntọn̄ọ ufan̄ikọ oro, Paul ama ọsọn̄ọ ediset ke n̄kpa nte akpan ubak ukpepn̄kpọ Christian. Idahaemi enye eneme aban̄a akpan mbụme oro: “Edi owo oyobụp ete, Ẹdinam mme akpan̄kpa ẹset didie? Nso orụk ikpọkidem ke mmọ ẹdinyụn̄ ẹda ẹdi?”—1 Corinth 15:35.
Nso Orụk Ikpọkidem?
3. Ntak emi ndusụk owo ẹkesịnde ediset ke n̄kpa?
3 Ke ndidemede mbụme emi, ana edi Paul okoyom ndibiat odudu ukpepn̄kpọ akwaifiọk Plato. Plato ekekpep ete ke owo enyene ukpọn̄ eke mîkemeke ndikpa emi ọbọhọde n̄kpa ikpọkidem. Ye mbon oro ẹkebọkde ke utọ ekikere oro, nte eyịghe mîdụhe eketie nte ukpepn̄kpọ Christian inyeneke ufọn. Edieke ukpọn̄ ọbọhọde n̄kpa, nso idi ufọn ediset ke n̄kpa? N̄ko-n̄ko, ediset ke n̄kpa editie nte n̄kpọ eke mîwụtke ifiọk. Ke ndondo oro ikpọkidem ama akataha ke ntan, didie ke ediset ke n̄kpa ekeme ndidu? Etịn̄ n̄kpọ mban̄a Bible oro Heinrich Meyer ọdọhọ ete ke usua ndusụk mbon Corinth ọkọkọn̄ọ “ke isọn̄ akwaifiọk oro nte ke owo ikemeke ndinam mme n̄kpatan̄a n̄kpọ ikpọkidem ẹfiak ẹdidu.”
4, 5. (a) Ntak emi mfan̄a mme anana mbuọtidem mîkowụtke eti ibuot? (b) Nam uwụtn̄kpọ Paul aban̄ade “n̄kpasịp” an̄wan̄a. (c) Nso orụk ikpọkidem ke Abasi ọnọ mbon oro ẹyetde aran oro ẹnamde ẹset?
4 Paul ayarade nte ekikere mmọ edide ndisịme: “Afo owo anana ibuot, inamke se afo ọtọde odu uwem ibọhọke enye ebem iso akpa. Se afo ọtọde, inyụn̄ idịghe idem eke ediwọrọde on̄wụm ke afo ọtọ, edi n̄kpasịp ikpọn̄, ndusụk n̄kpasịp ibokpot, mîdịghe, orụk n̄kpasịp en̄wen; edi Abasi ọnọ n̄kpasịp oro idem nte enemde Enye esịt, onyụn̄ ọnọ kpukpru n̄kpasịp kiet kiet idem eke ekemde ye mmọ.” (1 Corinth 15:36-38) Abasi idinamke ikpọkidem emi mme owo ẹkenyenede ke adan̄aemi ẹkedude ke isọn̄ eset. Utu ke oro, ẹyekpụhọde.
5 Paul emen ediset ke n̄kpa odomo ye n̄kpasịp nditịbe. Ata ekpri n̄kpasịp wheat isibietke eto emi editịbede ito enye. The World Book Encyclopedia ọdọhọ ete: “Ke ini n̄kpasịp ọtọn̄ọde ndisiaha, enye esin̄wọn̄ ata ediwak mmọn̄. Mmọn̄ oro esinam ediwak ukpụhọde ada itie ke mmọn̄ibọk ke esịt n̄kpasịp oro. Enye n̄ko esinam esịt n̄kpasịp oro ọtọt onyụn̄ asiaha ọwọrọ ke efọk n̄kpasịp oro.” Ke nditịm ntịn̄, n̄kpasịp oro esikpa nte n̄kpasịp onyụn̄ ọwọrọ ada nte eto. “Abasi ọnọ n̄kpasịp oro idem” ke enye ndinịm mme ibet eke ifiọk ntaifiọk oro ẹkarade n̄kọri esie, ndien n̄kpasịp kiet kiet ọbọ idem emi asan̄ade ekekem ye orụk esie. (Genesis 1:11) Ukem ntre, mme Christian oro ẹyetde aran ẹbem iso ẹkpan̄a nte mme owo. Ekem, ke edikem ini Abasi, enye anam mmọ ẹfiak ẹdidu uwem ye ata obufa ikpọkidem. Nte Paul ọkọdọhọde mbon Philippi, “Jesus Christ . . . ọyọtọn̄ọ ntak obot ikpọkidem nnyịn emi odude ke ata usụhọde itie, esịn ke mbiet idem Esiemọ emi enyenede ubọn̄.” (Philippi 3:20, 21; 2 Corinth 5:1, 2) Ẹnam mmọ ẹset ye idem eke spirit ẹnyụn̄ ẹdu uwem ke obio mme spirit.—1 John 3:2.
6. Ntak owụtde ifiọk ndinịm ke akpanikọ nte ke Abasi ekeme ndinọ mbon oro ẹnamde ẹset idem eke spirit oro odotde?
6 Ndi emi ọsọn̄ akaha ndinịm ke akpanikọ? Baba. Paul etịn̄ ete ke mme unam ẹnyene ediwak nsio nsio uduot ikpọkidem. Ke adianade do, enye owụt ukpụhọde emi odude ke ufọt mme angel ke heaven ye ubonowo ẹmi ẹdide obụk ye iyịp, ọdọhọde ete: “Ikpọkidem ẹdu ẹmi ẹdide eke heaven, ikpọkidem ẹnyụn̄ ẹdu ẹmi ẹdide eke isọn̄.” Akwa ukpụhọde onyụn̄ odu n̄ko ke ufọt mme anana-uwem edibotn̄kpọ. “Ntantaọfiọn̄ kiet okpụhọrede ye ntantaọfiọn̄ efen ke ubọn̄,” ntre ke Paul ọkọdọhọ, anyan ini mbemiso ifiọk ntaifiọk ayarade se idude ke enyọn̄ nte awawa ntantaọfiọn̄, ndatndat ikpọ ntantaọfiọn̄, ye n̄kpri mfia ntantaọfiọn̄. Ke ẹkerede ẹban̄a emi, nte iwụtke ifiọk nte ke Abasi ekeme ndinam idem eke spirit nnọ mbon oro ẹyetde aran oro ẹsetde?—1 Corinth 15:39-41.
7. Se mîkemeke ndibiara ọwọrọ nso? se mîdikpaha ọwọrọ nso?
7 Paul ndien ọdọhọ ete: “Ntem ke onyụn̄ edi ye ediset mme akpan̄kpa. Ẹtọ ikpọkidem ke mbiara; ẹnam enye eset nte n̄kpọ eke mîkemeke ndibiara.” (1 Corinth 15:42) Ikpọkidem owo, idem ke adan̄aemi edide mfọnmma, ekeme ndibiara. Ẹkeme ndiwot enye. Ke uwụtn̄kpọ, Paul ọkọdọhọ ete ke ẹma ẹnam Jesus eset ke n̄kpa man “okûnyụn̄ afiak aba okụt mbiara.” (Utom 13:34) Tutu amama enye idifiakke ididu uwem ke ikpọkidem owo oro ekemede ndibiara, okposụkedi edide mfọnmma. Ikpọkidem emi Abasi ọnọde mbon oro ẹyetde aran ẹmi ẹnamde ẹset edi se mîdibiarake—se mîkemeke ndikpa m̀mê ndibiara. Paul aka iso ete: “Ẹtọ enye ke esuene; ẹnam enye eset ke ubọn̄: ẹtọ enye ke mmemidem; ẹnam enye eset ke odudu: ẹtọ enye nte idem eke otode ke uduot obụkidem; ẹnam enye eset nte idem eke otode ke uduot spirit.” (1 Corinth 15:43, 44) Ke adianade do, Paul ọdọhọ ete: “Ikpọkidem n̄kpa emi onyụn̄ enyene ndisịne se mîdikpaha.” Se mîdikpaha ọwọrọ anana-utịt uwem emi owo mîdikemeke ndisobo. (1 Corinth 15:53; Mme Hebrew 7:16) Ke usụn̄ emi, mbon oro ẹnamde ẹset ẹnyene “mbiet owo eke otode heaven,” kpa Jesus, emi akanamde mmọ ẹkeme ndiset ke n̄kpa.—1 Corinth 15:45-49.
8. (a) Nnyịn isan̄a didie ifiọk ke mbon oro ẹdinamde ẹset ẹdi kpa mbon oro mmọ ẹkedide ke ini ẹkedude ke isọn̄? (b) Mme prọfesi ewe ẹdisu ke ini ediset ke n̄kpa adade itie?
8 Kpa ye edikpụhọde uduot emi, mbon oro ẹnamde ẹset ẹsụk ẹdi kpa mbon ẹmi mmọ ẹkedide mbemiso ẹkpan̄ade. Ẹdinam mmọ ẹset ye ukem ibuot uti n̄kpọ ye ukem n̄kokon̄ edu Christian. (Malachi 3:3; Ediyarade 21:10, 18) Ke usụn̄ emi mmọ ẹbiet Jesus Christ. Enye ama okpụhọde oto spirit odụk mbiet owo. Ekem enye ama akpa onyụn̄ eset nte spirit. Edi, “Jesus Christ etie ukem ukem, n̄kpọn̄, ye mfịn, ye ke nsinsi.” (Mme Hebrew 13:8) Nso ubọn̄ ubọn̄ ifet ke mbon oro ẹyetde aran ẹnyene ntem! Paul ọdọhọ ete: “Ndien ke adan̄aemi mbiara ikpọkidem emi edisịnede se mîdibiarake, ikpọkidem n̄kpa emi edinyụn̄ esịnede se mîdikpaha, adan̄aoro ndien ke ikọ ediwọrọ osu, nte ẹwetde ẹte, Ẹda edikan ẹmen n̄kpa. O n̄kpa, edikan fo enye? O n̄kpa, ifọt fo enye?”—1 Corinth 15:54, 55; Isaiah 25:8; Hosea 13:14.
Ediset ke N̄kpa eke Isọn̄?
9, 10. (a) Ke udọn̄ikọ eke 1 Corinth 15:24, nso idi “utịt ini,” ndien nso mme n̄kpọntịbe ẹda itie ke ebuana ye enye? (b) Nso inyene ndida itie man ẹsobo n̄kpa?
9 Nte ini iso ndomokiet odu ọnọ ediwak miliọn owo ẹmi mînyeneke idotenyịn uwem eke spirit oro mîkemeke ndikpa ke heaven? Ke akpanikọ odu! Ke ama akanam an̄wan̄a nte ke ediset ke n̄kpa n̄ka heaven ada itie ke ini edidu Christ, Paul owụt mme edinam ẹmi ẹtienede, ọdọhọde ete: “Edikem ke edisịm utịt ini, emi Enye ediyakde itie-ubọn̄ Esie ọnọ Abasi, kpa Ete Esie; ke Enye ama okosobo kpukpru edikara ye kpukpru nsọn̄uyo ye odudu.”—1 Corinth 15:23, 24.
10 “Utịt ini” edi utịt Tọsịn Isua Ukara Christ, emi Jesus ke nsụhọdeidem ye ke edinam akpanikọ ediyakde Obio Ubọn̄ ọnọ Abasi ye Ete esie. (Ediyarade 20:4) Ẹyesu uduak Abasi ‘nditan̄ kpukpru n̄kpọ ndọn̄ ke Christ.’ (Ephesus 1:9, 10) Nte ededi, akpa kan̄a, Christ oyosobo “kpukpru edikara ye kpukpru nsọn̄uyo ye odudu” oro ẹbiọn̄ọde Akakan uduak Abasi. Emi abuana se ikande nsobo ẹdidade ẹdi ke Armageddon. (Ediyarade 16:16; 19:11-21) Paul ọdọhọ ete: “[Christ] enyene ndida ubọn̄ tutu Enye onụk kpukpru mme asua Esie ke idak ikpat. Akpatre usua emi Enye edisobode edi n̄kpa.” (1 Corinth 15:25, 26) Ih, ẹyesio kpukpru mbọn idiọkn̄kpọ ye n̄kpa Adam ẹfep. Ndien, nte se ẹyomde, Abasi ayanam mme “udi” ẹdi ukpọk ke ndinam mme akpan̄kpa ẹfiak ẹdidu uwem.—John 5:28.
11. (a) Nnyịn isan̄a didie ifiọk ite ke Abasi ekeme ndifiak mbot mme ukpọn̄ oro ẹma ẹkekpa? (b) Ẹdinọ mbon oro ẹnamde ẹset ke isọn̄ nso orụk ikpọkidem?
11 Emi ọwọrọ ndifiak mbot mme ukpọn̄ owo. Ndi se owo mîkemeke ndinam? Baba, koro Psalm 104:29, 30 ọsọn̄ọ ọnọ nnyịn ete ke Abasi ekeme ndinam oro: “Afo . . . atan̄ ibifịk mmọ, mmọ ẹnịme, ẹnyụn̄ ẹfiak ke ntan mmọ. Afo ọdọn̄ spirit fo ọwọrọ, mmọ ẹboro.” Ke adan̄aemi mbon oro ẹnamde ẹset ẹdisụk ẹdide mme ukem owo oro mmọ ẹkedide mbemiso n̄kpa mmọ, idiyomke mmọ ẹnyene ukem ikpọkidem. Ukem nte mbon oro ẹnamde ẹset ẹka heaven, Abasi ọyọnọ mmọ idem nte enemde enye. Nte eyịghe mîdụhe obufa idem mmọ ọyọfọn oyonyụn̄ ebiet ata akpa idem mmọ ke ndusụk udomo man mbon ima mmọ ẹkpefiọk mmọ.
12. Ini ewe ke ediset ke n̄kpa eke isọn̄ ada itie?
12 Ini ewe ke ediset ke n̄kpa eke isọn̄ edida itie? Martha ama ọdọhọ aban̄a Lazarus, eyeneka esie oro akakpade, ete: “Mmọfiọk nte enye eyeset ke ediset ke n̄kpa ke akpatre usen.” (John 11:24) Didie ke enye ọkọdiọn̄ọ oro? Ediset ke n̄kpa ekedi ibuot nneme oro akamade eneni ke eyo esie, sia mme Pharisee ẹkenịmde enye ke akpanikọ edi mme Sadducee mîkenịmke. (Utom 23:8) Kpa ye oro, ana edi Martha ama ọdiọn̄ọ mme ntiense oro ẹkedude mbemiso eyo mme Christian ẹmi ẹkedoride enyịn ke ediset ke n̄kpa. (Mme Hebrew 11:35) N̄ko, ana edi enye ama ọfiọk oto Daniel 12:13 nte ke ediset ke n̄kpa edidu ke akpatre usen. Idem ekeme ndidi enye ama ekpep emi oto Jesus ke idemesie. (John 6:39) “Akpatre usen” oro asan̄a ekekem ye Tọsịn Isua Ukara Christ. (Ediyarade 20:6) Kere ban̄a nduaidem emi edidude ke “usen” oro ke ini akwa edinam emi editọn̄ọde!—Men Luke 24:41 domo.
Mmanie Ẹdifiak Ẹdi?
13. Nso n̄kukụt aban̄ade ediset ke n̄kpa ke ẹwet ke Ediyarade 20:12-14?
13 Ẹwet n̄kukụt John aban̄ade ediset ke n̄kpa eke isọn̄ ke Ediyarade 20:12-14: “N̄kụt mme akpan̄kpa, ikpọ ye n̄kpri, nte ẹdade ke iso ebekpo. Ndien ẹkụbọde mme n̄wed; ẹnyụn̄ ẹkụbọde n̄wed en̄wen, emi edide n̄wed uwem; ẹnyụn̄ ẹda se ẹwetde ẹsịn ke n̄wed oro ẹkpe ikpe mme akpan̄kpa, nte ekemde ye se mmọ ẹkenamde. Ndien inyan̄ ibom asana mme akpan̄kpa ẹmi ẹdude ke esịt ayak; n̄kpa ye obio ekpo ẹnyụn̄ ẹsana mme akpan̄kpa mmọ ẹyak: ndien ẹkpe ikpe kpukpru owo nte ekemde ye se mmọ ẹkenamde. Ẹnyụn̄ ẹmen n̄kpa ye obio ekpo ẹduọk ke akwa n̄kpọdiọhọ ikan̄. Emi edi udiana n̄kpa, kpa akwa n̄kpọdiọhọ ikan̄.”
14. Mmanie ẹdidu ke otu mbon oro ẹnamde ẹset?
14 Ediset ke n̄kpa ayabuana “ikpọ ye n̄kpri,” mme ọwọrọiso ye mme usụhọde owo ẹmi ẹkedude uwem ẹnyụn̄ ẹkpan̄ade. Kamse, idem nsek nditọ ẹyesịne ke otu oro! (Jeremiah 31:15, 16) Ke Utom 24:15, ẹyarade akpan ntọt efen: “Nti owo ye mme idiọk owo ẹyeset ke n̄kpa.” Mme ọwọrọiso ke otu “nti owo” ẹdidi mme anam-akpanikọ irenowo ye iban eke eset, utọ nte Abel, Enoch, Noah, Abraham, Sarah, ye Rahab. (Mme Hebrew 11:1-40) Kere ban̄a nte edikemede ndineme nneme ye utọ mbon oro nnyụn̄ mbọ ọyọhọ ntọt nto mme ntiense oro ẹkekụtde mme n̄kpọntịbe Bible ke anyanini ko ke enyịn! “Nti owo” ẹyenyụn̄ ẹsịne ediwak tọsịn mme abak-Abasi ẹmi ẹkpan̄ade ndondo emi ẹmi mîkenyeneke idotenyịn eke heaven. Nte afo emenyene andibuana ke ubon m̀mê owo ima emi ekemede ndidu ke otu mmọ ẹmi? Ọnọ ndọn̄esịt didie ntem ndifiọk nte ke afo emekeme ndifiak n̄kụt mmọ! Nte ededi, mmanie ẹdi “mme idiọk owo” ẹmi ẹditienede ẹfiak ẹdi? Mmọ ẹsịne ediwak miliọn, ndusụk ediwak biliọn, ẹmi ẹkekpan̄ade ye unana edinyene ifet ndikpep nnyụn̄ nda akpanikọ Bible nsịn ke edinam.
15. Nso ke ọwọrọ ndidọhọ ke ‘ẹdida se ẹwetde ẹsịn ke n̄wed ẹkpe ikpe mmọ ẹmi ẹwọn̄ọde ẹdi nte ekemde ye se mmọ ẹkenamde’?
15 Didie ke ẹdida “se ẹwetde ẹsịn ke n̄wed ẹkpe ikpe [mmọ ẹmi ẹfiakde ẹdi] nte ekemde ye se mmọ ẹkenamde”? Mme n̄wed ẹmi idịghe n̄wetnnịm n̄kpọ ẹban̄ade mme n̄kpọ ẹmi mmọ ẹkenamde ke edem; ke ini mmọ ẹkekpan̄ade, ikpe idiọkn̄kpọ ẹmi mmọ ẹkenamde ke ini uwem mmọ etebe mmọ. (Rome 6:7, 23) Nte ededi, mbon oro ẹnamde ẹset ẹdisụk ẹdu ke idak idiọkn̄kpọ Adam. Ana edi, adan̄aoro, mme n̄wed ẹmi ẹdiwụt mme item Abasi ẹmi anade kpukpru owo ẹtiene man ẹbọ ufọn ọyọhọ ọyọhọ ẹto uwa Jesus Christ. Nte ẹdisiode akpatre mbọn idiọkn̄kpọ Adam ẹfep, ‘ẹyesobo n̄kpa’ ke ọyọhọ ọyọhọ usụn̄ifiọk. Ke utịt tọsịn isua oro, Abasi eyedi “kpukpru n̄kpọ ọnọ kpukpru owo.” (1 Corinth 15:28) Owo idiyomke aba edisịbe ndụk eke Akwa Oku m̀mê Andifak. Ẹyeda kpukpru ubonowo ẹkesịm mfọnmma idaha oro Adam akadarade ke ntọn̄ọ.
Ediset ke N̄kpa Oro Asan̄ade ke Nde ke Nde
16. (a) Ntak owụtde ifiọk ndinịm ke akpanikọ nte ke ediset ke n̄kpa edidi edinam oro asan̄ade ke nde ke nde? (b) Ana edi mmanie ẹdidu ke otu mbon oro ẹdibemde iso iset?
16 Sia ediset ke n̄kpa eke heaven asan̄ade ke nde ke nde, “kpukpru owo ke idaha esie,” ana in̄wan̄în̄wan̄ nte ke ediset ke n̄kpa eke isọn̄ idinamke ibatowo awak akaha ke isọn̄. (1 Corinth 15:23) Nte an̄wan̄ade, oyoyom ẹse ẹban̄a mbufa mbon oro ẹnamde ẹset. (Men Luke 8:55 domo.) Mmọ ẹyeyom mme n̄kpọ obụkidem ye—ke edide akpan n̄kpọ akan—un̄wam eke spirit ndinyene ọnọ-uwem ifiọk aban̄ade Jehovah Abasi ye Jesus Christ. (John 17:3) Edieke kpukpru owo ẹkpesetde ke ukem ini, ikpedịghe mmemmem ndise mban̄a mmọ nte odotde. Owụt eti ibuot ndikere nte ke ediset ke n̄kpa edida itie ke adiana ke adiana. Ana edi mme anam-akpanikọ Christian oro ẹkekpan̄ade mbemiso utịt editịm n̄kpọ Satan ẹyedu ke otu akpa mbon oro ẹdinamde ẹset. Nnyịn n̄ko imekeme ndidori enyịn mme anam-akpanikọ irenowo eke eset oro ẹdinamde n̄kpọ nte “mbọn̄” ndibak nset.—Psalm 45:16.
17. Nso idi ndusụk n̄kpọ ẹban̄ade ediset ke n̄kpa ẹmi Bible mîtịn̄ke, ndien ntak emi mme Christian mîkpetịmekede esịt nte mîdotke iban̄a mme utọ n̄kpọ oro?
17 Nte ededi, nnyịn ikpenyeneke ndiyịre mme utọ n̄kpọ oro. Ediwak n̄kpọ ẹdu oro Bible mîtịn̄ke. Enye inọhọ ọyọhọ ntọt iban̄a usụn̄, ini, ye ebiet emi ediset mme owo edidade itie. Enye itịn̄ke inọ nnyịn nte ẹdinọde mbon oro ẹdinamde ẹset udia, ufọkidụn̄, ye edisịnen̄kpọ. Nnyịn inyụn̄ ikemeke ndisọn̄ọ ntịn̄ nte Jehovah edinamde mme utọ n̄kpọ nte edibọk ye edise mban̄a nditọ oro ẹdinamde ẹset m̀mê nte enye edisede aban̄a ndusụk idaha emi edibuanade mme ufan ye mbonima nnyịn. Ke akpanikọ, edi ndammana n̄kpọ ndikere mban̄a mme utọ n̄kpọ oro; edi idiwụtke ifiọk ndibiat ini ndidomo ndibọrọ mme utọ mbụme ẹmi owo mîkemeke ndibọrọ idahaemi. Ntịn̄enyịn nnyịn enyene ndiwụhọ ke ndinam n̄kpọ Jehovah ke edinam akpanikọ nnyụn̄ nnyene nsinsi uwem. Mme Christian oro ẹyetde aran ẹkọn̄ mbuọtidem mmọ ke ubọn̄ ubọn̄ ediset ke n̄kpa n̄ka heaven. (2 Peter 1:10, 11) “Mme erọn̄ en̄wen” ẹdori enyịn ke edida ikpehe Obio Ubọn̄ Abasi eke isọn̄ nnyene ke nsinsi. (John 10:16; Matthew 25:33, 34) Amaedi ediwak ọyọhọ ntọt ẹban̄ade ediset ke n̄kpa oro owo mîdiọn̄ọke, nnyịn n̄kukụre ibuọt idem ke Jehovah. Inemesịt ini iso nnyịn esịne ke ubọk Enye emi ekemede ‘ndinọ kpukpru mme andidu uwem se mmọ ẹmade ẹyụhọ.’—Psalm 145:16; Jeremiah 17:7.
18. (a) Nso edikan ke Paul osio owụt? (b) Ntak emi nnyịn ibuọtde idem ke idotenyịn ediset ke n̄kpa uko uko?
18 Paul eberi nneme esie ke ndidọhọ: “Yak ekọm enyene Abasi, emi ọnọde nnyịn edikan, oto ke Ọbọn̄ nnyịn Jesus Christ.” (1 Corinth 15:57) Ih, ẹda uwa ufak Jesus Christ ẹkan n̄kpa Adam, ndien mbon oro ẹyetde aran ye “mme erọn̄ en̄wen” ẹbuana ke edikan oro. Edi akpanikọ, “mme erọn̄ en̄wen” oro ẹdude uwem idahaemi ẹnyene idotenyịn emi edide n̄wọrọnda ọnọ emana emi. Nte ubak “akwa otuowo” oro akade-ka iso ndikọri, mmọ ẹkeme ndibọhọ “akwa ukụt” oro asan̄ade ekpere ndien ikwe n̄kpa ikpọkidem tutu amama! (Ediyarade 7:9, 14) Nte ededi, idem mbon oro ẹkpan̄ade ke ntak “ini ye unọmọ” m̀mê ke ubọk isụn̄utom Satan ẹkeme ndibuọt idem ke idotenyịn ediset ke n̄kpa.—Ecclesiastes 9:11.
19. Nso item ke ana kpukpru mme Christian mfịn ẹnịm?
19 Ke ntre, nnyịn ye ọkpọsọn̄ udọn̄ ibet ubọn̄ ubọn̄ usen oro ẹdisobode n̄kpa ẹfep. Mbuọtidem nnyịn oro n̄kpọ mînyen̄eke ke un̄wọn̄ọ Jehovah eke ediset ke n̄kpa ọnọ nnyịn nnennen ekikere kaban̄a mme n̄kpọ. Se ededi oro etịbede ọnọ nnyịn ke uwem emi—idem ekpedi ikpakpa—idụhe n̄kpọ oro ekemede ndibọ nnyịn utịp oro Jehovah ọn̄wọn̄ọde. Ntem, akpatre item oro Paul ọkọnọde mbon Corinth odot mfịn nte okodotde tọsịn isua iba ko-o ke edem: “Mmọdo ndima nditọete mi, ẹsọn̄ọ ẹda, ẹkûyak n̄kpọ esehede mbufo; ẹyọhọ kpukpru ini ke utom Ọbọn̄; sia ẹmefiọk ẹte utom eke mme imọ inamde idiwọrọke idi ikpîkpu ke Ọbọn̄.”—1 Corinth 15:58.
Nte Afo Emekeme Ndinam An̄wan̄a?
◻ Didie ke Paul ọkọbọrọ mbụme aban̄ade ikpọkidem emi mbon oro ẹyetde aran ẹdinyenede ke ini ẹsetde?
◻ Didie ndien ini ewe ke ẹdisobo n̄kpa ofụri ofụri ẹfep?
◻ Mmanie ẹdibuana ke ediset ke n̄kpa eke isọn̄?
◻ Nso ikpedi edu nnyịn kaban̄a mme n̄kpọ ẹmi Bible mîtịn̄ke?
[Mme ndise ke page 20]
N̄kpasịp “akpa” ke ndinam n̄wọrọnda ukpụhọde
[Mme ndise ke page 23]
Mme anam-akpanikọ iren ye iban eke eset utọ nte Noah, Abraham, Sarah, ye Rahab, ẹyedu ke otu mbon oro ẹdinamde ẹset
[Ndise ke page 24]
Ediset ke n̄kpa edidi ini akwa idatesịt!